ట్రెండింగ్‌లో కమల్ హాసన్... 60 ఏళ్ల సినీ ప్రస్థానంలో ఆసక్తిర విషయాలెన్నో!

60 ఏళ్ల సినీ ప్రయాణంలో

60 ఏళ్ల సినీ ప్రయాణంలో కమల్ హాసన్ దాదాపు 250 సినిమాల్లో నటించారు. కేవలం నటనకే పరిమితం కాకుండా రచయితగా, నిర్మాతగా, దర్శకుడిగా ఇలా తనలోని బహుముఖ టాలెంటును బయటపెట్టే ప్రయత్నం చేసి సక్సెస్ అయ్యారు. 64 ఏళ్ల కమల్ హాసన్ ఇప్పటికీ తన సినీ ప్రయాణం కొనసాగిస్తూనే ఉన్నారు. ప్రస్తుతం ఆయన శంకర్ దర్శకత్వంలో ‘భారతీయుడు 2' మూవీ చేస్తున్నారు.

#60PathBreakingYrsOfKamal

కమల్ హాసన్ నటుడిగా 60 సంవత్సారాలు పూర్తి చేసుకున్న సందర్భంగా అభిమానులు, సినీ ప్రముఖులు ఆయన్ను ప్రశంసలతో ముంచెత్తుతున్నారు. #60PathBreakingYrsOfKamal అనే యాష్ ట్యాగ్ సోషల్ మీడియాలో ట్రెండ్ అవుతోంది.

హాసన్ ఫ్యామిలీ

శ్రీనివాసన్, రాజ్య లక్ష్మి దంపతులకు నాలుగో సంతానం కమల్ హాసన్. కొడుకులందరికి చివరి పదం "హాసన్" అని వచ్చేలా పేరు పెట్టారు ఈ దంపతులు. ఇది హాసన్ అనబడే ఒక మిత్రుడితో తమకి ఉన్న అనుబంధానికి గుర్తు.

బాలచందర్ శిష్యరికంలో

కమల్ హాసన్ బాల్యంలోనే శాస్త్రీయ కళలను అభ్యసించారు. నూనుగు మీసాల వయసులో సినిమాలలో నృత్య దర్శకుడిగా పనిచేసారు. అదే సమయంలో ప్రసిద్ధ తమిళ సినీ దర్శకుడు కె.బాలచందర్తో ఆయనకు ఏర్పడిన అనుబంధం తరువాత సుదీర్ఘ గురు-శిష్య సంబంధంగా మారింది. కమల్ నేపథ్య గాయకుడిగా కూడా శిక్షణ పొందాడు. ఇటీవలి కొన్ని చిత్రాలలో పాటల రచయితగా కూడా పనిచేసారు. భరత నాట్యం ప్రదర్శించటంలో ఆయనకి ఆయనే సాటి.

వందల్లో అవార్డులు

జాతీయ ఉత్తమ నటుడి పురస్కారాన్ని కమల్ హసన్ మూడు సార్లు అందుకున్నారు. మూండ్రంపిరై, నాయకన్(నాయకుడు), ఇండియన్ (భారతీయుడు) చిత్రాలకుగాను ఆయన ఈ అవార్డు సొంతం చేసుకున్నారు. తొలిచిత్రానికే ఉత్తమ బాలనటుడిగా జాతీయ అవార్డు దక్కించుకున్నారు. సాగర సంగమం, స్వాతి ముత్యం చిత్రాలకు ఆసియా చిత్రోత్సవాల్లో ఉత్తమ నటుడిగా అవార్డు అందుకోవడంతో పాటు ప్రతిష్ఠాత్మక ఫిల్మ్ ఫేర్ అవార్డ్ రికార్డు స్థాయిలో 18 సార్లు సొంతం చేసుకున్నారు. తన నట జీవితంలో ఆయన ఎన్నో వందల అవార్డులను సొంతం చేసుకున్నారు.

ఆరు సార్లు ఆస్కార్ నామినేషన్

కమల్ హాసన్ నటించిన ఆరు చిత్రాలు ఇండియా నుంచి అఫీషియల్‍‌గా ఆస్కార్‌కు నామినేట్ అయ్యాయి. ఇండియాలో మరే నటుడికీ ఇలాంటి గౌరవం దక్కలేదు. కేంద్ర ప్రభుత్వం ఆయన్ను 1990లో పద్మశ్రీ, 2014లో పద్మ భూషణ్ పురస్కారంతో సత్కరించింది.