Click it and Unblock the Notifications
Gundeninda Gudigantalu April 16th Episode:సత్యం కన్నీళ్లు.. బాలుకు రోహిణి షాక్.. మనోజ్పై ప్రభావతి దాడి!
photo courtesy jiohotstar
Gundeninda Gudigantalu: గుండె నిండా గుడిగంటలు బుధవారం ఎపిసోడ్ హై వోల్టేజ్ డ్రామాతో ప్రేక్షకులను కట్టిపడేసింది. మీనాక్షి ఇంట్లోకి ఎంట్రీ ఇవ్వడంతో సన్నివేశం ఒక్కసారిగా టెన్షన్తో నిండిపోయింది. బాలు, మీనా ఇద్దరూ ఆమెపై సెటైర్లు వేస్తూ ప్రశ్నలు కురిపించగా, చివరకు మీనాక్షి అసలు నిజం బయటపెట్టింది. కందిపప్పు-పెసరపప్పు డబ్బాల కన్ఫ్యూజన్ వల్లే రెండు లక్షలు పోయాయని అనుకున్నామని, అవే దొరికాయని చెప్పి డబ్బులు ఇచ్చేసింది. దీంతో ఇంట్లో అందరూ షాక్ అయ్యారు.అయితే అసలు డ్రామా ఇక్కడితో ఆగలేదు. "నా భార్యను ఎందుకు దొంగని నింద వేశావ్?" అంటూ బాలు ప్రభావతిపై ఆగ్రహం వ్యక్తం చేశాడు. సత్యం కూడా ఆమెను నిలదీస్తూ కఠిన వ్యాఖ్యలు చేయడంతో పరిస్థితి మరింత తీవ్రంగా మారింది. ఇదే సమయంలో రోహిణి ముందే మీనాక్షి ఇంటికి వెళ్లిన విషయం బయటపడటం మరో ట్విస్ట్గా నిలిచింది. దీంతో ఆమెపై అనుమానాలు పెరుగుతున్నాయి.
డబ్బులు తిరిగి వచ్చినా, బాలు ఐదు లక్షల అప్పు విషయాన్ని ప్రస్తావించి ప్రభావతిని ఇరుకున పెట్టాడు. చివరకు ప్రామిసరీ నోట్ రాయాల్సిన పరిస్థితి వచ్చింది. కానీ మనోజ్ సంతకం చేయడానికి నిరాకరించడం, తల్లి చెంప చెళ్లుమనిపించడం ఎపిసోడ్కు హైలైట్గా మారింది. కుటుంబంలో విభేదాలు మరింత పెరిగాయి.మరోవైపు బాలు తనకు సహాయం చేసిన వారికి డబ్బులు తిరిగి ఇస్తూ బాధ్యత చూపించాడు. మీనా మాటలు విన్న సత్యం తన కొడుకు కోసం ఉద్యోగం చేయాలని నిర్ణయించుకోవడం ఎమోషనల్ టచ్ ఇచ్చింది. కానీ మనోజ్ మాటలు మరోసారి కుటుంబాన్ని షాక్కు గురి చేశాయి. ఇక రోహిణి ట్రాక్లో టెన్షన్ పెరుగుతూ, ఆమె దాచిన రహస్యాలు బయటపడే సూచనలు కనిపిస్తున్నాయి. మొత్తంగా ఈ ఎపిసోడ్ ట్విస్టులు, ఎమోషన్, డ్రామాతో నిండిపోయి, రాబోయే ఎపిసోడ్లపై ఆసక్తిని పెంచింది.
గురువారం ఎపిసోడ్ రసవత్తరంగా సాగింది. ముఖ్యంగా సత్యం ఉద్యోగం కోసం బయటకు వెళ్లడం నుంచి ఇంట్లో జరిగిన సంభాషణల వరకూ ప్రతి సన్నివేశం ప్రేక్షకులను ఆకట్టుకుంది. ఉదయం ఉద్యోగం కోసం బయటకు వెళ్లిన సత్యం మధ్యాహ్నం అయ్యే సరికి ఇంటికి రాకపోవడంతో ప్రభావతి ఆందోళన చెందుతుంది. హాల్లో అటూ ఇటూ తిరుగుతూ భర్త కోసం ఎదురుచూస్తుంది. ఇదంతా గమనించిన మనోజ్ మాత్రం నిర్లక్ష్యంగా స్పందిస్తూ "ఎందుకు అంత కంగారు పడుతున్నావ్?" అంటూ తేలికగా తీసుకుంటాడు. ఇంతలో బాలు హాల్లోకి వచ్చి పరిస్థితిని అర్థం చేసుకుని, "నాన్న పని కోసం వెళ్లాడు కదా... కొంచెం ఆలస్యమవుతుంది" అంటూ తల్లిని సమాధానపరుస్తాడు. అయితే కాసేపటికే సత్యం ఆనందంగా ఇంట్లోకి ఎంట్రీ ఇవ్వడం సన్నివేశానికి మలుపు తిప్పింది.
"నాకు ఉద్యోగం దొరికింది" అని సత్యం చెప్పగానే ప్రభావతి ఆనందంతో ఏ పని, ఎంత జీతం అని ఆసక్తిగా అడుగుతుంది. అయితే సత్యం మొదట విషయాన్ని పూర్తిగా చెప్పకుండా మాట తిప్పుతాడు. ఇదే సమయంలో బాలు, మనోజ్ను ఇన్డైరెక్ట్గా టార్గెట్ చేస్తూ "పార్కులో పడుకోవడం లాంటి పని కాదు కదా?" అంటూ సెటైర్ వేస్తాడు.
దీనికి మనోజ్ కూడా తగ్గకుండా "నేను పెద్ద బిజినెస్ మ్యాన్" అంటూ ఎగతాళిగా స్పందించగా, బాలు "కుబేర్లు నీ ఫోటో కోసం వెతుకుతున్నారు" అంటూ కౌంటర్ ఇస్తాడు. ఇద్దరి మధ్య మాటల యుద్ధం హీట్ ఎక్కుతుండగా, సత్యం జోక్యం చేసుకుని పరిస్థితిని కంట్రోల్ చేస్తాడు.
చివరికి సత్యం తనకు దొరికిన పని గురించి చెబుతూ, "పార్కులో పిల్లలకు నీతి కథలు చెప్పడం... అది కేవలం గంట మాత్రమే" అని చెప్పడంతో ప్రభావతి కొంత నిరాశకు గురవుతుంది. జీతం గురించి అడగగా, బాలు వ్యంగ్యంగా "మనోజ్ మింగిన 40 లక్షలు, ఇంటి తాకట్టు 10 లక్షలు, నాకు ఉన్న అప్పు 5 లక్షలు... ఇవే జీతంగా వస్తాయి" అంటూ కఠినంగా స్పందిస్తాడు. దీనికి సత్యం గంభీరంగా స్పందిస్తూ, "నేను చేసే పనికి ఎంత విలువ ఉంటే అంతే తీసుకుంటాను. ఇది పార్ట్ టైం మాత్రమే... ఇంకో పని కూడా చూస్తాను" అని చెప్పాడు. అలాగే "ఇంట్లో ఖాళీగా కూర్చోవడం కంటే పని చేయడం మంచిది... భార్య చేసిన అప్పు తీర్చడం నా బాధ్యత" అంటూ తన బాధ్యతను స్పష్టం చేశాడు. ఇక ప్రభావతి మాత్రం ఈ విషయాన్ని మరో కోణంలో తీసుకుని, "నీ వల్లే నీ నాన్న ఇలా పని చేయాల్సి వస్తోంది" అంటూ బాలును తప్పుపడుతుంది. దీనికి మీనా కూడా స్పందిస్తూ, "మామయ్య మా అప్పు తీర్చడం మాకు ఇష్టం లేదు" అంటూ చురకలు వేయడం ఇంట్లో ఉద్రిక్తతను మరింత పెంచింది.
ఇక సత్యం తన కొత్త ఉద్యోగంలో భాగంగా "నీతి కథల మాస్టర్"గా అవతారం ఎత్తాడు. చిన్నతనంలో నేర్చుకున్న నీతి కథలను గుర్తుచేసుకుంటూ, పార్క్లో పిల్లలకు ఆసక్తికరంగా చెబుతుంటాడు. అతని మాట తీరు, భావ వ్యక్తీకరణ, కథ చెప్పే విధానం పిల్లలను మాత్రమే కాదు, అక్కడ ఉన్న పెద్దలను కూడా ఆకర్షిస్తుంది. ఒకప్పుడు ఇంట్లో గౌరవం కోల్పోయిన సత్యం... ఇప్పుడు సమాజంలో గౌరవం పొందడం సన్నివేశానికి ప్రత్యేకమైన భావోద్వేగాన్ని తీసుకొచ్చింది. సత్యం చెప్పే కథలు కేవలం వినోదంగా కాకుండా, విలువలు నేర్పే విధంగా ఉండటంతో కమ్యూనిటీ వాళ్లు కూడా పెద్ద సంఖ్యలో వచ్చి శ్రద్ధగా వింటారు. కథలు ముగిసిన తర్వాత అతని దగ్గరకు వచ్చి అభినందనలు తెలియజేస్తూ, "ఈ రోజుల్లో తాతలు, బామ్మలు చేయాల్సిన పని మీరు చేస్తున్నారు. మా పిల్లలకు ఇలాంటి విలువలు చెప్పడం చాలా గొప్ప విషయం" అంటూ ప్రశంసలు కురిపిస్తారు. అంతేకాదు, "మీరు ఒక రూపాయి కూడా తీసుకోకుండా ఉచితంగా చేస్తున్న ఈ సేవ చాలా గొప్పది" అని చెప్పడం సత్యాన్ని ఒక్కసారిగా ఆలోచనలో పడేసింది.
"ఫ్రీగా చేస్తున్నానా? మరి నాకు అడ్వాన్స్గా ఇచ్చిన డబ్బులు ఎవరివి?" అనే అనుమానం సత్యం మనసులో మొదలవుతుంది. ఏమైందో అర్థం కాక గందరగోళంలో పడతాడు. ఇదే సమయంలో అతని స్నేహితుడు రంగారావు అక్కడికి వచ్చి కొత్త ఉద్యోగం ఎలా ఉందని అడుగుతాడు. అప్పుడే సత్యం తన సందేహాన్ని బయటపెడుతూ, "నాకు అడ్వాన్స్ ఇచ్చింది ఎవరు? అసలు ఈ వ్యవహారం ఏమిటి?" అని ప్రశ్నించడంతో అసలు ట్విస్ట్ బయటపడుతుంది. రంగారావు భావోద్వేగంగా స్పందిస్తూ, "నిన్ను చూస్తుంటే నాకు అసూయ వేస్తుంది రా... బాలు లాంటి కొడుకు నాకు లేడు" అని చెబుతాడు. అసలు విషయం ఏమిటంటే... సత్యం ఆత్మగౌరవం దెబ్బతినకూడదని బాలు ముందుగానే ప్లాన్ వేసి, రంగారావుతో కలిసి ఒక నకిలీ ఉద్యోగాన్ని సృష్టించాడు. "పిల్లలకు కథలు చెప్తే డబ్బులు ఇస్తారు" అని అబద్ధం చెప్పించి, ఆ డబ్బులు కూడా బాలు తనే ఇవ్వడం ద్వారా తండ్రి గౌరవాన్ని కాపాడే ప్రయత్నం చేశాడు. ఈ నిజం విన్న సత్యం ఒక్కసారిగా షాక్ అవుతూ, తన కొడుకు ప్రేమను గుర్తించి తీవ్రంగా భావోద్వేగానికి గురవుతాడు.
ఇక సీరియల్లో మరోవైపు కథ ఉత్కంఠభరిత మలుపు తిరిగింది. చింటూ గురించి ఉన్న సందేహాలతో బాలు స్వయంగా అతని ఊరికి వెళ్లడం కథలో సస్పెన్స్ను మరింత పెంచింది. అయితే అక్కడికి వెళ్లిన బాలకు ఎదురైన పరిస్థితులు అతన్ని షాక్కు గురి చేశాయి. చింటూ ఇంటికి చేరుకున్న బాలు, గేటుకు తాళం వేసి ఉండటాన్ని గమనిస్తాడు. ఇంటి చుట్టూ ఎవరూ కనిపించకపోవడంతో పక్కింటివారిని అడిగితే, "ఇక్కడ వారు ఇక ఉండడం లేదు" అనే సమాధానం వస్తుంది. ఈ సమాచారం విన్న వెంటనే బాలు మరింత ఆందోళనకు గురవుతూ, వెంటనే సుగుణమ్మకు ఫోన్ చేస్తాడు. ఇదే సమయంలో సుగుణమ్మ పక్కనే రోహిణి ఉండటం కథలో కీలక ట్విస్ట్గా మారింది. బాలు కాల్ చూసిన సుగుణమ్మ ఒక్కసారిగా కంగారుపడగా, రోహిణి మాత్రం పరిస్థితిని కంట్రోల్ చేయడానికి ముందుకొస్తుంది. "టెన్షన్ పడొద్దు... ఓపెన్ స్పీకర్ పెట్టి నేను చెప్పినట్టు మాట్లాడండి" అంటూ తల్లికి సూచనలు ఇస్తుంది.
ఫోన్లో బాలు "మీ ఇంటికి వచ్చాను... మీరు ఎక్కడున్నారు?" అని అడగడంతో, రోహిణి క్షణం పాటు భయపడుతుంది. నిజంగానే కొత్త ఇంటికి వచ్చాడేమోనని ఆందోళన చెందుతుంది. అయితే బాలు వెంటనే "మీ సొంత ఊరికి వచ్చాను... మీరు లేరని తెలిసి కాల్ చేస్తున్నాను" అని చెప్పడంతో పరిస్థితి కొంత సద్దుమణిగింది. అయితే రోహిణి చెప్పినట్టే సుగుణమ్మ అకస్మాత్తుగా కఠినంగా మాట్లాడటం మొదలుపెడుతుంది. "మరోసారి నాకు ఫోన్ చేయవద్దు... నన్ను చూసుకునే వాళ్లు చాలామంది ఉన్నారు... మీ వల్ల మా చింటూ చాలా ఇబ్బంది పడుతున్నాడు" అంటూ తీవ్రంగా స్పందిస్తుంది. ఈ మాటలు విన్న బాలు షాక్కు గురవుతాడు. సుగుణమ్మ ఈ విధంగా ప్రవర్తించడం బాలుకు అనుమానాస్పదంగా అనిపిస్తుంది. "మీరు నిజంగానే మాట్లాడుతున్నారా? లేక ఎవరైనా మీ వెనుక ఉండి మాట్లాడిస్తున్నారా?" అంటూ ప్రశ్నించగా, సుగుణమ్మ వెంటనే ఫోన్ కట్ చేయడం అనుమానాలను మరింత పెంచుతుంది.
ఇంటికి చేరుకున్న తర్వాత బాలు ఈ విషయాన్ని మీనాతో పంచుకుంటాడు. అయితే మీనా మాత్రం "ఇతరుల జీవితాల్లోకి తొంగి చూడాల్సిన అవసరం ఏముంది?" అంటూ బాలుని ప్రశ్నిస్తుంది. అయినా బాలు మాత్రం తన అనుమానాలను విడిచిపెట్టకుండా, "సుగుణమ్మ ప్రవర్తనలో ఏదో తేడా ఉంది... ముందు మనల్ని ఎంతో ప్రేమగా చూసుకునే వారు, ఇప్పుడు ఎందుకు ఇలా దూరంగా ఉంటున్నారు?" అని ఆలోచిస్తాడు. ఇంకా ముందుకు వెళ్లి, "సుగుణమ్మ వెనక ఎవరైనా ఉన్నట్లు అనిపిస్తోంది... ఆమె కూతురు దుబాయ్లో లేదేమో" అనే అనుమానాన్ని కూడా వ్యక్తం చేస్తాడు. చివరికి "ఏమైనా సరే... చింటూ గతం ఏంటో పూర్తిగా తెలుసుకుంటాను" అంటూ తన ప్లాన్ను మీనాకు చెబుతాడు. ఇదంతా పక్కనే దొంగచాటుగా వింటున్న రోహిణి మాత్రం భయంతో వణికిపోతుంది. బాలు నిజం తెలుసుకుంటే తన అసలు గతం బయటపడుతుందని ఆందోళన చెందుతుంది. ఎలాగైనా బాలు చేతికి చిక్కకుండా తప్పించుకోవాలని నిర్ణయించుకుంటుంది.
మరోవైపు.. సత్యం నీరసంగా ఇంటికి చేరుకుంటాడు. ఈ విషయాన్ని గమనించిన మీనా, "ఏంటి మామయ్య ఇలా ఉన్నారు? జ్యూస్ తీసుకురావాలా?" అంటూ ప్రేమగా అడుగుతుంది. కానీ సత్యం మాత్రం ఏమీ మాట్లాడకుండా సైలెంట్గా కూర్చుంటాడు. ఇదే సమయంలో ప్రభావతి దగ్గరకు వచ్చి, కొత్త ఉద్యోగం ఎలా ఉంది, ఎంత జీతం ఇస్తారు అని ఆసక్తిగా ప్రశ్నిస్తుంది. "మీకు మొహమాటం ఎక్కువ... కావాలంటే నేను వచ్చి మాట్లాడుతా" అంటూ తన స్టైల్లో స్పందిస్తుంది. ఇంతలో బాలు హాల్లోకి అడుగుపెట్టగానే సన్నివేశం ఒక్కసారిగా మారిపోతుంది. సత్యం కంటతడి పెట్టుకుంటూ బాలును చూసి, "ఎందుకురా ఇలా చేశావు? నన్నెంత ప్రేమిస్తున్నావురా... నీ కష్టార్జితాన్ని నా కష్టంగా చెప్పుకోవడం నాకు ఇబ్బందిగా ఉంది" అంటూ భావోద్వేగంగా మాట్లాడుతాడు. ఈ మాటలతోనే తన తండ్రికి నిజం తెలిసిపోయిందని బాలు గ్రహిస్తాడు.
ఆ వెంటనే సత్యం బాలును గట్టిగా కౌగిలించుకుని కన్నీళ్లు పెట్టుకోవడం ఇంట్లో అందరినీ షాక్కు గురి చేస్తుంది. ఏమైందో అర్థం కాక ప్రభావతి సహా అందరూ ఆశ్చర్యంగా చూస్తుంటారు. ఆ తర్వాత సత్యం తన మనసులోని భావాలను బయటపెడుతూ, "నాకోసం లేని పనిని ఉన్నట్లు సృష్టించి... నేను పని చేస్తున్నానని, కష్టపడి డబ్బు సంపాదిస్తున్నానని ఫీల్ అయ్యేలా చేశావు కదా" అంటాడు. దీనికి బాలు కూడా కంటతడి పెట్టుకుంటూ, "నాన్న... నాకు అమ్మ ప్రేమ దొరకలేదు... ఆ స్థానంలో మీరు ఉండి నన్ను పెంచారు. నా జీవితంలో నన్ను అర్థం చేసుకున్న మొదటి వ్యక్తి మీరు. మీరు మళ్లీ కష్టపడటం నాకు ఇష్టం లేదు... అందుకే ఇలా చేశాను" అంటూ తన మనసులోని ప్రేమను వ్యక్తం చేస్తాడు.
సత్యం కూడా భావోద్వేగంతో, "మీ లాంటి కొడుకు ఉండటం నా అదృష్టం... నా నాన్న ఎప్పుడూ 'నేను చచ్చి నీ కడుపులో పుడతా' అనేవాడు... ఈరోజు అది నిజమైంది అనిపిస్తోంది. నువ్వు నాన్నకి నాన్న అయ్యావురా" అంటూ కన్నీళ్లతో అక్కడినుంచి వెళ్లిపోతాడు. ఈ సన్నివేశం చూసి ఇంట్లో ఉన్నవారంతా కళ్లలో నీళ్లు తెచ్చుకుంటారు. అయితే ఈ భావోద్వేగ వాతావరణాన్ని మనోజ్ మాత్రం వెటకారంగా మార్చేస్తాడు. "నాన్న చదువు, వయసు చూసుకుంటే సెక్యూరిటీ గార్డ్ ఉద్యోగం తప్ప ఇంకేం వస్తుంది?" అంటూ నిర్లక్ష్యంగా మాట్లాడతాడు. ఈ మాటలు విన్న ప్రభావతి ఒక్కసారిగా ఆగ్రహంతో మనోజ్ చెంపపై గట్టిగా కొడుతుంది. "ఏం మాట్లాడుతున్నావురా? మీ నాన్న కష్టపడతానంటే బాలు ఎంత తాపత్రయ పడుతున్నాడు... కనీసం నువ్వు ఒక్క క్షణం ఆలోచించవా?" అంటూ తీవ్రంగా మందలిస్తుంది. "మరో మాట మాట్లాడితే చెప్పు తెగుతుంది" అంటూ గట్టిగా హెచ్చరిస్తుంది.
ఇదే సమయంలో ప్రభావతి మొదటిసారి బాలు వైపు నిలబడి అతని మనసును అర్థం చేసుకోవడం కథలో ముఖ్యమైన మార్పుగా కనిపించింది. ఇప్పటివరకు బాలును తప్పుబట్టిన ఆమె... ఇప్పుడు అతని ప్రేమను గుర్తించి మెచ్చుకోవడం ప్రేక్షకులను ఆకట్టుకుంది. తన తండ్రి సత్యం తనను హగ్ చేసుకున్న ఘటనను గుర్తుచేసుకుంటూ బాలు ఇంకా ఆ క్షణాల్లోనే జీవిస్తుంటాడు. ఈ సమయంలో మీనా అతని దగ్గరకు వచ్చి ఏదో చెప్పాలని ప్రయత్నించినా, బాలు మాత్రం తన భావోద్వేగాలను ఆపుకోలేక మాట్లాడడం మొదలుపెడతాడు. "నాన్న నాకు హగ్ ఇచ్చినప్పుడు ఏం మాట్లాడాలో అర్థం కాలేదు... ఆయన కోసం చిన్న పని చేశానని అనుకున్నా, ఆయన అంతగా సంతోషపడతాడని ఊహించలేదు" అంటూ కంటతడి పెట్టుకుంటాడు.
బాలు మాటలు విన్న మీనా కూడా భావోద్వేగానికి గురవుతూ, "మీ లాంటి భర్త నాకు దొరకడం నా అదృష్టం... ఇది నేను చేసుకున్న పుణ్యం" అంటూ తన ప్రేమను వ్యక్తం చేస్తుంది. ఇదే సమయంలో బాలు తన చిన్ననాటి బాధలను గుర్తుచేసుకుంటూ, "నాకు చిన్నప్పటి నుంచి అమ్మ ప్రేమ దొరకలేదు... అందరూ నన్ను దూరం పెట్టారు... ఈ సమాజం కూడా నన్ను వెలివేసింది. కానీ మా నాన్న మాత్రమే నన్ను అర్థం చేసుకున్నాడు... ఆయన నాకు దేవుడు" అంటూ తన హృదయంలో దాచుకున్న బాధను బయటపెడతాడు. "ఆయన కోసం ఏదైనా చేస్తాను" అని చెప్పిన బాలు మాటలు ప్రేక్షకుల మనసులను కదిలించేలా నిలిచాయి. బాలు మాటలకు మీనా కూడా ఆకర్షితురాలవుతూ, అతనిపై గౌరవం మరింత పెంచుకుంటుంది. ఈ సన్నివేశం ద్వారా దంపతుల మధ్య ఉన్న భావోద్వేగ బంధం స్పష్టంగా కనిపించింది.
ఇక ఎపిసోడ్ ముగింపు ఆసక్తికరంగా మలుపు తిరిగింది. చింటూ గతంపై ఉన్న అనుమానాలతో బాలు త్వరలోనే దాని గురించి పూర్తిగా తెలుసుకునే ప్రయత్నంలో పడతాడనే సూచనలు కనిపిస్తున్నాయి. మరోవైపు రోహిణి మాత్రం తన రహస్యాలు బయటపడతాయనే భయంతో ఆందోళన చెందుతోంది. బాలు తన అన్వేషణను ప్రారంభిస్తే, రోహిణి దానికి అడ్డుకట్ట వేయడానికి కొత్త ప్లాన్తో ముందుకు వస్తుందా? లేక ఆమె దాచిపెట్టిన నిజాలు ఒక్కొక్కటిగా బయటపడతాయా? అన్న ఉత్కంఠ ప్రేక్షకుల్లో పెరిగింది. రానున్న ఎపిసోడ్లలో ఈ ట్విస్టులు ఎలా రివీల్ అవుతాయో చూడాల్సిందే..
Continue with Google