Baba సంచలనం సృష్టించనున్న బాబా.. రజనీకాంత్ మూవీ ప్యాన్ వరల్డ్ రిలీజ్

బాక్సాఫీస్ వద్ద డిజాస్టర్‌గా

రజనీకాంత్ నిర్మాతగా, కథ, స్క్రీన్ ప్లే, నటించిన బాబా చిత్రం రిలీజ్‌కు ముందు భారీ అంచనాలు నెలకొన్నాయి. అయితే రిలీజ్ తర్వాత అభిమానులు పెదవి విరియడంతో సినిమాకు అంత స్పందన దక్కలేదు. దాంతో దర్శకుడు సురేష్ కృష్ణ, రజనీకాంత్ కాంబినేషన్‌లో వచ్చిన ఈ చిత్రం బాక్సాఫీస్ వద్ద దారుణంగా బోల్తా కొట్టింది. భారీ అంచనాలను చేరుకోలేకపోవడంతో డిజాస్టర్‌గా మారింది.

రజనీకాంత్ బర్త్ డే రోజున

అయితే బాబా సినిమా బాక్సాఫీస్ వద్ద డిజాస్టర్‌గా నిలిచిప్పటికీ.. 20 ఏళ్ల తర్వాత కూడా పాటలు, డైలాగ్ ఇంకా అభిమానులను వెంటాడుతున్నది. ఈ ఏడాది రజనీకాంత్ పుట్టిన రోజు అంటే డిసెంబర్ 12 తేదీన రీ రిలీజ్ చేయాలని సంచలనం నిర్ణయం తీసుకొన్నారు. ఈ సినిమాను ఈతరం ప్రేక్షకుల అంచనాలకు తగినట్టుగా పోస్ట్ ప్రొడక్షన్ పనులను కూడా చేపట్టారు.

రజనీకాంత్ మరోసారి డబ్బింగ్

బాబా సినిమాకు సంబంధించిన డిజిటల్ వెర్షన్‌ను కూడా తీర్చిదిద్దుతున్నారు. డీఐ వర్క్ కూడా ఫినిష్ చేసినట్టు సమాచారం. ప్రత్యేకంగా ఏఆర్ రెహ్మాన్ మ్యూజిక్ మెరుగులు మరోసారి దిద్దుతున్నారు. ఈ సినిమాలో కొన్ని కీలక సన్నివేశాలకు రజనీకాంత్ మరోసారి డబ్బింగ్ చెప్పారు. మిగితా సాంకేతిక విభాగాలు నిపుణులు తమ ప్రతిభతో ఈ సినిమాను మరింత అందంగా తీర్చి దిద్దుతున్నట్టు సమాచారం.

భారీగా, బ్రహ్మండంగా రిలీజ్

బాబా రిలీజ్‌ను భారీగా, బ్రహ్మండంగా అభిమానులు ప్లాన్ చేస్తున్నారు. ఈ సినిమా రిలీజ్ కోసం ప్రత్యేకంగా వనరులను సమీకరిస్తున్నారు. ఈ సినిమాతో వచ్చే ఆదాయాన్ని అభిమానులు, సామాజిక కార్యక్రమాలకు కోసం వెచ్చించాలని రజనీకాంత్ అభిమానులు ప్లాన్ చేశారు. ఇప్పటికే ఈ సినిమా పోస్ట్ ప్రొడక్షన్, ఇతర కార్యక్రమాలు తుది దశకు చేరుకొన్నాయి.

పాన్ వరల్డ్ మూవీగా

రజనీకాంత్ అన్నితానై రూపొందించిన బాబాను ప్రపంచవ్యాప్తంగా రీ రిలీజ్ చేసేందుకు ఏర్పాట్లు పూర్తయ్యాయి. తెలుగు, హిందీ, తమిళ, మలయాళం, కన్నడ భాషలతోపాటు పాన్ ఇండియా మూవీగా రిలీజ్ చేస్తున్నారు. అంతేకాకుండా అమెరికా, మలేషియా, యూఏఈ, సింగపూర్ ఇతర దేశాల్లో రిలీజ్ చేస్తున్నారు.