CCL 2025 Live: హోం గ్రాండ్‌లో దుమ్మురేపిన తెలుగు వారియర్స్.. భోజ్‌పురి జట్టుకు భంగపాటు

భోజ్‌పురి దబాంగ్స్‌పై తెలుగు వారియర్స్ 7 పరుగుల తేడాతో విజయం సాధించింది. అఖిల్ సేన నిర్దేశించిన 87 పరుగుల లక్ష్యాన్ని ఛేదించే క్రమంలో భోజ్‌పురి జట్టు 9.5 ఓవర్లలో 79 పరుగులకు ఆలౌట్ అయ్యింది. ఉదయ్ 25, ఖాన్ 15, మనోజ్ 1, దినేశ్ లాల్ యాదవ్ 3, ఆదిత్య 0, అన్షుమన్ 11, పర్వేష్ లాల్ యాదవ్ 13, సుధీర్ 2, విక్రాంత్ 0, మన్మోహన్ 1 పరుగు చేశారు. తెలుగు బౌలర్లలో సచిన్ 3, సాంబ 2, అశ్విన్ బాబు , ఆది , సామ్రాట్ చెరో వికెట్ పడగొట్టారు

63 పరుగుల వద్ద భోజ్‌పురి జట్టు అన్షుమన్ రాజ్‌పుత్ వికెట్‌ను కోల్పోయింది. మనీష్ జట్టు గెలవాలంటే 19 బంతుల్లో 23 పరుగులు చేయాల్సి ఉంది.

మంచి ఊపులో కనిపించిన భోజ్‌పురి దబాంగ్స్ జట్టుకు వెంట వెంటనే షాకులు తగిలాయి. 46 పరుగుల వద్ద ఆ జట్టు వరుసగా రెండు వికెట్లు కోల్పోయింది. సచిన్ జోషి బౌలింగ్‌లో దినేష్ లాల్ యాదవ్ (3), ఆదిత్య ఓజా (0) ఔట్ అయ్యాడు.

లక్ష్యఛేదనలో భోజ్‌పురి జట్టు తొలి వికెట్ కోల్పోయింది. జట్టు స్కోరు 33 పరుగుల వద్ద సచిన్ బౌలింగ్‌లో భారీ షాట్‌కు యత్నించిన అస్గర్ ఖాన్ 15 పరుగుల వ్యక్తిగత స్కోరు వద్ద ఔట్ అయ్యాడు.

87 పరుగుల లక్ష్యంతో బరిలోకి దిగిన భోజ్‌పరి జట్టుకు ఉదయ్, అస్గర్ ఖాన్‌లు మెరుపు ఆరంభాన్ని ఇచ్చారు. వీరిద్దరి ధాటికి స్కోరు బోర్డులు పరుగులు తీసింది.

తెలుగు వారియర్స్ తన సెకండ్ ఇన్నింగ్స్‌లో నిర్ణీత 10 ఓవర్లకు గాను 6 వికెట్లు కోల్పోయి 132 పరుగులు చేసింది. అశ్విన్ బాబు 36, థమన్ 21, అఖిల్ 22, సాంబ 26, ఆదర్శ్ 12, సామ్రాట్ 9 పరుగులు చేశారు. భోజ్‌పురి దబాంగ్స్ బౌలర్స్‌లో ఖాన్ 2, మనోజ్ , ఆదిత్య, మన్మోహన్‌లు తలో వికెట్ పడగొట్టారు. భోజ్‌పురి జట్టు గెలవాలంటే 87 పరుగులు చేయాల్సి ఉంది.

స్కోరు వేగాన్ని పెంచే క్రమంలో జట్టు స్కోరు 108 పరుగుల వద్ద ఉండగా మనోజ్ తివారీ బౌలింగ్‌లో భారీ షాట్ ఆడిన అఖిల్ .. బౌండరీ లైన్ వద్ద అజ్గర్ ఖాన్‌కు చిక్కాడు. 11 బంతుల్లో 2 సిక్సర్ల సాయంతో అఖిల్ 22 పరుగులు చేశాడు.

తెలుగు వారియర్స్ మరోసారి ఫామ్‌లోకి వచ్చింది. స్కోరు బోర్డును పరుగులు పెట్టిస్తూ 7వ ఓవర్‌లో 100 మార్క్ దాటింది. అఖిల్ 18, సాంబ 22 పరుగులతో క్రీజులో ఉన్నారు.

మంచి ఊపులో కనిపించిన తెలుగు వారియర్స్ మరోసారి కష్టాల్లో పడింది. వెంట వెంటనే థమన్ (21), అశ్విన్ బాబు (36), నిఖిల్ (0) ఔట్ కావడంతో భోజ్‌పురి దబాంగ్స్‌ శిబిరంలో ఊపు కనిపించింది. రెండు ఇన్నింగ్స్‌ల్లోనూ నిఖిల్ డకౌట్ కావడం గమనార్హం

47 పరుగుల ఆధిక్యమే లక్ష్యంగా సెకండ్ ఇన్నింగ్స్ ఆరంభించిన తెలుగు వారియర్స్ జట్టుకు థమన్, అశ్విన్ బాబులు మెరుపు ఆరంభం ఇచ్చారు. ముఖ్యంగా థమన్ ఫోర్లు, సిక్సర్లతో విరుచుకుపడ్డాడు.

భోజ్‌పురి దబాంగ్స్ జట్టు తన తొలి ఇన్నింగ్స్‌లో నిర్ణీత 10 ఓవర్లలో 4 వికెట్ల నష్టానికి 126 పరుగులు చేసి, తద్వారా తెలుగు జట్టుపై 46 పరుగుల ఆధిక్యం సాధించింది. ఆదిత్య 61 (నాటౌట్), అన్షుమన్ (42), అజ్గర్ ఖాన్ (4), ఉదయ్ (16) పరుగులు చేశారు. తెలుగు వారియర్స్ బౌలర్లలో సచిన్ 4 వికెట్లు పడగొట్టారు.

ఊపు మీదున్న భోజ్‌పురి జట్టుకు గట్టి షాక్ తగిలింది. జట్టు స్కోరు 88 పరుగుల వద్ద అన్షుమన్ రాజ్‌పుత్ ఔట్ అయ్యాడు. 18 బంతుల్లో 6 ఫోర్లు, 2 సిక్సర్ల సాయంతో అతను 42 పరుగులు చేశాడు.

81 పరుగుల ఆధిక్యమే లక్ష్యంగా తొలి ఇన్నింగ్స్ ఆరంభించిన భోజ్‌పురి దబాంగ్స్ జట్టు 6.5 ఓవర్ల వద్ద లీడింగ్‌లోకి వచ్చింది. 7 ఓవర్లలో 1 వికెట్ నష్టానికి మనీష్ తివారీ జట్టు 87 పరుగులు చేసింది. క్రీజులో ఆదిత్య, అన్షుమన్‌లు క్రీజులో ఉన్నారు.

81 పరుగుల ఆధిక్యమే లక్ష్యంగా తొలి ఇన్నింగ్స్ ప్రారంభించిన భోజ్‌పురి దబాంగ్స్‌కు గట్టి ఎదురుదెబ్బ తగిలింది. జట్టు స్కోరు 15 పరుగుల వద్ద ఉండగా పర్వేష్ లాల్ యాదవ్ పరుగులేమీ చేయకుండానే అశ్విన్ బాబు బౌలింగ్‌లో రఘుకి క్యాచ్ ఇచ్చి వెనుదిరిగాడు.

భోజ్‌పురి దబాంగ్స్‌తో జరిగిన మ్యాచ్‌లో తెలుగు వారియర్స్ తన తొలి ఇన్నింగ్స్‌లో నిర్ణీత 10 ఓవర్లలో 8 వికెట్ల నష్టానికి 80 పరుగులు చేసింది. ఐదుగురు బ్యాట్స్‌మెన్లు డకౌట్ కాగా.. అఖిల్ 41, సాంబ 18, సామ్రాట్‌లు పోరాడారు. భోజ్‌పురి బౌలర్లలో మనోజ్ తివారీ , మన్మోహన్, ఆదిత్యలు తలా రెండేసి వికెట్లు, అజ్గర్ ఖాన్ ఓ వికెట్ పడగొట్టారు.

భోజ్‌పురి దబాంగ్స్ ధాటికి తెలుగు వారియర్స్ వెంట వెంటనే వికెట్లు కోల్పోతోంది. తాజాగా కెప్టెన్ అఖిల్ అక్కినేని జట్టు స్కోర్ 65 పరుగుల వద్ద 5వ వికెట్‌గా వెనుదిరిగాడు. 28 బంతుల్లో 41 పరుగులు చేసిన అఖిల్ భారీ షాట్‌కు ప్రయత్నించి బౌండరీ వద్ద సుధీర్‌కు చిక్కాడు. ఆ వెంటనే 18 పరుగుల వద్ద సాంబ కూడా పెవిలియన్ బాట పట్టాడు. నిఖిల్ అలా వచ్చి ఇలా ఔట్ అయ్యాడు

4 వికెట్లు కోల్పోయి కష్టాల్లో పడిన జట్టును కెప్టెన్ అఖిల్ అక్కినేని, సాంబలు నడిపించారు. ఈ దశలో 5.3 ఓవర్ల వద్ద తెలుగు వారియర్స్ 50 పరుగుల మార్క్ దాటింది.

తెలుగు వారియర్స్ కష్టాలు కొనసాగుతున్నాయి. ఇప్పటికే మూడు వికెట్లు కోల్పోయిన అఖిల్ సేనకు మరో షాక్ తగిలింది. అజ్గర్ ఖాన్ బౌలింగ్‌తో థమన్ ఎల్బీడబ్ల్యూగా వెనుదిరిగాడు.

భోజ్‌పురి దబాంగ్స్‌తో జరిగిన మ్యాచ్‌లో టాస్ గెలిచిన తెలుగు వారియర్స్ కెప్టెన్ అఖిల్ అక్కినేని బ్యాటింగ్ ఎంచుకున్నాడు. అయితే ఆదిలోనే తెలుగు జట్టుకు షాక్ తగిలింది. ఆదర్శ్, సచిన్, అశ్విన్ బాబులు తొలి ఓవర్‌లోనే డకౌట్‌గా వెనుదిరిగారు. దీంతో తెలుగు వారియర్స్ కష్టాల్లో పడింది. ప్రస్తుతం క్రీజ్‌లు అఖిల్ , థమన్ ఉన్నారు.