Bigg Boss Telugu OTT: బిగ్ బాస్ ఓటీటీలోకి మాజీ కంటెస్టెంట్.. అప్పటి ఫైనలిస్టుకు బంపర్ ఆఫర్

సూపర్ హిట్.. ఐదు సీజన్లు పూర్తి

'బిగ్ బ్రదర్' అనే ఇంగ్లీష్ రియాలిటీ షో ఆధారంగా హిందీలో 'బిగ్ బాస్' ప్రారంభం అయింది. ఆ తర్వాత దేశంలోని చాలా భాషల్లో ఇది మొదలైంది. అలా తెలుగులోకి కూడా పరిచయం అయింది. సాదాసీదా వచ్చినప్పటికీ.. తక్కువ టైమ్‌లోనే ప్రేక్షకుల హృదయాలను దోచుకున్న ఈ షో ఒకటి కాదు.. రెండు కాదు.. ఏకంగా ఐదు సీజన్లను సక్సెస్‌ఫుల్‌గా పూర్తి చేసేసుకుంది.

హిందీలో మాదిరిగా ఇక్కడ రెడీ

తెలుగులో బిగ్ బాస్ ఐదో సీజన్‌ గ్రాండ్ ఫినాలే ఎపిసోడ్‌ రెండు వారాల క్రితమే ముగిసింది. ఈ వేదికపైనే షో నిర్వహకులు అదిరిపోయే ప్రకటన చేశారు. అందులో బిగ్ బాస్ తెలుగు ఓటీటీ సీజన్ వన్ ప్రారంభం అవుతుందని పేర్కొన్నారు. ఇది త్వరలోనే మొదలు కానుందని కూడా వెల్లడించారు. ఆ తర్వాత కూడా హోస్ట్ అక్కినేని నాగార్జున దీని గురించి మాట్లాడి హుషారు పెంచేశారు.

ఓటీటీ వెర్షన్‌‌ రెడీ చేస్తోన్న టీమ్

హిందీలో బిగ్ బాస్ ఓటీటీ వెర్షన్ కూడా సూపర్ హిట్ అయింది. ఈ నేపథ్యంలోనే తెలుగులో కూడా దీన్ని పరిచయం చేయబోతున్నారు. బిగ్ బాస్ ఓటీటీ తెలుగు మొదటి సీజన్‌ ఫిబ్రవరి నుంచి ప్రారంభం అవుతుంది. దీన్ని కూడా టాలీవుడ్ స్టార్ హీరో అక్కినేని నాగార్జున హోస్ట్ చేయనున్నారు. ఈ విషయాన్ని ఆయనే చెప్పారు. దీనిపై అధికారిక ప్రకటన కూడా త్వరలోనే రానుంది.

అందులోనే ప్రసారం.. రోజంతా

బిగ్ బాస్ షో మాదిరిగా ఓటీటీ వెర్షన్ టీవీ ఛానెల్‌లో ప్రసారం కాదు. దీన్ని డిస్నీ ప్లస్ హాట్‌స్టార్‌లో స్ట్రీమింగ్ చేయబోతున్నారు. అంతేకాదు, 24 గంటలూ ఇది ప్రసారం అవుతూనే ఉంటుంది. దీంతో కంటెస్టెంట్ల గురించి మరింత సమాచారం తెలియనుంది. వారాంతాల్లో అక్కినేని నాగార్జున దీన్ని హోస్ట్ చేస్తారు. ఇక, ఇందులో ఎలిమినేషన్ ఎప్పుడైనా జరిగే ఛాన్స్ ఉంటుందని టాక్.

మొదలైన కంటెస్టెంట్ల ఎంపిక

బిగ్ బాస్ ఐదో సీజన్ పూర్తవడంతో ఇప్పుడందరూ ఓటీటీ వెర్షన్‌పై దృష్టి సారించారు. దీంతో త్వరలోనే ఈ సీజన్ ప్రారంభం కాబోతుండడంతో.. ఇందులో పలానా సెలెబ్రిటీ కంటెస్టెంట్‌గా ఎంట్రీ ఇస్తున్నారని జోరుగా ప్రచారం జరుగుతోంది. ఫలితంగా చాలా రోజులుగా బిగ్ బాస్ ఓటీటీ తరచూ వార్తల్లో నిలుస్తూనే ఉంటోంది. అలాగే, ఎంతో మంది పేర్లు కూడా తెరపైకి వస్తున్నాయి కూడా.

మాజీ కంటెస్టెంట్‌కు అవకాశం

బిగ్ బాస్ తెలుగు ఓటీటీ వెర్షన్‌కు సంబంధించి ఎన్నో సర్‌ప్రైజ్‌లు ఉండబోతున్నాయని తెలుస్తోంది. కంటెస్టెంట్ల ఎంపిక దగ్గర నుంచి ఎలిమినేషన్ వరకు ఊహించని పరిణామాలను చూపించబోతున్నారట. మరీ ముఖ్యంగా ఇందులో గతంలో బిగ్ బాస్ షోలో పాల్గొన్న వాళ్లను కూడా తీసుకుంటున్నారని తెలిసింది. ఇందులో భాగంగానే అఖిల్ సార్థక్‌కు అవకాశం ఇస్తున్నారట.

ఫైనలిస్టుకు అదిరిపోయే ఆఫర్

బిగ్ బాస్ నాలుగో సీజన్‌లో ఫినాలేకు చేరుకోవడంతో పాటు ఏకంగా రన్నరప్‌గా నిలిచిన అఖిల్ సార్థక్‌తో షో నిర్వహకులు తాజాగా చర్చలు జరిపారని తెలుస్తోంది. ఓటీటీ వెర్షన్‌లోకి కంటెస్టెంట్‌గా వచ్చేందుకు అతడికి బంపర్ ఆఫర్ ఇచ్చినట్లు బుల్లితెర వర్గాల్లో ఓ న్యూస్ తెగ వైరల్ అవుతోంది. అయితే, దీనికి అతడు ఒప్పుకున్నాడా? లేదా? అన్నది మాత్రం సస్పెన్స్‌గా మారిపోయింది.