ఆ కంటెస్టెంట్‌కు నాగబాబు సపోర్ట్: బిడ్డ లాంటి వాడంటూ కామెంట్.. అభిజీత్ గెలిచినట్లే తను కూడా!

ఎన్నో అంచనాలతో వచ్చిన ఐదో సీజన్

మిగిలిన భాషలతో పోల్చితే తెలుగులో ప్రసారం అయ్యే బిగ్ బాస్‌కు మాత్రమే భారీ స్థాయిలో రెస్పాన్స్ దక్కుతోంది. సామాన్యులే కాదు.. దీనికి సెలెబ్రిటీలు కూడా అభిమానులుగా మారిపోయారు. ఫలితంగా ఈ షోపై భారీ అంచనాలు కూడా ఏర్పడ్డాయి. ఈ నేపథ్యంలోనే ఇటీవలే ఐదో సీజన్ అంగరంగ వైభవంగా ప్రారంభం అయింది. దీన్ని కూడా కింగ్ అక్కినేని నాగార్జున హోస్ట్ చేస్తున్న విషయం తెలిసిందే.

ఒకేసారి అంత మంది... స్పెషల్ ఒక్కరే

బిగ్ బాస్ ఐదో సీజన్‌లో సిరి హన్మంత్, వీజే సన్నీ, షణ్ముక్ జశ్వంత్, ప్రముఖ నటి ప్రియ, యాంకర్ రవి, నటరాజ్ మాస్టర్, ప్రియాంక సింగ్, లహరి, సింగర్ శ్రీరామచంద్ర, సరయు, జస్వంత్, శ్వేతా వర్మ, మానస్ షా, ఉమాదేవి, ఆర్జే కాజల్, లోబో, హమీదా, ఆనీ మాస్టర్, విశ్వలు కంటెస్టెంట్లుగా ఎంట్రీ ఇచ్చారు. ఇందులో 9 మంది ఆడవాళ్లు, 9 మంది మగవాళ్లు ఉండగా.. ఒక ట్రాన్స్‌జెండర్ ప్రియాంక కూడా వచ్చింది.

ఆదర్శంగా ఉంటూ... అందరి దృష్టిలో

జబర్ధస్త్‌లో లేడీ గెటప్‌లు వేసుకుంటూ మంచి గుర్తింపును అందుకున్న సాయితేజ.. జెండర్‌ను మార్చుకోవాలన్న కోరికతో ఆ తర్వాత సర్జరీ చేయించుకుని అమ్మాయిలా మారిపోయాడు. ఆ సమయంలో ఎన్నో సమస్యలను ఎదుర్కొన్నాడు. ఇలాంటి సమయంలో ప్రియాంక సింగ్‌కు బిగ్ బాస్ ఆఫర్ వచ్చింది. హౌస్‌లోకి ఎంట్రీ ఇస్తోన్న సమయంలోనే ఎంతో ఆదర్శవంతంగా మాట్లాడి అందరి దృష్టిలో పడిపోయింది.

ప్రియాంకకు సపోర్ట్ చేస్తున్న నాగబాబు

బిగ్ బాస్ షోపై సామాన్య ప్రేక్షకుల్లోనే కాకుండా.. సెలెబ్రిటీల్లోనూ ఆసక్తి బాగా ఉంటోంది. అలా ఈ షోను ఫాలో అయ్యే వారిలో మెగా బ్రదర్ నాగబాబు ఒకరు. ప్రతి సీజన్‌నూ చూసిన ఆయన.. పలువురు కంటెస్టెంట్లకు మద్దతు కూడా ప్రకటిస్తూ వస్తున్నారు. ఈ క్రమంలోనే ప్రస్తుతం జరుగుతోన్న ఐదో సీజన్‌లో ప్రియాంక సింగ్‌కు నాగబాబు మద్దతు ప్రకటించారు. ఈ మేరకు ఓ వీడియోను కూడా విడుదల చేసి పలు విషయాలు వెల్లడించారు.

అప్పుడే సపోర్ట్ చేశాను అంటూ చెప్పి

ప్రియాంక సింగ్ గురించి నాగబాబు మాట్లాడుతూ.. 'సాయితేజకు పైకి అబ్బాయిలా ఉన్నా.. లోపల అమ్మాయిల ఫీలింగ్స్ ఉండేవి. అందుకే సర్జరీ చేయించుకున్నాడు. ఆ సమయంలో ఎన్నో కష్టాలు అనుభవించినప్పటికీ.. ఎంతో ధైర్యం చేశాడని అనిపించింది. అందుకే అతడికి సపోర్ట్ చేశా. జబర్ధస్త్‌లో మానేసిన తర్వాత అదిరిందికి తీసుకున్నా. దాని తర్వాత సొంతంగా వీడియోలు చేస్తూ ఎదుగుతున్నాడు' అని చెప్పారాయన.

వాళ్లంతా తెలుసు.. తను గెలవాలంటూ

ఇక, ఐదో సీజన్‌లో తనకు చాలా మంది తెలుసన్న నాగబాబు.. ప్రియాంక గెలిస్తే బాగుంటుందని అభిప్రాయపడ్డారు. 'ఈ సీజన్‌లో యాంకర్ రవి, షణ్ముఖ్, శ్రీరాం, ఆనీ మాస్టర్, నటి ప్రియ, నటరాజ్ మాస్టర్ ఇలా చాలా మంది తెలిసిన వాళ్లే ఉన్నారు. కానీ, ప్రియాంక గెలిస్తే చూడాలని ఉంది. కెమెరా ముందు ఎలా ఉన్నాడో.. బయట కూడా అలానే ఉంటాడు. తను గెలిచినా గెలవకపోయినా నేను మాత్రం సపోర్ట్ చేస్తున్నా' అంటూ చెప్పారు.

బిడ్డ లాంటి వాడు.. తను గెలిస్తే వాళ్లే

ఇప్పుడున్న వారిలో ప్రియాంక సింగ్ ఎంతో స్పెషల్ అంటూ చెప్పిన నాగబాబు 'ట్రాన్స్ జెండర్స్‌ కూడా ఈ సమాజంలో ఓ వర్గం వారే. వారికి ప్రతినిధిగా సాయి రావడం ఎంతో సంతోషంగా ఉంది. వెకిలి నవ్వు, ప్రవర్తన వంటివి ఉండవు. తను గెలిస్తే ఒక కమ్యూనిటీ గెలిచినట్లు అవుతుంది. అందుకే అందరూ తనకు మద్దతిచ్చి గెలవకపోయినా హౌస్‌లో ఉండేలా చేయండి' అంటూ ప్రేక్షకులను కోరారాయన.

Recommended Video

Maha Samudram Movie Team On 'Cheppake Cheppake' Song

అప్పుడు అభిజీత్ గెలిచినట్లే ఇప్పుడు

మెగా బ్రదర్ నాగబాబు గత సీజన్‌లో అభిజీత్‌కు మద్దతు తెలిపారు. అతడి గురించి కూడా వీడియోలు చేయడం.. పోస్టులు పెట్టడం వంటివి చేశారు. అందుకు అనుగుణంగానే నాలుగో సీజన్‌లో ఈ యంగ్ హీరో విజేతగా నిలిచాడు. ఈ నేపథ్యంలో నాగబాబు ఇప్పుడు ప్రియాంకకు మద్దతు తెలిపారు. దీంతో తను కూడా విజేతగా నిలుస్తుందా అనే చర్చ జరుగుతోంది. ఇక, మెగా అభిమానులంతా ప్రియాంకకు సపోర్ట్ చేస్తూ పోస్టులు పెడుతున్నారు.