చిరంజీవి సినిమాలో రామ్ చరణ్ రోల్ లీక్.. ‘సిద్దూ’గా కనిపించనున్న మెగా పవర్ స్టార్.!

అదిరిపోయే కమ్‌బ్యాక్.. అంతలోనే నిరాశ

మెగాస్టార్ చిరంజీవి రాజకీయాల్లోకి వెళ్లిన తర్వాత ‘ఖైదీ నెంబర్ 150'తో సినిమాల్లోకి రీఎంట్రీ ఇచ్చారు. ఈ మూవీ భారీ విజయాన్ని అందుకోవడంతో పాటు ఆయనలో గ్రేస్ ఏమాత్రం తగ్గలేదని నిరూపించింది. దీంతో రెట్టించిన ఉత్సాహంతో ఆయన ‘సైరా: నరసింహారెడ్డి' అనే సినిమా చేశారు. అయితే, ఈ మూవీ మాత్రం తెలుగు ప్రేక్షకుల మెప్పును పొందలేకపోయింది.

బడా డైరెక్టర్‌‌తో కలిసిన మెగాస్టార్

‘సైరా' వంటి భారీ సినిమా తర్వాత మెగాస్టార్ చిరంజీవి.. బడా డైరెక్టర్ కొరటాల శివతో సినిమా చేయడానికి గ్రీన్ సిగ్నల్ ఇచ్చేశారు. ఇప్పటికే పూజా కార్యక్రమాలు జరుపుకున్న ఈ మూవీని రామ్ చరణ్‌తో పాటు మ్యాట్నీ మూవీస్ సంస్థ నిర్మిస్తోంది. ప్రతిష్టాత్మకమైనది కావడంతో ఈ సినిమా విషయంలో దర్శకుడు కొరటాల శివ ఎన్నో జాగ్రత్తలు తీసుకుంటున్నారు.

అన్నీ ఫిక్స్ అయ్యాయి.. మళ్లీ మార్చేశారు

వాస్తవానికి ఈ సినిమా ఎప్పుడో ప్రారంభం కావాల్సి ఉంది. అయితే, సైరా విడుదల ఆలస్యం కావడం వల్ల దాని ప్రభావం ఈ ప్రాజెక్టుపై పడింది. దీంతో ఈ సినిమా కోసం మొదట అనుకున్న కథ, టైటిల్, క్యారెక్టర్ సహా ఎన్నో అంశాలు మారిపోయాయట. సినిమా లైన్ ఒకటే అయినా.. కథలో కీలకమైన మార్పులు చాలా వరకు చేశారని జోరుగా ప్రచారం జరుగుతోంది.

కథకు తగ్గ టైటిల్.. ఇప్పుడు కట్ చేశారు

ఈ సినిమా మొత్తం దేవాదాయ భూములను ఆక్రమించే వారిపై జరిపే పోరాటం ఆధారంగా తెరకెక్కిస్తున్నారని ఎప్పటి నుంచో వార్తలు వస్తున్నాయి. అందుకే ఈ మూవీకి ‘గోవింద ఆచార్య' అనే టైటిల్ ఫిక్స్ చేశారని అన్నారు. అయితే, కథలో కొన్ని మార్పులు జరగడంతో ఈ సినిమా టైటిల్‌ను ‘ఆచార్య'గా కుదించారనే టాక్ తాజాగా వినిపిస్తోంది.

చిరంజీవి సినిమాలో రామ్ చరణ్ కీ రోల్

కొరటాల శివ - చిరంజీవి సినిమా చేయబోతున్నారని లీకులు వచ్చిన సమయంలోనే, ఇందులో రామ్ చరణ్ కూడా కీలక పాత్ర పోషిస్తున్నాడని ప్రచారం జరిగింది. కానీ, తర్వాత దీని గురించి ఎవరూ మాట్లాడలేదు. అయితే, ఈ మధ్య మాత్రం ఇందులో చెర్రీ నటిస్తున్నాడని ప్రచారం జోరందుకుంది. తాజా సమాచారం ప్రకారం.. ఈ వార్తలు నిజమేనని తెలుస్తోంది.

‘సిద్దూ'గా కనిపించనున్న మెగా పవర్ స్టార్

చిరంజీవి సినిమాలో మెగా పవర్ స్టార్ రామ్ చరణ్ కీలక పాత్ర చేస్తున్నాడని తాజాగా ఓ వార్త ఇండస్ట్రీలో చక్కర్లు కొడుతోంది. అంతేకాదు, అతడు క్యారెక్టర్ పేరు సిద్దూ అని సమాచారం. సినిమాలో చాలా కీలకమైన ఈ పాత్ర దాదాపు 20 నుంచి 30 నిమిషాలు ఉంటుందట. ఇంకో విషయం ఏమిటంటే.. ఇది చిరంజీవి యుక్త వయసు పాత్ర మాత్రం కాదని తెలిసింది.