Gundeninda Gudigantalu june 5th Episode: బాలు చేతికి కీలక సాక్ష్యం, విద్యకు రోహిణి గుడ్‌బై..

Gunde Ninda Gudi Gantalu: గుండె నిండా గుడిగంటలు గురువారం ప్రసారమైన ఎపిసోడ్‌లో భావోద్వేగాలు, కుటుంబ గొడవలు, పోలీస్ డ్రామాతో కథ ఆసక్తికరంగా సాగింది. రోహిణి తన తండ్రి ఫోటోను ఇంట్లో చూపిస్తూ ఎమోషనల్ అవ్వగా, బాలు ఆ ఫోటోపై అనుమానం వ్యక్తం చేశాడు. మలేషియాలో కోట్ల ఆస్తులు సంపాదించిన వ్యక్తిలా కనిపించడం లేదని చెప్పడంతో రోహిణి కంగారుపడింది. మరోవైపు ప్రమాదంలో గాయపడిన వృద్ధురాలికి రక్తం అవసరమని తెలిసిన బాలు, రక్తదాతలను వెతికి సహాయం చేశాడు. అయితే కొద్దిసేపటికే పోలీసులు ఇంటికి వచ్చి డ్యూటీలో ఉన్న కానిస్టేబుల్‌పై చేయి చేసుకున్నాడనే ఆరోపణలతో బాలును అరెస్ట్ చేశారు.

దీంతో మీనా పోలీసులను నిలదీయగా, ప్రభావతి మాత్రం కొడుకు అరెస్ట్ కంటే ఇంట్లో వంట గురించే ఆలోచించడం అందరినీ ఆశ్చర్యపరిచింది. దీనిపై మీనా తీవ్ర ఆగ్రహం వ్యక్తం చేయగా, సత్యం సహా కుటుంబ సభ్యులంతా ప్రభావతిని తప్పుబట్టారు. పోలీస్ స్టేషన్‌లో ట్రాఫిక్ కానిస్టేబుల్ బాలును రెచ్చగొట్టే ప్రయత్నం చేసినా, బాలు ధైర్యంగా సమాధానం ఇచ్చాడు. ఇదే సమయంలో 30 లక్షల మోసం కేసు వ్యవహారంతో మనోజ్, రోహిణి కూడా స్టేషన్‌కు వచ్చారు. తన స్టేటస్ చూపించుకోవాలని ప్రయత్నించిన మనోజ్, ఓ కానిస్టేబుల్‌కు ఏదో ఆఫర్ ఇవ్వడంతో వరుసగా ఇద్దరు పోలీసుల చేతిలో చెంపదెబ్బలు తిన్నాడు. బాలు ముందు పరువు పోవడంతో రోహిణి కూడా మనోజ్‌పై ఆగ్రహం వ్యక్తం చేసింది. చివరగా ఎస్సై జోక్యం చేసుకుని అసలు విషయం తెలుసుకుని బాలును హెచ్చరించి విడుదల చేశాడు. అయితే మనోజ్ పోలీసులకు అసలు ఏం ఆఫర్ చేశాడన్న సస్పెన్స్‌తో ఎపిసోడ్ ముగిసింది.

Courtesy: Jio hotstar

శుక్రవారం ఎపిసోడ్ ప్రారంభంలో పోలీస్ కానిస్టేబుల్ మనోజ్ చేసిన పనిని బాలుకు వివరిస్తాడు. ఆ విషయం విన్న వెంటనే బాలు ఒక్కసారిగా షాక్‌కు గురవుతాడు. మనోజ్ అంత దిగజారిపోతాడని తాను కూడా ఊహించలేదన్నట్లుగా ఆశ్చర్యపోతాడు. "మరోసారి వాడు ఈ స్టేషన్ వైపు వస్తే మా వాళ్లు చుక్కలు చూపిస్తారు" అని కానిస్టేబుల్ కోపంగా చెప్పగా, బాలు మాత్రం "ఇప్పటికే మీరు గట్టిగానే బుద్ధి చెప్పారు. ఇక జీవితంలో ఈ వైపు రావడానికి కూడా భయపడతాడు" అంటూ స్పందిస్తాడు.

అయితే బాలు ముఖంలో కనిపించిన ఆశ్చర్యాన్ని గమనించిన మీనా, "ఇంతకీ మనోజ్ ఏం చేశాడు? కానిస్టేబుల్ ఏమన్నాడు?" అంటూ ప్రశ్నిస్తుంది. దీంతో బాలు నెమ్మదిగా మనోజ్ పోలీసులకు ఇచ్చిన అనుచిత ఆఫర్ గురించి మీనా చెవిలో చెబుతాడు. ఆ విషయం విన్న మీనా అసహ్యంతో "ఛీ... ఛీ... ఇంత నీచంగా ఆలోచిస్తాడా?" అంటూ తీవ్ర ఆవేదన వ్యక్తం చేస్తుంది. దీంతో మనోజ్ అసలు స్వభావం మరోసారి బయటపడినట్లవుతుంది.

ఇక అక్కడి నుంచి నేరుగా బాలు, మీనా హాస్పిటల్‌కు వెళ్తారు. ప్రమాదంలో గాయపడిన వృద్ధురాలి ఆరోగ్యం గురించి అడుగుతారు. అయితే అందరూ ఊహించినట్లుగా బాధలో కాకుండా, ఆమె ముఖంలో ఆనందం కనిపిస్తుంది. "ఈరోజు నాకు చాలా సంతోషంగా ఉంది అమ్మా" అని చెప్పడంతో మీనా ఆశ్చర్యపోతుంది. "గాయాలతో ఆస్పత్రిలో ఉన్న మీరు ఇలా మాట్లాడుతున్నారేంటి?" అని ప్రశ్నిస్తుంది. దానికి ఆ వృద్ధురాలు ఎంతో భావోద్వేగంగా స్పందిస్తుంది. "దేవుడి లీలలు మనకు అర్థం కావు. మంచి మనసున్న వాళ్లకు చివరికి మంచి జరుగుతూనే ఉంటుంది. మా మనవడు మమ్మల్ని వెతుక్కుంటూ వచ్చాడు" అని చెబుతుంది. అదే సమయంలో అక్కడికి వచ్చిన యువకుడు తనను ప్రకాష్‌గా పరిచయం చేసుకుంటూ, "మేము చాలా కాలంగా తాతయ్య, బామ్మ కోసం వెతుకుతున్నాం. బాలు గారు సోషల్ మీడియాలో పెట్టిన పోస్ట్ వల్ల వీళ్లు ఎక్కడ ఉన్నారో తెలిసింది. వెంటనే వచ్చేశాం" అని చెబుతాడు. ఆ మాటలు విన్న మీనా, బాలు ఇద్దరూ ఆనందపడతారు.

"ఇకపై వీళ్లను బాగా చూసుకోవాలి. మళ్లీ ఇలాంటి కష్టాలు రాకుండా జాగ్రత్తపడండి" అని ప్రకాష్‌కు సూచిస్తారు. ఈ సందర్భంగా ఆస్పత్రి బిల్లు తాను కడతానని బాలు చెప్పగా, "అన్నయ్యా, మీరు ఇప్పటికే చాలా చేశారు. బిల్లు నేను చెల్లించాను" అని ప్రకాష్ చెప్పడంతో బాలు సంతోషిస్తాడు. అంతేకాదు, వెళ్లే ముందు మీనా వృద్ధురాలి చేతిలో కొంత డబ్బు పెట్టేందుకు ప్రయత్నిస్తుంది. మొదట ఆమె తీసుకోవడానికి నిరాకరించినా, "నేను కూడా మీ మనవరాలినే కదా. మనవరాలు ఇస్తే తీసుకోరా?" అంటూ ప్రేమగా ఒప్పించి డబ్బు అందిస్తుంది.

మీనా చూపిన ఆప్యాయతకు అక్కడున్న వారంతా కదిలిపోతారు. చివరగా అందరూ కలిసి ఒక సెల్ఫీ తీసుకుని ఆ మధుర క్షణాలను గుర్తుగా దాచుకుంటారు. అయితే కథలో మరో ఆసక్తికర మలుపు చోటు చేసుకుంటుంది. బాలు, మీనా వెళ్లబోతుండగా వృద్ధుడు వారిని ఆపి, తన చెప్పుల దుకాణం వద్ద ఓ మహిళ మర్చిపోయిన మొబైల్ ఫోన్‌ను బాలుకు అందజేస్తాడు. "ఈ ఫోన్ యజమానికి చేరేలా చూడండి" అని కోరుతాడు. బాలు కూడా బాధ్యతగా ఫోన్ తీసుకుని, ఆ మహిళకు అందజేస్తానని హామీ ఇస్తాడు.

పోలీస్ స్టేషన్‌లో జరిగిన హంగామా తర్వాత బాలు, మీనా ఇంటికి చేరుకుంటారు. అయితే అప్పటికే ప్రభావతి కోపంతో రగిలిపోతూ కనిపిస్తుంది. "ఇంట్లో ఉన్న సమస్యలు చాలవన్నట్లు ఇప్పుడు రోడ్ల మీద వాళ్ల సమస్యలు కూడా నెత్తిన వేసుకుని తిరుగుతున్నారు. కోడలు కాఫీ కూడా పెట్టకుండా భర్తతో కలిసి ఊరంతా తిరుగుతోంది" అంటూ మీనాపై వ్యంగ్య వ్యాఖ్యలు చేస్తుంది. ఇంతలో బాలు ఇంట్లోకి అడుగుపెట్టగానే సత్యం సరదాగా, "ఇప్పటివరకు నీ అమ్మ నిన్నే తలుచుకుంటోంది రా.. నీకు వందేళ్లు" అని అంటాడు. దీంతో బాలు కూడా నవ్వుతూ, "నిజంగా అమ్మ నా గురించి ఆలోచించిందా? అది కూడా ప్రేమతోనా?" అంటూ సెటైర్ వేస్తాడు. ఆ తర్వాత పోలీస్ స్టేషన్‌లో ఏం జరిగిందని సత్యం అడగగా, మీనా పరిస్థితిని చల్లార్చే ప్రయత్నం చేస్తూ, "కాస్త కోపం తగ్గించుకోమని పోలీసులు సలహా ఇచ్చారు" అని చెబుతుంది.

అయితే ప్రభావతి మాత్రం అక్కడ కూడా వెటకారం మానదు. "పోలీసులు తమ స్టైల్లో బాగా మర్యాద చేసినట్టున్నారు" అంటూ వ్యంగ్యంగా మాట్లాడుతుంది. వెంటనే బాలు స్పందిస్తూ, "మాకు కాదు అమ్మా... మీ సుపుత్రుడికే ప్రత్యేక సన్మానం జరిగింది" అని చెప్పడంతో అక్కడ ఉన్నవారంతా ఆశ్చర్యపోతారు. అదే సమయంలో మనోజ్, రోహిణి ఇంటికి వస్తారు. వారిని చూసిన బాలు, "నేను చెప్పడం ఎందుకు? మీ కొడుకును అడగండి. పోలీస్ స్టేషన్‌లో ఎంత గొప్ప సన్మానం జరిగిందో చెబుతాడు" అంటూ పంచ్ వేస్తాడు. దీంతో మనోజ్ ఒక్కసారిగా అసహనానికి గురవుతాడు. "అవసరమా అక్కడ జరిగిన విషయాలు ఇక్కడ చెప్పడం?" అంటూ కోపంగా స్పందిస్తాడు.

వారి మాటల మధ్యలో సత్యం జోక్యం చేసుకుని అసలు ఏం జరిగిందని ప్రశ్నిస్తాడు. అప్పుడు బాలు నెమ్మదిగా మనోజ్ చేసిన నిర్వాకం గురించి సత్యం చెవిలో చెబుతాడు. ఆ విషయం విన్న వెంటనే సత్యం ఆగ్రహంతో ఊగిపోతూ మనోజ్ చెంపపై గట్టిగా కొడతాడు. "ఇదేనా నీ సంస్కారం? పోలీస్ స్టేషన్‌లో అలా మాట్లాడతావా? నా కళ్ల ముందే కనిపించకు" అంటూ తీవ్రంగా మందలిస్తాడు. అయితే బాలు చెప్పిన విషయం ఏమిటో ప్రేక్షకులకు మాత్రం చూపించరు. సత్యం ఎందుకు అంత కోపం తెచ్చుకున్నాడో అర్థం కాక ప్రభావతి తెగ ఆరాటపడుతుంది. కానీ సత్యం మాత్రం "ఆ విషయం గురించి మరోసారి అడిగితే నిన్ను కూడా ఇంట్లో ఉండనివ్వను" అంటూ గట్టిగా హెచ్చరిస్తాడు. దీంతో ప్రభావతి సైలెంట్ అయిపోతుంది.

మరోవైపు తమ గదిలోకి వెళ్లిన బాలు, మీనా హాస్పిటల్‌లో వృద్ధుడు ఇచ్చిన ఫోన్‌ను జాగ్రత్తగా పెట్టమని చెబుతాడు. ఆసక్తిగా ఫోన్‌ను పరిశీలించిన మీనా ఒక్కసారిగా షాక్ అవుతుంది. అది గతంలో పోయిన బాలు మొబైల్ ఫోన్ అని గుర్తిస్తుంది. వెంటనే బాలుకు చూపిస్తూ, "ఇది మీ ఫోన్ కదా!" అని ఆశ్చర్యంగా అడుగుతుంది. ఆ ఫోన్‌ను చూసిన బాలు కూడా నమ్మలేకపోతాడు. తాను ఎన్నాళ్లుగానో వెతుకుతున్న ఫోన్ అదే కావడంతో ఆశ్చర్యానికి గురవుతాడు. "ఇది ముసలివాళ్లకు ఎలా దొరికింది? వాళ్లు చెప్పిన ఆ మహిళ ఎవరు?" అంటూ అనుమానాలు వ్యక్తం చేస్తాడు.

వెంటనే ఈ విషయాన్ని సత్యంకు చెబుతాడు. ఫోన్ తిరిగి దొరకడంతో సత్యం కూడా సంతోషపడతాడు. అంతేకాదు, "శివకు సంబంధించిన వీడియో ఈ ఫోన్ నుంచే బయటకు వెళ్లింది. ఇందులోని వివరాలు చెక్ చేస్తే నిజాలు బయటపడే అవకాశం ఉంది" అంటూ బాలుకు కీలక సూచన చేస్తాడు. అయితే ఇదంతా రోహిణి వింటుంది. ఫోన్ తిరిగి దొరకడం ఆమెకు పెద్ద షాక్‌గా మారుతుంది. గతంలో విద్య ఆ ఫోన్‌ను పూర్తిగా మాయం చేయాలని చెప్పినా అది జరగకపోవడంతో ఆమె తీవ్ర ఆందోళనకు గురవుతుంది. "ఫోన్ బయటపడితే నా రహస్యాలన్నీ కూడా బయటపడిపోతాయి" అనే భయంతో రోహిణి ఆగ్రహం వ్యక్తం చేస్తుంది.

బాలు చేతికి తన పాత మొబైల్ ఫోన్ తిరిగి రావడంతో అతడు ఆలోచనల్లో పడిపోతాడు. వెంటనే శివకు ఫోన్ చేసి జరిగిన విషయాన్ని చెబుతాడు. "నా ఫోన్ మళ్లీ దొరికింది. కానీ ఈ ఫోన్ నుంచి వీడియో బయటకు ఎలా వెళ్లిందో అర్థం కావడం లేదు" అని తన సందేహాన్ని వ్యక్తం చేస్తాడు. దీంతో శివ కూడా ఆశ్చర్యపోతాడు. ఈ సందర్భంగా గుణ బ్యాచ్ వద్ద వీడియో గురించి విచారణ చేశావా అని బాలు ప్రశ్నించగా, శివ తాను ఇప్పటికే ఎంక్వయిరీ చేసిన విషయాన్ని చెబుతాడు. "నేను అడిగాను బావా. కానీ వాళ్లు మాత్రం ఆ వీడియో తమ నుంచి వెళ్లలేదని చెబుతున్నారు" అని శివ సమాధానం ఇస్తాడు. దీంతో బాలు అనుమానాలు మరింత పెరుగుతాయి. అసలు తన ఫోన్ నుంచి వీడియో పంపించింది ఎవరు? ఫోన్‌ను తీసుకున్న ఆ అమ్మాయి ఎవరు? అనే ప్రశ్నలు అతడిని వెంటాడతాయి.

ఇదే సమయంలో బాలు ఒక కీలక అనుమానాన్ని మీనా ముందుంచుతాడు. "ఒకవేళ ముసలివాళ్లు చెప్పిన ఆ మహిళ రోహిణే అయితే?" అని సందేహం వ్యక్తం చేస్తాడు. అయితే మీనా వెంటనే ఆ ఆలోచనను తిరస్కరిస్తుంది. "అనవసరంగా రోహిణిపై అనుమానం పెట్టుకోకండి" అంటూ అతడిని వారించే ప్రయత్నం చేస్తుంది. కానీ బాలు మాత్రం తన అనుమానంపై మరింత బలంగా నిలబడతాడు. "మొదటి నుంచి రోహిణి ప్రవర్తనలో ఏదో తేడా కనిపిస్తోంది. నా ఫోన్ పోయింది కూడా మనోజ్ ఫంక్షన్ రోజే. ఈ సంఘటనలన్నీ కలిపి చూస్తే రోహిణే ఫోన్ తీసుకుని ఉండొచ్చు. అందులోని వీడియో బయటకు పంపించి ఉండొచ్చు" అని అంటాడు. ఈ విషయం వెనుక ఉన్న నిజాన్ని ఎలాగైనా బయటకు తీయాలని నిర్ణయించుకుంటాడు. తన ప్లాన్‌లో భాగంగా విద్య దగ్గర నుంచి ఒక ఫోటో తీసుకురావాలని మీనాకు చెబుతాడు.

మరోవైపు మరుసటి రోజు ఉదయం రోహిణి నేరుగా విద్య ఇంటికి చేరుకుంటుంది. ఇంట్లోకి అడుగుపెట్టిన వెంటనే ఆగ్రహంతో విద్యపై ప్రశ్నల వర్షం కురిపిస్తుంది. "నిజం చెప్పు... నేను చెప్పినట్టుగా బాలు ఫోన్ చెరువులో పడేశావా లేదా?" అని నిలదీస్తుంది. విద్య మాత్రం చాలా ప్రశాంతంగా స్పందిస్తుంది. "అవును... నేను తీసుకెళ్లాను. కానీ అనుకున్న విధంగా జరగలేదు" అని చెబుతుంది. దీంతో రోహిణి మరింత కోపంతో, "అయితే బాలు చేతికి ఆ ఫోన్ ఎలా వచ్చింది?" అని ప్రశ్నిస్తుంది. అప్పుడు విద్య అసలు నిజాన్ని బయటపెడుతుంది. "ఫోన్‌ను చెరువులో పడేయడానికి వెళ్తున్న సమయంలో మధ్యలో ఎక్కడో జారిపోయింది. నేను కావాలనే దాచిపెట్టలేదు. అది నా చేతిలో నుంచి మిస్ అయింది" అని వివరణ ఇస్తుంది.

అయితే ఆ వివరణ రోహిణిని ఏమాత్రం సంతృప్తి పరచదు. "నిన్ను నమ్మి నా రహస్యాలన్నీ చెప్పాను. నువ్వు నా నమ్మకాన్ని వమ్ము చేశావు. ఒక చిన్న పని కూడా సరిగా చేయలేకపోయావు" అంటూ తీవ్ర ఆగ్రహం వ్యక్తం చేస్తుంది. ఇంతకాలం రోహిణి మాటలు భరించిన విద్య కూడా ఈసారి గట్టిగానే బదులిస్తుంది. "నేను నీ పనిమనిషిని కాదు. స్నేహితురాలిగా నీకు సహాయం చేశాను. కానీ నువ్వు మాత్రం నన్ను అవసరాల కోసం మాత్రమే వాడుకున్నావు" అంటూ నేరుగా ముఖంపై చెప్పేస్తుంది. అంతేకాదు, రోహిణి చేస్తున్న పనులపై కూడా ఆమె తీవ్ర అభ్యంతరం వ్యక్తం చేస్తుంది. "నువ్వు అందరినీ మోసం చేస్తున్నావు. వారి జీవితాలతో ఆటలాడుతున్నావు. ఆ విషయాలు నాకు అస్సలు నచ్చడం లేదు. ఇకనైనా నీ ప్రవర్తన మార్చుకో" అంటూ గట్టిగా హెచ్చరిస్తుంది. విద్య మాటలు విన్న రోహిణి మరింత ఆవేశానికి లోనవుతుంది. "ఇన్ని రోజులు నిన్ను నా ప్రాణ స్నేహితురాలిగా భావించాను. కానీ నువ్వు ఇలా నమ్మకద్రోహం చేస్తావని అనుకోలేదు. ఇక నీ స్నేహం నాకు అవసరం లేదు" అంటూ సంబంధాన్ని తెంచుకునేలా మాట్లాడుతుంది.

దానికి విద్య కూడా ఏమాత్రం తగ్గకుండా, "నీ స్నేహం నాకు కూడా అవసరం లేదు. నువ్వు చేస్తున్నవి అన్నీ మోసాలే. ఇప్పుడే నా ఇంటి నుంచి వెళ్లిపో" అంటూ ముఖం మీదనే చెప్పేస్తుంది. విద్య మాటలకు రోహిణి ఒక్కసారిగా షాక్ అవుతుంది. అయినప్పటికీ తన అహంకారాన్ని వదలకుండా, "నేను కూడా ఇక నీ ముఖం చూడను. జీవితంలో మళ్లీ నీ దగ్గరకు రాను" అని చెప్పి వెళ్లిపోవడానికి సిద్ధమవుతుంది. వెళ్లే ముందు కూడా విద్య చివరిసారి హెచ్చరిస్తుంది. "ఎన్ని రోజులు మోసం చేస్తావో, అంతకంటే ఎక్కువ రోజులు బాధపడాల్సి వస్తుంది. జాగ్రత్త" అని అంటుంది. కానీ రోహిణి మాత్రం ఆ మాటలను పట్టించుకోకుండా, "గుడ్‌బై" అంటూ కోపంగా అక్కడి నుంచి వెళ్లిపోతుంది. ఇలా ఎన్నో సంవత్సరాల స్నేహానికి ఒక్కసారిగా ముగింపు పలికిన ఈ ఘర్షణ కథలో కీలక మలుపుగా మారింది.

ఇక మరుసటి రోజు బాలు స్నేహితుడు మురళి నేరుగా విద్య ఇంటికి చేరుకుంటాడు. గత రెండు రోజులుగా ఆమెను చూడలేకపోయానని, అందుకే ప్రత్యేకంగా కలవడానికి వచ్చానని చెబుతాడు. మురళిని చూసిన విద్య కూడా లోలోపల సంతోషపడుతుంది. అయితే తన మనసులోని భావాలను బయటపెట్టకుండా సాధారణంగానే ప్రవర్తిస్తుంది. ఇంట్లోకి ఆహ్వానించి అతనితో మాట్లాడుతుంది. ఈ సందర్భంగా మురళి తన మనసులోని ప్రేమను పరోక్షంగా వ్యక్తం చేస్తాడు. "మిమ్మల్ని రెండు రోజులుగా చాలా మిస్ అయ్యాను. ఎందుకో తెలియదు కానీ మిమ్మల్ని చూడగానే ఒక ప్రత్యేకమైన అనుభూతి కలుగుతోంది. మీరు నాకు చాలా నచ్చారు" అంటూ తన మనసులోని మాటలను చెబుతాడు. మురళి మాటలు విన్న విద్య సిగ్గుతో మునిగిపోతుంది. అయినప్పటికీ తన ప్రేమను బయటపెట్టకుండా ఏమీ తెలియనట్లు నటిస్తుంది.

మురళి వెళ్లే సమయంలో కూడా రొమాంటిక్‌గా మాట్లాడి, మళ్లీ కలుస్తానంటూ అక్కడి నుంచి వెళ్లిపోతాడు. అతను వెళ్లిపోయిన తర్వాత విద్య మాత్రం పూర్తిగా అతని ఆలోచనల్లో మునిగిపోతుంది. మురళి చెప్పిన మాటలను గుర్తు చేసుకుంటూ ఊహాలోకంలో విహరిస్తుంది. అతడిపై తనకూ ప్రేమ భావనలు పెరుగుతున్నాయని ఆమె ముఖంలో కనిపిస్తుంది. ఇదే సమయంలో బాలు చెప్పిన ప్లాన్‌ను అమలు చేయడానికి మీనా విద్య ఇంటికి చేరుకుంటుంది. విద్య ఆమెను ఎంతో ఆప్యాయంగా ఆహ్వానించి లోపలికి పిలుస్తుంది. అయితే మాట్లాడుతుండగా పరోక్షంగా మురళి గురించి ప్రస్తావిస్తూ, తన మనసులో ఏదో కొత్త భావన మొదలైందన్న సంకేతాలను ఇస్తుంది.

విద్య ప్రవర్తనను గమనించిన మీనా వెంటనే అర్థం చేసుకుంటుంది. "నీ మాటలు వింటుంటే నువ్వు ప్రేమలో పడిపోయినట్టే కనిపిస్తోంది. నీ బుగ్గలు కూడా ఎర్రబడ్డాయి. ఏదో సంథింగ్... సంథింగ్ జరుగుతున్నట్టుంది" అంటూ సరదాగా ఆటపట్టిస్తుంది. దీంతో విద్య మరింత సిగ్గుపడుతుంది. అయితే మీనా అసలు ఉద్దేశం మాత్రం వేరే. బాలు చెప్పినట్లుగా విద్య ఫోటోలు సేకరించాలన్న ప్లాన్‌ను చాలా తెలివిగా అమలు చేస్తుంది. ప్రేమ విషయంపై మాట్లాడుతున్నట్లు నటిస్తూ, తన ఫోన్‌లో కొన్ని ఫోటోలు తీస్తుంది. విద్యకు కూడా అది అనుమానం రాకుండా ఎంతో సహజంగా వ్యవహరిస్తుంది.

కొద్దిసేపటి తర్వాత "నాకు ఒక పని ఉంది. నేను వెళ్తాను. కానీ ప్రేమ విషయంలో మాత్రం ఆలస్యం చేయొద్దు. మనసులో ఉన్నది త్వరగా చెప్పేయ్" అంటూ విద్యకు సలహా ఇచ్చి అక్కడి నుంచి బయలుదేరుతుంది. తనపై ఎలాంటి అనుమానం రాకుండా ప్లాన్‌ను విజయవంతంగా పూర్తి చేయడంతో మీనా సంతోషపడుతుంది. ఇంటికి చేరుకున్న తర్వాత మీనా నేరుగా బాలును కలుస్తుంది. "మీరు ఇచ్చిన టాస్క్ పూర్తయింది. విద్య ఫోటోలు తీసుకొచ్చాను" అంటూ ఫోటోలను అతనికి పంపిస్తుంది. మీనా తెలివిని చూసి బాలు కూడా సంతోషపడతాడు. అయితే బాలు ప్లాన్ అసలు అప్పుడే మొదలవుతుంది. వెంటనే వృద్ధ దంపతుల మనుమడు ప్రకాష్‌కు ఫోన్ చేస్తాడు. "నేను కొన్ని ఫోటోలు పంపిస్తాను. వాటిని మీ తాతయ్య, బామ్మకు చూపించండి. వాళ్లు గుర్తుపడతారేమో చూడండి" అని చెబుతాడు. ప్రకాష్ కూడా అందుకు అంగీకరిస్తాడు.

ఇక్కడే కథలో అసలు సస్పెన్స్ మొదలవుతుంది. బాలు పంపిన ఫోటోల్లో విద్య ఉండటంతో, ఆ ఫోన్‌ను ముసలి దంపతుల వద్దకు తీసుకొచ్చిన మహిళ విద్యేనా? లేక రోహిణి కుట్రలో ఆమె పాత్ర ఏమైనా ఉందా? అనే ప్రశ్నలు ప్రేక్షకుల్లో మొదలవుతున్నాయి. బాలు కూడా ఇదే దిశగా దర్యాప్తు చేస్తున్నట్లు కనిపిస్తోంది. ఇప్పటికే రోహిణిపై అనుమానాలు పెరుగుతున్న నేపథ్యంలో, విద్య ఫోటోలను చూపించడం వెనుక బాలు పెద్ద ప్లాన్ ఉన్నట్లు తెలుస్తోంది. ఒకవేళ ముసలి దంపతులు విద్యను గుర్తుపడితే రోహిణి దాచిపెట్టిన నిజాలు బయటపడే అవకాశం ఉంది. అదే జరిగితే రోహిణి అబద్ధాల సామ్రాజ్యం ఒక్కసారిగా కూలిపోయే పరిస్థితి ఏర్పడవచ్చు అనే ప్రశ్నలకు సమాధానం రాబోయే ఎపిసోడ్లలో తెలియనుంది.