Bhama Kalapam 2 Review : 1000 కోట్ల కోసం ప్రియమణి సాహసం... భామ కలాపం 2 ఎలా ఉందంటే?

Rating: 2.5/5

చిత్రం : భామాకలాపం2;
నటీనటులు : ప్రియమణి, శరణ్య ప్రదీప్‌, సీరత్‌ కపూర్‌, చైతు జొన్నలగడ్డ, సుదీప్‌ వేద్‌, అనీష్ తదితరులు;
సంగీతం : ప్రశాంత్ విహారి;
సినిమాటోగ్రఫీ : దీపక్‌;
ఎడిటింగ్‌ : విప్లవ్‌ నైషద్‌;
రచన, దర్శకత్వం : అభిమన్యు;
స్ట్రీమింగ్‌ వేదిక : ఆహా
విడుదల తేదీ 16-02-2024

విలక్షణ నటి ప్రియమణి ప్రధాన పాత్రలో నటించిన భామా కలాపం అప్పట్లో ఓటీటీ వేదికగా విడుదలై సూపర్ రెస్పాన్స్​ను అందుకున్న సంగతి తెలిసిందే. ఇప్పుడా చిత్రానికే కొనసాగింపుగా భామా కలాపం 2ను మరోసారి ఓటీటీ వేదికగా ప్రేక్షకుల ముందుకు తీసుకొచ్చారు మేకర్స్​. తెలుగు ఓటీటీ ఆహాలో అందుబాటులోకి వచ్చింది. మరి ఫస్ట్ పార్ట్​ను మించిన థ్రిల్లింగ్‌ ఎలిమెంట్స్‌ ఇందులో ఉన్నాయా? అనుపమగా ప్రియమణి ఈ సారి చేసిన సాహసం ఏంటి? అసలీ హెయిస్ట్ థ్రిల్లర్​ను ఈ వీకెండ్​లో చూడొచ్చా? అన్నది ఈ రివ్యూ చూసి తెలుసుకుందాం..

కథేంటంటే : తొలి భాగంలో యూట్యూబ్‌ ఛానెల్‌ వేదికగా వంటలు చేసే అనుపమ (ప్రియమణి).. కోల్‌కతా మ్యూజియంలో రూ.200కోట్ల విలువైన కోడిగుడ్డు మాయమవడంతో తన కుటుంబంతో సహా ఇబ్బందుల్లో పడుతుంది. మర్డర్ మిస్టరీగా దీన్ని తెరకెక్కించారు. ఎలాగోలా ఆ కష్టాల నుంచి బయటపడిన అనుమప ఫ్యామిలీ ఇల్లు మారడంతో రెండో భాగం ప్రారంభమవుతుంది. అంటే తొలి భాగానికి కొనసాగింపుగా దీన్ని ప్రారంభించారు.

ఇల్లు మారేటప్పుడు ఇతరుల విషయాలను అస్సలు పట్టించుకోనని భర్తకు ప్రామిస్ చేసిన అనుపమ తన యూట్యూబ్‌ ఛానల్​ ద్వారా వచ్చిన ఆదాయాన్ని కూడబెట్టుకుని ఓ ఫుడ్​ హోటల్‌ ప్రారంభిస్తుంది. తమ ఇంటి పనిమనిషి శిల్ప (శరణ్య)ను పార్ట్నర్​గా చేసుకుని అనుపమ ఘుమఘుమ అనే రెస్టారెంట్‌ను ప్రారంభిస్తుంది. హ్యాపీగా లైఫ్​ను సాగదీయాలనుకుంటూనే కుకింగ్ ఐడల్ 2023 అనే నేషనల్ లెవల్ కుకింగ్ కాంపిటీషన్​లో పాల్గొనేందుకు అప్లై చేస్తుంది.

అయితే మరోవైపు ఆంథోని లోబో (అనూజ్ గుర్వారా) అనే వ్యాపార వేత్త, స్మగ్లర్​.. ఈ కుకింగ్ ఐడల్ ట్రోఫీ పేరుతో యూరోప్ నుంచి డ్రగ్స్‌ను స్మగ్లింగ్ చేయాలని భారీ ప్రణాళికను రచిస్తాడు. మరి అనుపమకు రూ.1000కోట్ల విలువ గల కోడి పుంజు బొమ్మ గల డ్రగ్స్​ను కొట్టేయాల్సిన పరిస్థితి ఎందుకు ఏర్పడింది? ఈ క్రమంలో విలన్​ నుంచి ఆమెకు ఎలాంటి సమస్యలు ఎదురయ్యాయి? చావోరేవో తేల్చుకునే పరిస్థితి ఎదురైనప్పుడు ఆమె దాన్ని ఎలా అధిగమించింది? అసలు జుబైదా?(సీరత్ కపూర్​) పాత్ర ఏంటి? అనేది తెలియాలంటే ఈ హెయిస్ట్ థ్రిల్లర్​ను చూడాల్సిందే..

ఎలా ఉందంటే : మొదటి భాగంలో గుడ్డు చుట్టూ అల్లుకున్న స్టోరీని రెండో భాగంలో కోడి పుంజు బొమ్మను చుట్టూ తిప్పారు. హీరో లేదా హీరోయిన్‌ తమ ప్రమేయం లేకుండానే నేరస్థులను పోలీసులకు పట్టించడం, ఆ తర్వాత వాళ్లు బయటకు వచ్చాక హీరో లేదా హీరోయిన్​పై పగను పెంచుకుని వారిపై దాడికి దిగడం, దాని నుంచి తమను తాము కాపాడుకునేందుకు ఆ ప్రధాన పాత్రలు ప్రయత్నాలు చేయడం.. ఇప్పుడీ కోవకే చెందినది భామకలాపం 2. అనుపమ పాత్ర అలాంటిదే.

అయితే సమస్య వచ్చినప్పుడు డీలా పడకుండా పోరాడి గెలవాలనే స్ఫూర్తినిస్తుంది ఆమె పాత్ర. అనుపమ - శిల్పల కామెడీ, జుబేదా గ్లామర్‌ బాగానే ఆకట్టుకున్నాయి. అక్కడక్కడా కొన్ని సన్నివేశాలు మరీ ల్యాగింగ్​గా అనిపించింది. నెగటివ్ క్యారెక్టర్స్​కు సంబంధించి సన్నివేశాలన్ని​ ఆసక్తిని రేకెత్తిస్తాయి. ప్రేక్షకుడికి ప్రీక్లైమాక్స్‌లో ఊహించలేని ట్విస్ట్‌ ఎదురవుతుంది. ఇక భామాకలాపం 3 కూడా ఉంటుందని క్లైమాక్స్‌లో మరో ఇంట్రెస్ట్​ను క్రియేట్‌ చేశారు మేకర్స్​. అయితే మూడో భాగం విదేశాల్లో ఉంటుందని అర్థమైంది.

ఎవరెలా చేశారంటే : అనుపమ పాత్ర ప్రియమణి కోసమే రాసిపెట్టారని అనిపిస్తుంది. వన్‌ విమెన్‌ షో అనిపించింది ఆమె. శరణ్య తెరపై కనిపిస్తే చాలు నవ్వులే నవ్వులూ. హీరోయిన్‌ కావాలనే ఆశతో ఉన్న అమ్మాయిగా సీరత్‌ కపూర్‌ గ్లామర్​తో ఆకట్టుకుంది. ఆంటోనీ లోబో, తాషీర్‌, సదానందం తమ పాత్రలతో బాగానే ఆకట్టుకున్నారు. బ్రహ్మాజీ అతిథి పాత్రలో సందడి చేశారు. సాంకేతికంగా పరంగా ప్రొడక్షన్ వ్యాల్యూస్ బాగున్నాయి. ప్రశాంత్‌ ఆర్‌.విహారి బ్యాక్​ గ్రౌండ్ మ్యూజిక్​, దీపక్‌ సినిమాటోగ్రఫీ, విప్లవ్‌ నైషధ ఎడిటింగ్‌ అని మంచిగా ఉన్నాయి.

చివరిగా కుటుంబంతో కలిసి చూడొచ్చా అంటే ఈ సినిమా ఎలాంటి ఇబ్బంది లేకుండా చూడొచ్చు. ఈ వీకెండ్‌లో మంచి సస్పెన్స్‌ థ్రిల్లర్‌ చూడాలనుకుంటే భామాకలాపం-2 మంచి ఛాయిస్‌. మొదటి భాగంలో గుడ్డుతో సక్సెస్​ అందుకున్న దర్శకుడు ఈసారి కోడిపుంజుతోనూ విజయం సాధించారు.