HanuMan OTT: మీ ఇంటికి 'హనుమాన్' వచ్చేస్తున్నాడు... ఎప్పుడు, ఎక్కడ చూడాలంటే?

ఎలాంటి అంచ‌నాలు లేకుండా, అతి త‌క్కువ స్క్రీన్లు, యువ నటీనటులతో ఈ సంక్రాంతి బరిలో దిగిన సినిమా హనుమాన్. కానీ ఒక్కసారిగా అంచ‌నాల‌ను తారుమారు చేసేసింది. తనతో పాటు రిలీజైన బడా సినిమాలన్నిటినీ పక్కకు నెట్టేస్తూ రికార్డుల మీద రికార్డులతో ప్రేక్ష‌కుల‌ను విప‌రీతంగా ఆక‌ట్టుకుంది. క‌లెక్ష‌న్ల సునామీ సృష్టించింది. దీంతో ఈ సినిమా ఎప్పుడెప్పుడు ఓటీటీలో కూడా వస్తుందా? రెండో సారి చూద్దామా అంటూ సినీ ప్రియులు ఎంతో ఆసక్తిగా ఎదురుచూశారు. ఇప్పుడా సస్పెన్స్​ను తెరదించుతూ ఓటీటీ స్ట్రీమింగ్​కు రెడీ అయిపోయిందీ చిత్రం. ఆ వివరాలను ఇప్పుడు స్టోరీలో చదివి తెలుసుకుందాం...

ప్ర‌శాంత్ వ‌ర్మ దర్శకత్వంలో తేజ స‌జ్జ హీరోగా ఈ సంక్రాంతి బ‌రిలో నిలిచిన సినిమా 'హ‌నుమాన్' ఎంతటి బ్లాక్ బస్టర్ అయిందో తెలిసిన విషయమే. అతి తక్కువ బడ్జెట్​తో వచ్చిన ఈ చిత్రం దాదాపు రూ.300 కోట్ల‌కు పైగా వ‌సూళ్లను అందుకుని రికార్డులు సృష్టించింది. చిన్న పెద్దా తేడా అని లేకుండా అందరూ థియేటర్లకు క్యూ కట్టేలా చేసింది. ఓ పక్క సూపర్ స్టార్​ మహేశ్ బాబు మరోవైపు సీనియర్ హీరోలు వెంకీ, నాగ్ అలాంటి వారి చిత్రాల మధ్య సక్సెస్​ ఫుల్​గా రన్​ అవుతూ వారి చిత్రాలనే బీట్ చేసింది.

అసలీ చిత్రం రిలీజై దాదాపు 50 రోజులు పూర్తవుతున్నా ఇంకా ప్రేక్ష‌కుల‌ను థియేట‌ర్ల‌కు ర‌ప్పిస్తూనే ఉంది.ఇంకా నార్త్​లోనూ పలు రికార్డులను క్రియేట్ చేసింది. ప్రభాస్, యశ్​, రజనీకాంత్​, రామ్ చరణ్, ఎన్టీఆర్, అల్లు అర్జున్, రిషబ్ శెట్టి తర్వాత ఉత్తరాది రాష్ట్రంలో రూ.50 కోట్ల నెట్ వసూల్లు సాధించిన హీరోగా సజ్జా రికార్డుకెక్కాడు.

ఇప్పటివరకు రోబో 2, బాహుబలి 1, బాహుబలి 2, పుష్ప, ఆర్​ఆర్​ఆర్​ , కేజీయఫ్​ 2, కాంతార సినిమాలు మాత్రమే ఈ మార్క్​ను అందుకున్నాయి. ఇప్పుడు హనుమాన్​ ఆ రికార్డును అందుకుని వాటి సరనస చేరింది. ఇంకా ఓవర్సీస్​లోనూ మంచి వసూళ్లనే అందుకుంది. అయితే ఈ చిత్రాన్ని థియేట‌ర్లలో ఎక్స్ పీరియెన్స్ చేసిన వాళ్లు మరోసారి కూడా థియేటర్లకు వెళ్లి చూశారు.

ఇక ఓటీటీలోనూ మ‌రోసారి చూసేందుకు ఎంతో ఆసక్తిగా ఎదురుచూస్తున్నారు. ఇప్పుడు అలాంటి వాళ్ల కోసమే అదిరిపోయే గుడ్​ న్యూస్ బయటకు వచ్చింది. ఇప్పటికే సంక్రాంతి సినిమాలు గుంటూరు కారం, సైంధవ్, నా సామిరంగ ఓటీటీలోకి వచ్చేయగా ఇప్పుడు హ‌నుమాన్ కూడా ఓటీటీ స్ట్రీమింగ్​కు రెడీ అయిపోయిందని తెలిసింది. మార్చి 2 నుంచి ఓటీటీలోకి రాబోతున్నట్లు ఓటీటీ వర్గాల నుంచి సమాచారం అందింది.

అయితే, దీనిపై ఎలాంటి అధికారిక ప్రకటన రాలేదు కానీ రావడం మాత్రం పక్కా అని అంటున్నారు. ఇక ఈ మూవీ ఓటీటీ రైట్స్​ను జీ - 5 ఫ్లాట్ ఫామ్ ద‌క్కించుకున్న సంగతి తెలిసిందే. మరి థియేటర్లలో చూసిన వారు, చూడని వారు ఉంటే ఈ సినిమాను ఎంచక్కా మీ ఫ్యామిలీతో కలిసి ఇంట్లోనే ఓటీటీలో చూసి ఆస్వాదించేయండి.