చేతిలో చిప్పతో మోడీకి అవమానం.. బాహుబలి 'కట్టప్ప' అరెస్ట్ అంటూ వార్తలు!

సత్యరాజ్ అరెస్ట్ అంటూ

సత్యరాజ్ తన పేస్ బుక్ పేజీలో ప్రధాని నరేంద్రమోడీ చేతిలో చిప్ప పట్టుకుని ఉన్న ఫోటోని పోస్ట్ చేసినట్లు వార్తలు వచ్చాయి. అది మార్ఫింగ్ చేసిన ఫోటో. భారత ప్రధానిని అవమానించే విధంగా ఆ ఫోటో ఉండడంతో పోలీసులు సత్యరాజ్ ని అరెస్ట్ చేశారంటూ వార్తలు వచ్చాయి. బాహుబలి కట్టప్ప అరెస్ట్ అంటూ సోషల్ మీడియాలో కూడా ప్రచారం మొదలైంది. కానీ ఇది వాస్తవం కాదు.

అసలేం జరిగిందంటే

భారత ప్రధాని నరేంద్ర మోడీ ఇటీవల తమిళనాడులోని మధురై నగరంలో పర్యటించారు. ప్రధాని పర్యటనని ఎండిఎంకె పార్టీ తీవ్రంగా వ్యతిరేకించింది. మోడీ రాకని నిరసిస్తూ నగరం మొత్తం ఆ పార్టీ నేతలు నిరసనలు వ్యక్తం చేశారు. సోషల్ మీడియాలో కూడా పెద్ద ఎత్తున మోడీకి వ్యతిరేకంగా క్యాంపైనింగ్ నడిచింది. మోడీకి వ్యక్తిరేకంగా ఎండిఎంకె నేత సత్యరాజ్ బాలు సోషల్ మీడియాలో మోడీని అవమానించే విధంగా ఉన్నా మార్ఫింగ్ ఫోటోని పోస్ట్ చేశారు. చేతిలో చిప్ప పట్టుకుని ఉన్న ఫోటో అదే.

పేర్లు ఒకేలా

దీనితో పోలీసులు సత్యరాజ్ బాలుని అరెస్ట్ చేయడం జరిగింది. పేర్లు ఒకే విధంగా ఉండడంతో నటుడు సత్యరాజ్ అరెస్ట్ అయ్యారనే వార్త ప్రచారం జరిగింది. సినీ ప్రముఖులు, ఆయన అభిమానులు కూడా ఆందోళన చెందారు. జరిగిన వాస్తవం తెలుసుకుని అంతా ఊపిరి పీల్చుకున్నారు. కొంత మంది నటుడు సత్యరాజ్ రాత్రంతా పోలీస్ స్టేషన్ లోనే గడిపారని కూడా భ్రమ పడ్డారు. ఈ రోజుల్లో చిన్న విషయం కూడా సోషల్ మీడియాలో పెద్దదిగా మారిపోతోంది.

వందలాది చిత్రాల్లో

నటుడు సత్యరాజ్ దక్షణాది భాషల్లో వందలాది చిత్రాల్లో క్యారెక్టర్ ఆర్టిస్ట్ గా రాణించారు. బాహుబలి మొదటి భాగం తర్వాత కట్టప్ప బాహుబలిని ఎందుకు చంపాడు అనే ప్రశ్నతో ఆయన ఉక్కిరిబిక్కిరి అయ్యారు. హైపర్, మిర్చి, బాహుబలి,బ్రహ్మోత్సవం చిత్రాలు సత్యరాజ్ కు మంచి గుర్తింపుని తీసుకొచ్చాయి. ప్రస్తుతం నాని జెర్సీ చిత్రంలో కూడా సత్యరాజ్ నటిస్తున్నారు.