Gundeninda Gudigantalu April 10th Episode: మీనా కిడ్నాప్, రోహిణి సైకోయిజం, గుణ ప్రతీకారం, కష్టాల్లో బాలు

photo courtesy jiohotstar

Gundeninda Gudigantalu: గుండె నిండా గుడిగంటలు గురువారం ఎపిసోడ్ హై వోల్టేజ్ డ్రామాతో సాగి ప్రేక్షకులను ఉత్కంఠకు గురి చేసింది. చిన్న సంఘటనగా మొదలైన విషయం, ఒక్కసారిగా కుటుంబాన్ని కుదిపేసే స్థాయికి చేరి కథలో కీలక మలుపు తీసుకొచ్చింది. ప్రభావతి ఖరీదైన చీరలు కొనాలని నిర్ణయించుకుని రాధిక అమ్మను పిలిపించడం నుంచి ఈ డ్రామా ప్రారంభమైంది. ఒక్కో చీర ధర నలభై వేల వరకు ఉండటంతో ఆశ్చర్యపోయినా, తన దగ్గర రెండు లక్షలు ఉన్నాయని చెప్పి కొనాలనుకోవడం పరిస్థితిని ఆసక్తికరంగా మార్చింది. అయితే అసలు ట్విస్ట్ అక్కడే మొదలైంది. మీనాక్షి డబ్బు తీసుకురావడానికి వెళ్లినప్పుడు డబ్బు కనిపించకపోవడంతో షాక్‌కు గురై పడిపోవడం, ప్రభావతి కూడా అదే షాక్‌తో కుప్పకూలడం ఇంట్లో టెన్షన్ పెంచింది. ఇద్దరూ వెతికినా డబ్బు కనిపించకపోవడంతో అనుమానాలు మొదలయ్యాయి. "వంటగదిలో మీనా మాత్రమే ఉంది" అనే కారణంతో ప్రభావతి అనుమానం నేరుగా మీనా మీద పడటం కథను మలుపు తిప్పింది.

ఇక మరోవైపు రవి-శృతి ట్రాక్‌లో కూడా ఘర్షణ జరిగింది. రవి మోసం చేశాడని అనుకున్న శృతి కోపంతో రియాక్ట్ అవుతుంది. అయితే నీతూ "ఏప్రిల్ ఫూల్" అంటూ అసలు విషయం చెప్పడంతో అపార్థం తొలగిపోతుంది. దీంతో రవి-శృతి మధ్య మళ్లీ ప్రేమ వాతావరణం నెలకొంటుంది. బాలు-మీనా మధ్య రొమాంటిక్ ట్రాక్ కూడా ఈ ఎపిసోడ్‌లో ప్రత్యేక ఆకర్షణగా నిలిచింది. బాలు సరదాగా మీనాను ఆటపట్టించడం, గిఫ్ట్‌గా చీర ఇవ్వడం వంటి సన్నివేశాలు ప్రేక్షకులను ఆకట్టుకున్నాయి. కానీ ఈ ఆనందం ఎక్కువసేపు నిలవలేదు. అర్జెంట్ పని కారణంగా బాలు వైజాగ్ వెళ్లాల్సి రావడంతో మీనా ఆందోళన చెందుతుంది. బాలు ధైర్యం చెప్పినా, అతను వెళ్లిపోయిన తర్వాత ఇంట్లో పరిస్థితులు పూర్తిగా మారిపోతాయి.

ప్రభావతి ఇంటికి వచ్చి మీనాపై నేరుగా దొంగతనం ఆరోపణలు చేయడం ఎపిసోడ్‌కు హై వోల్టేజ్‌ను తీసుకొచ్చింది. "రెండు లక్షలు నువ్వే తీసుకున్నావ్" అంటూ తీవ్రంగా మాట్లాడటం, మీనా కుటుంబాన్ని అవమానించడం పరిస్థితిని మరింత దిగజార్చింది. మీనా ఎంత చెప్పినా వినకపోవడం, ఆమెను కొట్టడానికి కూడా ప్రయత్నించడం ఉద్రిక్తతను పెంచింది. ఈ సమయంలో సత్యం వచ్చి ప్రభావతిని గట్టిగా ఆపడం కీలక సన్నివేశంగా నిలిచింది. శృతి, రవి మీనాకు సపోర్ట్‌గా నిలవడం కథలో మరో ముఖ్యమైన అంశం. "ముందు నిజం తెలుసుకోండి" అంటూ శృతి స్పందించడం, రవి కూడా మీనా నిర్దోషిత్వాన్ని నమ్మడం కథకు బలం ఇచ్చాయి. అయితే రోహిణి మాత్రం ప్రభావతికి మద్దతుగా నిలవడం కొత్త అనుమానాలకు దారి తీసింది.

ఇక మీనా తీవ్రంగా బాధపడుతూ, ఈ సమస్యకు ముగింపు కోసం పోలీస్ కంప్లైంట్ ఇవ్వాలని నిర్ణయించడం కథను మరింత ఆసక్తికరంగా మార్చింది. ఈ విషయం విన్న రోహిణి భయపడుతూ, వెంటనే గుణకు ఫోన్ చేసి డబ్బు ఏర్పాటు చేయాలని ప్రయత్నించడం మరో పెద్ద ట్విస్ట్‌గా నిలిచింది. గుణ "నేను చూసుకుంటా" అని చెప్పడంతో కథ సస్పెన్స్‌తో ముగిసింది. మొత్తంగా ఈ ఎపిసోడ్‌లో భావోద్వేగాలు, అనుమానాలు, ఘర్షణలు అన్ని కలిపి కథను కీలక మలుపు వద్ద నిలిపాయి. ఇక మీనా నిజంగా పోలీస్ స్టేషన్‌కు వెళ్తుందా? బాలు వచ్చాక అసలు నిజం బయటపడుతుందా? రోహిణి రహస్యం బయటకు వస్తుందా? అనే ఆసక్తితో తదుపరి ఎపిసోడ్ కోసం ప్రేక్షకులు ఎదురుచూస్తున్నారు.

శుక్రవారం ప్రసారమైన ఎపిసోడ్ ఉత్కంఠభరితంగా, అనూహ్య మలుపులతో సాగింది. కథలో కీలకమైన మలుపు రోహిణీ చేసిన దొంగతనం చుట్టూనే తిరుగుతూ, ఆమె భయం, ఆందోళనను బలంగా చూపించింది. తాను చేసిన తప్పు ఎప్పుడైనా బయటపడుతుందనే భయంతో రోహిణీ తీవ్ర టెన్షన్‌కు గురవుతుంది. ముఖ్యంగా బాలు ఊరికి తిరిగి వస్తాడన్న వార్త ఆమెను మరింత కలవరపెడుతుంది. "గుణనే నన్ను కాపాడగలడు... బాలు వచ్చేసరికి అన్నీ బయటపడతాయి" అనే ఆలోచనతో వెంటనే గుణకు కాల్ చేస్తుంది. అయితే గుణ మాత్రం ఆ సమయంలో దినేష్‌తో కలిసి మద్యం సేవిస్తూ నిర్లక్ష్యంగా కనిపిస్తాడు. రోహిణీ తన పరిస్థితిని వివరంగా చెబుతూ, రెండు లక్షల కోసం ఒత్తిడి తెచ్చిన గుణ కారణంగానే తాను ఒక ఆంటీ ఇంట్లో దొంగతనం చేసి డబ్బు ఇచ్చానని చెప్పి షాక్ ఇస్తుంది. ఆ దొంగతనం నింద మీనా మీద పడిందని, ఇప్పుడు బాలు వస్తే నిజం బయటపడుతుందని భయపడుతూ, తన డబ్బు తిరిగి ఇవ్వమని గుణను వేడుకుంటుంది.

కానీ గుణ మాత్రం ఆమెను పూర్తిగా నిరాశపరుస్తాడు. తాను ఆ డబ్బు దినేష్ ట్రీట్‌మెంట్ కోసం ఖర్చు చేసేశానని చెబుతూ, "నువ్వేం కంగారు పడొద్దు... బాలు వచ్చేలోపు అంతా సెట్ చేసేస్తా" అని హామీ ఇస్తాడు. అంతేకాదు, మీనా, బాలు మీద తనకు ఉన్న పాత పగను తీర్చుకునే ఇది మంచి అవకాశం అని భావిస్తూ, ఈ సమస్యను తన ప్రయోజనానికి ఉపయోగించుకోవాలని నిర్ణయించుకుంటాడు. ఇక్కడి నుంచే కథ మరింత డేంజరస్ మలుపు తిరుగుతుంది. గుణ, దినేష్‌తో కలిసి ఒక కిడ్నాప్ ప్లాన్ రూపొందించడం కథలో భారీ ట్విస్ట్‌గా మారింది. మొదట్లో కాస్త భయపడిన దినేష్, గుణ చెప్పిన మాటలకు ఒప్పుకుని, తాను కూడా బాలు కుటుంబంతో ఉన్న లెక్కలు తీర్చుకోవాల్సి ఉందని అంగీకరిస్తాడు. "ఈ పని చేస్తే మనకు డబ్బు కూడా వస్తుంది, పగ కూడా తీర్చుకుంటాం" అనే ఆలోచనతో కిడ్నాప్‌కు సిద్ధమవుతాడు.

ఒకవైపు రోహిణీ చేసిన దొంగతనం విషయం బయటపడే ప్రమాదం పెరుగుతుండగా, మరోవైపు ఆ నిందను భరిస్తున్న మీనా తీవ్ర మనోవేదనలో పడుతుంది. తనపై పడిన అపవాదును ఎలాగైనా తుడిచేయాలనే సంకల్పంతో, అసలు నిజం బయటకు తీసుకురావాలని నిర్ణయిస్తుంది. ఎవరికి చెప్పకుండా నిశ్శబ్దంగా ఇంటి నుంచి బయలుదేరి నేరుగా పోలీస్ స్టేషన్‌కు వెళ్లి ఫిర్యాదు చేయాలని భావిస్తుంది. అయితే ఇదే సమయంలో కథలో కీలక ట్విస్ట్ చోటుచేసుకుంది. గుణతో కలిసి ముందే ప్లాన్ చేసిన దినేష్, మీనాను మార్గమధ్యంలో అడ్డగించి కిడ్నాప్ చేయడానికి ప్రయత్నిస్తాడు. మీనా పరిస్థితి ప్రమాదకరంగా మారుతుంది. ఆమెకు సహాయం చేయాలని ప్రయత్నించిన ఓ ముసలి దంపతులను కూడా దినేష్ కత్తితో బెదిరించి అక్కడి నుంచి పంపించేస్తాడు. భయంతో వణికిపోయిన ఆ దంపతులు ఏమీ చేయలేక వెనక్కి తగ్గిపోతారు. ఇదే సమయంలో మీనా ధైర్యంగా తప్పించుకోవడానికి ప్రయత్నించినా, దినేష్ ఆమెను కత్తితో బెదిరించి బలవంతంగా తనతో తీసుకెళ్తాడు. దీంతో కథలో టెన్షన్ మరింత పెరుగుతుంది.

ఇదిలా ఉంటే, ఇంట్లో మీనా కనిపించకపోవడంతో పరిస్థితి గందరగోళంగా మారుతుంది. శృతి ఆందోళనతో మీనా గురించి అడగగా, మనోజ్ అనాలోచితంగా మాట్లాడి పరిస్థితిని మరింత విషమం చేస్తాడు. "మళ్లీ దొంగతనం చేయడానికి వెళ్లిందేమో" అంటూ నోరు జారడంతో శృతి తీవ్రంగా ఆగ్రహిస్తుంది. మీనా గురించి తెలిసి కూడా ఇలా మాట్లాడటం సరికాదని గట్టిగా హెచ్చరిస్తుంది. ఇంతలో సత్యం అక్కడికి చేరుకుని ఏం జరిగిందని ప్రశ్నించగా, శృతి జరిగిన విషయాన్ని వివరంగా చెబుతుంది. మీనా మీద తప్పుడు ఆరోపణలు చేస్తున్నారని వినగానే సత్యం కోపంతో మనోజ్‌పై విరుచుకుపడతాడు. అతని కాలర్ పట్టుకుని గట్టిగా మందలిస్తూ, "నీ తమ్ముడి భార్యపై ఇలాంటి ఆరోపణలు చేయడం సరైనదేనా?" అంటూ ప్రశ్నిస్తాడు.

ఈ సమయంలో ప్రభావతి కూడా మనోజ్‌కు మద్దతుగా మాట్లాడడం పరిస్థితిని మరింత వేడెక్కిస్తుంది. "దొంగతనం చేసిన విషయం బయటపడడంతో సిగ్గుపడుతూ ఇంటి నుంచి వెళ్లిపోయిందేమో" అంటూ మీనాపై అసహ్యకర వ్యాఖ్యలు చేస్తుంది. దీంతో సత్యం ఆగ్రహానికి గురై, తీవ్రంగా స్పందిస్తాడు. "మీ కొడుకు ఎన్నిసార్లు తప్పులు చేసినా మీరు ఇంట్లోనే ఉన్నారు. కానీ మీనా అలాంటిది కాదు. ఆమె పరాయి సొమ్ము ఆశించదు. ఇక్కడున్న అందరికీ ఆమె నిజ స్వభావం తెలుసు. అనవసరంగా నిందలు వేయడం ఆపండి" అంటూ గట్టిగా వార్నింగ్ ఇస్తాడు. అంతేకాకుండా, మీనా ఎక్కడికి వెళ్లిందో వెంటనే తెలుసుకోవాలని ఆదేశిస్తాడు. ఒకవేళ మీనా తిరిగి రాకపోతే ఇంట్లో ఉండనివ్వనని కూడా హెచ్చరిస్తాడు. దీంతో ఇంట్లో పరిస్థితి మరింత ఉద్రిక్తంగా మారుతుంది.

మరోవైపు.. వైజాగ్ ట్రిప్ ముగించుకుని ఇంటికి చేరుకున్న బాలు, ఇంటి వాతావరణం అసాధారణంగా మారిపోయిందని వెంటనే గమనిస్తాడు. ఇంట్లోకి అడుగుపెట్టగానే "మీనా ఎక్కడుంది? ఎక్కడికి వెళ్లింది?" అంటూ ఆత్రుతగా అడుగుతాడు. ఈ సమయంలో రవి, "వదిన ఇంట్లో లేదు... ఫోన్ కూడా ఇంట్లోనే పెట్టి వెళ్లింది" అని చెప్పడంతో బాలు కంగారుపడతాడు. వెంటనే పరిస్థితిని అర్థం చేసుకుంటూ, "ఇంట్లో నుంచి వెళ్లగొట్టారా? అసలు ఏమైంది?" అని ప్రశ్నిస్తాడు. దీంతో ప్రభావతి స్పందిస్తూ, "నా కోడలు అని మీనాక్షి ఇంట్లోకి రానిస్తే... వంటింట్లోకి వెళ్లి రెండు లక్షలు దొంగతనం చేసింది" అంటూ మీనాపై ఘోర ఆరోపణలు చేస్తుంది. ఈ మాటలు విన్న బాలు ఒక్కసారిగా ఆగ్రహంతో ఊగిపోతాడు. "నోరు మూయ్! కన్నతల్లి అని కూడా చూడను... ఒక ఆడపిల్లపై ఇలాంటి అబద్ధాలు వేయడం సిగ్గు కాదా?" అంటూ గట్టిగా నిలదీస్తాడు. తల్లి అనే గౌరవం కూడా మరచిపోయి, "నువ్వు నిజంగా తల్లివేనా?" అని హెచ్చరిస్తాడు.

అయితే ప్రభావతి అక్కడే ఆగకుండా, "మీనా రక్తంలోనే దొంగబుద్ధి ఉంది" అంటూ మరోసారి తీవ్ర వ్యాఖ్య చేస్తుంది. దీంతో బాలు కోపం తారాస్థాయికి చేరుతుంది. వెంటనే మనోజ్, ప్రభావతి గతంలో చేసిన తప్పులను బయటపెడుతూ, "మీ మనసులో దొంగబుద్ధి పెట్టుకుని నా భార్యపై నిందలు వేస్తారా?" అంటూ గట్టిగా హెచ్చరిస్తాడు. "మీనా తిరిగి వస్తే అందరి సంగతి చూస్తా" అని చెప్పి ఇంటి నుంచి బయటకు వెళ్లిపోతాడు. బాలు వెళ్లిపోయిన వెంటనే సత్యం రంగంలోకి దిగుతాడు. ప్రభావతిని గట్టిగా మందలిస్తూ, "మీనాకు ఏదైనా జరిగితే లేదా ఆమె ఏదైనా ఆత్మహత్య ప్రయత్నం చేస్తే నిన్ను ఇంటి నుంచి వెళ్లగొడతా" అంటూ సీరియస్ వార్నింగ్ ఇస్తాడు. ఇదే సమయంలో శృతి కూడా తనదైన స్టైల్‌లో రోహిణి, ప్రభావతికి మాస్ వార్నింగ్ ఇస్తూ, ఇకనైనా నిజం చెప్పాలని ఒత్తిడి పెంచుతుంది. రవి కూడా తల్లికి హితవు చెబుతూ, "ఇకనైనా నీ ఆలోచన మార్చుకో" అని చెప్పి వెళ్లిపోతాడు. దీంతో ప్రభావతి మొదటిసారి భయంతో ఆలోచనలో పడుతుంది-మీనాకు ఏమైనా జరిగిందేమోనని కంగారు పడుతుంది.

ఇదిలా ఉంటే, మరోవైపు బాలు తన భార్య కోసం ఆతృతగా వెతుకులాట ప్రారంభిస్తాడు. తన స్నేహితుడు రాజేష్ సహాయంతో మీనా వెళ్లే అన్ని చోట్లను వెతుకుతాడు. ముందుగా మీనా పుట్టింటికి ఫోన్ చేసి అక్కడికి వచ్చిందా అని అడుగుతాడు. కానీ అక్కడి నుంచి కూడా "ఇక్కడికి రాలేదు" అనే సమాధానం రావడంతో బాలు మరింత ఆందోళనకు గురవుతాడు. ఆ తర్వాత బాలు ఒక్క క్షణం కూడా వృథా చేయకుండా తనకు తెలిసిన ప్రతి చోట వెతుకుతాడు గుళ్లు, దేవాలయాలు, పూల దుకాణాలు, బంధువుల ఇళ్లు... ఇలా ఎక్కడైనా మీనా దొరుకుతుందేమోనని ఆశతో తిరుగుతాడు. అయితే ఎంత వెతికినా మీనా జాడ మాత్రం దొరకదు. దీంతో కథ మరింత ఉత్కంఠభరితంగా మారుతుంది.

మరోవైపు కిడ్నాప్ చేసిన తర్వాత దినేష్, మీనాను ఓ చీకటి గదిలో బంధిస్తాడు. అక్కడికి తీసుకెళ్లిన వెంటనే "ఎవర్రా మీరు?" అని మీనా ధైర్యంగా ప్రశ్నించినా, దినేష్ ఎలాంటి సమాధానం ఇవ్వకుండా మౌనం పాటిస్తాడు. గతంలో మీనా చేతిలో తాను దెబ్బలు తిన్న విషయం గుర్తుకు వచ్చి, ఆమెతో జాగ్రత్తగా ఉండాలని భావిస్తూ కొంచెం భయంతోనే ఉంటాడు. ఇదిలా ఉండగా, దినేష్ వెంటనే గుణకు ఫోన్ చేసి పని పూర్తి అయ్యిందని చెబుతాడు. కొద్ది సేపటికి గుణ అక్కడికి చేరుకుని పరిస్థితిని పరిశీలిస్తాడు. "మీనాను కట్టుదిట్టంగా కాపాడాలి... చిన్న పొరపాటు జరిగినా తప్పించుకునే ప్రమాదం ఉంది" అంటూ దినేష్‌కు హెచ్చరిస్తాడు.

ఇంతలోనే రోహిణి నుంచి గుణకు కాల్ వస్తుంది. "మీన కనిపించడం లేదు... ఇది నీ పని కాదా?" అని అనుమానం వ్యక్తం చేస్తుంది. ఈ ప్రశ్నకు గుణ చల్లగా "అవును... మీనాను నేనే కిడ్నాప్ చేశాను. బాలుకి వడ్డీతో సహా చుక్కలు చూపిస్తా. నా పగ తీర్చుకుంటా" అని చెప్పడంతో కథలో మరింత క్రూరత్వం బయటపడుతుంది. ఈ విషయం విన్న రోహిణి మాత్రం ఆనందపడటం మరింత షాకింగ్‌గా మారింది. "మీన బయట ఉంటే ఈ సమయానికి నేను జైల్లో ఉండేదాన్ని... ఆమె దూరంగా ఉంటేనే నాకు సేఫ్" అంటూ తన అసలు స్వభావాన్ని బయటపెడుతుంది.

రోహిణి ఫ్రెండ్ విద్య మాత్రం ఈ విషయంపై తీవ్ర ఆందోళన వ్యక్తం చేస్తుంది. "పాపం మీనా చేయని తప్పుకు శిక్ష అనుభవిస్తోంది. గుణ లాంటి వ్యక్తి చేతిలో పడితే ఏం జరుగుతుందో తెలియదు" అని చెబుతూ కనీసం మానవత్వాన్ని చూపిస్తుంది. కానీ రోహిణి మాత్రం కరుణ లేకుండా "మీనాకు ఏం జరిగినా నాకు సంబంధం లేదు" అంటూ తన క్రూరత్వాన్ని మరింతగా బయటపెడుతుంది.

ఇక మరోవైపు, గుణ-దినేష్ తమ ప్లాన్‌ను మరింత డేంజరస్ దశలోకి తీసుకెళ్తారు. బాలు కు ఓ కొత్త నెంబర్ నుంచి ఫోన్ చేసి "మీ భార్యను ఎవరో కిడ్నాప్ చేసి కారులో తీసుకెళ్తున్నారు" అంటూ గేమ్ స్టార్ట్ చేస్తారు. దీంతో బాలు ఆందోళనతో గుణ చెప్పిన ప్రదేశానికి వెళ్తాడు. కానీ అక్కడికి చేరుకున్న తర్వాత మరోసారి కాల్ చేసి "అక్కడ కాదు... మరోచోట" అంటూ అతన్ని ముప్పుతిప్పలు పెడతారు. ఇలా బాలు‌ను గందరగోళానికి గురిచేస్తూ మానసికంగా ఇబ్బంది పెడతారు. చివరికి బాలు కోపంతో "ఎవర్రా మీరు?" అని గట్టిగా ప్రశ్నించగా, "నీ భార్యను కిడ్నాప్ చేశాం... ఇంకొన్ని గంటల్లో ప్రాణాలు పోతాయి" అంటూ బెదిరించి కాల్ కట్ చేస్తారు. దీంతో బాలు అనుమానం నేరుగా గుణపై పడుతుంది. వెంటనే గుణ ఆఫీస్‌కి వెళ్లి క్లియర్ చేయాలని అనుకుంటాడు. కానీ అతని స్నేహితుడు రాజేష్ అడ్డుకుంటూ, "ఇప్పుడు వెళ్లడం సరైంది కాదు. ఒకవేళ గుణే చేసుంటే మరింత అలర్ట్ అవుతాడు. దీంతో మీనాకు ప్రమాదం పెరుగుతుంది" అని హెచ్చరిస్తాడు.

దీంతో బాలు కంగారులో పడిపోతాడు. వెంటనే ఒక చిన్న పిల్లవాడిని పంపించి గుణ ఆఫీస్‌లో ఏమైనా అనుమానాస్పదంగా ఉందా అని చెక్ చేయమంటాడు. ఆ బాలుడు మొత్తం ఆఫీస్ వెతికినా ఏమీ కనిపించదు. దీంతో బాలు పూర్తిగా కన్ఫ్యూజ్ అవుతాడు. చివరికి దేవుడి దగ్గర ప్రార్థిస్తూ "ఏదైనా దారి చూపించు" అని వేడుకుంటాడు. ఇదే సమయంలో, మరోవైపు బంధించబడ్డ మీనా కూడా దేవుణ్ణి ప్రార్థిస్తూ, ఈ ప్రమాదం నుంచి బయటపడేందుకు ధైర్యం కోరుకుంటుంది. మీనా ప్రాణాపాయం, గుణ-దినేష్ క్రూర ప్లాన్, రోహిణి సైకో స్వభావం, బాలు ఆందోళన అన్ని కలిసి ఎపిసోడ్‌ను పీక్ టెన్షన్‌కు తీసుకెళ్లాయి. చివరికి మీనాకు ఏమవుతుంది? బాలు ఆమెను కాపాడగలడా? గుణ ప్లాన్ ఎక్కడ బద్దలవుతుంది? అన్న సస్పెన్స్‌తో ఎపిసోడ్ ముగియడం ప్రేక్షకుల్లో మరింత ఉత్కంఠ పెంచింది.