Gundeninda Gudigantalu June 16th Episode: ప్రభావతిని రెచ్చగొట్టిన చింతామణి.. మీనాపై నిందాలు.. బాలు కౌంటర్

Courtesy: Jio hotstar

Gunde Ninda Gudi Gantalu: గుండె నిండా గుడిగంటలు సోమవారం ఎపిసోడ్ భావోద్వేగాలు, కుటుంబ బంధాలు, కొత్త విభేదాలతో ఆసక్తికరంగా సాగింది. రవి-శృతి వివాహ వార్షికోత్సవ వేడుకలు కుటుంబ సభ్యుల సందడితో ఘనంగా జరిగాయి. ఈ సందర్భంగా బాలు-మీనాలు ప్రేమకు ప్రతీకగా స్వయంగా తయారు చేసిన ఫ్లవర్ బొకేను బహుమతిగా ఇవ్వగా అందరి ప్రశంసలు అందుకున్నారు. అనంతరం రవి, శృతి కలిసి మీనాకు ఖరీదైన స్మార్ట్‌ఫోన్‌ను సర్‌ప్రైజ్ గిఫ్ట్‌గా అందించడంతో ప్రభావతి, రోహిణి, మనోజ్ అసూయతో రగిలిపోయారు. మరోవైపు ట్రాఫిక్ కానిస్టేబుల్ అరుణ్ తన అనారోగ్యంతో బాధపడుతున్న తల్లి రాజేశ్వరిని హాస్పిటల్‌లో చేర్పించాల్సి వచ్చింది. డ్యూటీ ఒత్తిడి కారణంగా ఆందోళన చెందుతున్న అరుణ్‌కు సుమతి అండగా నిలిచి రాజేశ్వరిని చూసుకుంటానని హామీ ఇచ్చింది. ఆమె మంచితనానికి అరుణ్, రాజేశ్వరి ఇద్దరూ ఆకర్షితులయ్యారు.

ఇక బాలు, అరుణ్ మధ్య విభేదాలు మరింత తీవ్రమయ్యాయి. హోటల్‌లో ఎదురుపడిన అరుణ్‌ను బాలు కావాలనే రెచ్చగొట్టడంతో ఇద్దరి మధ్య వాగ్వాదం జరిగింది. కోపంతో ఊగిపోయిన అరుణ్, బాలు తన ఏకైక శత్రువని హెచ్చరించడం కథలో కొత్త ఉత్కంఠను పెంచింది. ఇదిలా ఉండగా మీనాకు మరో శుభవార్త లభించింది. శివ సహాయంతో ఆమెకు రూ.5 లక్షల విలువైన భారీ క్యాటరింగ్ ఆర్డర్ వచ్చింది. అయితే ఆ పనిని పూర్తి చేయడానికి రూ.70 వేల పెట్టుబడి అవసరం కాగా, అడ్వాన్స్‌గా కేవలం రూ.20 వేలే రావడంతో మీనా ఆందోళన చెందుతుంది. అవసరమైన డబ్బును ఎలా సమకూర్చుకుంటుంది? ఈ భారీ ఆర్డర్‌ను విజయవంతంగా పూర్తి చేస్తుందా? అన్నది రాబోయే ఎపిసోడ్‌లలో ఆసక్తికరంగా మారనుంది.

Courtesy: Jio hotstar

మంగళవారం ప్రసారమైన ఎపిసోడ్ భావోద్వేగాలు, కుటుంబ బంధాలు, కొత్త కుట్రలతో ప్రేక్షకులను ఆకట్టుకుంది. మీనాకు ఇటీవల రూ.5 లక్షల విలువైన భారీ డేకరేషన్ ఆర్డర్ రావడంతో ఆమె ఆనందంలో మునిగిపోయింది. అయితే ఆ ఆర్డర్ పూర్తి చేయడానికి అవసరమైన పెట్టుబడి విషయంలో ఇబ్బందులు ఎదురయ్యాయి. అడ్వాన్స్‌గా కేవలం రూ.20 వేలు మాత్రమే రావడంతో మిగిలిన ఖర్చుల కోసం డబ్బు అవసరమైంది. దీంతో బాలు, మీనా కలిసి రవి-శృతిని సహాయం కోరాలని నిర్ణయించుకుంటారు. ఇద్దరూ రవి-శృతి గదికి వెళ్లే సరికి వారు సినిమా చూస్తూ సరదాగా వాగ్వాదం చేసుకుంటూ కనిపిస్తారు. బాలు, మీనా రావడంతో వారి గొడవ ఆగిపోతుంది. వచ్చిన కారణం అడగగా, మీనా తనకు వచ్చిన పెద్ద ఆర్డర్ గురించి వివరించి, అదనంగా రూ.40 వేల వరకు అవసరమవుతుందని చెబుతుంది. ఆమె మాటలు విన్న శృతి వెంటనే స్పందిస్తూ, "ఇంత చిన్న విషయానికి ఇంత మొహమాటమా? నువ్వు మా కోసం చేసిన సహాయానికి మేమే రుణపడి ఉన్నాం. ఆ డబ్బంతా నేనే ఇస్తాను" అని అంటుంది.

అయితే వెంటనే రవి కూడా రంగంలోకి దిగి, "నువ్వు ఎందుకు ఇస్తావు? నేనే ఇస్తాను" అంటూ పట్టుబడతాడు. దీంతో ఇద్దరి మధ్య సహాయం చేయడంలోనే పోటీ మొదలవుతుంది. చివరకు చెరో రూ.20 వేలు ఇవ్వాలని నిర్ణయించుకుంటారు. వారి ప్రేమాభిమానాలు చూసి బాలు, మీనా ఎంతో సంతోషిస్తారు. ఈ సందర్భంగా శృతి, "నీకు ఏ అవసరం వచ్చినా మొహమాటపడకుండా మమ్మల్ని అడుగు" అని భరోసా ఇస్తుంది. రవి కూడా తన చదువు రోజులలో బాలు చేసిన సహాయాన్ని గుర్తు చేసుకుంటూ, "అన్నయ్యా.. నీకు ఏ అవసరం వచ్చినా ముందుగా నన్నే అడగాలి" అని చెప్పడంతో బాలు భావోద్వేగానికి గురవుతాడు.

మరోవైపు చింతామణి డాన్స్ క్లాస్‌లో ప్రభావతితో కలిసి సాధన చేస్తూ కనిపిస్తుంది. ప్రభావతి ఆమె డాన్స్‌ను ప్రశంసిస్తూ ప్రోత్సహిస్తుంది. ఈ క్రమంలో చింతామణి తన చిన్ననాటి కలలు, ఆర్థిక సమస్యల కారణంగా డాన్స్‌కు దూరమైన విషయాలను చెప్పి ప్రభావతి సానుభూతిని పొందుతుంది. ఇదే సమయంలో ఆమె అసిస్టెంట్ నుంచి వచ్చిన ఫోన్ కాల్ కథలో కీలక మలుపు తీసుకొస్తుంది. మీనాకు భారీ ఆర్డర్ దక్కిన విషయం తెలుసుకున్న చింతామణి ఒక్కసారిగా షాక్‌కు గురవుతుంది. మొదట కోపంతో స్పందించినా, వెంటనే మరో ప్రమాదకరమైన ప్లాన్ వేస్తుంది. మీనాను నేరుగా ఎదుర్కోవడం కంటే, ఆమె విజయాన్ని అడ్డుకోవడమే లక్ష్యంగా పెట్టుకుంటుంది. ఇందుకోసం ప్రభావతిని ఆయుధంగా ఉపయోగించుకోవాలని నిర్ణయిస్తుంది.

తన ప్లాన్ ప్రకారం ప్రభావతి వద్దకు వెళ్లిన చింతామణి, మీనా తన గురించి అవమానకరంగా మాట్లాడిందని అబద్ధాలు చెబుతుంది. "మీ కోడలు డబ్బు కోసం కాదు, మిమ్మల్ని తన ఆధీనంలో పెట్టుకోవడానికి కష్టపడుతోంది. మీ అహంకారం తగ్గించాలని అనుకుంటోంది" అంటూ లేనిపోని కథలు అల్లుతుంది. ఆ మాటలు విన్న ప్రభావతి ఆగ్రహంతో రగిలిపోతుంది. మీనాపై ఇప్పటికే ఉన్న అసంతృప్తి కారణంగా చింతామణి చెప్పిన అబద్ధాలను నిజమని నమ్మేస్తుంది. అక్కడితో ఆగని చింతామణి, మీనాకు వచ్చిన ఆర్డర్‌ను ఎలా అడ్డుకోవాలో ప్రభావతికి సలహా ఇస్తుంది. "ఒక్కసారి ఆ ఆర్డర్ క్యాన్సిల్ అయితే మార్కెట్లో మీనా పేరు దెబ్బతింటుంది. ఇకపై ఎవరూ ఆమెను నమ్మరు. అందుకే ఆమె ఇంటి నుంచి బయటకు వెళ్లకుండా చూడండి" అంటూ కుట్ర పన్నుతుంది. చింతామణి మాటలకు ప్రభావతి పూర్తిగా ప్రభావితమై, మీనాకు వ్యతిరేకంగా అడుగులు వేయడానికి సిద్ధమవుతుంది.

చింతామణి చెప్పిన మాటలను పూర్తిగా నమ్మిన ప్రభావతి ఇంటికి చేరుకున్న వెంటనే పెద్ద రచ్చ చేస్తుంది. కుటుంబ సభ్యులందరి ముందు మీనాను నిలదీస్తూ, "నేను ఈ ఇంట్లో ఉండటం నీకు ఇష్టం లేదట. నా అహంకారాన్ని తగ్గించాలని చూస్తున్నావట. నన్ను నీ గుప్పెట్లో పెట్టుకోవాలని అనుకుంటున్నావట. బయట వాళ్ల దగ్గర నా గురించి తక్కువ చేసి మాట్లాడుతున్నావట" అంటూ వరుస ఆరోపణలు చేస్తుంది. ఒక్కసారిగా ప్రభావతి మాటలు విన్న మీనా షాక్‌కు గురవుతుంది. అయితే మీనా చాలా ప్రశాంతంగా స్పందిస్తూ, "అత్తయ్యా.. నేను ఎప్పుడూ అలాంటి మాటలు అనలేదు. మీ గురించి బయట ఎక్కడైనా మాట్లాడినా గొప్పగానే మాట్లాడుతాను. కానీ తప్పుడు ఆరోపణలు మాత్రం చేయను" అని వివరణ ఇచ్చే ప్రయత్నం చేస్తుంది. కానీ ప్రభావతి మాత్రం ఆమె మాటలను వక్రీకరిస్తూ, "చూశారా.. తనే ఒప్పుకుంది. నా గురించి బయట మాట్లాడుతానని చెబుతోంది" అంటూ మళ్లీ నిందలు వేస్తుంది.

ఈ పరిణామంతో సత్యం జోక్యం చేసుకుంటాడు. "అసలు ఈ విషయం నీకు ఎవరు చెప్పారు? ఆ వ్యక్తి పేరు చెప్పు" అంటూ ప్రభావతిని గట్టిగా ప్రశ్నిస్తాడు. అయితే చింతామణి పేరు బయటకు రాకుండా జాగ్రత్తపడిన ప్రభావతి, "ఆమె పేరు నేను చెప్పను. ఆమె నాకు చాలా నమ్మకమైన వ్యక్తి. అలాంటి వ్యక్తి చెప్పిన మాటను నేను నమ్మాను" అంటూ అసలు విషయాన్ని దాచిపెడుతుంది. ప్రభావతి తీరుపై శృతి తీవ్ర అభ్యంతరం వ్యక్తం చేస్తుంది. "నిజం ఏంటో తెలుసుకోకుండా మీనాపై ఇలాంటి ఆరోపణలు చేయడం సరైంది కాదు. మీనా గురించి మాకు బాగా తెలుసు" అంటూ అత్తకు ఎదురుగా నిలుస్తుంది. అయినప్పటికీ ప్రభావతి ఏమాత్రం వెనక్కి తగ్గకుండా తన ఆరోపణలను కొనసాగిస్తుంది.

అప్పుడు సత్యం మరోసారి గట్టిగా స్పందిస్తాడు. "మీనాపై అనవసరమైన నిందలు వేయకు. ఈ ఇంట్లో మీనా ఎలాంటిదో అందరికీ తెలుసు. ఎవరో చెప్పారని మన ఇంటి కోడల్ని అనుమానించడం చాలా తప్పు. నువ్వు ఏం చెప్పినా నేను మాత్రం నమ్మను. నా మద్దతు ఎప్పుడూ మీనాకే ఉంటుంది" అని స్పష్టం చేస్తాడు. సత్యం మాటలు విన్న ప్రభావతి మరింత అసహనానికి గురవుతుంది. "మీరు అందరూ తనకే సపోర్ట్ చేస్తున్నారు కాబట్టే మీనా నన్ను తన ఆధీనంలో పెట్టుకోవాలని చూస్తోంది" అంటూ కొత్త ఆరోపణలు చేస్తుంది. అత్త మాటలు విన్న మీనా తీవ్రంగా బాధపడుతుంది. తాను ఎలాంటి తప్పు చేయకపోయినా నిందలు ఎదుర్కోవాల్సి రావడం ఆమెను కలచివేస్తుంది. ఆ సమయంలో శృతి ఆమెకు అండగా నిలుస్తూ, "నువ్వు బాధపడకు. నిజం ఎప్పటికైనా బయటపడుతుంది. ఎవరు కుట్ర చేస్తున్నారో త్వరలోనే అందరికీ తెలుస్తుంది" అంటూ ధైర్యం చెబుతుంది. దీంతో మీనా కాస్త ఊరట పొందుతుంది.

ఇక మరోవైపు బాలు, అరుణ్ మధ్య శత్రుత్వం మరింత పెరిగే సూచనలు కనిపిస్తాయి. బాలు స్నేహితుడు రాజేష్ ఫోన్ చేసి కీలక విషయం చెబుతాడు. "ఆ ట్రాఫిక్ కానిస్టేబుల్ అరుణ్ మన కారుకు రూ.2,000 ఫైన్ వేశాడు" అని చెప్పడంతో బాలు ఆశ్చర్యపోతాడు. వెంటనే "నువ్వు డ్రైవింగ్ చేస్తూ ఫోన్ మాట్లాడావా? లేక సీట్ బెల్ట్ పెట్టుకోలేదా?" అని అడుగుతాడు. అయితే రాజేష్ అసలు కారణం చెబుతూ, "అలాంటి తప్పులేమీ చేయలేదు. నెంబర్ ప్లేట్‌లో అక్షరాలు చిన్నగా ఉన్నాయనే కారణంతో ఫైన్ వేశాడు. కానీ అసలు విషయం అది కాదు. మనపై కోపంతోనే ఇలా చేశాడు. ఫైన్ వేయడానికి ముందు కూడా పోలీసుల గురించి మాట్లాడితే ఇలాగే శిక్ష పడుతుందని అహంకారంగా మాట్లాడాడు" అని వివరిస్తాడు.

రాజేష్ మాటలు విన్న బాలు కోపంతో రగిలిపోతాడు. "అలా ఎలా ఫైన్ వేస్తాడు? తన అధికారాన్ని దుర్వినియోగం చేస్తున్నాడు. ఒకసారి నా చేతికి చిక్కితే వాడి పొగరేంటో చూపిస్తా" అంటూ ఆగ్రహం వ్యక్తం చేస్తాడు. అయితే.. "పొగరు తగ్గిస్తా " అనే మాటలు విన్న ప్రభావతి, అవి తననే ఉద్దేశించి అన్నారని భావిస్తుంది. వెంటనే ఆవేశంగా స్పందిస్తూ, "నాకు అంతా తెలుసు. నువ్వు కూడా మీనాకే సపోర్ట్ చేస్తున్నావు. మీరందరూ కలిసి నాపై కుట్ర చేస్తున్నారు. నా పొగరు దించేయాలని చూస్తున్నారు. నన్ను అందరి ముందు చిన్నచూపు చూడాలని ప్రయత్నిస్తున్నారు" అంటూ మండిపడుతుంది.

ప్రభావతి మాటలు విన్న బాలు మొదట ఆశ్చర్యపోతాడు. అసలు ఆమె ఎందుకు ఇలా మాట్లాడుతోందో అర్థం కాక కాసేపు చూస్తూ ఉంటాడు. ఆ తర్వాత తనదైన శైలిలో కౌంటర్ ఇస్తూ, "అమ్మవతి... నీ పొగరు, నీ పరువు ఎవరో తీసేయాల్సిన అవసరమేంటి? నువ్వు నలుగురిలో ఇలా మాట్లాడితే నీ పరువు నువ్వే తీసుకుంటున్నావు. దానికి ఇంకెవరైనా ఇంత కష్టపడాలా?" అంటూ వ్యంగ్యంగా అంటాడు. అయినా ప్రభావతి శాంతించదు. "మీనా బయట వాళ్ల దగ్గర నా గురించి చెడుగా మాట్లాడుతోంది. నన్ను చెడ్డదానిలా చూపిస్తోంది" అంటూ మరోసారి ఆరోపణలు చేస్తుంది. దీనిపై బాలు గట్టిగానే స్పందిస్తాడు. "అమ్మా... మీనా గురించి నీకు బాగా తెలుసు. ఇతరులు చెప్పిన మాటలు విని ఆమెను అనుమానించడం సరైంది కాదు. ఆమె అలాంటి పని ఎప్పటికీ చేయదు" అని చెబుతాడు.

మీనాకు కూడా ఆ ఆరోపణలు చాలా బాధ కలిగిస్తాయి. "అత్తయ్యా... మీ గురించి నేను ఎక్కడా, ఎప్పుడూ తప్పుగా మాట్లాడలేదు. మీకు ఎవరో కావాలని నా మీద అబద్ధాలు చెబుతున్నారు" అంటూ తన మనసులోని బాధను వ్యక్తం చేస్తుంది. కానీ ప్రభావతి మాత్రం ఏమాత్రం వినిపించుకోకుండా, "మీరిద్దరూ తోడు దొంగలు. కావాలనే నన్ను తప్పుగా చూపించడానికి ప్రయత్నిస్తున్నారు" అని అంటుంది. అక్కడే బాలు మరోసారి చురక వేస్తాడు. "ఇంట్లో తోడు దొంగలు ఎవరో అందరికీ తెలుసు" అంటూ ఇన్‌డైరెక్ట్‌గా పంచ్ వేస్తాడు. ఆ మాటలు విన్న ప్రభావతి మరింత కోపంతో, "నీ మాటలు వింటుంటే నేను గోడకేసి తల కొట్టుకోవాలనిపిస్తోంది" అని అంటుంది. దానికి బాలు నవ్వుతూ, "అనడం కాదు అమ్మా... ఎప్పుడైనా చేసి చూపించావా కోపావతి?" అంటూ మరోసారి సెటైర్ వేస్తాడు.

బాలు వరుస కౌంటర్లకు ప్రభావతి దగ్గర సమాధానం ఉండదు. తీవ్ర అసహనంతో అక్కడి నుంచి వెళ్లిపోతుంది. ప్రభావతి వెళ్లిపోయిన తర్వాత మీనా మాత్రం ఎంతో బాధపడుతుంది. అప్పుడు బాలు ఆమెకు ధైర్యం చెబుతాడు. "మనిషి ఎదుగుతున్నప్పుడు విమర్శలు రావడం సహజం. మన విజయాన్ని చూసి కొందరు ఈర్ష్యతో ఇలాంటి నిందలు వేస్తారు. వాటిని పట్టించుకుంటే మనం ముందుకు వెళ్లలేం. నిజం మనవైపు ఉన్నప్పుడు భయపడాల్సిన అవసరం లేదు" అంటూ మీనాలో ఆత్మవిశ్వాసం నింపుతాడు.

మరోవైపు హాస్పిటల్‌లో సుమతి, అరుణ్ తల్లి రాజేశ్వరిని ఎంతో ప్రేమగా చూసుకుంటూ ఉంటుంది. మందులు వేయడం, పరీక్షలకు తీసుకెళ్లడం, భోజనం పెట్టడం ఇలా ప్రతి విషయంలోనూ దగ్గరుండి సేవ చేస్తుంది. ఆమె అంకితభావాన్ని చూసిన అరుణ్ కృతజ్ఞతతో నిండిపోతాడు. ఈ సందర్భంగా రాజేశ్వరి కూడా సుమతిని ప్రశంసిస్తూ, "నీలాంటి అమ్మాయి కూతురిగా పుట్టడం నీ తల్లిదండ్రులు చేసుకున్న అదృష్టం" అని అంటుంది. అయితే ఆ మాటలు విన్న సుమతి కాస్త భావోద్వేగానికి గురవుతుంది. "అలాంటి అదృష్టం ఇప్పుడు మా ఇంట్లో లేదు. కొద్దిరోజుల క్రితమే మేము మా నాన్నను కోల్పోయాం. అప్పటి నుంచి ఎన్నో కష్టాలు ఎదుర్కొంటున్నాం" అని చెబుతుంది.

తన మాటలతో సుమతిని బాధపెట్టానేమోనని భావించిన రాజేశ్వరి వెంటనే క్షమాపణ చెబుతుంది. అనంతరం ఆమె కుటుంబం గురించి అడగగా, సుమతి తన తల్లి, అక్క మీనా, తమ్ముడు శివ గురించి వివరిస్తుంది. అదే సమయంలో మీనా నుంచి ఫోన్ రావడంతో పక్కకు వెళ్లి మాట్లాడుతుంది. మీనాకు వచ్చిన భారీ క్యాటరింగ్ ఆర్డర్ గురించి చెప్పిన మీనా, "రేపు పనికి చాలా మంది అవసరం. నువ్వు రావడానికి వీలవుతుందా?" అని అడుగుతుంది. దానికి సుమతి వెంటనే, "అక్కయ్యా... నువ్వు అడగాలా? హాస్పిటల్ పని ముగిసిన వెంటనే నేను వచ్చేస్తాను. నువ్వు టెన్షన్ పడకు" అని ధైర్యం చెబుతుంది. అంతేకాదు, రాజేశ్వరి ఆరోగ్యం గురించి అడిగిన మీనాకు, "ఇప్పుడు బాగానే ఉన్నారు. త్వరలో డిశ్చార్జ్ అవుతారు" అని చెబుతుంది. ఆ తర్వాత మీనా ఫోన్‌లోనే రాజేశ్వరితో మాట్లాడి ఆమె ఆరోగ్యం గురించి తెలుసుకుంటుంది. మీనా చూపించిన ఆప్యాయత రాజేశ్వరిని మరింత ఆకట్టుకుంటుంది.

ఇదిలా ఉండగా, తన తల్లిని చూసుకున్నందుకు కృతజ్ఞతగా అరుణ్ సుమతికి డబ్బులు ఇవ్వాలని ప్రయత్నిస్తాడు. అయితే ఆ పని సుమతికి అస్సలు నచ్చదు. "నేను సహాయం చేసింది డబ్బుల కోసం కాదు. ఒక మనిషికి అవసరం ఉన్నప్పుడు చేయాల్సిన బాధ్యతగా చేశాను. నా ప్రేమకు, నా సేవకు ధర కట్టడం సరైంది కాదు" అంటూ ఆవేదనతో అక్కడి నుంచి వెళ్లిపోతుంది. సుమతి మాటలు విన్న అరుణ్ ఒక్కసారిగా నిశ్శబ్దంగా మారిపోతాడు. డబ్బుకంటే మానవత్వానికి విలువ ఇచ్చే ఆమె వ్యక్తిత్వం అతనిని బాగా ఆకట్టుకుంటుంది. ఇక రాజేశ్వరి కూడా సుమతి గురించి గొప్పగా మాట్లాడుతూ, "ఈ అమ్మాయి ఏ ఇంట్లో అడుగుపెడితే ఆ ఇల్లు అదృష్టవంతమవుతుంది" అని అంటుంది. తల్లి మాటలు విన్న అరుణ్ ఆలోచనలో పడిపోతాడు. సుమతి పట్ల అతని మనసులో ప్రత్యేకమైన భావనలు మొదలవుతున్నాయా అనే సందేహాన్ని కలిగిస్తూ ఈ ట్రాక్ ఆసక్తికరంగా మారింది.

ఒకవైపు బాలు ట్రిప్ లేక ఇంట్లో ఖాళీగా తిరుగుతూ కనిపిస్తాడు. అతడిని చూసిన మీనా వెంటనే పని పెట్టాలని నిర్ణయించుకుంటుంది. "అలా ఖాళీగా తిరగడం కాకుండా ఇక్కడికి వచ్చి కూరగాయలు కోయండి" అంటూ బాలును పిలుస్తుంది. మొదట ఆశ్చర్యపోయిన బాలు, "నన్నా..? కూరగాయలు కోయమంటున్నావా?" అంటూ ముఖం పెట్టినా, చివరికి మీనా మాట కాదనలేక పని మొదలుపెడతాడు. అంతేకాదు, రేపటి ఆర్డర్ చాలా ముఖ్యమని, తనకు సహాయం చేయాలని మీనా చెప్పడంతో బాలు కూడా వెంటనే అంగీకరిస్తాడు. "నీ పని అంటే నా పని. రేపు నీతోనే ఉంటాను" అంటూ భరోసా ఇస్తాడు.

ఇదిలా ఉండగా సత్యం స్కూల్ నుంచి ఇంటికి వస్తాడు. ఇటీవలే ఉద్యోగంలో చేరిన సత్యం పనుల గురించి తెలుసుకోవాలని ప్రభావతి ఆసక్తిగా అడుగుతుంది. "స్కూల్లో పని ఎలా ఉంది?" అని ప్రశ్నించగా, సత్యం నవ్వుతూ, "వారానికి ఒకసారి అకౌంట్స్ చూసుకోవాలి. అంతగా కష్టపడాల్సిన పని కాదు. ఇలా వెళ్లి అలా వచ్చేస్తున్నా" అని సమాధానం చెబుతాడు. అయితే ప్రభావతి అనుకోకుండా నోరు జారుతుంది. "అంత సింపుల్ పని ఎందుకు? ఇంకేదైనా కష్టమైన పని చూసుకోండి. డబ్బులు కూడా ఎక్కువ వస్తాయి" అని అంటుంది. ఆ మాటలు విన్న బాలు వెంటనే స్పందిస్తాడు. ప్రభావతి దగ్గరకు వచ్చి, "ఏంటమ్మా ఇది? మా నాన్న ఇంకా కష్టపడాలా? ఆయన కష్టపడి సంపాదించిన డబ్బులు మళ్లీ ఎవరైనా లక్షలు మింగిన వాళ్లకు ఇవ్వాలా?" అంటూ చురక వేస్తాడు.

బాలు చెప్పిన మాటల్లో వ్యంగ్యం ఉందని అర్థమైన ప్రభావతి ఒక్కసారిగా కోపంతో అతని తలపై గుద్దుతుంది. "నీకు ఎప్పుడూ నోరు అదుపులో ఉండదు" అంటూ మందలిస్తుంది. వెంటనే బాలు నాటకీయంగా స్పందిస్తూ, "అమ్మో... చచ్చానురో! నన్ను కొట్టేశారు!" అంటూ గట్టిగా అరుస్తాడు. అప్పుడు మీనా నవ్వుతూ సత్యంతో, "మామయ్యా... వీళ్లిద్దరిని చూస్తుంటే మీ స్కూల్ పిల్లలు గుర్తుకు వస్తున్నారు కదా?" అని అంటుంది. దానికి సత్యం కూడా వెంటనే స్పందిస్తూ, "అవునమ్మా... స్కూల్లో పిల్లలు కూడా ఇంతగా కొట్టుకోరు. వీళ్లిద్దరిని చూస్తుంటే క్లాస్‌రూమ్‌లో అల్లరి చేసే పిల్లల్లా కనిపిస్తున్నారు" అంటూ సెటైర్ వేస్తాడు. అయితే మరోవైపు చింతామణి పన్నిన కుట్ర సక్సెస్ అవుతుందా? రాబోయే ఎపిసోడ్‌లలో మీనాకు ఎలాంటి సమస్యలు ఎదురవుతాయి? భారీ ఆర్డర్‌ను ఆమె విజయవంతంగా పూర్తి చేయగలుగుతుందా? ప్రభావతి నిజం తెలుసుకుంటుందా? అనే ఆసక్తి ప్రేక్షకుల్లో పెరిగింది.