Gundeninda Gudigantalu April 20th Episode: మనోజ్‌కు హెచ్చరిక.. ప్రభావతికి తప్పిన పెనుముప్పు.. రక్షించిన మీనా..

Gundeninda Gudigantalu: గుండెనిండా గుడి గంటలు శుక్రవారం ఎపిసోడ్‌లో కథ అనేక ఆసక్తికర మలుపులతో ముందుకు సాగింది. మొదటగా సత్యం కుటుంబానికి అండగా నిలవాలని నిర్ణయించుకుని ఉద్యోగం కోసం స్కూల్ ఇంటర్వ్యూకి వెళ్లాడు. తన స్నేహితుడు రంగారావు రిఫరెన్స్‌తో వెళ్లిన సత్యం నిజాయితీగా మాట్లాడటంతో యాజమాన్యం ఆకట్టుకుని అకౌంటెంట్ ఉద్యోగం ఇచ్చింది. వారానికి ఒకరోజు పని, త్వరలో కొత్త బ్రాంచ్‌లో రెగ్యులర్ జాబ్ అవకాశం ఇవ్వడం సత్యం జీవితంలో కొత్త ఆశలు నింపింది. ఇదే సమయంలో రోహిణి తన కొడుకు చింటూని అదే స్కూల్‌లో చేర్పించేందుకు తీసుకురావడం కథలో సస్పెన్స్ పెంచింది. ఇద్దరూ ఒకే చోట ఉన్నా ఎదురుపడకపోవడం ఆసక్తికరంగా మారింది. మరోవైపు మీనా ట్రాక్ టెన్షన్ పెంచింది. పూల డెలివరీకి వెళ్లిన మీనాను ఓ అనుమానాస్పద వ్యక్తి ఫాలో అవుతుండటంతో భయపడిపోయింది. చివరకు సేఫ్ ప్లేస్‌గా విద్య ఇంటికి వెళ్లింది.

అక్కడ ఇప్పటికే రోహిణి ఉండటంతో మరో ట్విస్ట్ చోటుచేసుకుంది. బాలు ఫోన్ విషయాన్ని దాచిపెట్టేందుకు రోహిణి ప్రయత్నించగా, విద్యకు ఫోన్ తీసుకెళ్లి పడేయమని ఆదేశించింది. అయితే మార్గమధ్యలో చెప్పు తెగిపోవడం, బైక్ సమస్య రావడంతో విద్య ఇబ్బందుల్లో పడింది. చివరకు కంగారులో బాలు ఫోన్ అక్కడే మరిచిపోవడంతో అది ముసలి దంపతుల చేతికి చేరింది. ఈ ఫోన్ భవిష్యత్తులో పెద్ద సమస్యగా మారే అవకాశాలు కనిపిస్తున్నాయి. ఇక బాలు ట్రాక్‌లో సరదా సన్నివేశాలు కనిపించాయి. ఒక ఫ్రెండ్ ప్రేమ విషయంపై బాలు సలహాలు ఇవ్వగా, అతను ప్రేమిస్తున్న అమ్మాయి మీనానే కావడం పెద్ద ట్విస్ట్. మరోవైపు మనోజ్ ట్రాక్ భయానకంగా మారింది. షాప్ ముందు చేతబడి చేసిన గుడ్లు కనిపించడంతో భయపడిపోయిన మనోజ్ స్వామీజీని ఆశ్రయించాడు. అక్కడ "పేరు, డబ్బు అన్నీ పోతాయి.. అప్పుల పాలవుతారు" అన్న మాటలు అతన్ని మరింత ఆందోళనలోకి నెట్టాయి.

photo courtesy jiohotstar

సోమవారం ప్రసారమైన ఎపిసోడ్ ఉత్కంఠభరితంగా సాగుతూ ప్రేక్షకులను కట్టిపడేసింది. ముఖ్యంగా మనోజ్ జీవితంలో కొత్త టెన్షన్ మొదలైనట్లు చూపించిన సన్నివేశాలు కథకు ప్రధాన ఆకర్షణగా నిలిచాయి. ఎపిసోడ్ ప్రారంభంలో మనోజ్ స్వామీజీని కలిసి తన షాప్ ఎదుట కొన్ని కోడిగుడ్లు కనిపించాయని ఆందోళనతో చెబుతాడు. ఆ గుడ్లను చూసిన స్వామీజీ అవి సాధారణ కోడిగుడ్లు కావని, ఎవరో మీపై చేతబడి చేశారని సంచలన వ్యాఖ్యలు చేస్తాడు. మీరు ఇన్ని రోజులుగా కష్టపడి సంపాదించుకున్న పేరు ప్రతిష్టలు అన్నీ ఒక్కసారిగా పోతాయని, చివరికి రోడ్డున పడే పరిస్థితి వస్తుందని హెచ్చరించడంతో మనోజ్ ఒక్కసారిగా షాక్ అవుతాడు.

మనోజ్ భయపడుతూ "ఇంత పెద్ద ప్రమాదమా?" అని ప్రశ్నించగా, స్వామీజీ తాను ఎప్పుడూ సత్యమే మాట్లాడతానని, తన దగ్గరకు వచ్చే వారి భవిష్యత్తు చెప్పడమే తన ధర్మమని చెబుతాడు. త్వరలో మీ జీవితంలో ఎన్నో కష్టాలు ఎదురవుతాయని మరోసారి హెచ్చరిస్తాడు. ఈ మాటలు విన్న రోహిణి కూడా తీవ్రంగా కంగారుపడి దీనికి ఎలాంటి పరిహారం లేదానీ అడుగుతుంది. దానికి స్వామీజీ ప్రత్యేక పరిహారం సూచిస్తూ, తమ కులదైవానికి ఒకరోజు మొత్తం ఉపవాసం ఉండి నిష్టగా పూజ చేయాలని చెబుతాడు. అంతేకాకుండా ఆ సమయంలో ఒంటిపై వేపాకులు మాత్రమే ధరించాలని, అమ్మవారికి అగ్నితో నివేదన చేయాలని చెప్పడంతో అక్కడున్న వారంతా ఆశ్చర్యానికి గురవుతారు.

అక్కడితో ఆగని స్వామీజీ "నీకు ఎవరంటే ఎక్కువ ఇష్టం?" అని అడగగా, మనోజ్ వెంటనే తన తల్లి గురించే చెబుతాడు. చిన్నప్పటి నుంచీ తన అమ్మే ఎంతో ప్రేమగా చూసుకుందని, తాను ఏది అడిగినా వెంటనే ఇచ్చేదని భావోద్వేగంగా చెబుతాడు. ఈ మాటలు విన్న రోహిణి తీవ్ర అసహనం వ్యక్తం చేస్తూ కోపంగా చూస్తుంది. పరిస్థితిని గమనించిన మనోజ్ వెంటనే "మా అమ్మ తర్వాత నాకు ఎక్కువగా ఇష్టం నా భార్య రోహిణి" అని చెప్పి పరిస్థితిని సర్దిచెప్పే ప్రయత్నం చేస్తాడు. దీనిపై స్వామీజీ మరో ట్విస్ట్ ఇస్తూ, ఈ చేతబడి ప్రభావం నీకు ఎవరంటే ఎక్కువ ఇష్టమో వారిపైనే మొదటగా కనిపిస్తుందని చెబుతాడు. వెంటనే "నీకు ఎవరంటే ఇష్టం లేదు?" అని అడగగా, మనోజ్ బాలు పేరు చెబుతూ మొదటి నుంచీ తనకు వాడితో సఖ్యత లేదని చెబుతాడు.

దీంతో స్వామీజీ ఆశ్చర్యకరంగా స్పందిస్తూ, నీకు నచ్చని వారిపై ఈ గుడ్డు ప్రభావం అనుకూలంగా పనిచేస్తుందని, వారికి అన్ని విషయాల్లో కలిసి వస్తుందని చెబుతాడు. అంటే బాలుకు మేలు జరుగుతుందని చెప్పడం కథలో కొత్త ఆసక్తిని రేకెత్తించింది. ఇంకా ఆ స్వామీజీ.. నా మాటలను పట్టించుకోకుండా వెళ్లిపోతే ప్రమాదం మరింత తీవ్రమవుతుందని హెచ్చరిస్తాడు. దీంతో మనోజ్ ఇప్పుడు ఏం చేయాలని అడగగా, నీతో పాటు నీ తల్లి కూడా ఈ పూజలో పాల్గొనాలని చెబుతాడు. ఒకరోజు మొత్తం ఉపవాసం ఉండి, పసుపు బట్టలు ధరించి కులదైవానికి పూజ చేయాలని చెప్పడంతో మనోజ్ మరింత భయంతో ఇంటికి బయలుదేరుతాడు.

మరోవైపు ఎపిసోడ్‌లో బాలు ట్రాక్ పూర్తిగా వినోదభరితంగా సాగుతూ ప్రేక్షకులకు నవ్వులు పూయించింది. తన స్టైల్‌లో మాటలతో ఆకట్టుకునే బాలు ఈసారి ఏకంగా లవ్ గురువుగా మారి కొత్త హంగామా సృష్టించాడు. తన ఫ్రెండ్ తమ్ముడు ప్రేమలో పడిపోయి, అమ్మాయిని ఎలా ఇంప్రెస్ చేయాలో తెలియక సలహా కోసం బాలును ఆశ్రయిస్తాడు. దీంతో బాలు తనదైన స్టైల్‌లో ప్రేమ పాఠాలు మొదలుపెట్టి, అమ్మాయిల మనసు గెలవాలంటే ముందుగా వారిని స్పెషల్‌గా ఫీల్ అయ్యేలా చూడాలని చెబుతాడు. ముఖ్యంగా అసలు పేరుతో కాకుండా క్యూట్ నిక్ నేమ్‌లతో పిలిస్తే అమ్మాయిలు త్వరగా ఇంప్రెస్ అవుతారని సీక్రెట్ టిప్స్ ఇస్తాడు. ఇంకా అక్కడితో ఆగకుండా, మాట్లాడేటప్పుడు కాస్త స్టైల్ ఉండాలని, మాటల్లో ప్రేమ కనిపించాలని, చూసిన ప్రతిసారి నవ్వుతూ పలకరించాలని బాలు బోధిస్తాడు. బాలుని మాటలు విన్న ఆ యువకుడు పూర్తిగా ఫిదా అయిపోతాడు. బాలు చెప్పిన ప్రతి మాటను గొప్ప ప్రేమ సూత్రంలా భావిస్తూ, అతడిని నిజమైన లవ్ గురువుగా కీర్తిస్తాడు. అంతేకాకుండా ఆనందంతో బాలు కాళ్లకు నమస్కారం చేస్తూ ఆశీర్వాదం కూడా తీసుకుంటాడు.

మరోవైపు స్వామీజీ చెప్పిన మాటలతో పూర్తిగా భయపడిపోయిన మనోజ్, ఇంటికి చేరుకున్న వెంటనే తన తల్లి ప్రభావతిని బయటకు పిలిచి ముఖ్యమైన విషయం మాట్లాడాలని చెబుతాడు. ఆ తర్వాత తన షాప్ ఎదుట చేతబడి చేసిన కోడిగుడ్లు దొరికాయని, వాటి వల్ల తనకే కాదు మనిద్దరికీ పెద్ద ప్రమాదం ఉందని స్వామీజీ హెచ్చరించాడని చెప్పి ఆందోళన వ్యక్తం చేస్తాడు. దీనికి పరిహారంగా మనిద్దరం కలిసి మన కులదైవానికి నిష్టగా పూజ చేయాలని, ఉపవాసం ఉండాలని, అన్ని నియమాలు పాటించాలని తన తల్లిని ఒప్పించే ప్రయత్నం చేస్తాడు.

అయితే ప్రభావతి మాత్రం మనోజ్ మాటలను ఏమాత్రం పట్టించుకోకుండా తీవ్రంగా స్పందిస్తుంది. ఇలాంటి మూఢనమ్మకాలు నమ్మడమేంటిరా అంటూ మండిపడుతుంది. నిష్టగా ఉండి ఉపవాసంతో పూజలు చేయడం తన వల్ల కాదని, నీ షాప్ దగ్గర కోడిగుడ్లు దొరికితే నాకేం సంబంధమని తేల్చి చెబుతుంది. అంతేకాకుండా పక్కన భార్యను పెట్టుకొని, "నాకు ఎక్కువ ఇష్టం అమ్మ" అని స్వామీజీ దగ్గర తన పేరు ఎందుకు చెప్పావని అసహనం వ్యక్తం చేస్తుంది. ఈ మాటలతో మనోజ్ ఒక్కసారిగా సెంటిమెంట్ మోడ్‌లోకి వెళ్లి, చిన్నప్పటి నుంచి నువ్వే నన్ను ప్రేమగా చూసుకున్నావని, నాకు కావాల్సిన ప్రతిదీ నువ్వే ఇచ్చావని, అందుకే నీ పేరు చెప్పానని భావోద్వేగంగా చెబుతాడు.

అయినా ప్రభావతి మనసు కరగదు. నీ పెళ్లాం ఉంది కదా, నువ్వూ నీ భార్య కలిసి ఆ పూజలు చేసుకోండి అంటూ వ్యంగ్యంగా సమాధానం ఇస్తుంది. ఈ సమయంలో రోహిణి కూడా మాట్లాడేందుకు ప్రయత్నిస్తూ, తాను చిన్నప్పటి నుంచి మలేషియాలో పెరిగానని, ఇలాంటి గుళ్లు గోపురాలు తనకు తెలియవని చెబుతుంది. వెంటనే ప్రభావతి ఆమెపై విరుచుకుపడుతూ, ఆ మలేషియా కథలు తన దగ్గర చెప్పొద్దని ఘాటుగా హెచ్చరిస్తుంది. ఏదైనా అడిగితే మా నాన్న జైలులో ఉన్నాడు, మా మామయ్య తీర్థయాత్రలో ఉన్నాడు, ఫోన్ చేయమంటే సిగ్నల్ లేదు అంటూ కథలు చెబుతావని రోహిణిని అవమానిస్తుంది. చివరికి మీ పూజలతో నాకు ఎలాంటి సంబంధం లేదని చెప్పి అక్కడి నుంచి వెళ్లిపోతుంది.

ఇక్కడితో ఆగని మనోజ్ మరోసారి తన తల్లిని ఆపి సెంటిమెంట్ ప్రయోగిస్తాడు. "అమ్మా... ఇదే నా చివరి కోరిక. నువ్వు నాకు సహాయం చేయకపోతే నేను ఈ లోకం నుంచి శాశ్వతంగా వెళ్లిపోతా" అంటూ ఆమె కాళ్లపై పడిపోతాడు. ఈ ఒక్క సహాయం చేస్తే జీవితాంతం నీకు రుణపడి ఉంటానని వేడుకుంటాడు. అయినా ప్రభావతి మాత్రం కఠినంగానే స్పందిస్తుంది. ఇవన్నీ మూఢనమ్మకాలే అంటూ కొట్టిపారేసి హాల్‌లోకి వెళ్లిపోతుంది. అయితే అదే సమయంలో ఊహించని ట్విస్ట్ చోటుచేసుకుంటుంది.

ప్రభావతి హాల్లో అడుగుపెట్టగానే సడన్‌గా సీలింగ్ ఫ్యాన్ ఊడిపోయి ఆమె కాళ్ల ముందే పడిపోతుంది. ఒక్క క్షణం ఆలస్యం అయినా భారీ ప్రమాదం జరిగేదనేలా సన్నివేశం ఉత్కంఠ రేపింది. వెంటనే అక్కడికి పరుగెత్తుకొచ్చిన మనోజ్, "చూశావా అమ్మా... ఇది కేవలం హెచ్చరిక మాత్రమే. రాబోయే రోజుల్లో ఇంకా ఎన్నో ప్రమాదాలు జరగబోతున్నాయి. ఇకనైనా నమ్మి మన కులదైవానికి పూజ చేద్దాం" అంటూ వేడుకుంటాడు. అయినా ప్రభావతి మాత్రం ఈ ఘటనను కూడా పట్టించుకోకుండా మొండిగా వ్యవహరిస్తుంది. అది యాదృచ్ఛికం మాత్రమేనని భావించి, మనోజ్ మాటలను తిరస్కరిస్తుంది.

మరుసటి రోజు ఉదయం ప్రసారమైన ఎపిసోడ్ పూర్తిగా వినోదభరితంగా సాగుతూ ప్రేక్షకులను కడుపుబ్బా నవ్వించింది. ఇంట్లో ఒక్కసారిగా నీళ్ల సమస్య రావడంతో మొదలైన గందరగోళం, చివరికి కరెంట్ షాక్ కామెడీ ట్రాక్ వరకు వెళ్లి ఎపిసోడ్‌కు ప్రత్యేక హైలైట్‌గా నిలిచింది. ఉదయం లేవగానే ప్రభావతి ఇంట్లో నీళ్ల మోటార్ చెడిపోవడంతో పెద్ద సమస్య తలెత్తుతుంది. దీంతో ఇంట్లో నీటి కొరత ఏర్పడి, అందరూ నీళ్ల కోసం తిప్పలు పడే పరిస్థితి వస్తుంది. ఈ సమయంలో ప్రభావతి తన అత్తగారి హోదాలో మీనాక్షికి ఆర్డర్ వేస్తూ, ఇంట్లో అందరికీ నీళ్లు తీసుకురమ్మని చెబుతుంది. అయితే బాలు వెంటనే రంగంలోకి దిగి, "నా పెళ్లాం పనిమనిషి కాదు... ఎవరికెవరికీ నీళ్లు కావాలో వాళ్లే తెచ్చుకోండి" అంటూ స్ట్రాంగ్ కౌంటర్ ఇస్తాడు. దీంతో ప్రభావతి ఒక్కసారిగా షాక్ అవుతుంది. ఇక మీనా కూడా సమయస్ఫూర్తిగా స్పందిస్తూ, ఇంట్లో ఉన్న ప్రతి ఒక్కరికీ ఒక్కో బిందె ఇచ్చి కులాయి దగ్గరికి వెళ్లి నీళ్లు తీసుకురమ్మని చెబుతుంది. దీంతో ఇంట్లో చిన్నవాళ్ల నుంచి పెద్దవాళ్ల వరకు అందరూ బిందెలు మోస్తూ తిరగడం కామెడీగా మారుతుంది.

ఇదిలా ఉండగా శృతి మాత్రం అత్యుత్సాహంతో నీళ్లు మోసేందుకు ముందుకొస్తుంది. బిందెను ఎత్తుకొని తొందరపాటుతో నడుస్తూ మనోజ్ కాలి మీద పడేస్తుంది. దీంతో మనోజ్ గట్టిగా అరుస్తూ "అయ్యో నా కాలు విరిగిపోయింది" అంటూ నొప్పితో విలవిలలాడతాడు. ఈ సన్నివేశం ఇంట్లో ఉన్నవారిని భయపెట్టినా, ప్రేక్షకులను మాత్రం నవ్వుల్లో ముంచెత్తింది. మరోవైపు రోహిణి మాత్రం ఎలాంటి ఇబ్బంది లేకుండా చాకచక్యంగా నీళ్లు మోస్తూ రావడం చూసి ప్రభావతి ఆశ్చర్యపోతుంది. "నీకు అలవాటు లేని పని కదా అమ్మా... ఎలా చేస్తున్నావ్?" అని అడగగా, రోహిణి వెంటనే "బాలు ఎక్కడ హేళన చేస్తాడో అని చేస్తున్నా" అంటూ కవరింగ్ ఇస్తుంది.

ఇక మరోవైపు సమస్యను పూర్తిగా పరిష్కరించేందుకు బాలు మోటార్ మెకానిక్‌ను పిలిపిస్తాడు. మెకానిక్ మోటార్ చెక్ చేసి, రిపేర్ చేయడానికి ముందు మెయిన్ స్విచ్ ఆఫ్ చేస్తాడు. అనంతరం "ఎవరూ మెయిన్ స్విచ్ ఆన్ చేయకండి... లేదంటే ఇంట్లో వాళ్లందరికీ కరెంట్ షాక్ వచ్చే ప్రమాదం ఉంది" అని గట్టిగా హెచ్చరిస్తాడు. బాలు కూడా "సరే, నేను చూసుకుంటా" అని చెబుతాడు. కానీ ఎప్పటిలాగే మనోజ్ తన తెలివితేటలు చూపిస్తూ ఆ మాట పట్టించుకోకుండా మెల్లగా వెళ్లి మెయిన్ స్విచ్ ఆన్ చేసి అక్కడి నుంచి జారుకుంటాడు.

ఇంతలో ప్రభావతి ఉక్కపోతగా ఉందని ఫ్యాన్ ఆన్ చేయడానికి వెళ్తుంది. స్విచ్ తాకగానే ఒక్కసారిగా ఆమెకు కరెంట్ షాక్ తగులుతుంది. ఆ విషయం అర్థం కాక మీనాక్షి పరుగెత్తి వెళ్లి ప్రభావతిని పట్టుకోగానే ఆమెకూ షాక్ వస్తుంది. వారిని కాపాడేందుకు వెళ్లిన రోహిణి కూడా అనుకోకుండా టచ్ చేయడంతో షాక్‌కు గురవుతుంది. ఆ తర్వాత రోహిణిని రక్షించేందుకు వెళ్లిన మనోజ్ కూడా చిక్కుకుంటాడు. శృతి, రవి ఇలా ఒక్కొక్కరుగా అందరూ వెళ్లి కరెంట్ షాక్‌కు గురవడంతో ఇంట్లో మొత్తం గందరగోళ పరిస్థితి నెలకొంటుంది. ఈ పరిస్థితిని గమనించిన మీనా మాత్రం చాకచక్యంగా స్పందిస్తుంది. "అత్తయ్యా... మీ మీద కోపంతో కొట్టడం లేదు, మిమ్మల్ని కాపాడేందుకే కొడుతున్నాను" అంటూ దగ్గర్లో ఉన్న కర్ర తీసుకొని ప్రభావతిని కొడుతుంది. ఆ దెబ్బతో ఆమె కరెంట్ నుంచి బయటపడుతుంది. అలాగే ఒక్కొక్కరిని కర్రతో విడదీస్తూ అందరినీ షాక్ నుంచి రక్షిస్తుంది.

ఇంతలో అక్కడికి వచ్చిన బాలు, "అసలు ఏమైంది? అందరూ ఎందుకు ఇలా పడిపోయారు?" అంటూ షాక్ అవుతాడు. మీనా జరిగిన విషయం చెప్పి, అందరికీ షాక్ వచ్చిందని అందుకే కర్రతో కొట్టానని వివరిస్తుంది. వెంటనే బాలు, "మెయిన్ స్విచ్ ఆఫ్‌లో ఉంది కదా... ఎవరు ఆన్ చేశారు?" అని ప్రశ్నించగానే మనోజ్ మెల్లగా అక్కడి నుంచి జారుకునే ప్రయత్నం చేస్తాడు. దీంతో ప్రభావతికి అసలు విషయం అర్థమై, మనోజ్‌ను పట్టుకొని చితకబాదుతుంది. వెంటనే ఇంట్లో అందరూ కలిసి మనోజ్‌పై దాడి చేయడంతో కామెడీ పీక్స్‌కు చేరింది.