Gundeninda Gudigantalu May 29th Episode: డిటెక్టివ్స్‌లా బాలు-మీనా, రోహిణి గతంపై ఆరా, మలేషియా ట్రిప్ హంగామా,

Gundeninda Gudigantalu: గుండె నిండా గుడి గంటలు గురువారం ఎపిసోడ్ భావోద్వేగాలు, కుటుంబ ఘర్షణలు, కామెడీ, సస్పెన్స్‌తో ఎంతో ఆసక్తికరంగా సాగింది. మీనా కేవలం సత్యంకు మాత్రమే భోజనం వడ్డించి వెళ్లిపోవడంతో ఇంట్లో టెన్షన్ మొదలైంది. ప్రభావతి ప్రశ్నించగా, "నేను చాలా కోపంగా ఉన్నాను.. మీరే వడ్డించుకుని తినండి" అంటూ మీనా గట్టిగా సమాధానం ఇచ్చింది. దీంతో సత్యం తన కొడుకులను ప్రశ్నించగా, రవి "వాళ్లే మాతో గొడవ పడుతున్నారు" అంటూ బాధపడతాడు. ఇదే సమయంలో బాలు నోట మద్యం వాసన రావడంతో అసలు గొడవకు కారణం బయటపడుతుంది. సత్యం తీవ్రంగా మందలించడంతో ముగ్గురు అన్నదమ్ములు టెర్రస్‌పైకి వెళ్లిపోతారు. టెర్రస్‌పై బాలు మద్యం మత్తులో పాటలు పాడుతూ "భార్యా బాధితుల సంఘం" పెట్టాలని కామెడీగా మాట్లాడటం నవ్వులు పూయించింది.

అయితే సత్యం మాత్రం భార్యాభర్తల మధ్య గొడవలు సహజమని, చిన్న విషయాలను పెద్దవి చేయొద్దని ముగ్గురికీ క్లాస్ పెట్టాడు. మరోవైపు శృతి గదిలో మీనా, రోహిణి, శృతి కలిసి తమ సమస్యలు చెప్పుకుంటూ ఎమోషనల్ అవుతారు. ప్రభావతి కూడా అక్కడికి రావడంతో వాతావరణం కాస్త కూల్ అవుతుంది. మరుసటి రోజు మీనా ట్రాక్ హైలైట్‌గా నిలిచింది. సీరియల్ నటుడు కిరణ్ ఇంట్లో చేసిన సంప్రదాయ డెకరేషన్ అందరినీ ఆకట్టుకుంది. చింతామణి పంపిన గుండాలను మీనా ధైర్యంగా ఎదుర్కొని తరిమికొట్టింది. కిరణ్ ఆమె పనిని మెచ్చుకుని అదనంగా డబ్బులు ఇవ్వమని చెప్పడం విశేషం. ఇదే సమయంలో రోహిణి-మనోజ్ గుడికి వెళ్లగా, పోలీసులు సీసీటీవీ ఫుటేజ్ కోసం రావడం కథలో కొత్త సస్పెన్స్‌కు దారితీసింది.

photo courtesy jiohotstar

శుక్రవారం ఎపిసోడ్ సస్పెన్స్, అనుమానాలు, భావోద్వేగాలతో ఎంతో ఆసక్తికరంగా సాగింది. రోహిణి దాచిపెడుతున్న రహస్యాన్ని బయటకు తీసేందుకు బాలు, మీనా మరో అడుగు ముందుకు వేయగా.. కథలో కొత్త ట్విస్టులు చోటు చేసుకున్నాయి. ఎపిసోడ్ ప్రారంభంలోనే మీనా చెల్లి సుమతి ఫోన్ చేసి కీలక సమాచారం అందిస్తుంది. గుడికి రోహిణి, మనోజ్ వచ్చారని, అక్కడ సీసీటీవీ ఫుటేజ్ గురించి ఆరా తీస్తున్నారని చెబుతుంది. ఈ విషయం విన్న వెంటనే మీనాకు రోహిణిపై ఉన్న అనుమానాలు మరింత బలపడతాయి. "ఏదో పెద్ద విషయం దాచిపెడుతోంది.. లేకపోతే సీసీటీవీ ఫుటేజ్ కోసం ఎందుకు తిరుగుతుంది?" అని ఆలోచిస్తుంది.

వెంటనే తన చెల్లి సుమతికి మరో ప్లాన్ చెబుతుంది. ఆలయ అధికారులను కలిసి తామూ సీసీటీవీ ఫుటేజ్ కావాలని అడగమని సూచిస్తుంది. ఇప్పటికే పోలీసులు, రోహిణి వాళ్లు ఫుటేజ్ కోసం అడిగిన నేపథ్యంలో తమకు కూడా ఆ అవకాశం దొరకొచ్చని చెబుతుంది. దీంతో సుమతి కూడా అసలు విషయం తెలుసుకోవాలనే ఉద్దేశంతో రంగంలోకి దిగుతుంది. ఇక మరోవైపు బాలు, మీనా మధ్య జరిగిన సంభాషణ కథకు మరింత ఊపు తెస్తుంది. మీనాకు సారీ చెప్పడానికి వచ్చిన బాలు, ఆమె నుంచి గుడి దగ్గర జరిగిన విషయాన్ని తెలుసుకుంటాడు. దీంతో రోహిణి, మనోజ్ వ్యవహారంపై అతనికి కూడా అనుమానం మొదలవుతుంది. "ఏదో మనకు తెలియని విషయం జరుగుతోంది" అని భావిస్తాడు.

అప్పుడే అక్కడికి మనోజ్ రావడంతో బాలు తన ప్లాన్ అమలు చేస్తాడు. ఉద్దేశపూర్వకంగానే మలేషియా నుంచి వచ్చిన రవీంద్ర ఫోన్ చేశాడని, రోహిణి తండ్రి సమస్యలో సహాయం చేయడానికి సిద్ధంగా ఉన్నాడని చెబుతాడు. అంతేకాదు, తన స్నేహితుడు జైలు అధికారిగా ఉన్నాడని, అవసరమైతే కేసు వివరాలు కూడా తెలుసుకుంటామని అంటాడు. ఈ మాటలు విన్న మనోజ్ ఆనందంతో ఆశ్చర్యపోతాడు. కానీ అదే సమయంలో అక్కడికి వచ్చిన రోహిణి ముఖంలో మాత్రం టెన్షన్ స్పష్టంగా కనిపిస్తుంది. తన అసలు రహస్యం బయటపడుతుందేమోనన్న భయంతో వెంటనే ఆగ్రహం వ్యక్తం చేస్తుంది.

"మా నాన్న విషయం అందరికీ ఎందుకు చెబుతున్నారు? మా కుటుంబ విషయాల్లో మీరు ఎందుకు జోక్యం చేసుకుంటున్నారు?" అంటూ బాలు, మీనాలపై విరుచుకుపడుతుంది. ఆమె అసహజ స్పందనను గమనించిన బాలు మరింత సీరియస్ అవుతాడు."లక్షలు పోయాయని చెబుతున్నావు.. కానీ నీ మామయ్య పేరు ఏంటో కూడా చెప్పడం లేదు. ఆయన ఎక్కడ ఉంటాడు? ఏం చేస్తాడు? ఇప్పటివరకు ఎప్పుడైనా మాట్లాడావా? ఎందుకు మాట్లాడలేదు?" అంటూ వరుస ప్రశ్నలు సంధిస్తాడు. "నువ్వు ఏదో పెద్ద విషయం దాచిపెడుతున్నట్టు అనిపిస్తోంది" అంటూ తన అనుమానాన్ని నేరుగా బయటపెడతాడు.

ఇక మీనా కూడా తనదైన శైలిలో స్పందిస్తుంది. "పోయిన డబ్బు దొరికితే అందులో వాటాగా మా డబ్బు మేము తీసుకుంటాం. మనోజ్ జీవితం సెట్ అవుతుంది. రవి కూడా సెట్ అవుతాడు" అంటూ సరదాగా మాట్లాడినా, ఆమె మాటల్లో రోహిణి కథపై ఉన్న సందేహం స్పష్టంగా కనిపిస్తుంది. అయితే రోహిణి మాత్రం ఎప్పటిలాగే టాపిక్‌ను డైవర్ట్ చేసే ప్రయత్నం చేస్తుంది. "ఇది మా వ్యక్తిగత విషయం. ఇందులో ఎవరూ జోక్యం చేసుకోవాల్సిన అవసరం లేదు" అంటూ గట్టిగా చెబుతుంది. అంతేకాదు, "పని పాట లేని వాళ్లే ఇలాంటి విషయాల వెనుక పడతారు" అంటూ బాలు, మీనాలను హేళన చేస్తుంది.

రోహిణి ప్రవర్తన, మాట తీరు చూసిన బాలు, మీనాలకు ఇప్పుడు అనుమానం పూర్తిగా నమ్మకంగా మారుతుంది. ఆమె గతంలో ఏదో రహస్యం ఉందని, అది బయటపడకుండా తప్పించుకోవడానికి ప్రయత్నిస్తోందని ఇద్దరూ భావిస్తారు. చివరకు "ఎలాగైనా రోహిణి అసలు నిజం బయటపెడదాం" అంటూ బాలు, మీనా డిటెక్టివ్ అవతారం ఎత్తాలని నిర్ణయించుకుంటారు.

ఇక రోహిణి దాచిపెడుతున్న రహస్యాన్ని ఛేదించేందుకు బాలు, మీనా రంగంలోకి దిగడంతో కథ మరింత ఆసక్తికరంగా మారింది. ఇప్పటి వరకు కేవలం అనుమానాలకే పరిమితమైన బాలు-మీనా, ఇప్పుడు నేరుగా ఆధారాలు సేకరించే పనిలో పడటం ఎపిసోడ్‌కు ప్రధాన ఆకర్షణగా నిలిచింది. తన ఇన్వెస్టిగేషన్‌లో మొదటి అడుగుగా బాలు నేరుగా మీనాక్షి దగ్గరకు వెళ్తాడు. అయితే అసలు విషయం అడిగితే చెప్పదని భావించిన బాలు, ముందుగా ఆమెకు ఇష్టమైన హల్వా తీసుకెళ్లి ఇంప్రెస్ చేసే ప్రయత్నం చేస్తాడు. అంతేకాదు, "ఈ వయసులో కూడా మీరు పదహారేళ్ల అమ్మాయిలా కనిపిస్తున్నారు" అంటూ పొగడ్తల వర్షం కురిపిస్తాడు. కానీ బాలు నాటకాన్ని వెంటనే పసిగట్టిన మీనాక్షి, "చాలు బాబు.. ఎందుకొచ్చావో నేరుగా చెప్పు" అంటూ అసలు విషయానికి వస్తుంది.

దీంతో బాలు తన ప్లాన్ ప్రకారం పరోక్షంగా ప్రశ్నలు వేయడం మొదలుపెడతాడు. విదేశాల్లో ఉండే తన స్నేహితుడికి పెళ్లి సంబంధం కావాలని, ఆమెకు చాలా కాంటాక్ట్స్ ఉన్నాయని చెప్పి మాటలు కలుపుతాడు. అనంతరం తెలివిగా రోహిణి విషయాన్ని తెరపైకి తీసుకొస్తాడు. "మనోజ్‌కు రోహిణి సంబంధం కూడా నువ్వే తీసుకొచ్చావు కదా.. మలేషియాలో కూడా నీకు బాగా పరిచయాలు ఉన్నాయనుకుంటా" అంటూ ప్రశ్నిస్తాడు.

అయితే మీనాక్షి చెప్పిన సమాధానం బాలు అనుమానాలను మరింత పెంచుతుంది. "రోహిణి ఒకసారి పార్లర్‌లో పరిచయమైంది. ఆ పరిచయం తర్వాతే పెళ్లి సంబంధం వరకు వెళ్లింది. అంతకుమించి ఆమె కుటుంబం గురించి నాకు పెద్దగా తెలియదు" అని చెప్పడంతో బాలు ఒక్కసారిగా షాక్ అవుతాడు. రోహిణి గురించి అందరికీ తెలిసినట్టు నటించిన మీనాక్షికే అసలు నిజాలు తెలియకపోవడం అతనికి కొత్త సందేహాలను కలిగిస్తుంది. దీంతో "రోహిణి మీనాక్షిని కూడా మోసం చేసిందా?" అనే అనుమానం బలపడుతుంది.

ఇక మరోవైపు మీనా కూడా తన దర్యాప్తు మొదలుపెడుతుంది. రోహిణి స్నేహితురాలు విద్య దగ్గరకు వెళ్లి సమాచారం సేకరించాలని నిర్ణయిస్తుంది. మీనాను చూసిన విద్య మొదట ఆశ్చర్యపోతుంది. "నేనే నీకు ఫోన్ చేయాలనుకున్నా.. అంతలోనే నువ్వే వచ్చావు" అంటూ ఆత్మీయంగా లోపలికి తీసుకెళ్తుంది. మొదట సాధారణ విషయాలే మాట్లాడిన విద్య, తర్వాత మీనా-బాలు దాంపత్య జీవితం గురించి ప్రశ్నలు అడగడం మొదలుపెడుతుంది. దీనిపై మీనా కూడా తెలివిగా స్పందిస్తూ, "నన్నెందుకు అడుగుతున్నావు? నీ ఫ్రెండ్ రోహిణి ఉంది కదా.. వాళ్లిద్దరూ చాలా ప్రేమగా ఉంటారు" అని అంటుంది.

ఈ సందర్భంలో విద్య చేసిన వ్యాఖ్యలు కథలో కీలక మలుపు తీసుకొస్తాయి. "మనోజ్-రోహిణి మధ్య ప్రేమ కంటే ఒకరి మోసాన్ని మరొకరు మోస్తున్నట్టే కనిపిస్తోంది. వాళ్ల రిలేషన్‌లో నిజమైన ప్రేమను నేను ఎప్పుడూ చూడలేదు" అని చెప్పడంతో మీనా ఒక్కసారిగా అప్రమత్తమవుతుంది. దీంతో ఆమె అసలు ఎంక్వయిరీ మొదలుపెడుతుంది. "రోహిణి నీకు ఎప్పటి నుంచి తెలుసు? మీరు కలిసి చదువుకున్నారా? మలేషియా నుంచి వచ్చారా? ఫ్యామిలీ ఫ్రెండ్సా?" అంటూ వరుస ప్రశ్నలు సంధిస్తుంది. అయితే విద్య మాత్రం ఏదో తెలిసి కూడా చెప్పలేని పరిస్థితిలో చిక్కుకుపోతుంది. నిజం చెబితే రోహిణి జీవితం తలకిందులవుతుందనే భయంతో, అటూ ఇటూ మాటలు చెబుతూ పరిస్థితిని మేనేజ్ చేయడానికి ప్రయత్నిస్తుంది.

విద్య ప్రవర్తన చూసిన మీనాకు ఇప్పుడు మరో క్లూ దొరికినట్టవుతుంది. రోహిణి మాత్రమే కాదు.. విద్య కూడా ఏదో దాచిపెడుతోందని భావిస్తుంది. ఈ విషయాన్ని వెళ్లి బాలుకి చెప్పగా, "అంటే ఈ విషయంలో విద్య కూడా భాగస్వామేనా?" అంటూ అతను కొత్త అనుమానాన్ని వ్యక్తం చేస్తాడు. ఇక మీనా వెళ్లిపోయిన వెంటనే విద్య రోహిణికి ఫోన్ చేస్తుంది. "నేను చెప్పబోయేది విన్నాక షాక్ అవ్వకు" అంటూ ముందే హెచ్చరిస్తుంది. అయితే అప్పటికే ఒత్తిడిలో ఉన్న రోహిణి వ్యంగ్యంగా, "నా జీవితంలో ప్రతిరోజూ షాకింగ్ న్యూస్‌లే వస్తున్నాయి.. కొత్తగా ఏముంటుంది?" అంటూ స్పందిస్తుంది.

అప్పుడు విద్య అసలు విషయం చెబుతుంది. "నీ గురించి తెలుసుకోవడానికి మీనా నా దగ్గరకు వచ్చింది. నీ ఫ్యామిలీ బ్యాక్‌గ్రౌండ్ మొత్తం ఆరా తీస్తోంది" అని చెప్పడంతో రోహిణి ఒక్కసారిగా ఉలిక్కిపడుతుంది. వెంటనే "నా గురించి ఏమైనా చెప్పావా?" అంటూ భయంతో అడుగుతుంది. అయితే విద్య మాత్రం, "నేను పెద్దగా ఏమీ చెప్పలేదు. కానీ ఒక విషయం గుర్తుంచుకో. అబద్ధాలు, మోసాలు ఎక్కువ కాలం దాచిపెట్టలేం. ఒక రోజు అవే మనల్ని మింగేస్తాయి. నీ పరిస్థితి కూడా అదే దిశగా వెళ్తోంది" అంటూ గట్టిగా హెచ్చరిస్తుంది.

ఇప్పటికే టెన్షన్‌తో ఉన్న రోహిణి పరిస్థితి మరింత దారుణంగా మారుతుంది. ఈ సమయంలో మనోజ్ ఆమెతో మాట్లాడటానికి వస్తాడు. కానీ రోహిణి వెంటనే బాలు, మీనాలపై ఆరోపణలు చేయడం మొదలుపెడుతుంది. "మన సంతోషాన్ని వాళ్లు చూడలేకపోతున్నారు. నా ఫ్యామిలీ గురించి అబద్ధాలు ప్రచారం చేస్తున్నారు. ఈరోజు విద్య దగ్గరకు వెళ్లి నా గురించి ఆరా తీశారు" అంటూ మనోజ్ మనసులో కూడా అనుమానాలు నాటే ప్రయత్నం చేస్తుంది. అయితే మనోజ్ మాత్రం మరో కోణంలో ఆలోచిస్తాడు.

"ఈ సమస్యలన్నింటికీ పరిష్కారం కావాలంటే ముందుగా ఆ 40 లక్షల వ్యవహారం క్లియర్ కావాలి. అందుకు నీ మలేషియా మామయ్య సహాయం అవసరం. వెంటనే ఆయనకు ఫోన్ చేయి. నేను మాట్లాడి మన బిజినెస్ గురించి చెబుతాను" అని అంటాడు. ఈ మాటలు విన్న రోహిణి గుండె ఒక్కసారిగా ఆగిపోయినంత పని అవుతుంది. ఇప్పటి వరకు తాను సృష్టించిన "మలేషియా మామయ్య" కథే ఇప్పుడు తనకు పెద్ద సమస్యగా మారిందని గ్రహిస్తుంది. అసలు లేని వ్యక్తిని ఇప్పుడు మనోజ్ ముందు ఎలా తీసుకురావాలి? ఈ అబద్ధాన్ని ఇంకా ఎంతకాలం కొనసాగించాలి? అనే భయంతో తీవ్ర ఆందోళనకు గురవుతుంది.ఇక మరోవైపు.. చింతామణి మరో కుట్రకు తెరలేపుతుంది. మీనా తనకు ఎదురు నిలబడటం, వ్యాపారంలో తనకంటే ఎక్కువ గుర్తింపు సంపాదించడం ఆమెకు ఏమాత్రం నచ్చదు. దీంతో ఎలాగైనా మీనాను తన ఆధీనంలోకి తెచ్చుకోవాలని నిర్ణయిస్తుంది. తన అనుచరులతో కలిసి మీనా పూల డబ్బాను దొంగిలించి, దాన్ని ఎరగా ఉపయోగించి తన ఇంటికి రప్పించే ప్లాన్ వేస్తుంది. పూల డబ్బా కనిపించకపోవడంతో వెతుక్కుంటూ వెళ్లిన మీనాను చింతామణి అనుచరులు బలవంతంగా ఓ పెద్ద ఇంటికి తీసుకెళ్తారు. అక్కడికి వెళ్లగానే పనివాళ్లు ఆమెను డైనింగ్ టేబుల్ దగ్గర కూర్చోబెట్టి ముందుగా భోజనం చేయమని చెబుతారు. కానీ మీనా మాత్రం ఏమాత్రం భయపడకుండా, "అసలు మీరెవరు? నన్ను ఎందుకు తీసుకువచ్చారు? నా పూల డబ్బా ఎక్కడ?" అంటూ గట్టిగా ప్రశ్నిస్తుంది.

అప్పుడు వారు "మా మేడం వస్తారు.. మీ గురించి మాకు అన్నీ తెలుసు" అంటూ సమాధానం చెబుతారు. కొద్దిసేపటి తర్వాత అక్కడికి వచ్చిన వ్యక్తిని చూసి మీనా ఒక్కసారిగా అసలు విషయం అర్థం చేసుకుంటుంది. ఆ వ్యక్తి ఎవరో కాదు.. చింతామణే. దీంతో మీనా నేరుగా విషయానికి వచ్చేస్తుంది. "నన్ను ఇక్కడికి ఎందుకు తీసుకొచ్చావు? నా పూల డబ్బా ఎక్కడ?" అంటూ నిలదీస్తుంది. అయితే చింతామణి మాత్రం ఆశ్చర్యకరమైన ప్రతిపాదనతో ముందుకు వస్తుంది. "మనిద్దరం కలిసి వ్యాపారం చేద్దాం. ఈ రంగంలో నాకు మంచి పేరుంది. నువ్వు టాలెంటెడ్. మనిద్దరం చేతులు కలిపితే ఈ వ్యాపారాన్ని చాలా పెద్ద స్థాయికి తీసుకెళ్లొచ్చు. మనకు పోటీగా ఎవరూ ఉండరు" అంటూ మీనాను తనతో భాగస్వామ్యం చేసుకోవాలని ప్రయత్నిస్తుంది.

కానీ మీనా మాత్రం తన వ్యక్తిత్వాన్ని మరోసారి చాటుకుంటుంది. "నేను పులికి తోకగా ఉండడం కంటే పిల్లికి తలగా ఉండడానికే ఇష్టపడతాను. ఎవరితోనూ పొత్తు పెట్టుకోవడం నాకు ఇష్టం లేదు. నిజాయితీగా కష్టపడి పనిచేస్తే విజయం ఒకరోజు తప్పకుండా వస్తుంది. అదే నిజమైన గుర్తింపును తీసుకొస్తుంది" అంటూ ఘాటుగా సమాధానం ఇస్తుంది. మీనా మాటలు విన్న చింతామణి ఒక్కసారిగా షాక్ అవుతుంది. ఈ అమ్మాయి తన దారికి రాదని అర్థం చేసుకుంటుంది. చివరికి చేసేదేమీ లేక ఆమె పూల డబ్బాను తిరిగి ఇచ్చి పంపిస్తుంది. అయితే వెళ్లే ముందు మీనా వేసిన మాస్ డైలాగ్ ఎపిసోడ్‌లో హైలైట్‌గా నిలుస్తుంది. "నేను కష్టపడి పని చేసే మనిషిని. ఇతరులను తొక్కేసి పైకి రావాలని ఎప్పుడూ అనుకోను. నువ్వు నీ పని చూసుకో.. నువ్వు బతుకు.. నలుగురిని బతకనివ్వు" అంటూ చింతామణికి స్ట్రాంగ్ వార్నింగ్ ఇచ్చి అక్కడి నుంచి వెళ్లిపోతుంది.

ఇక మరోవైపు రోహిణి రహస్యాన్ని బయటపెట్టేందుకు బాలు మరో మాస్టర్ ప్లాన్ వేస్తాడు. ఇంటికి కొన్ని పాస్‌పోర్ట్ అప్లికేషన్ ఫార్మ్స్ తీసుకువచ్చి అందరినీ హాల్లోకి పిలుస్తాడు. ఒక్కొక్కరికి ఫార్మ్స్ ఇస్తూ సంతకాలు చేయమని చెబుతాడు. అయితే మనోజ్ మాత్రం వాటిని చదవకుండానే "ఏరా.. ఇవి ఏంటి? ఇల్లు కొట్టేయడానికి కొత్త ప్లాన్ ఏమైనా వేసావా?" అంటూ వ్యంగ్యంగా మాట్లాడతాడు. దీంతో బాలు కూడా కౌంటర్ ఇస్తూ "నేను పార్లరమ్మ టైప్ కాదు. ముందు చదివి తెలుసుకో" అని అంటాడు.

ఈ సమయంలో శృతి ఫార్మ్స్ చూసి అవి పాస్‌పోర్ట్ అప్లికేషన్ ఫార్మ్స్ అని చెబుతుంది. వెంటనే "నాకు ఇప్పటికే పాస్‌పోర్ట్ ఉంది. నాకు అవసరం లేదు. రోహిణికి కూడా పాస్‌పోర్ట్ ఉండి ఉంటుంది కదా" అంటూ కావాలనే రోహిణిని ఇరుకున పెట్టే ప్రయత్నం చేస్తుంది. అప్పటికే టెన్షన్‌లో ఉన్న రోహిణి వెంటనే స్పందిస్తూ "అవును.. నాకు పాస్‌పోర్ట్ ఎందుకు ఉండదు? నేను మలేషియా నుంచి వచ్చాను కదా" అంటూ చెప్పేస్తుంది. అయితే ఈ మాటల వెనక ఆమె భయం స్పష్టంగా కనిపిస్తుంది. ఇంతలో సత్యం కలగజేసుకుని "ఏంట్రా ఈ హడావిడి? ఈ ఫార్మ్స్ ఎందుకు?" అని అడుగుతాడు. దీంతో బాలు అసలు బాంబ్ పేలుస్తాడు.

"నేను, మీనా పెళ్లైన తర్వాత ఎక్కడికీ హనీమూన్‌కి వెళ్లలేదు. ఇప్పుడు మలేషియాకు వెళ్లాలని నిర్ణయించుకున్నాం. మాతో పాటు మీరందరూ కూడా రావాలి. మనం మొత్తం ఫ్యామిలీగా మలేషియా ట్రిప్‌కు వెళ్దాం. అందుకే పాస్‌పోర్ట్ ఏర్పాట్లు చేస్తున్నాను" అని ప్రకటిస్తాడు. ఈ మాటలు విన్న వెంటనే ఇంట్లో అందరూ ఆశ్చర్యపోతారు. ముఖ్యంగా ప్రభావతి సంతోషంతో షాక్ అవుతుంది. కానీ రోహిణి మాత్రం లోలోపల కంగారుపడుతుంది. ఎందుకంటే ఇప్పటివరకు తాను చెప్పిన మలేషియా కథలన్నీ అబద్ధాలపై నిలబడి ఉన్నాయి. ఇప్పుడు నిజంగానే మలేషియా వెళ్లాల్సి వస్తే తన అబద్ధాలు బయటపడే ప్రమాదం ఉందని ఆమె గ్రహిస్తుంది. బాలు మలేషియా ఎత్తుగడతో రోహిణి పరిస్థితి మరింత క్లిష్టంగా మారింది. ఇక ఈ మలేషియా ట్రిప్ నిజంగానే జరుగుతుందా? రోహిణి అబద్ధాలు ఎప్పుడు బయటపడతాయి? అన్న ఉత్కంఠతో ఎపిసోడ్ ముగిసింది.