జెమినీ టీవీలో ‘బోల్ బేబీ బోల్’

By Bojja Kumar

Published: Monday, September 3, 2012, 16:41 [IST]

హైదరాబాద్: బుల్లి తెరపై రియాల్టీ షోల జోరు ఈ మధ్య బాగా పెరిగి పోయింది. ఈ నేపథ్యంలో జెమినీ టీవీలో మరో మ్యూజిక్ గేమ్ షో సెప్టెంబర్ 1న ప్రారంభం అయింది. 'బోల్ బేబీ బోల్' పేరుతో ప్రారంభమైన ఈ గేమ్ షో 24 ఎపిసోడ్ల పాటు సాగుతుంది. ఫైనల్‌లో గెలుపొందిన వారికి రూ. 25 లక్షల ఫ్రైజ్ మనీ దక్కనుంది. ఇంటిల్లి పాదికీ వినోదం పంచేలా ఈ గేమ్ షోను రూపొందిస్తున్నారు.

ప్రముఖ సంగీత దర్శకుడు కోటి సారథ్యం వహిస్తున్న ఈ కార్యక్రమంలో...షకలక బేబీ అంటూ, నేపాడితే లోకమే ఆడదా అని సంగీత ప్రియులను మంత్ర ముగ్దుల్ని చేసిన వసుంధరాదాస్ తొలిసారిగా జడ్జిగా వ్యవహరిస్తుండగా... వర్ధమాన సంగీత దర్శకుడు, గాయకుడు హేమచంద్ర, వర్ధమాన గాయని శ్రావణ భార్గవి యాంకరింగ్ చేస్తున్నారు.

పలువరు టాలీవుడ్ ప్లేబ్యాక్ సింగర్స్ సారథ్యంలో 14 సంవత్సరాల లోపు ఆణిముత్యాల్లాంటి చిన్నారులతో ఇంటిల్లిపాదినీ ఆకట్టుకునేలా బోల్ బేబీ బోల్ కార్యక్రమాన్ని ప్లాన్ చేసారు. ప్రేక్షకులకు బోర్ కొట్టకుండా ప్రతి ఎపిసోడ్ లో రసవత్తరమైన పోటీ, ప్రతి ఏపిసోడ్ కీ లక్ష రూపాయల ఫ్రైజ్ మనీ అందజేస్తున్నారు.

ఈ కార్యక్రమంలో కోకిలని మరిపించే అఖిల, సంగీతంలో చిచ్చర పిడుగు శ్రీలలిత, పాటతో కట్టిపడేసే ప్రవస్తి, అందరినీ మెప్పించే షణ్ముక్, ప్రత్యూష, ప్రతీక్, సాయిదేవ హర్ష, సింధూజ ఇలా అంతా పోటాపోటీగా పాడే చిన్నారులతో బుల్లితెరపై ప్రేక్షకులకు సరికొత్త అనుభూతిని పంచడం ఖాయమని నిర్వాహకులు అంటున్నారు.

More from Filmibeat