హోమ్

Tamil

సౌత్ స్టార్ విక్రమ్ హీరోగా 'మహావీర్ కర్ణ' అనే భారీ చిత్రం ప్రారంభం కాబోతున్న సంగతి తెలిసిందే. దర్శకుడు ఆర్‌ఎస్ విమల్ రూ. 300 కోట్ల పైచిలుకు బడ్జెట్‌తో ఈ సినిమా రూపొందించబోతున్నారు. ఈ ప్రాజెక్టుకు సంబంధించి తిరువనంతపురంలోని పద్మనాభస్వామి ఆలయంలో కొన్ని రోజుల క్రితమే ప్రత్యేక పూజలు నిర్వహించారు.

ఈ మెగా బడ్జెట్ మూవీలో ప్రముఖ మలయాళ నటుడు సురేష్ గోపీ కీలకమైన పాత్ర పోషించబోతున్నట్లు తెలుస్తోంది. ఈ చిత్రంలో ఆయన దుర్యోధనుడిగా కనిపించబోతున్నారట. ఈ చిత్రం తమిళం, తెలుగు, హిందీ మూడు భాషల్లో రూపొందిస్తున్నారు.

'మహావీర్ కర్ణ' చిత్రానికి సంబంధించి రామోజీ ఫిల్మ్ సిటీలో భారీ సెట్ వేశారు. 30 అడుగుల ఎత్తైన రథం సెట్ సినిమాలో ప్రత్యేక ఆకర్షణగా నిలుస్తుందట. ఈ రథంలో అలంకరణగా ఉండే గంటకు ఇటీవల కేరళ పద్మనాభస్వామి ఆలయంలో ప్రత్యేక పూజలు నిర్వహించారు.

ఈ చిత్రంలో టైటిల్ రోల్ చేస్తున్న విక్రమ్ జనవరి, 2019లో సెట్స్‌లో జాయిన్ కాబోతున్నారు. ప్రస్తుతం సినిమాలో పాత్రకు తగిన విధంగా తన శరీరాకృతిని మార్చుకోవడంలో బిజీగా ఉన్నారు. 2020 ప్రథమార్థం నాటికి సినిమాను ప్రేక్షకుల ముందుకు తెచ్చేందుకు ప్లాన్ చేస్తున్నారు.