OTT: హిందు అబ్బాయి - ముస్లిం అమ్మాయి.. ఓటీటీలో సూపర్ హిట్ 'లవ్ అండ్​ రివెంజ్'​ డ్రామా!

ఓటీటీ ప్రియులను అలరించేందుకు మరో సరికొత్త సూపర్ హిట్​ లవ్​ అండ్ రివెంజ్ డ్రామా సినిమా అందుబాటులోకి వచ్చింది. 1980 బ్యాక్​డ్రాప్​లో హిందూ అబ్బాయి - ముస్లిం అమ్మాయి మధ్య ప్రేమ కథతో తెరకెక్కించారు. ఈ సినిమాను ఎందులో చూడాలో తెలుసుకుందాం..

మూవీ లవర్స్​కు వివిధ భాషల్లో సూపర్ హిట్​గా నిలిచిన సినిమా/సిరీస్​లను అందిస్తుంటాయి ఓటీటీ ఫ్లాట్​ఫామ్స్​. ప్రతివారం ఏదో ఒక కొత్త కంటెంట్​తో ఎంటర్​టైన్మెంట్​ చేసేందుకు ప్రయత్నిస్తూనే ఉంటాయి. అలా ఈ వారం కూడా ఓ కన్నడ సూపర్ హిట్​ లవ్​ స్టోరీని తీసుకొచ్చాయి. అదే 'కైవా'. 1980 బ్యాక్​డ్రాప్​లో హిందూ అబ్బాయి - ముస్లిం అమ్మాయి మధ్య ప్రేమ కథా నేపథ్యంతో చిత్రాన్ని తెరకెక్కించారు. గతేడాది డిసెంబర్‌ 8న థియేటర్లలో రిలీజైన ఈ చిత్రం ఆడియెన్స్​ను బాగా ఆకట్టుకుని సూపర్‌ హిట్‌గా నిలిచింది. బాక్సాఫీస్‌ వద్ద మంచి వసూళ్లను కూడా అందుకుంది.

ఆ ఓటీటీలోకే కైవా : ఇప్పుడీ చిత్రమే డిజిటల్ స్ట్రీమింగ్​కు రెడీ అయింది. ప్రముఖ ఓటీటీ ప్లాట్‌ ఫామ్ అమెజాన్‌ ప్రైమ్‌ వీడియో దీని రైట్స్​ను కొనుగోలు చేసుకుని స్ట్రీమింగ్​కు వదిలింది. కానీ ప్రస్తుతానికి ఈ చిత్రం కన్నడ వెర్షన్ మాత్రమే అందుబాటులో ఉంది. అయితే ఈ వెర్షన్‌కు ఇంగ్లిష్ సబ్‌ టైటిల్స్‌ ఉన్నాయి. త్వరలోనే తెలుగు వెర్షన్‌ కూడా అందుబాటులోకి రానుందని సమాచారం అందింది. కాబట్టి చూడాలనుకునేవారు ఇంగ్లీష్ సబ్​టైటిల్స్​తో చూసేయొచ్చు.

సినిమాలో ఎవరెవరు నటించారంటే ? ఈ కైవా చిత్రానికి జయతీర్థ జయన్న దర్శకత్వం వహించారు. రమేశ్ ఇందిర, దినకర్ తోగుదీప, నందా, జయరామ్ కార్తీక్, ఉగ్రం మంజు, రఘు, జాన్వీ రాయల ఇతర కీలక పాత్రల్లో నటించారు. కాంతార, విరూపాక్ష, మంగళవారం ఫేమ్​ అజ్నీశ్ లోకనాథ్ చిత్రానికి సంగీతం సమకూర్చారు. హింస సన్నివేశాలు ఉన్నందున్న సెన్సార్​ బోర్డు ఈ చిత్రానికి ఏ సర్టిఫికేట్ ఇచ్చిందని తెలిసింది.

ఈ సినిమా కథేంటంటే ? రియల్​ లైఫ్ ఇన్సిడెంట్స్ ఆధారంగానే 'కైవా' చిత్రాన్ని తెరకెక్కించినట్లు తెలిసింది. ఉద్యోగం కోసం ఓ మారుమూల గ్రామం నుంచి బెంగళూరు సిటీకి వస్తాడు కైవా (ధనవీర). ఆ తర్వాత ముస్లిం అమ్మాయి సల్మాతో(మేఘా శెట్టి) ప్రేమలో పడతాడు. అలా ఇద్దరు ప్రేమించుకుంటారు. అయితే కొంతమంది సల్మాను ఓ గ్యాంగ్‍స్టర్ ప్రియురాలు అనుకుని బాగా వేధిస్తారు. అనంతరం యాసిడ్‍తో కూడా దాడి చేస్తారు. దీంతో కైవా అదే గ్యాంగ్​స్టార్​ సాయంతో ఆ ముగ్గురిపై ప్రతీకారం తీర్చుకునేందుకు సిద్ధమవుతాడు. ఈ క్రమంలోనే సల్మాను పెళ్లి చేసుకుంటాడు. అనంతరం ఆమెపై యాసిడ్‌ తో దాడి చేసిన వారిని తరిమి ఇద్దరిని చంపేస్తాడు. కానీ ఆ తర్వాత పోలీసులకు చిక్కి జైలుకు వెళ్తాడు. మరి కైవా బయటకు వచ్చాడా? కైవా జైలుకు వెళ్లడంతో సల్మా జీవితం ఎలా మారిపోయింది? మూడో వాడిని కైవా చంపాడా? లేదా? అనేది తెలుసుకోవాలంటే 'కైవా' సినిమాను చూడాల్సిందే.