రోబో-2: అమీ జాక్సన్ తీసేయకుంటే రజనీ, శంకర్ పై దాడి చేస్తాం!

హైదరాబాద్: శంకర్ దర్శకత్వంలో సౌత్ సూపర్ స్టార్ రజనీకాంత్ హీరోగా ‘రోబో-2' తెరకెక్కుతున్న సంగతి తెలిసిందే. ఈ చిత్రాన్ని ‘2.0' టైటిల్ తో తెరకెక్కిస్తున్నారు. ఈ చిత్రంలో హీరోయిన్ గా అమీ జాక్సన్ ఎంపికయింది.

అయితే ఓ వివాదం కారణంగా ఇపుడు తమిళనాడులో ఆమెపై కారాలు మిరియాలు నూరుతున్నారు అక్కడివారు. అంతేకాదు.... రోబో-2 సినిమా నుండి ఆమెను తీసేయాలని, లేకుంటే దాడి చేస్తామంటూ బెదిరింపులు వస్తున్నాయి.

తమిళనాడులో సంప్రదాయ జల్లికట్టు క్రీడపై సుప్రీంకోర్టు గతంలో నిషేధం విధించింది. దీనిని ఎత్తివేయాలంటూ తమిళనాట ఆందోళనలు మొదలయ్యాయి. ఈ క్రమంలో కొంతమంది బాలీవుడ్ నటులు దీనిని వ్యతిరేకిస్తూ, మూగజీవాలను హింసించరాదని, జల్లికట్టుపై నిషేధాన్ని కొనసాగించాలని కోరుతున్నారు. దీనికి అమీ జాక్సన్ కూడా మద్దతు ప్రకటిస్తూ ట్వీట్ చేసింది.

అయితే తమిళ సినిమా ద్వారా ఇండియన్ సినిమా రంగంలోకి అడుగు పెట్టి, ఐ లాంటి తమిళ చిత్రాల ద్వారానే ఫేమస్ హీరోయిన్ అవ్వడంతో పాటు ఇపుడు రజనీకాంత్ రసనన భారీ తమిళ ప్రాజెక్టు రోబో-2లో నటిస్తున్న అమీ జాక్సన్ కూడా జల్లికట్టును వ్యతిరేకించడాన్ని కొందరు తమిళులు జీర్ణించుకోలేక పోతున్నారు. వెంటనే ఆమెకు వ్యతిరేకంగా ఆందోళన ప్రారంభించారు. 'రోబో-2' నుంచి ఆమెను తొలగించాలని, లేకుంటే యూనిట్ పైన, హీరో రజనీ, దర్శకుడు శంకర్ పైనా దాడి చేస్తామంటూ బెదిరిస్తున్నారట!