రవితేజ తెలుగులో దుమ్ము-తమిళంలో దమ్ము

రవితేజ త్వరలో టాలీవుడ్ నుండి కోలీవుడ్ కి జంప్ కాబోతున్నాడు. ప్రస్తుతం ఆయన నటిస్తున్న 'శంభో శివ శంభో" చిత్రానికి దర్శకత్వం వహిస్తున్న సముదిరకని డైరెక్షన్ లో ఈ తమిళ చిత్రముంటుంది. తమిళంలో సంచలన విజయం నమోదుచేసుకున్న 'సుబ్రహ్మణ్యపురం" చిత్రం తెలుగులో 'అనంతరపురం" గా అనువాదమైంది. కలర్స్ స్వాతి, జై, చిత్ర దర్శకుడు శశికుమార్ ముఖ్యపాత్రలు పోషించారు. ఇందులో విలన్ గా నటించిన సముదిరకని ఈ తర్వాత 'నాడోడిగల్" అనే సూపర్ హిట్ చిత్రానికి దర్శకత్వం వహించారు.

నాడోడిగల్ చిత్రాన్ని తెలుగులో ఇదే దర్శకుడి నిర్దేశకత్వంలో 'శంభో శివ శంభో" పేరుతో రీమేక్ చేస్తున్నారు. రవితేజ, అల్లరి నరేష్, శివబాలాజీ, ప్రియమణి ముఖ్య తారాగణంగా నటిస్తున్న ఈ చిత్రం షూటింగ్ 75 శాతం పూర్తి చేసుకొన్నది. రవితేజ నటన దర్శకుణ్ణి ఆకట్టుకొన్నది దాంతో దర్శకుడు రవితేజను తమిళ చిత్రరంగానికి పరిచయం చేయాలనుకుంటున్నారని తెలిసింది. రవితేజ తనదైన ఎనర్జిటిక్ యాక్షన్ తో తమిళ ప్రేక్షకుల ప్రశంసలు అందుకొంటాడని ఆశిద్దాం.