పవన్ కల్యాణ్‌ దారిలో విజయ్.. ప్రజా సీఎం అంటూ ఫ్యాన్స్ హంగామా.. హోరెత్తిన బర్త్ డే వేడుకలు!

తమిళనాడులో పవర్‌ స్టార్‌గా

ప్రముఖ దర్శక, నిర్మాత ఎస్ఏ చంద్రశేఖర్ తనయుడిగా తమిళ చిత్ర పరిశ్రమకు పరిచయమైన విజయ్ కొద్దికాలంలో తమిళనాడులో పవర్‌స్టార్‌గా మారారు. పవన్ కల్యాణ్ నటించిన చిత్రాలను రీమేక్ చేస్తూ క్రేజీ స్టార్‌గా భారీ మొత్తంలో అభిమానులను సంపాదించుకొన్నారు. వరుస హిట్లు ఇస్తూ దక్షిణాదిలో దూసుకెళ్లున్నారు. ఇటీవల కాలంలో విజయ్ రాజకీయాలపై ఆసక్తి ఉన్నారనే విధంగా ఇంట్రెస్టింగ్ కామెంట్లు చేస్తున్నారు.

రా.. రాజకీయాల్లోకి రమ్మని

తాజాగా విజయ్ 45వ బర్త్ డే వేడుకల సందర్బంగా ఫ్యాన్స్ హంగామా స్పష్టంగా సంకేతాలిచ్చింది. ప్రజా సీఎం, రేపటి సీఎం అనే నినాదాలతో హోరెత్తించారు. దళపతి పాలిటిక్స్‌లోకి రా అంటూ పోస్టర్లు కట్టి ఆహ్వానం పలికారు. 2011లో జరిగిన ఎన్నికల ముందే విజయ్ రాజకీయాల్లోకి వస్తారనే ప్రచారం జరిగింది. అయితే అనూహ్యంగా ఆయన ఎన్నాడీఎంకేకు మద్దతు తెలియజేయడం అభిమానులను నిరాశ పరిచింది.

పాలిటిక్స్‌పై విజయ్ నజర్

తమిళనాడులో పాగా వేసేందుకు ప్రయత్నిస్తున్న బీజేపీపై మెర్సల్, తదితర చిత్రాల్లో సెటైర్లు వేయడంతో మరోసారి విజయ్ దృష్టంతా రాజకీయాలపై ఉందనే మాట వినిపించింది. కాగా తాజా బర్త్ డే నేపథ్యంలో అధికార పీఠం మనదే.. దానిని అధిరోహిద్దాం అంటూ అభిమానులు నినాదాలు చేయడం సినీ వర్గాల్లో చర్చనీయాంశమైంది.

బిజిల్ ఫస్ట్‌లుక్‌తో

తాజాగా మెర్సల్ చిత్రాన్ని రూపొందించిన అట్లీ దర్శకత్వంలో విజయ్ నటిస్తున్నాడు. ఈ సినిమా విజయ్ కెరీర్‌లో 63వది. ఈ సినిమాకు బిజిల్ అనే టైటిల్‌ను ఖరారు చేశారు. విజయ్ జన్మదినం సందర్భంగా ఫస్ట్ లుక్‌ను విడుదల చేశారు. ఈ చిత్రంలో ద్విపాత్రాభినయం చేస్తున్న విజయ్.. గ్యాంగ్‌స్టర్‌గా, ఫుట్‌బాల్ ఆటగాడిగా కనిపిస్తారు. బిజిల్ తాజా పోస్టర్ ప్రస్తుతం సోషల్ మీడియాలో వైరల్‌గా మారింది.