అభిమానికి సర్‌ప్రైజ్ ఇచ్చిన బాలు.. వీడియో చూసి కన్నీరు పెట్టుకున్న రవీనా టండన్

సంతాపం ప్రకటించిన భారతావని..

ఎస్పీ బాలు మృతి పట్ల కేవలం సినీ ప్రముఖులు, సంగీత ప్రియులు మాత్రమే సంతాపాన్ని ప్రకటించలేదు. భారత ప్రధాని మొదలుకొని ప్రతీ ఒక్కరూ బాలు మరణం పట్ల ఆయన కుటుంబానికి ప్రగాఢ సానుభూతిని తెలియజేశారు. ఇక చైన్నైలోని ఆయన నివాసం వద్ద భౌతిక కాయాన్ని సందర్శనార్థం ఉంచారు.

ప్రభుత్తం లాంఛనాలతో..

అభిమానులు, ప్రముఖుల సందర్శనార్థం భౌతికకాయాన్ని ఆయన ఇంటి వద్ద ఉంచారు. సాయంత్రం వేళ అభిమానుల తాకిడి ఎక్కువ కావడంతో తామరైపాక్కం ఫాంహౌస్‌కు తరలించారు.ఎస్పీ బాలసుబ్రమణ్యం అంత్యక్రియల సమయంలో తమిళనాడు పోలీసులు గౌరవం వందనం సమర్పించారు. గాల్లోకి తుపాకులు పేల్చి దిగ్గజ గాయకుడు ఎస్పీబాలుకు గౌరవం వందనం సమర్పించారు.

నాటి వీడియో..

శ్రీలంక బాంబు పేలుళ్లలో గాయపడిన కళ్లు పోగొట్టుకున్న ఓ అభిమానికి బాలు సర్ ప్రైజ్ ఇచ్చారు. అభిమాని దగ్గరికి వెళ్లి ఆయన పాట పాడుతూ.. దాంట్లో బాలు శృతి కలిపారు. ఇక ఏకంగా ఎస్పీ బాలుయే తన పాటకు వంత పాడటంతో సదరు అభిమాని ఆనందాన్ని పట్టలేకపోయాడు.

రవీనా టండన్ ఎమోషనల్..

ఇక ఆ వీడియోను, అందులో బాలు గారి మాట్లాడిన విధానానికి రవీనా టండన్ ఎమోషనల్ అయింది. ఈ మేరకు ఆమె ట్వీట్ చేస్తూ.. నా కంట్లో నీళ్లు తిరిగాయి.. నా గొంతు మూగబోయింది.. అదే బాలు గారి గొప్పదనం అంటూ చేతులెత్తి దండం పెట్టేసింది. ఓం శాంతి అంటూ నమస్కరించింది.