Gunde Ninda Gudi Gantalu june 2nd Episode: రోహిణి తండ్రి హత్య, మలేషియా ట్రిప్ క్యాన్సిల్, ప్రభావతి కలలకు దెబ్బ

Courtesy: Jio hotstar

Gunde Ninda Gudi Gantalu: గుండె నిండా గుడిగంటలు సోమవారం ఎపిసోడ్ ఆసక్తికర మలుపులతో సాగింది. బాలు ఇంట్లో కొత్త డ్రామాకు తెరలేపుతూ, తాను మరియు మీనా ఇప్పటివరకు హనీమూన్‌కు కూడా వెళ్లలేదని చెబుతూ కుటుంబ సభ్యులందరినీ తీసుకుని మలేషియా ట్రిప్‌కు వెళ్లాలని ప్రకటించాడు. ఈ నిర్ణయం విన్న ప్రభావతి ఆనందంతో ఉప్పొంగిపోయి, రోహిణి తండ్రి మలేషియాలో ఉన్నాడని, అక్కడ ఇళ్లు, కార్లు కూడా ఉన్నాయని చెబుతూ ట్రిప్‌కు మద్దతు ఇచ్చింది. అయితే రోహిణి మాత్రం తీవ్ర ఆందోళనకు గురైంది.

ఇదే సమయంలో బాలు తన అసలు ప్లాన్‌ను మీనాకు చెప్పాడు. రోహిణి చెప్పిన మలేషియా కథలో ఏదో నిజం దాగి ఉందని అనుమానిస్తున్నానని, ఆమె అసలు రంగు బయటపెట్టేందుకే ఈ ట్రిప్ డ్రామా మొదలుపెట్టానని వెల్లడించాడు. మలేషియా పేరు వినగానే రోహిణి భయపడటం, అక్కడి గురించి ఒక్క మాట కూడా మాట్లాడకపోవడం బాలులో మరిన్ని అనుమానాలు రేకెత్తించింది. మరోవైపు రోహిణి తన బాధను మనోజ్‌తో పంచుకుంటూ, జైలులో ఉన్న తండ్రిని కుటుంబ సభ్యులకు పరిచయం చేయడం తనకు అవమానంగా అనిపిస్తోందని కన్నీళ్లు పెట్టుకుంది. దీంతో మనోజ్ ఆమెకు అండగా నిలబడి మలేషియా ట్రిప్‌ను ఆపేస్తానని హామీ ఇచ్చాడు.

అయితే ప్రభావతి, సత్యం మాత్రం మలేషియా వెళ్లాలనే నిర్ణయంపై గట్టిగా నిలబడ్డారు. మనోజ్ వ్యతిరేకించినా వినిపించుకోలేదు. ఈ క్రమంలో రోహిణి ప్రవర్తనను గమనించిన బాలు, ఆమె ఏదో పెద్ద రహస్యాన్ని దాచిపెడుతోందని మరింత బలంగా నమ్మాడు. మరోవైపు శృతి-రవి మధ్య చిన్న గొడవ కూడా ఇంట్లో చర్చనీయాంశమైంది. రవి తనకంటే బాస్ నీతూతో ఎక్కువ సమయం గడుపుతున్నాడని శృతి ఫిర్యాదు చేయగా, బాలు తనదైన శైలిలో సెటైర్లు వేస్తూ అందరినీ నవ్వించాడు. ఇలా మలేషియా ట్రిప్ వివాదం, రోహిణి రహస్యం, శృతి-రవి దాంపత్య చర్చలతో ఎపిసోడ్ రసవత్తరంగా ముగిసింది.

మంగళవారం ప్రసారమైన ఎపిసోడ్ ప్రేక్షకులను ఆద్యంతం ఆసక్తిగా ఆకట్టుకుంది. ఒకవైపు శృతి-రవి మధ్య దాంపత్య గొడవ, మరోవైపు మలేషియా ట్రిప్ చుట్టూ తిరుగుతున్న రోహిణి భయాలు, చివర్లో ఇంటికి వచ్చిన పోలీసు కానిస్టేబుల్‌తో కథ మరింత ఉత్కంఠభరితంగా మారింది. ప్రతి సన్నివేశం తర్వాత మరో ట్విస్ట్ ఇస్తూ ఎపిసోడ్ రసవత్తరంగా సాగింది. ఎపిసోడ్ ప్రారంభంలోనే శృతి తన భర్త రవిపై అసంతృప్తి వ్యక్తం చేసింది. ఇంట్లో అందరూ తమ భార్యలతో సంతోషంగా సమయం గడుపుతున్నారని, కానీ రవి మాత్రం తనకు తగినంత సమయం ఇవ్వడం లేదని బాధపడింది. ఈ క్రమంలో కుటుంబ సభ్యులందరి ముందు శృతి ఒక ఆసక్తికరమైన ప్రశ్న వేసింది. రోజులో తమ భార్యలతో ఎంతసేపు గడుపుతారో చెప్పాలని అడిగింది. ముందుగా బాలు, మీనా స్పందిస్తూ తాము దాదాపు రోజంతా కలిసి ఉంటామని చెప్పారు. అనంతరం మనోజ్ కూడా తాను, రోహిణి రోజుకు తొమ్మిది గంటలకు పైగా కలిసి ఉంటామని గొప్పగా చెప్పుకున్నాడు.

ఈ సమాధానాలు విన్న శృతి మరింత ఎమోషనల్ అయింది. "చూశావా... నీ అన్నయ్యలు ఎంత బాగా తమ భార్యలను చూసుకుంటున్నారు. నువ్వు మాత్రం నీతూ చుట్టూనే తిరుగుతున్నావు" అంటూ రవిపై మండిపడింది. పరిస్థితిని సరదాగా మార్చేందుకు ప్రయత్నించిన బాలు, "ఇప్పటివరకు మీరెక్కడికీ వెళ్లలేదు కదా... అందరం కలిసి మల్లెచెట్టు దగ్గరికి వెళ్లి ఎంజాయ్ చేద్దాం" అని చెప్పాడు. అయితే శృతి అక్కడే కొత్త డిమాండ్ పెట్టింది. "మేము కూడా మలేషియా ట్రిప్‌కు వస్తాం" అంటూ ప్రకటించింది. శృతి మాటలకు రవి మొదట అభ్యంతరం వ్యక్తం చేశాడు. తనకు పని ఒత్తిడి ఎక్కువగా ఉందని, రావడం కుదరదని చెప్పాడు. కానీ శృతి మాత్రం తగ్గలేదు. "హనీమూన్‌కు భార్యను ఒంటరిగా పంపించే భర్త ఎవరుంటాడు? ఫుడ్ రెసిపీలు నేర్చుకుంటానని లీవ్ పెట్టరా?" అంటూ చురకలు అంటించింది. దీంతో చివరకు రవి కూడా ట్రిప్‌కు ఒప్పుకోవాల్సి వచ్చింది. ఇలా మలేషియా ట్రిప్‌కు మరో జంట కూడా రెడీ కావడంతో బాలు ప్లాన్ మరింత పెద్దదిగా మారింది.

అయితే ఈ వ్యవహారంపై మీనా కొంత ఆందోళన వ్యక్తం చేసింది. అసలు మలేషియా ట్రిప్ అనేది కేవలం రోహిణి నిజం బయటపెట్టేందుకు వేసిన డ్రామా మాత్రమేనని, అది తెలిసితే కుటుంబ సభ్యులందరూ బాధపడతారని చెప్పింది. దీనికి స్పందించిన బాలు మాత్రం ధైర్యంగా కనిపించాడు. "రోహిణి ఈ ట్రిప్‌ను ఎలాగైనా ఆపడానికి ప్రయత్నిస్తుంది. త్వరలోనే మరో కొత్త డ్రామా మొదలుపెడుతుంది చూడు" అంటూ తన అంచనాను వెల్లడించాడు. ఇదే సమయంలో మీనా తన మనసులోని కోరికను బయటపెట్టింది. "మనం కూడా ఎప్పుడూ బయటకు వెళ్లలేదు. ఈసారి ఊటీ లేదా కొడైకెనాల్‌కు వెళ్దాం" అని కోరింది. దీనికి బాలు కూడా సానుకూలంగా స్పందిస్తూ, "అన్ని సమస్యలు తీరాక మన కారులోనే వెళ్దాం" అని హామీ ఇచ్చాడు. ఈ సన్నివేశం ఇద్దరి మధ్య ఉన్న అనుబంధాన్ని మరింత బలంగా చూపించింది.

మరోవైపు మలేషియా ట్రిప్ గురించి ఇంట్లో అందరూ ఉత్సాహంగా మాట్లాడుతుండగా, రోహిణి మాత్రం తీవ్ర ఆందోళనలో మునిగిపోయింది. తన అబద్ధాలన్నీ బయటపడే పరిస్థితి వచ్చిందని భావించి నేరుగా విద్య దగ్గరకు వెళ్లింది. ఇంట్లో జరుగుతున్న పరిణామాలన్నింటినీ ఆమెకు వివరించింది. అయితే విద్య మాత్రం రోహిణికి మద్దతు ఇవ్వకుండా, ఆమె చేసిన తప్పులను ఎత్తిచూపింది. "నేను ముందే చెప్పాను. లేని దేశాల కథలు, లేని గొప్పలు చెప్పొద్దని. నువ్వే మలేషియా అంటూ బిల్డప్ ఇచ్చావు. తర్వాత లేని తండ్రిని జైలులో ఉన్నాడని చెప్పి తప్పించుకోవాలని చూశావు. ఇప్పుడు నీ అబద్ధాలన్నీ బయటపడితే జైలుకు వెళ్లే పరిస్థితి వస్తుంది" అంటూ విద్య గట్టిగా హెచ్చరించింది. ఈ మాటలు విన్న రోహిణి మరింత భయపడిపోయింది.

అయితే కొద్దిసేపటి తర్వాత రోహిణికి మరో కొత్త ఐడియా వచ్చింది. వెంటనే మటన్ కొట్టు మాణిక్యాన్ని పిలిపించాలని విద్యను కోరింది. విద్య పిలుపుతో అక్కడికి వచ్చిన మాణిక్యం, రోహిణిని చూసి ఒక్కసారిగా షాక్ అయ్యాడు. "ఇంకా నాతో కొత్త డ్రామా ఆడించాలనుకుంటున్నారా? ఈసారి బాలు తెలుసుకుంటే నన్ను బతకనివ్వడు" అంటూ భయపడ్డాడు. కానీ రోహిణి తన భావోద్వేగాలతో అతడిని ఒప్పించే ప్రయత్నం చేసింది. రోహిణి చెప్పిన ప్లాన్ విన్న మాణిక్యం మొదట తీవ్రంగా భయపడ్డాడు. "ఇందులో చిన్న తప్పు జరిగినా నా జీవితం నాశనం అవుతుంది" అని చెప్పాడు. అయినప్పటికీ రోహిణి తన కన్నీళ్లు, బాధను చూపిస్తూ ఇది చివరిసారి సహాయం చేయాలని వేడుకుంది. చివరకు ఆమె మాటలకు కరిగిపోయిన మాణిక్యం మరోసారి రోహిణి డ్రామాలో భాగం కావడానికి అంగీకరించాడు.

ఇక మరుసటి రోజు కథలో మరో కీలక ట్విస్ట్ చోటుచేసుకుంది. పాస్‌పోర్ట్ వెరిఫికేషన్ కోసం ఒక పోలీసు కానిస్టేబుల్ ఇంటికి వచ్చాడు. అయితే ఆ విషయం తెలియని మనోజ్, పోలీసులు కనిపించగానే కంగారుపడ్డాడు. "నేను ఏ తప్పూ చేయలేదు... నన్ను అరెస్ట్ చేయకండి" అంటూ గగ్గోలు పెట్టాడు. అతని ప్రవర్తన చూసి ఇంట్లో వాళ్లంతా ఆశ్చర్యపోయారు. కానిస్టేబుల్ సత్యం గురించి అడగడంతో ప్రభావతి కూడా భయపడిపోయింది. "ఏమండీ... మీరు ఏం తప్పు చేశారు?" అంటూ భర్తను ప్రశ్నించింది. కానీ సత్యం మాత్రం ప్రశాంతంగా స్పందిస్తూ, "పోలీసులు ఇంటికి వచ్చారంటే తప్పు చేసినట్టే కాదు" అని చెప్పాడు. అనంతరం కానిస్టేబుల్ పాస్‌పోర్ట్ ఎంక్వయిరీ కోసం వచ్చానని చెప్పడంతో అందరూ ఊపిరి పీల్చుకున్నారు.

ఈ సందర్భంగా కానిస్టేబుల్ సరదాగా, "ఇంట్లో అందరూ ఒకేసారి పాస్‌పోర్ట్‌కు అప్లై చేశారు. ఏమైనా విదేశాలకు వెళ్లి సెటిల్ అవ్వాలనుకుంటున్నారా?" అని అడిగాడు. వెంటనే బాలు తనదైన శైలిలో, "మా ఇంట్లో జైలుకు వెళ్లే వాళ్లు కూడా లేరు సార్" అంటూ సెటైర్ వేయడం ఆసక్తికరంగా మారింది. అయితే ఇదే సమయంలో అక్కడికి "మలేషియా మామ" ఎంట్రీ ఇవ్వడంతో పరిస్థితి మరోసారి ఉత్కంఠభరితంగా మారింది. ఇంటి ముందు పోలీసులను చూసిన అతడు ఒక్కసారిగా షాక్‌కు గురయ్యాడు. రోహిణి అసలు నిజం బయటపడిందేమోనని భయపడిపోయాడు. రోహిణి మాత్రం లోపలికి రమ్మని సైగ చేయడంతో ధైర్యం తెచ్చుకుని ఇంట్లోకి అడుగుపెట్టాడు. ఇక అతని రాకతో కథ మరింత కీలక మలుపు తిరిగింది.

పాస్‌పోర్ట్ వెరిఫికేషన్ పూర్తయిందని ప్రభావతి ఆనందంగా చెబుతుండగా, మాణిక్యం అత్యంత విషాదకరమైన వార్త చెప్పాడు. రోహిణి తండ్రి జైలులో శత్రువుల దాడిలో దారుణంగా హత్యకు గురయ్యాడని, ఆస్తి వివాదాల కారణంగానే ఈ ఘటన జరిగిందని వెల్లడించాడు. అంతేకాదు, తన చేతిలో ఉన్న కలశాన్ని చూపిస్తూ అవి రోహిణి తండ్రి అస్తికలని చెప్పడంతో ఇంట్లో ఒక్కసారిగా విషాద ఛాయలు అలుముకున్నాయి.ఈ వార్త విన్న వెంటనే రోహిణి కళ్లుతిరిగి పడిపోయినట్లు నటించడం మరింత నాటకీయతను తీసుకొచ్చింది. ఇంట్లో వారంతా ఆమెను చూసి కంగారుపడిపోయారు. అనంతరం మాణిక్యం ఎమోషనల్‌గా మాట్లాడుతూ, "నీ తండ్రి చివరి కోరిక ప్రకారం ఈ అస్తికలను నీ చేతికి అందిస్తున్నాను. కనీసం చివరి చూపు కూడా మీకు దక్కలేదు" అంటూ కన్నీటి కథ వినిపించాడు. అతని మాటలకు రోహిణి కూడా కన్నీళ్లు పెట్టుకుంటూ బాధపడుతున్నట్లు నటించింది.

అయితే ఈ విషాదంలో కూడా ప్రభావతి మాత్రం తన ఆస్తుల ఆలోచనను వదలలేదు. "అంటే ఆస్తులన్నీ పోయినట్లేనా? కూతురు ఇక్కడ ఉండగా ఆస్తులు ఎలా పోతాయి?" అంటూ నేరుగా ప్రశ్నించింది. దీనికి మాణిక్యం మరింత డ్రామా జోడిస్తూ, "మీరు అక్కడికి వెళ్తే మిమ్మల్ని కూడా చంపేస్తారు. రోహిణి, మనోజ్ ప్రాణాలకు కూడా ప్రమాదమే" అంటూ భయపెట్టాడు. అయినప్పటికీ ప్రభావతి వెనక్కి తగ్గకుండా ఆస్తుల గురించే నిలదీయడం ఆసక్తికరంగా మారింది. చివరకు మాణిక్యం కోర్టులో కేసు నడుస్తోందని, అది పూర్తయిన తర్వాతే ఆస్తులపై నిర్ణయం వస్తుందని చెప్పి అక్కడి నుంచి వెళ్లిపోయాడు. దీంతో ప్రభావతి ఆశలన్నీ ఒక్కసారిగా అడియాశలయ్యాయి. "ఆస్తులు వస్తాయనుకుంటే అస్తికలు వచ్చాయి" అంటూ కోపంగా మాట్లాడింది. ఈ మాటలు విన్న రోహిణి మాత్రం, "మా నాన్న చనిపోతే నేను బాధలో ఉన్నాను.. మీరు మాత్రం ఆస్తుల గురించి మాట్లాడుతున్నారు" అంటూ గట్టిగా స్పందించింది. దీంతో ప్రభావతి కూడా కాసేపు మౌనంగా ఉండిపోయింది.

ఇక బాలు తనదైన శైలిలో ఈ పరిస్థితిని కామెడీగా మార్చాడు. అస్తికల కలశాన్ని చూస్తూ, "ఆస్తులు పోయాయి.. అస్తికలు వచ్చాయి.. మలేషియా ట్రిప్ కలలు గోవిందా" అంటూ సరదాగా ఏడవడం నవ్వులు పూయించింది. ఈ ఘటనల తర్వాత సత్యం కూడా మలేషియా ట్రిప్‌ను పూర్తిగా రద్దు చేస్తున్నట్లు ప్రకటించాడు. దీంతో రోహిణి లోలోపల ఆనందపడినా, బయటకు మాత్రం బాధలో ఉన్నట్లు నటిస్తూ అందరి సానుభూతి పొందేందుకు ప్రయత్నించింది. ప్రత్యేకంగా మనోజ్‌ను తన వైపు తిప్పుకోవడానికి రోహిణి ఎమోషనల్ డ్రామా కొనసాగించింది. "మా నాన్న ఉంటే నీకు కోట్ల ఆస్తి వచ్చేది. ఆయనకు నువ్వంటే చాలా ఇష్టం" అంటూ కల్లబొల్లి కథలు చెబుతూ మనోజ్ మనసు గెలుచుకునే ప్రయత్నం చేసింది. ఇదే సమయంలో విద్యకు ఫోన్ చేసి జరిగిన విషయాలన్నీ చెప్పగా, విద్య మాత్రం సెటైర్లు వేసింది. "మొత్తానికి నీ ప్లాన్ సక్సెస్ అయింది. ట్రిప్ క్యాన్సిల్ అయింది. ఇప్పుడు నీ అబద్ధాలు ఇంకొన్ని సంవత్సరాలు సేఫ్‌గా నడుస్తాయి" అంటూ ఎద్దేవా చేసింది.

అయితే మరోవైపు బాలు మాత్రం ఈ వ్యవహారంలో ఏదో తేడా ఉందని గట్టిగా అనుమానించడం మొదలుపెట్టాడు. జైలులో చనిపోయిన వ్యక్తి విషయంలో ఉండే చట్టపరమైన ప్రక్రియలు, కుటుంబ సభ్యులకు సమాచారం ఇవ్వకుండా నేరుగా అస్తికలు పంపించడం వంటి విషయాలు తనకు అస్సలు లాజికల్‌గా అనిపించడం లేదని మీనాతో చెప్పాడు. "ఎవరైనా చనిపోతే మొదట సమాచారం కూతురికే ఇస్తారు. కానీ ఇక్కడ మలేషియా మామకు ఎలా తెలిసింది?" అంటూ ప్రశ్నించాడు. మీనా కూడా బాలుతో ఏకీభవించింది. "మలేషియా మామగా నటిస్తున్న వ్యక్తిని మనం చాలాసార్లు రాజమండ్రిలోనే చూశాం. అతడు నిజంగా మలేషియా వ్యక్తి కాదేమో" అంటూ తన అనుమానాన్ని వ్యక్తం చేసింది. దీంతో బాలు మరింత పట్టుదలతో, "ఏదో ఒక రోజు రోహిణి అసలు బాగోతం బయటపెడతాను" అంటూ సవాల్ విసిరాడు.

ఇక మరుసటి రోజు ప్రభావతి తన స్నేహితురాలు మీనాక్షి వద్దకు వెళ్లి మొత్తం కథ చెప్పింది. అయితే మీనాక్షి మాత్రం ఆమెను ఓదార్చకుండా, "మలేషియా ట్రిప్ క్యాన్సిల్ అయినట్టే కదా" అంటూ హేళన చేసింది. అంతేకాదు, కోర్టు కేసులు సంవత్సరాల తరబడి సాగుతాయని, ఆస్తులపై ఆశలు వదులుకోవడమే మంచిదని సలహా ఇచ్చింది. ఈ మాటలు ప్రభావతిని మరింత నిరాశకు గురి చేశాయి. మరోవైపు చింతామణి కూడా తన కొత్త ఎత్తుగడకు శ్రీకారం చుట్టింది. మీనాను ఇబ్బందుల్లోకి నెట్టేందుకు ప్రభావతిని టార్గెట్ చేసింది. "మీరు గొప్ప క్లాసికల్ డాన్సర్ అని విన్నాను. మీ దగ్గర డ్యాన్స్ నేర్చుకోవాలి" అంటూ ప్రభావతిని ప్రసన్నం చేసుకునే ప్రయత్నం చేసింది. ఈ వయసులో డ్యాన్స్ నేర్చుకోవడం ఏంటని ప్రభావతి ఆశ్చర్యపోయినా, చింతామణి మాత్రం తన అసలు ప్లాన్‌ను నెమ్మదిగా అమలు చేసే దిశగా అడుగులు వేస్తోంది.

ఇలా ఒకవైపు రోహిణి అబద్ధాల చుట్టూ కొత్త అనుమానాలు మొదలవుతుండగా, మరోవైపు చింతామణి కొత్త కుట్రకు తెరలేపడంతో కథ మరింత ఉత్కంఠభరితంగా మారింది. రోహిణి డ్రామా ఎప్పుడు బయటపడుతుంది? మాణిక్యం చెప్పిన కథలో నిజం ఎంత? చింతామణి ప్లాన్ ఎలాంటి పరిణామాలకు దారితీస్తుంది? అనే ఆసక్తి ప్రేక్షకుల్లో పెరుగుతోంది.