The Family Star Movie Review: క్లీన్ ఫ్యామిలీ ఎంటర్‌టైనర్.. విజయ్ దేవరకొండ వన్ మ్యాన్ షో.. ఫ్యామిలీ స్టార్

Rating: 2.75/5

నటీనటులు: విజయ్ దేవరకొండ, మృణాల్ ఠాకూర్ తదితరులు
నిర్మాతలు: రాజు, శిరీష్
రచన, దర్శకత్వం: పరశురామ్ పెట్ల
సినిమాటోగ్రఫీ: కేయూ మోహనన్
సంగీతం: గోపీసుందర్
ఆర్ట్ డైరెక్టర్: ఏ ఎస్ ప్రకాష్
ఎడిటర్: మార్తాండ్ కె వెంకటేష్
క్రియేటివ్ ప్రొడ్యూసర్: వాసు వర్మ
బ్యానర్: శ్రీ వెంకటేశ్వర క్రియేషన్స్
రిలీజ్ డేట్: 2023-04-05

మధ్య తరగతి ఉమ్మడి కుటుంబంలో అన్నలు,వదినలు, వారి పిల్లలతోపాటు బామ్మ బాధ్యతలను మోసే యువకుడు గోవర్ధన్ (విజయ్ దేవరకొండ). మిడిల్ క్లాస్ ఫ్యామిలీలో బంధాలకు కట్టుబడి ఉంటాడు. తన జీతం మీదే జీవితాన్ని కొనసాగించే సమయంలో సెంట్రల్ యూనివర్సిటీలో రీసెర్చ్ చేసే ఇందు (మృణాల్ థాకూర్) లైఫ్‌లోకి వస్తుంది. ఇందు చేసిన ఓ పనికి హర్ట్ అయిన గోవర్దన్ ఆమెను దూషించి కొడుతాడు. మధ్య తరగతి వాడు తలుచుకొంటే ఏదైనా సాధించగలడు అని ప్రముఖ రియల్ ఎస్టేట్ కంపెనీ ఓనర్ (జగపతిబాబు) కంపెనీలో మంచి ఉద్యోగంలో చేరి ఇందు చేసిన పని తప్పు అని నిరూపించే ప్రయత్నంలో ఉంటాడు.

గోవర్ధన్ లైఫ్‌లోకి ఇందు ఎలా వచ్చింది? గోవర్ధన్ కుటుంబాన్ని ఇందు ఎలా హర్ట్ చేసింది? అసలు ఇందు వారి జీవితంలోకి ఎందుకు వచ్చింది? రియల్ ఎస్టేట్ సంస్థలో చేరిన గోవర్ధన్‌ అమెరికాలోని ప్రాజెక్టులో పనిచేయడానికి వెళ్లినప్పుడు ఇందూ కూడా అక్కడికి ఎందుకు వెళ్లింది? అమెరికాలో ఇందు, గోవర్ధన్ మధ్య ఎలాంటి సంఘటనలు చోటుచేసుకొన్నాయి? ఇందును గోవర్ధన్ క్షమించాడా? ఒకవేళ క్షమిస్తే.. ఎలాంటి పరిస్జితులు వారి మధ్య జరిగాయి? ఇందు చేసిన పని తప్పని నిరూపించాడా? లేదా తనదే తప్పు అని ఒప్పుకొన్నాడా? వారిద్దరి మధ్య ప్రేమకు ఎలాంటి పరిష్కారం లభించింది అనే ప్రశ్నలకు సమాధానమే ది ఫ్యామిలీ స్టార్ సినిమా కథ.

మధ్య తరగతి యువకుడు తన కుటుంబాన్ని కంటికి రెప్పలా కాపాడుకొనేందుకు ఎలాంటి బాధ్యతలను భుజాన వేసుకొన్నారనే అంశాలను ఫన్ వేలో చూపించడంతో కథ ఎంటర్‌టైనింగ్‌గా సాగుతుంది. అయితే ఫీల్ గుడ్ ఫ్యాక్టర్ లేకపోవడం వల్ల ఫస్టాఫ్‌లో అక్కడక్కడ సన్నివేశాలు చాలా స్లోగా, రొటీన్‌గా అనిపిస్తాయి. ఫస్టాఫ్‌లో విజయ్ యాక్టింగ్, రెండు ఫైట్స్ అన్ని వర్గాల ప్రేక్షకులను ఆకట్టుకొనేలా డిజైన్ చేయడం బాగుంది. కథను మలుపుతిప్పే పాయింట్‌తో ఫస్టాఫ్ ముగుస్తుంది.

ఇక సెకండాఫ్ విషయానికి వస్తే.. ఓ ట్విస్టుతో అమెరికాలో కథ మొదలవుతుంది. విజయ్, మృణాల్ మధ్య టిట్ ఫర్ టాట్ తరహా సన్నివేశాలు ఆసక్తికరంగా ఉంటాయి. అమెరికాలో క్లబ్ సీన్‌లో గోవర్దన్ క్యారెక్టర్‌తో ఓ సీన్ ఫన్ క్రియేట్ చేసింది. ప్రీ క్లైమాక్స్ వరకు కథ మంచి జోష్‌తో సాగుతుంది. క్లైమాక్స్ వరకు వచ్చే సరికే బలమైన కాన్‌ఫ్లిక్ లేకపోవడం వల్ల మూవీ రొటీన్‌గా ముగియడం ఓ మైనస్‌గా అనిపిస్తుంది. ఈ మూవీకి మ్యూజిక్, పాటలు మైనస్ కావడం మరో ప్రతికూల అంశంగా చెప్పుకోవచ్చు.

ఇక నటీనటుల విషయానికి వస్తే.. విజయ్, మృణాల్ పాత్రలు తప్పితే మరో పాత్ర ఎలివేట్ అయినట్టు ఎక్కడా అనిపించదు. సినిమా మొత్తాన్ని విజయ్ తన భుజాలపై మోసి.. వన్ మ్యాన్ షోతో చూపించాడు. గత సినిమాలతో పోల్చుకొంటే.. విజయ్ దేవరకొండ యాక్టింగ్ బెటర్‌గా, మెచ్యుర్డ్‌గా కనిపించింది. ఫైట్స్, డ్యాన్సులతో కొత్తగా కనిపించాడు. ఎమోషనల్ సీన్లలో, కామెడీ సీన్లలో ఆయన చూపించిన హావభావాలు బాగున్నాయి.మృణాల్ పాత్ర ఫెర్ఫార్మ్ చేయడానికి స్కోప్ లేకపోయింది. సింగిల్ ఎక్స్‌ప్రెషన్‌తో కనిపించడంతో ఆమె టాలెంట్‌ను సరిగా యూజ్ చేసుకోలేదనిపిస్తుంది. జగపతి బాబు, అచ్యుత్ కుమార్, వెన్నెల కిషోర్ తదితరులు యాక్టింగ్ కూడా అంతంత మాత్రమే చెప్పవచ్చు.

సాంకేతిక విభాగాల విషయానికి వస్తే.. సినిమాటోగ్రఫి, యాక్షన్ కోరియోగ్రఫి, ఎడిటింగ్ అంశాలు ఈ సినిమాకు సానుకూల అంశాలు. కథలో రెండు రకాలు షేడ్స్ అంటే.. మిడిల్ క్లాస్ ఎన్విరాన్మెంట్, అమెరికాలో రిచ్ యాంబియేన్స్‌ను కేవీ మోహనన్ బాగా డీల్ చేశాడు. పాటలు, వాటి ప్లేస్ మెంట్ సరిగా లేదు. సూపర్ హిట్ పాటను రోలింగ్ టైటిల్ వేయడం నిరాశ కలిగించే అంశం. ప్రొడక్షన్ వ్యాల్యూస్ రిచ్ గా ఉన్నాయి.

ఫ్యామిలీ వాల్యూస్, లవ్, ఫన్ అంశాలను కలబోసి రూపొందించిన చిత్రం ది ఫ్యామిలీ స్టార్. విజయ్ దేవరకొండ, మృణాల్ యాక్టింగ్ సినిమాకు బలం. గోవర్దన్, ఇందు పాత్రల మధ్య కెమిస్ట్రీ అంతగా వర్కవుట్ కాలేదనే చెప్పాలి. బలహీన కథతో చేసిన ప్రయోగంలా అనిపిస్తుంది. మిడిల్ క్లాస్ ఫ్యామిలీ, ముఖ్యంగా ఫ్యామిలీ ఆడియెన్స్‌కు కనెక్ట్ అయ్యే అంశాలు ఎక్కువగా ఉన్నాయి. అవి కనుక కనెక్ట్ అయితే సినిమా సక్సెస్ రేంజ్ పెరుగుతుంది. విజయ్ దేవరకొండ కోసం వెళ్లే అడియెన్స్‌కు ఎలాంటి నిరాశ ఉండదు. ఫ్యామిలీ స్టార్ పక్కాగా క్లీన్ ఎంటర్‌టైనర్. మంచి అనుభూతిని పంచుతుంది. థియేటర్‌లో ఈ మూవీని మిస్ చేసుకోవద్దు.