Gundeninda Gudigantalu May 27th Episode: రోహిణిపై బాలు కన్ను, మీనా ఫైర్, శృతి-రవి రిలేషన్‌లో క్రాక్,

Gundeninda Gudigantalu: గుండె నిండా గుడి గంటలు మంగళవారం ఎపిసోడ్ ఎంటర్టైన్‌మెంట్‌తో పాటు హై టెన్షన్ డ్రామాతో ప్రేక్షకులను బాగా ఆకట్టుకుంది. ఎపిసోడ్ ప్రారంభంలో మీనా మలేషియా అతిథుల కోసం స్పెషల్ వంటలు చేస్తుండగా ప్రభావతి ఎంట్రీ ఇచ్చి వెటకారంగా ప్రశ్నించడం వంటగదిలో ఉద్రిక్తతను పెంచింది. శృతి కూడా కౌంటర్లు ఇస్తూ మాటల యుద్ధాన్ని మరింత పెంచగా, పరిస్థితిని అదుపులోకి తెచ్చేందుకు మీనా జోక్యం చేసుకుంది. ప్రభావతి మాత్రం తన వైఖరిని మార్చకుండా అతిథుల విషయం మీద అసహనం వ్యక్తం చేస్తుంది. ఈ సమయంలో సత్యం వచ్చి ఆతిథ్యం మన సంప్రదాయం అని చెప్పి పరిస్థితిని కూల్ చేస్తాడు. మరోవైపు రోహిణి వ్యంగ్య వ్యాఖ్యలు చేస్తూ మీనాను ఇబ్బంది పెట్టాలని చూస్తుంది.

అయితే మీనా తన కష్టార్జితంతో ఇతరులకు భోజనం పెట్టడం ఆనందమని ఘాటుగా సమాధానం ఇవ్వడం హైలైట్‌గా నిలిచింది.బాలు మలేషియా దంపతులను ఇంటికి తీసుకురాగానే ప్రభావతి మొదట అసహనం చూపించినా, వారి గురించి తెలుసుకున్న తర్వాత టోన్ మార్చి నటించడం ఆసక్తికరంగా మారింది.రోహిణి నిజం బయటపడుతుందనే భయంతో పంటి నొప్పి డ్రామా చేసి తప్పించుకోవాలని ప్రయత్నిస్తుంది. కానీ శృతి ఆమెను హాస్పిటల్‌కు తీసుకెళ్లడంతో చివరికి నిజంగానే పన్ను పీకించుకోవాల్సిన పరిస్థితి రావడం ఎపిసోడ్‌లో ప్రధాన ట్విస్ట్‌గా నిలిచింది. చివర్లో మలేషియా దంపతులు మీనా ఆతిథ్యాన్ని ప్రశంసించి, ఆమెను ఆదర్శ కోడలిగా కొనియాడటం భావోద్వేగాన్ని కలిగించింది. ప్రభావతి బయటకు నవ్వినా లోపల అసంతృప్తిగా ఉండటం మరో కోణాన్ని చూపించింది. మొత్తం ఎపిసోడ్ డ్రామా, కామెడీ, ట్విస్టులతో ఆకట్టుకుంది.

photo courtesy jiohotstar

బుధవారం ఎపిసోడ్ భావోద్వేగాలు, ట్విస్టులు, కుటుంబ ఘర్షణలతో ఎంతో రసవత్తరంగా సాగింది. మీనా చేసిన వంటకాలను రుచి చూసిన మలేషియా దంపతులు ఆమెను ప్రశంసలతో ముంచెత్తారు. ఇలాంటి కోడలు ప్రతి ఇంట్లో ఉండాలని, ఆమె వల్ల కుటుంబానికి మంచి పేరు వస్తుందని చెప్పి ప్రభావతి ముందే మీనాను పొగడటం ప్రత్యేకంగా నిలిచింది. వెళ్లే ముందు బాలు వారికి గిఫ్ట్ ఇచ్చి సత్కరించగా, మలేషియాకు వచ్చినప్పుడు తప్పకుండా తమ ఇంటికే రావాలని ఆహ్వానిస్తారు.

అయితే అతిథులు వెళ్లిపోయిన వెంటనే ఇంట్లో మరో కొత్త డ్రామా మొదలైంది. రోహిణి కనిపించకపోవడంతో మనోజ్ ఆందోళన చెందుతాడు. ఇదే సమయంలో బాలు తన స్టైల్‌లో వెటకారం చేస్తూ రోహిణిపై కామెంట్లు చేయడం హాస్యాన్ని పంచింది. కొద్దిసేపటికే శృతి రోహిణిని తీసుకుని ఇంటికి రావడంతో అసలు విషయం బయటపడింది. మలేషియా అతిథులను కలిసే అవకాశం కోల్పోయిందని ప్రభావతి బాధపడుతుండగా, రోహిణి మాత్రం "శృతి నా పన్ను పీకించింది" అంటూ చెప్పడం షాక్ కలిగించింది. దీనికి శృతి కౌంటర్ ఇస్తూ, పన్ను పూర్తిగా పాడైందని డాక్టర్లు చెప్పారని, ఆలస్యమైతే ఇంకా పెద్ద సమస్య వచ్చేదని స్పష్టం చేసింది.

ఇక ప్రభావతి మాత్రం మరో కోణంలో ఆలోచిస్తూ, రోహిణి అక్కడ ఉంటే ఆమె తండ్రి సమస్యకు మలేషియా దంపతుల సహాయం తీసుకునే అవకాశం ఉండేదని చెప్పి నిరాశ వ్యక్తం చేసింది. ఈ మాటలు విన్న రోహిణి మరింత టెన్షన్‌కు గురై, తన అసలు విషయం బయటపడుతుందనే భయంతో మళ్లీ పంటి నొప్పిని కారణంగా చూపుతూ అక్కడి నుంచి తప్పించుకోవడానికి ప్రయత్నించింది. రెస్ట్ తీసుకుంటానని చెప్పి వెళ్లిపోవడం ద్వారా పరిస్థితిని తప్పించుకోవాలని చూసింది.

ఇక రోహిణి ప్రవర్తనపై బాలు, మీనా మధ్య చర్చ మొదలవుతుంది. మలేషియా పేరు వినగానే రోహిణి ఒక్కసారిగా భయపడటం, వెంటనే పంటి నొప్పి డ్రామా మొదలుపెట్టడం వారిలో అనుమానాలు రేకెత్తిస్తుంది. "ఇంతసేపు బాగానే మాట్లాడింది... ఒక్కసారిగా పంటి నొప్పి ఎలా వస్తుంది?" అంటూ మీనా సందేహం వ్యక్తం చేస్తుంది. దీనికి బాలు కూడా సమ్మతిస్తూ, "మన ఊరి వాళ్లను చూస్తే ఎవరైనా ఆనందంగా మాట్లాడతారు... కానీ రోహిణి మాత్రం దూరంగా వెళ్లేందుకు ప్రయత్నించింది. అంటే ఏదో దాచిపెడుతోంది" అని తన అనుమానాన్ని బలంగా వ్యక్తం చేస్తాడు.

ఇంతలో శృతి అక్కడికి చేరుకోవడంతో చర్చ మరింత వేడెక్కుతుంది. ఆమె క్లినిక్‌లో జరిగిన విషయాన్ని చెబుతూ, "అసలు ఆమెకు పెద్దగా నొప్పి లేదు... కానీ నేను డాక్టర్‌తో మాట్లాడి పన్ను తీసేయించాను. అంతా భరించింది కానీ అసలు విషయం బయట పెట్టలేదు" అని చెప్పడంతో పరిస్థితి మరింత క్లిష్టంగా మారుతుంది. ఈ మాటలు విన్న బాలు అనుమానం పీక్స్‌కు చేరుతుంది. "ఎలాగైనా రోహిణి అసలు నిజం బయటపెడతా... ఆమె గతం ఏంటో తెలుసుకుంటా" అంటూ గట్టిగా ఛాలెంజ్ వేస్తాడు.

ఇక మరోవైపు బాలు టాక్సీ స్టాండ్‌కి వెళ్లడం కథను కొత్త మలుపు తిప్పుతుంది. అక్కడ అతని స్నేహితుడు దుబాయ్‌కు వెళ్లే ముందు పార్టీ ఏర్పాటు చేస్తూ అందరినీ ఆహ్వానిస్తాడు. మొదట బాలు వెనుకంజ వేస్తూ, "ఇది మీనాకు తెలిసితే ఇంట్లో అడుగు పెట్టనివ్వదు" అని చెబుతాడు. అయితే స్నేహితులు అతన్ని ప్రేరేపించడంతో, మీనాకు నిజం చెప్పకుండా ఫోన్ చేసి తాను ఆలస్యంగా వస్తానని మాత్రమే చెబుతాడు. కానీ మీనా మాత్రం అతని మాటల్లో ఏదో తేడా ఉందని గ్రహించి, "తాగి వస్తే మాత్రం సహించను... అవసరమైతే మామయ్యకి చెబుతా" అని గట్టిగా హెచ్చరిస్తుంది. అయితే బాలు ఆ మాటలను పట్టించుకోకుండా, "ఇలాంటి అవకాశాలు మళ్లీ రావు" అన్న ఆలోచనతో స్నేహితులతో కలిసి పూర్తిగా మద్యం సేవిస్తాడు. ఈ నిర్ణయం తర్వాత ఇంట్లో ఎలాంటి పరిణామాలు చోటుచేసుకుంటాయో అన్న ఉత్కంఠను ఎపిసోడ్ మరింత పెంచుతుంది.

మరోవైపు రవి-శృతి ట్రాక్‌లో భావోద్వేగాలు, అపార్థాలు తీవ్ర స్థాయికి చేరుకుంటాయి. రవి నీతూ‌తో కలిసి కీలకమైన బిజినెస్ మీటింగ్‌లో బిజీగా ఉంటాడు. ఇదే సమయంలో శృతి వరుసగా ఫోన్ కాల్స్ చేస్తూ అతనిని డిస్టర్బ్ చేస్తుంది. దీంతో నీతూ కాస్త సీరియస్‌గా స్పందిస్తూ, "మీటింగ్‌లో ఉన్నప్పుడు ఫోన్ సైలెంట్‌లో పెట్టాలి, లేకపోతే స్విచ్ ఆఫ్ చేయాలి" అంటూ రవిని మందలిస్తుంది. అందరి ముందు ఇలా చెప్పడంతో రవి అసహనంగా ఫీల్ అవుతాడు. కానీ కాల్ లిఫ్ట్ చేయకపోవడం శృతికి పూర్తిగా వేరే అర్థం ఇస్తుంది. "ఇప్పటిలా కాదు... ముందున్న ప్రేమ తగ్గిపోయింది... నన్ను దూరం పెడుతున్నాడు" అంటూ ఆమె మనసులో బాధ పెరుగుతుంది. ఈ అపార్థం వారి రిలేషన్‌లో చిన్న చీలికకు దారితీస్తున్నట్టు స్పష్టమవుతుంది.

ఇదిలా ఉంటే, మరోవైపు రోహిణి ట్రాక్‌లో సస్పెన్స్ మరింత గట్టిపడుతుంది. పంటి నొప్పితో బాధపడుతున్న రోహిణి ఇంట్లో ఉండగా, మనోజ్ మాత్రం ఆమెను పట్టించుకోకుండా సైలెంట్‌గా ఉండటం ఆమెకు అసహనాన్ని కలిగిస్తుంది. కోపంతో బయటకు వెళ్లిన రోహిణికి వరుసగా ఒక ఫోన్ కాల్ వస్తుంది. ఆమె లేని సమయంలో కాల్ వస్తుండటంతో, మొదట మనోజ్ ఎత్తాలా వద్దా అని సందేహపడతాడు. కానీ కాల్ కంటిన్యూగా రావడంతో చివరకు లిఫ్ట్ చేస్తాడు.

అవతలి వ్యక్తి మాట్లాడుతూ, "ప్రతినెల 5వ తేదీకి రెంట్ ఇవ్వమన్నాను కదా... ఇంకా ఎందుకు ఇవ్వడం లేదు?" అని ప్రశ్నించడంతో మనోజ్ షాక్ అవుతాడు. అసలు విషయం అర్థం కాక "ఎవరు మీరు?" అని అడగగా, "నేను రోహిణి భర్తను" అంటూ చెప్పడం అతనిలో అనుమానాలను మరింత పెంచుతుంది. "ఎవరు అయినా సరే, రోహిణి ఇంకా రెంట్ చెల్లించలేదు... చెప్పండి" అని ఆ వ్యక్తి చెప్పడంతో మనోజ్ పూర్తిగా గందరగోళానికి గురవుతాడు. "రోహిణి నా దగ్గర ఏదో దాచిపెడుతోంది" అనే అనుమానం అతనిలో బలపడుతుంది.

ఇంతలో రోహిణి ఇంటికి తిరిగి రాగానే మనోజ్ నేరుగా ప్రశ్నలు వేస్తాడు. "ఎవరికి రెంట్ కడుతున్నావ్? ఎందుకు కడుతున్నావ్?" అని అడుగుతాడు. దీనికి రోహిణి వెంటనే టాపిక్ డైవర్ట్ చేస్తూ, "నా ఫోన్ ఎందుకు లిఫ్ట్ చేశావ్? నాకు కస్టమర్స్ కాల్ చేస్తుంటారు... ఇలా చేస్తే వాళ్లు పోతారు" అంటూ తప్పించుకునే ప్రయత్నం చేస్తుంది. అయితే మనోజ్ ఈసారి వెనక్కి తగ్గకుండా, "ఇది కస్టమర్స్ విషయం కాదు... అసలు నిజం చెప్పు" అంటూ గట్టిగా నిలదీస్తాడు.

చివరకు రోహిణి ఓ కథ చెబుతూ పరిస్థితిని కూల్ చేయాలని చూస్తుంది. "విద్యకు జాబ్ పోయింది... ఆపదలో ఉంది... నాకు పెళ్లికి ముందు చాలా సహాయం చేసింది... అందుకే నేను ఆమెకు సహాయం చేస్తున్నాను" అంటూ విషయం చిన్నదిగా చూపించే ప్రయత్నం చేస్తుంది. కానీ మనోజ్ మాత్రం పూర్తిగా నమ్మకపోయి, "నువ్వు నాకేం దాచిపెడుతున్నావ్? ఎందుకు నిజం చెప్పడం లేదు?" అంటూ మరింత సీరియస్‌గా ప్రశ్నిస్తాడు. ఈ పరిస్థితిని తట్టుకోలేక రోహిణి అలిగి అక్కడి నుంచి వెళ్లిపోతుంది.

ఇక మరోవైపు బాలు స్నేహితులతో కలిసి మద్యం సేవించి ఇంటికి వస్తాడు. మొదట కవరింగ్ చేయడానికి ప్రయత్నించినా అతని మాట తీరు, ప్రవర్తన చూసి మీనా వెంటనే అసలు విషయం గుర్తిస్తుంది. "ఒక్కసారి ఊదు" అంటూ అడగగా, బాలు ఊదగానే మద్యం వాసన రావడంతో మీనా ఆగ్రహానికి గురవుతుంది. "నేను చెప్పినా కూడా ఇలా తాగడం కరెక్ట్ కాదు... ముందుగా ఆ తాగుబోతు బ్యాచ్‌ని విడిచిపెట్టు" అంటూ గట్టిగా హెచ్చరిస్తుంది. అయితే బాలు కూడా వెనక్కి తగ్గకుండా, "నన్ను ఏమైనా అనుకో... కానీ నా ఫ్రెండ్స్ గురించి ఒక్క మాట కూడా అనొద్దు. వాళ్లు నా ఆపదలో తోడున్నారు" అంటూ తీవ్రంగా స్పందిస్తాడు. అంతేకాదు, మీనాతో క్షమాపణ చెప్పమని డిమాండ్ చేయడం పరిస్థితిని మరింత వేడెక్కిస్తుంది. దీనికి మీనా "నేను అస్సలు క్షమాపణ చెప్పను... ఏం చేసుకుంటావో చేసుకో" అంటూ దీటుగా సమాధానం ఇవ్వడంతో గొడవ తారాస్థాయికి చేరుతుంది. చివరకు కోపంతో బాలు టెర్రస్‌కి వెళ్లిపోవడం క్లైమాక్స్‌గా నిలుస్తుంది.

ఇక మరోవైపు రవి-శృతి మధ్య భావోద్వేగ ఘర్షణ మరింత పెరుగుతుంది. ఇంటికి వచ్చిన వెంటనే శృతి తన అసహనాన్ని బయటపెడుతూ, "ఎందుకు నా ఫోన్ లిఫ్ట్ చేయడం లేదు? ముందులా నాతో ఉండడం లేదు... నేను ఎంత వెయిట్ చేస్తున్నానో తెలుసా?" అంటూ తన బాధను వ్యక్తం చేస్తుంది. దీనికి రవి సమాధానంగా, "నేను మీటింగ్‌లో ఉన్నాను... నువ్వు వరుసగా ఫోన్ చేయడంతో నీతూ‌తో అందరి ముందు మాటలు పడాల్సి వచ్చింది... నాకు అవమానం జరిగింది" అని చెప్పడం పరిస్థితిని మరింత క్లిష్టం చేస్తుంది. ఈ మాటలకు శృతి వ్యంగ్యంగా స్పందిస్తూ, "నీతూ నిన్ను తిడుతుందా? ఇది ఎప్పటినుండి?" అంటూ రవిని రెచ్చగొడుతుంది.

దీంతో రవి కూడా తన బాధను బయటపెడుతూ, "నేను రోజంతా వేడి కిచెన్‌లో పని చేస్తున్నాను... నీలా ఏసీలో కూర్చొని పని చేయడం కాదు... చాలా అలసిపోయాను" అని అంటాడు. కానీ శృతి మాత్రం ఆగకుండా, "నువ్వు చేస్తున్నది పని కాదు అంటావా? నేను చేస్తున్నది పని కాదు అంటావా? నువ్వు పూర్తిగా మారిపోయావ్... ముఖ్యంగా నీతూ విషయంలో నన్ను దూరం పెడుతున్నావ్" అంటూ తీవ్రంగా ఆరోపిస్తుంది. ఈ వాగ్వాదం తారాస్థాయికి చేరడంతో రవి మాట్లాడడం ఇష్టం లేక అక్కడి నుంచి వెళ్లిపోతాడు. దీంతో వారి రిలేషన్‌లో ఉన్న చీలిక మరింత స్పష్టమవుతుంది.

ఇక చివరగా డైనింగ్ టేబుల్ సీన్‌లో కుటుంబంలోని అంతర్గత విభేదాలు ఒక్కసారిగా బయటపడతాయి. అందరూ భోజనానికి కూర్చుంటే, మీనా వడ్డించడానికి వచ్చి బాలు ఉన్నాడని చూసి కోపంతో అక్కడి నుంచి వెళ్లిపోతుంది. ఇదే సమయంలో శృతి కూడా కోపంతో, "ఈ వేస్ట్ గాడు ఉన్నచోట నేను భోజనం చేయలేను" అంటూ రవిని హేళన చేస్తూ అక్కడి నుంచి లేచి వెళ్తుంది. మరోవైపు రోహిణి కూడా వ్యంగ్యంగా మాట్లాడుతూ, "లక్షలు తిన్నప్పుడు నోర్లు ఇస్తుంది... ఇప్పుడు మాత్రం నోరు మూసుకుపోతుంది" అంటూ భోజనం చేయకుండా వెళ్లిపోవడం పరిస్థితిని మరింత దిగజారుస్తుంది.

ఇంట్లో ఏమి జరుగుతుందో అర్థం కాక ప్రభావతి షాక్‌లో పడుతుంది. ఆమె మీనాను పిలిచి వడ్డించమని అడగగా, మీనా ఈసారి గట్టిగా స్పందిస్తూ, "మరోసారి నన్ను పిలిస్తే బాగోదు... మీరే వడ్డించుకుని తినండి... నేను ఈరోజు ఎవరికీ వడ్డించను" అంటూ తెగేసి చెబుతుంది. దీంతో ఇంట్లో వాతావరణం పూర్తిగా ఉద్రిక్తంగా మారిపోతుంది.