ఫ్యాన్స్‌కి సారీ చెప్పిన కమల్.. సినిమాల్లో, రాజకీయాల్లో ఒకేసారి కొనసాగలేను.. శంకర్‌నే అడగండి!

మరోసారి క్లారిటీ

కమల్ హాసన్ భారతీయుడు 2 షూటింగ్ కి బ్రేక్ ఇచ్చిన తర్వాత ఈ చిత్రం ఆగిపోయిందంటూ ప్రచారం జరిగింది. ఈ వార్తలని చిత్ర యూనిట్ ఖండించింది. తాజాగా కమల్ హాసన్ కూడా భారతీయుడు 2 ఆగిపోలేదంటూ క్లారిటీ ఇచ్చారు. చాలా రోజులుగా కమల్ హాసన్ నటించబోయే చివరి చిత్రం భారతీయుడు 2నే అని ప్రచారం జరుగుతోంది. దీనిపై కమల్ ఆసక్తికర వ్యాఖ్యలు చేశారు.

శంకర్‌నే అడగండి

భారతీయుడు 2 చిత్రం రాజకీయ అంశాలతో తెరకెక్కుతుందనే వార్తలపై కమల్ స్పందించారు. నేను ప్రస్తుతం ఓ చిత్రంలో నటిస్తున్నా. నా మనసంతా ప్రజలపైనే ఉంది. ఈ చిత్రంలో రాజకీయ అంశాలు ఉన్నాయా లేదా అనే ప్రశ్నపై స్పందించాల్సింది నేను కాదు.. దర్శకుడు. కాబట్టి ఈ ప్రశ్న శంకర్ ని అడగండి అని కమల్ హాసన్ అన్నారు.

అభిమానులు క్షమించాలి

సినిమాల్లో, రాజకీయాల్లో రెండింటిలో కొనసాగే విషయంపై కమల్ మాట్లాడారు. అభిమానులంతా ప్రజా సేవ చేయాలని కోరుకుంటే సినిమాలు ఆపేస్తా. తాను సినిమాల్లో నటించాలని కోరుకునే వారికి ఇది నిరాశ కలిగించొచ్చు. అభిమానులంతా నన్ను క్షమించాలి. సినిమాల్లో, రాజకీయాల్లో ఒకేసారి కొనసాగలేను అని కమల్ అన్నారు. రాజకీయాల్లోకి చాలా ఆలస్యంగా వచ్చాను కాబట్టి అని తొందరగా జరగాలి. నేను చేయాల్సింది చాలా ఉందంటూ కమల్ వ్యాఖ్యానించారు.

వృద్ధుడి గెటప్

ఆ మధ్యన శంకర్ కమల్ హాసన్ గురించి మాట్లాడుతూ.. దాదాపు 22 ఏళ్ల తర్వాత కమల్ భారతీయుడులోని వృద్ధుడి గెటప్ లో కనిపించారు. టెస్ట్ లుక్ కోసం ఫోటో షూట్ చేశా. కమల్ ని ఆ గెటప్ లో చూడగానే నా రోమాలు నిక్కబొడుచుకున్నాయి అని శంకర్ తెలిపారు. ఈ చిత్రంలో కమల్ హాసన్ సరసన క్రేజీ హీరోయిన్ కాజల్ అగర్వాల్ నటిస్తోంది. లైకా ప్రొడక్షన్స్ సంస్థ ఈ చిత్రాన్ని నిర్మిస్తోంది.