అమెరికాలో రజనీకాంత్ ‘లింగా’ రికార్డ్ర్ రిలీజ్

హైదరాబాద్: రజనీకాంత్ హీరోగా తెరకెక్కుతున్న ‘లింగా' చిత్రం ఆయన పుట్టినరోజు సందర్భంగా డిసెంబర్ 12న విడుదల చేసేందుకు ఏర్పాట్లు చేస్తున్న సంగతి తెలిసిందే. ఇప్పటికే విడుదలైన ట్రైలర్స్, ఫోటోస్ సినిమాపై అంచనాలు భారీగా పెంచేసాయి. విడుదల ముందే బిజినెస్ భారీగా జరుగుతోంది. ఈ చిత్రం ఓవర్సీస్ రైట్స్ అరుణ్ పాండ్యన్‌కు చెందిన ఎ అండ్ పి గ్రూపు, సంజయ్ వధ్వాకు చెందిన ఎపి ఇంటర్నేషనల్ సంస్థలు దక్కించుకున్నాయి.

తాజాగా అందుతున్న సమాచారం ప్రకారం ఈ చిత్రం అమెరికాలో 200లకు పైగా స్క్రీన్లలో విడుదలవుతున్నట్లు తెలుస్తోంది. యూఎస్ఏలో లీడింగ్ సంస్థ అయిన క్లాసిక్ ఎంటర్టెన్మెంట్స్ వారు దీన్ని విడుదల చేస్తున్నారు. ఈ మేరకు అరుణ్ పాండ్యన్‌కు, ఆ సంస్థకు మధ్య ఒప్పందం కుదిరినట్లు తెలుస్తోంది.

క్లాసిక్ ఎంటర్టెన్మెంట్స్ సంస్థ వారు ఈ చిత్రాన్ని అత్యంత నాణ్యతతో కూడిన బిగ్ డి, ఎక్స్ డి, ఎక్స్ ఎల్, డాల్బీ అట్మాస్ ఫార్మాట్లలో విడుదల చేస్తున్నారు. త్వరలోనే రిలీజ్ లొకేషన్స్ డిటేల్స్ వెల్లడి కానున్నాయి. ఆ వెంటనే అడ్వాన్స్ బుకింగ్ ప్రారంభం అవుతాయి.

ఇటీవలే ఈ చిత్రం వరల్డ్ వైడ్ రిలీజ్ హక్కులను ఈరోస్ ఇంటర్నేషనల్ సంస్థ 165 కోట్లకు కొనుగోలు చేసిన సంగతి తెలిసిందే. ఈ చిత్రంలో రజనీకాంత్ ద్విపాత్రాభినయం చేస్తున్నారు. అనుష్క, సోనాక్షి సిన్హా హీరోయిన్లు. ఇటీవల విడుదలైన టీజర్ సినిమాపై అంచనాలు మరింత పెంచాయి. ఈ చిత్రానికి ఏఆర్ రెహహాన్ సంగీతం అందిస్తున్నారు. రత్నవేలు సినిమాటోగ్రఫీ అందిస్తున్నాడు. ఇండియాలోని అతి ఉత్తమమైన సాంకేతిక నిపుణులు పని చేస్తున్న ఈ చిత్రం మొదటి లుక్ విడుదలైనప్పటి నుండి రెస్పాన్స్ అదిరిపోతోంది.

రజనీ-రవికుమార్ కాంబినేషన్ కూడా ఇంత క్రేజ్ పెరగడానికి మరో కారణం. గతంలో వీరి కాంబినేషన్‌లో వచ్చిన ముత్తు, అరుణాచలం, న‌ర‌సింహ చిత్రాలు ఎంత పెద్ద విజయాలు సాధించాయో అందరికి తెలిసిందే. మరి ఇపుడు ‘లింగా' చిత్రం ఎలాంటి రికార్డులు సృష్టించబోతోందో చూడాలి.