విజయ్‌పై ఐటీ రైడ్స్.. పార్టీ కార్యకర్తలకు, ఫ్యాన్స్ మధ్య వాగ్వాదం.. షూటింగ్ రచ్చ రచ్చ

కావాలనే విజయ్‌ను టార్గెట్..

విజయ్‌ను కావాలనే టార్గెట్ చేస్తున్నారని, దీనిలో బీజేపీ, అన్నాడీఎంకే కుట్ర ఉందని ప్రతిపక్షాలు ఆరోపిస్తున్నాయి. విజయ్ రాజకీయాల్లోకి వస్తాడేమోనన్న భయంతో, వారికి వ్యతిరేకంగా సినిమాల్లో డైలాగ్స్ చెబుతున్నాడని కారణంతో ఇలా ఐటీ రైడ్స్ చేయిస్తున్నారని తీవ్ర విమర్శలు చేస్తున్నారు.

పలువురి మద్దతు..

విజయ్‌ ఇంట్లో ఐటీ అధికారులు సోదాలు చేయడంపై ఆయనకు రాజకీయ నాయకుల మద్దతు పెరుగుతోంది. కాంగ్రెస్‌ పార్టీ నాయకులు, నామ్‌తమిళర్‌ పార్టీ నేత సీమాన్‌, కమ్యూనిస్ట్‌ పార్టీ నాయకులు విజయ్‌కు మద్దతుగా నిలిచారు. ఇలా ఈ వ్యవహారం పూర్తిగా రాజకీయంగా మారిపోయింది.

షూటింగ్‌లో రచ్చ..

విజయ్ ప్రస్తుతం మాష్టర్ చిత్ర షూటింగ్‌లో బిజీగా ఉన్నాడు. ఈ మూవీ షూటింగ్ నైవేలిలోని ఎన్‌ఎల్‌సీ సొరంగం ప్రాంతంలో చిత్రీకరణ జరుగుతున్న సమయంలోనే ఐటీ అధికారులు అక్కడకు వచ్చి ఆయన్ని విచారించారు. తాజాగా ఆ ప్రాంతంలోనే విజయ్ షూటింగ్‌లో పాల్గొంటే బీజేపీ కార్యకర్తలు వచ్చి వ్యతిరేక నినాదాలు చేశారు.

రంగంలోకి ఫ్యాన్స్..

అలా బీజేపీ కార్యకర్తలు షూటింగ్‌కు అడ్డు తగులుతున్న విషయం తెలుసుకున్న ఫ్యాన్స్.. ఆ ప్రాంతానికి చేరుకుని బీజేపీ కార్యకర్తలతో వాగ్వాదానికి దిగారు. అది కాస్తా గొడవకు దారి తీసి రచ్చరచ్చగా మారింది. దీంతో పోలీసులు కలుగుజేసుకుని వ్యవహారాన్ని సద్దుమణిగేలా చేశారు. ఈ సంఘటనతో విజయ్‌ నటిస్తున్న మాస్టర్‌ చిత్ర షూటింగ్‌కు పోలీసుల భద్రతను పెంచినట్టు తెలుస్తోంది.