Gundeninda Gudigantalu May 21 Episode: చింతామణికి మీనా వార్నింగ్, చేతికి చిక్కిన విల్లా విజయ్ ఎస్కేప్,

photo courtesy jiohotstar

Gundeninda Gudigantalu: గుండె నిండా గుడి గంటలు బుధవారం ఎపిసోడ్ పూర్తిగా రోహిణి చుట్టూ తిరుగుతూ, ఆమె భండారం ఒక్కొక్కటిగా బయటపడేలా సాగింది. ఎపిసోడ్ ప్రారంభంలోనే ప్రభావతి, మనోజ్-రోహిణిలను డబ్బు గురించి నిలదీస్తూ, "డబ్బు తెచ్చేవరకు ఇంట్లో గౌరవం లేదు" అని గట్టిగా చెప్పడం టెన్షన్ పెంచింది. ఇదే సమయంలో బాలు, మీనా ఎంట్రీ ఇచ్చి, వాళ్లను మరింత ఇరికించేలా మాట్లాడారు. ముఖ్యంగా రోహిణి తన తండ్రి గొప్పలు చెప్పడంతో మీనా ఘాటుగా కౌంటర్ ఇవ్వడం హైలైట్‌గా నిలిచింది. పరిస్థితి మరింత దిగజారుతూ, చివరకు మనోజ్-రోహిణి తినడానికి కూడా నోచుకోని స్థితి వచ్చింది. అందరూ బయట నుంచి భోజనం తెచ్చుకోవడంతో, రోహిణి కిచెన్‌లోకి దిగాల్సి వచ్చింది.

అయితే దోసెలు కూడా సరిగా వేయలేకపోవడం, చేసిన చట్నీ కారంగా ఉండటంతో మనోజ్, ప్రభావతి కళ్లలో నీళ్లు రావడం సన్నివేశానికి కొంచెం కామెడీ టచ్ ఇచ్చింది. ఇక అసలు ట్విస్ట్ కిచెన్ సీన్‌లో వచ్చింది. మీనా, రోహిణిని గుణ దగ్గర అప్పు గురించి నిలదీయడం ఆమెను కంగారు పెట్టింది. గుణ ఓ రౌడీ అని, శివ ద్వారా ఈ విషయం తెలిసిందని చెప్పడంతో రోహిణి టెన్షన్ పడింది. అదే సమయంలో బాలు, రవి కూడా మనోజ్‌కు ఈ విషయం చెబుతారు. మొదట నమ్మని మనోజ్, తర్వాత అనుమానంతో భార్యను నేరుగా ప్రశ్నించడం ఎపిసోడ్‌ను హై వోల్టేజ్‌లో ముగించింది.

గురువారం ఎపిసోడ్ పూర్తిగా ఉత్కంఠభరితంగా సాగింది. ముఖ్యంగా రోహిణి చుట్టూ తిరిగిన కథ మరింత మలుపులు తిరుగుతూ ప్రేక్షకులను కట్టిపడేసింది. ఇప్పటివరకు ప్రశాంతంగా కనిపించిన పరిస్థితులు ఒక్కసారిగా అనుమానాల దిశగా మారడంతో కథలో కొత్త టెన్షన్ మొదలైంది. ఈ ఎపిసోడ్‌లో బాలు రోహిణిపై తీవ్ర అనుమానం వ్యక్తం చేస్తూ పలు ప్రశ్నలు అడగడం ప్రధాన హైలైట్‌గా నిలిచింది. బాలు మాటలతో ప్రభావితమైన మనోజ్ కూడా రోహిణి ప్రవర్తనపై సందేహం వ్యక్తం చేస్తూ ఆమెను నేరుగా ప్రశ్నించేందుకు ముందుకొచ్చాడు. ముఖ్యంగా "నీ నాన్న నిజంగానే కోటీశ్వరుడా? మిలియన్ స్థాయిలో సంబంధాలు ఉన్నాయా?" అంటూ మనోజ్ అడిగిన ప్రశ్నలు రోహిణిని ఒక్కసారిగా కంగారు పెట్టాయి.

ఈ ప్రశ్నలకు సమాధానం ఇవ్వడంలో రోహిణి తొలుత తడబడటం, వెంటనే మాట మళ్లించే ప్రయత్నం చేయడం ఆమెపై ఉన్న అనుమానాలను మరింత బలపరిచింది. "ఇవి నువ్వు అడిగే ప్రశ్నలు కావు... ఎవరో నిన్ను నా మీద రెచ్చగొడుతున్నారు" అంటూ బాలు పేరు ప్రస్తావించడం ద్వారా పరిస్థితిని మార్చే ప్రయత్నం చేసింది. అయితే మనోజ్ మాత్రం వెనక్కి తగ్గకుండా "బాలు చెప్పినా, నాకు కూడా చాలా రోజులుగా ఈ విషయం తెలుసుకోవాలని ఉంది" అంటూ మళ్లీ ప్రశ్నలు కొనసాగించాడు.

అక్కడితో ఆగకుండా, గుణ దగ్గర అప్పులు తీసుకున్న విషయాన్ని కూడా మనోజ్ ప్రస్తావించడంతో పరిస్థితి మరింత సీరియస్ అయింది. ఇక దాచలేనని భావించిన రోహిణి, "అవును... నేను గుణ దగ్గర అప్పు తీసుకున్నాను" అని ఒప్పుకుంది. అయితే ఆ విషయం వెనుక ఉన్న కారణాలను వివరించే ప్రయత్నం చేస్తూ, తనపై ఉన్న నిందలను తగ్గించుకోవాలని చూసింది.

"నీ వల్లే నేను అప్పులు చేశాను. నువ్వు ఉద్యోగం లేక ఇబ్బందుల్లో ఉండగా నేను చూడలేకపోయాను. పెళ్లి తర్వాత ఖర్చులు పెరిగాయి. అవసరాల కోసం ముందుగా విద్య దగ్గర డబ్బులు తీసుకునేదాన్ని. తర్వాత పెద్ద మొత్తం అవసరం వచ్చినప్పుడు గుణ దగ్గర అప్పు తీసుకున్నాను" అంటూ రోహిణి చెప్పిన మాటలు కథకు కొత్త మలుపు తీసుకొచ్చాయి.

అదే సమయంలో గుణ గురించి వచ్చిన నెగటివ్ ఇమేజ్‌ను కూడా రోహిణి సమర్థించుకునే ప్రయత్నం చేసింది. "మీరు అనుకుంటున్నట్లుగా ఆయన పెద్ద రౌడీ కాదు. మన అవసరాలకు సహాయం చేసిన వ్యక్తి" అంటూ గుణను కాపాడే ప్రయత్నం చేయడం ఆసక్తికరంగా మారింది.

మరోవైపు, బాలు మరియు మీనాకు గుణతో ఉన్న పాత గొడవలను ప్రస్తావిస్తూ, "ఆ గొడవల వల్లే మన మధ్య చిచ్చు పెట్టాలని ప్రయత్నిస్తున్నారు. వాటిని అర్థం చేసుకుని ఆలోచించు" అంటూ మనోజ్‌ను ప్రభావితం చేయడానికి ప్రయత్నించింది. చివరికి పరిస్థితి తనకు అనుకూలంగా మారుతుందనే భావనతో అక్కడి నుంచి వెళ్లిపోవడం ఎపిసోడ్‌ను సస్పెన్స్‌లో ముగించింది.

మరోవైపు.. ఇంటి పెద్ద సత్యం నిద్ర పట్టక హాల్లో తిరుగుతూ ఉండటం ద్వారా ఆయన మనసులో ఉన్న ఆందోళన స్పష్టమైంది. ఈ పరిస్థితిని గమనించిన బాలు, తన తండ్రిని ప్రశ్నించగా అసలు విషయం బయటపడింది. తమ కుటుంబాన్ని కుదిపేసిన 30 లక్షల మోసం గురించి ఆలోచిస్తూ సత్యం తీవ్రంగా కలవరపడుతున్నాడు. ఎలాగైనా ఆ మోసగాడిని పట్టుకుని డబ్బులు తిరిగి తెచ్చుకోవాలని బాలును కోరుతాడు. తండ్రి బాధను చూసిన బాలు, "ఎలాగైనా ఆ వ్యక్తిని కనుక్కుంటాను" అంటూ మాట ఇస్తాడు.

ఈ క్రమంలోనే బాలు ఒక కీలక నిర్ణయం తీసుకుంటాడు. టీవీ ఆర్టిస్ట్ కిరణ్‌ను కలవాలని భావించి, ఆ ప్లాన్‌ను మీనాతో షేర్ చేస్తాడు. మరుసటి రోజు తమ యాక్షన్ ప్లాన్ ప్రకారం, మీనా తెలివిగా బాలును కిరణ్ ఇంటికి తీసుకెళ్తుంది. అక్కడ ఇద్దరూ తమ అసలు ఉద్దేశ్యాన్ని దాచిపెట్టి, "పూలజంప - ములగంప" అంటూ సరదాగా పరిచయం చేసుకోవడం సన్నివేశానికి కొంత హాస్యాన్ని జోడించింది.

కిరణ్‌ను చూసిన మీనా, తాను అతని అభిమానినని చెబుతూ సెల్ఫీ కోరుతుంది. ప్రేక్షకుల అభిమానమే తమకు పాపులారిటీ తీసుకొస్తుందని చెప్పిన కిరణ్, ఆనందంగా సెల్ఫీ ఇస్తాడు. ఈ సమయంలో బాలు తెలివిగా మాట మొదలుపెట్టి, "ఇది మీ సొంత ఇల్లేనా?" అని ప్రశ్నిస్తాడు. దానికి కిరణ్ ఆశ్చర్యపడి ఎందుకు అలా అడుగుతున్నారని అడగగా, "ముందు మిమ్మల్ని ఓ విల్లాలో చూశాను" అని బాలు చెబుతాడు.

ఈ ప్రశ్నతో అసలు ట్విస్ట్ బయటపడుతుంది. కిరణ్ చెప్పిన ప్రకారం, ఆ విల్లాను కొనాలనుకున్నప్పటికీ అమ్మే వ్యక్తి ప్రవర్తన అనుమానాస్పదంగా ఉండటంతో డీల్ క్యాన్సిల్ చేసుకున్నాడని వెల్లడిస్తాడు. డాక్యుమెంట్స్ అడిగితే సరైన సమాధానం చెప్పలేకపోయాడని, మోసపోయే ప్రమాదం ఉందని భావించి వెనక్కి తగ్గినట్టు చెబుతాడు. దీంతో బాలు-మీనాలకు తమ అనుమానం మరింత బలపడుతుంది.

ఈ సమయంలో బాలు, తన అన్న మనోజ్ 30 లక్షలు మోసపోయిన విషయాన్ని కిరణ్‌కు చెబుతాడు. ఆ మోసగాడి గురించి ఏమైనా సమాచారం ఉందా అని అడగగా, కిరణ్ "వారి అడ్రస్ ధవలేశ్వరం అని చెప్పాడు... కానీ అది కూడా నాకు నమ్మకం లేదు" అంటూ క్లారిటీ ఇస్తాడు. దీంతో మోసం వెనుక ఉన్న వ్యక్తి మరింత మిస్టరీగా మారుతుంది.

ఇంతలోనే సీన్‌లోకి చింతామణి ఎంట్రీ ఇస్తుంది. తన బిజినెస్ డీల్ గురించి మాట్లాడటానికి వచ్చిన ఆమె ప్రవర్తన కిరణ్‌కు అస్సలు నచ్చదు. ఇంట్లోకి రావాలంటే ముందుగా చెప్పులు తీసేయాలని చెప్పడంతో, తన పొగరు కొద్దిగా తగ్గించుకుని లోపలికి వస్తుంది. గతంలో ఇచ్చిన ఆర్డర్ గురించి అడగగా, కిరణ్ కీలక నిర్ణయం చెబుతాడు - "కళ్యాణమండపం ఆర్డర్ మీకిస్తాను... కానీ మిగతా ఆర్డర్స్ మీనాకు ఇస్తాను. మీరు వర్క్ షేర్ చేసుకోండి" అని చెప్పడం సీన్‌ను హాట్‌గా మార్చింది.

ఇది విన్న చింతామణి తన అసలు స్వరూపాన్ని చూపిస్తుంది. "ఈ ఫీల్డ్‌లో నాకు ఎవరు సాటిరారు... గుడి ముందు పూల అమ్ముకునే వాళ్లు ఎక్కడ, నేను ఎక్కడ" అంటూ అహంకారంగా మాట్లాడుతుంది. అయితే మీనా మాత్రం తగ్గకుండా బలమైన కౌంటర్ ఇస్తుంది "నాకు ఇదే మొదటి ఆర్డర్ అయితే ఆ అవకాశాన్ని నేనే తీసుకుంటాను" అంటూ ధైర్యంగా స్పందిస్తుంది. ఈ మాటలతో చింతామణి షాక్ అవుతూ అవమానంగా భావించి అక్కడి నుంచి వెళ్లిపోతుంది.

అయితే బయటకు వచ్చిన తర్వాత కూడా చింతామణి ఆగదు. మీనాను అడ్డగించి "నీలా వాళ్లు పుట్టగొడుగుల్లా వస్తారు... కానీ అందరూ ఎదగరు" అంటూ హేళనగా మాట్లాడుతుంది. దీనికి మీనా ఇచ్చిన రిప్లై మాత్రం ఎపిసోడ్‌కు హైలైట్‌గా నిలిచింది "మీ మీదనే గుడి ఉంది... ఆ పుట్టగొడుగు మీరు కావచ్చు, జాగ్రత్త!" అంటూ గట్టి కౌంటర్ ఇవ్వడంతో చింతామణి నిశ్శబ్దంగా వెళ్లిపోతుంది.

ఇక నేటీ ఎపిసోడ్‌లో కథ కీలక మలుపు తిరిగింది. 30 లక్షల మోసం చేసిన విల్లా విజయ్‌ను పట్టుకోవడానికి బాలు-మీనాలు ధవలేశ్వరం ప్రయాణం అవడం కథను మరింత ఉత్కంఠగా మార్చింది. బయటకు లాంగ్ డ్రైవ్‌లా కనిపించినా, వారి అసలు లక్ష్యం ఒక్కటే - మోసగాడిని కనిపెట్టి డబ్బులు తిరిగి సాధించడం. ఈ ప్రయాణంలో వారి మధ్య ఉన్న అండర్‌స్టాండింగ్, పట్టుదల స్పష్టంగా కనిపించింది. ధవలేశ్వరం చేరుకున్న తర్వాత బాలు-మీనాలు ఆ మోసగాడి కోసం గాలింపు ప్రారంభిస్తారు. ప్రతి చోటా అడిగి, ప్రతి వీధి వెంబడి వెతుకుతూ చివరకు అలసిపోతారు.

ఈ సమయంలో మీనా కొద్దిగా నిరుత్సాహపడుతూ "అనవసరంగా వచ్చామేమో" అని అనగా, బాలు మాత్రం ధైర్యం కోల్పోకుండా ప్రోత్సహిస్తాడు. "సంకల్పంతో ముందుకు వెళ్తే తప్పకుండా ఫలితం ఉంటుంది... మన ప్రయత్నం ఆగకూడదు" అంటూ మీనాకు మోటివేషన్ ఇస్తాడు. ఈ డైలాగ్ సీన్‌కు బలమైన ఎమోషనల్ టచ్ ఇచ్చింది. ఇలా వెతుకుతూ ఉండగానే అనుకోకుండా ట్విస్ట్ ఎదురవుతుంది. ఒకచోట చేపలు అమ్ముకుంటున్న వ్యక్తిని చూసి మీనాకు అనుమానం వస్తుంది. దగ్గరగా గమనించగా అతడే విల్లా విజయ్ అని గుర్తిస్తుంది.

ఇదే సమయంలో అతని భార్య పట్టు చీర, బంగారు నగలతో అక్కడికి రావడం సస్పెన్స్‌ను మరింత పెంచింది. ఆమె "30 లక్షలు సంపాదించాక కూడా ఈ చిన్న వ్యాపారం ఎందుకు?" అని ప్రశ్నించగా, విజయ్ చెప్పిన మాటలు అతని మైండ్‌సెట్‌ను బయటపెట్టాయి - "డబ్బు ఎప్పటికీ ఉండదు... అందరూ మనోజ్‌లా అమాయకులు ఉండరు, కిరణ్‌లా తెలివైన వాళ్లు కూడా ఉంటారు... మనమే జాగ్రత్తగా ఉండాలి" అంటూ తన దుర్మార్గాన్ని గర్వంగా చెప్పడం షాకింగ్‌గా అనిపించింది.

ఇదంతా గమనించిన మీనా వెంటనే బాలుకు చెప్పడంతో సీన్ హీట్ అవుతుంది. బాలు ఒక్కసారిగా వెళ్లి విజయ్ కాలర్ పట్టుకొని బయటకు లాగి నిలదీస్తాడు. "మా అన్నను మోసం చేసినట్టు నన్ను మోసం చేయలేవు... మా 30 లక్షలు ఎక్కడ?" అంటూ తీవ్రంగా ప్రశ్నిస్తాడు. "మర్యాదగా డబ్బులు ఇవ్వాలి... లేకపోతే చేపను రాసినట్టు నిన్ను కూడా రాస్తాను" అంటూ గట్టిగా హెచ్చరిస్తాడు. మీనా కూడా వెనకడుగు వేయకుండా కఠినంగా వార్నింగ్ ఇవ్వడంతో పరిస్థితి క్లైమాక్స్‌కు చేరుతుంది.

అయితే ఇంతలోనే అనుకోని మలుపు. మనోజ్ నుంచి వరుసగా ఫోన్ కాల్స్ రావడం సీన్‌ను డిస్ట్రబ్ చేస్తుంది. మొదట బాలు కాల్ కట్ చేసినా, ఎమర్జెన్సీ అనుకుని చివరకు లిఫ్ట్ చేస్తాడు. కానీ ఫోన్ ఎత్తిన తర్వాత తెలిసిన విషయం మాత్రం పూర్తిగా షాకింగ్ - మనోజ్ తన ఫ్రెండ్ 30 రూపాయలు ఇవ్వాల్సి ఉందని, అతను ఫోన్ ఎత్తడం లేదని చెప్పడం! ఈ చిన్న విషయానికి ఇంతగా ఫోన్ చేసినందుకు బాలు కోపంతో ఊగిపోతాడు. "30 రూపాయల కోసం 30 సార్లు ఫోన్ చేస్తావా?" అంటూ మనోజ్‌పై మండిపడతాడు.

ఈ చిన్న గ్యాప్‌ను ఉపయోగించుకున్న విల్లా విజయ్ మరియు అతని భార్య అక్కడి నుంచి జారుకోవడం ఎపిసోడ్‌లో పెద్ద ట్విస్ట్‌గా మారింది. చేతికి చిక్కిన మోసగాడు ఇలా తప్పించుకోవడంతో బాలు-మీనాలు తీవ్ర నిరాశకు గురవుతారు. చివరకు చేసేది ఏమీ లేక, అక్కడ ఉన్న చేపలను ఫ్రీగా పంచి వెళ్తారు ఇది ఒకవైపు వారి నిరాశను, మరోవైపు పరిస్థితిపై ఉన్న అసహాయతను ప్రతిబింబించింది.

మొత్తంగా ఈరోజు ఎపిసోడ్‌లో ఉత్కంఠ, యాక్షన్, ఎమోషన్ అన్నీ మిక్స్ అయి ప్రేక్షకులను ఆకట్టుకున్నాయి. చివరి క్షణంలో మోసగాడు తప్పించుకోవడం కథను మరింత ఆసక్తికరంగా మార్చింది. ఇక బాలు-మీనాలు మళ్లీ ఎలా ట్రాప్ వేస్తారు? విల్లా విజయ్ ఎప్పుడు పట్టుబడతాడు? అన్న ప్రశ్నలు ప్రేక్షకుల్లో ఆసక్తిని రేపుతున్నాయి.