Gundeninda Gudigantalu June 25th Episode: మీనాక్షి నగలతో లేచిపోయిన సుందరి.. రంగంలోకి దిగిన బాలు మీనా..

Courtesy: Jio hotstar

Gunde Ninda Gudi Gantalu: జీఎస్టీ ఆఫీసర్స్ వచ్చి ఇచ్చిన టైమ్ అయిపోయింది ఫైన్ కట్టలేదు కాబట్టి షాపును సీల్ చేస్తున్నామని చెప్పడంతో మనోజ్ టెన్షన్ పడతాడు. ఇంతలో రోహిణి వచ్చి డబ్బులు అకౌంట్‌లో ఉన్నాయి చెక్ రాసి ఇవ్వమని చెబుతుంది. మనోజ్ చెక్ రాసి ఇవ్వగా.. ఇకపై జీఎస్టీ కట్టకుంటే పరిణామాలు చాలా తీవ్రంగా ఉంటాయని వార్నింగ్ ఇస్తారు. ఇంత సడెన్‌గా డబ్బులు ఎక్కడివి అని మనోజ్ అడగ్గా.. మా ఫ్రెండ్ దగ్గర అప్పు చేశానని చెబుతుంది రోహిణి. ఇంట్లో మీనాని పిలిచిన బాలు.. తాను నాన్నని స్కూల్‌లో దించడానికి వెళ్లినప్పుడు సుగుణమ్మని, చింటూని చూశానని చెబుతాడు. ఆ మాటలు విన్న రోహిణి కంగారుపడుతుంది.

డ్రైవింగ్ స్కూల్ పెట్టుకోవడానికి ప్రభుత్వం అనుమతించినట్లు బాలు చెప్పడంతో అంతా సంతోషిస్తారు. కానీ మనోజ్, ప్రభావతిలు మాత్రం అసూయతో రగిలిపోతారు. రెండు కార్లకు ఓనర్‌వి అయ్యావు, ఇప్పుడు డ్రైవింగ్ స్కూల్ కూడా పెట్టుకుంటున్నావు శెభాష్ అని బాలుని మెచ్చుకుంటాడు సత్యం. డ్రైవింగ్ స్కూల్‌కి ఆఫీసుగా మనింటి అడ్రస్ ఇచ్చానని బాలు చెప్పడంతో రోహిణి ట్యాక్స్ పేరు చెప్పి భయపెట్టడంతో ప్రభావతి కూడా అడ్డు తగులుతుంది. వీడు డ్రైవింగ్ స్కూల్ పెట్టుకోవడానికి ప్రభుత్వమే అనుమతించిందని అంటాడు సత్యం. తన డ్రైవింగ్ స్కూల్‌కి తండ్రి పేరు పెట్టి తల్లిదండ్రులతో ఓపెనింగ్ చేయిస్తాడు బాలు. సుందరిని వెంట బెట్టుకుని కామాక్షి వచ్చి రేపు దీనికి పెళ్లి చూపులు.. మీరే దగ్గరుండి చూసుకోవాలని చెబుతుంది. ఇదంతా గత ఎపిసోడ్‌లో హైలైట్‌గా జరిగింది. మరి జూన్ 25వ తేదీ ఎపిసోడ్ 713లో ఏం జరిగిందంటే?

Courtesy: Jio hotstar

'గుండె నిండా గుడి గంటలు' సీరియల్ గురువారం ఎపిసోడ్ ఎంతో ఆసక్తికరంగా సాగింది. బాలు ఎంతో కష్టపడి ప్రారంభించిన డ్రైవింగ్ స్కూల్‌కు మొదటి స్టూడెంట్‌గా మీనా చేరడం ప్రత్యేక ఆకర్షణగా నిలిచింది. అంతేకాకుండా డ్రైవింగ్ ఫీజును చెక్కు రూపంలో చెల్లించి బాలు ప్రయత్నానికి తన పూర్తి మద్దతు ఉందని నిరూపించింది. అయితే ఇది చూసిన ప్రభావతి మాత్రం అసూయతో రగిలిపోయింది. "కారు మీద పూలు అమ్ముకునే స్థాయి నుంచి డ్రైవింగ్ స్కూల్ పెట్టేశారా?" అంటూ వ్యంగ్యంగా మాట్లాడింది.

ప్రభావతి మాటలకు మీనా కూడా గట్టిగానే బదులిచ్చింది. "డ్రైవింగ్ నేర్చుకోవడంలో తప్పేం లేదు. ఇది నేను కష్టపడి సంపాదించిన డబ్బు. ఎవరినీ మోసం చేసి సంపాదించలేదు. ఇంట్లో డబ్బులు తీసుకుని మా నాన్న ఇచ్చాడు, మా మామయ్య ఇచ్చాడు అంటూ అబద్ధాలు చెప్పే రకం నేను కాదు" అంటూ రోహిణి, మనోజ్‌లపై పరోక్షంగా సెటైర్లు వేసింది. మీనా ఇచ్చిన ఈ కౌంటర్‌కు ప్రభావతి ఒక్కసారిగా షాక్‌కు గురైంది.

ఇక అదే సమయంలో శృతిని కూడా డ్రైవింగ్ నేర్చుకోమని అందరూ ప్రోత్సహిస్తారు. అయితే శృతి మాత్రం తనకు డ్రైవింగ్‌పై పెద్దగా ఆసక్తి లేదని, అవసరమైతే రవి ఉన్నాడని చెబుతుంది. వెంటనే ప్రభావతి "మీనా ఉంది కదా, డ్రైవింగ్ నేర్చుకుని మీ ఇంట్లో డ్రైవర్‌గా పనిచేస్తుంది" అంటూ మరోసారి అవమానించే ప్రయత్నం చేసింది. కానీ శృతి కూడా తగ్గలేదు. "మనోజ్‌కి కూడా డ్రైవింగ్ వస్తుంది కదా. ఉద్యోగం లేనప్పుడు ఆయనను డ్రైవర్‌గా పంపిస్తే బాగుంటుంది" అంటూ గట్టి పంచ్ వేసింది. దీంతో ప్రభావతి ముఖం మాడిపోయింది.

డ్రైవింగ్ స్కూల్ వ్యవహారం పూర్తిగా చట్టబద్ధంగా, అన్ని పత్రాలు సక్రమంగా ఉండాలని బాలు నిర్ణయిస్తాడు. అవసరమైన డాక్యుమెంటేషన్ బాధ్యతను రాజేష్‌కు అప్పగిస్తాడు. రాజేష్ కూడా వెంటనే ఆ పనిలో నిమగ్నమవుతాడు. మరోవైపు మొదటి విద్యార్థినిగా చేరిన మీనాకు స్వయంగా బాలు డ్రైవింగ్ పాఠాలు చెప్పడం ప్రారంభిస్తాడు. వారి జీవితాల్లో ఇది కొత్త అధ్యాయానికి నాంది పలికినట్లుగా కనిపించింది.

మరోవైపు బాలు, మీనా ఒక్కో అడుగు ముందుకు వేస్తుంటే రోహిణికి మాత్రం అసూయ పెరుగుతూ ఉంటుంది. ఈ సమయంలో మనోజ్ తీసుకొచ్చిన డ్రైవింగ్ స్కూల్ నేమ్ బోర్డును చూసి ఆమె ఆగ్రహం వ్యక్తం చేస్తుంది. "ఇన్ని డిగ్రీలు చదివి ఏం సాధించావు? ఇంట్లో పనికిరాని వ్యక్తిలా తిరుగుతున్నావు" అంటూ అదే బోర్డుతో మనోజ్‌ను కొట్టేంత వరకు వెళ్లింది.

దీనికి మనోజ్ మాత్రం తనదైన స్టైల్లో బిల్డప్ ఇచ్చే ప్రయత్నం చేశాడు. "నన్ను బాలుతో పోల్చొద్దు. నేనెక్కడ, వాడెక్కడ? నేను బిజినెస్‌మ్యాన్‌ని" అంటూ గొప్పలు చెప్పుకున్నాడు. అయితే ఆ మాటలు విన్న రోహిణికి మరింత కోపం వచ్చింది. "జీఎస్టీ కూడా సరిగా కట్టలేని నువ్వు బిజినెస్‌మ్యాన్నా? ఇంకోసారి ఇలాంటి బిల్డప్‌లు ఇవ్వొద్దు. కనీసం బాలను చూసైనా బుద్ధి తెచ్చుకో" అంటూ గట్టిగా క్లాస్ పీకింది.

అయితే రోహిణి ఎంత చెప్పినా మనోజ్ మాత్రం మారే సూచనలు కనిపించలేదు. కుక్క తోక వంకర అన్నట్లు తన తప్పులను అంగీకరించకుండా లైట్‌గా తీసుకున్నాడు. మరోవైపు.. కానిస్టేబుల్ అరుణ్ తన డ్యూటీలో బిజీగా కనిపిస్తాడు. అదే సమయంలో సుమతి హెల్మెట్ ధరించకుండా స్కూటీ నడుపుకుంటూ రావడంతో ఆమెను అడ్డగిస్తాడు. ట్రాఫిక్ నిబంధనలు ఉల్లంఘించినందుకు వెయ్యి రూపాయల జరిమానా విధిస్తాడు. అయితే సుమతి మాత్రం ఆశ్చర్యానికి గురవుతుంది. "నేను మీ అమ్మకు ఎంతో సహాయం చేశాను. కనీసం ఆ కృతజ్ఞత కూడా లేదా? తెలిసిన వ్యక్తిలా కాకుండా పరాయివాళ్లలా ఎందుకు మాట్లాడుతున్నారు?" అంటూ ప్రశ్నిస్తుంది.

అయితే అరుణ్ మాత్రం తన విధానాన్ని మార్చుకోడు. "డ్యూటీలో ఉన్నప్పుడు నాకు బంధాలు, పరిచయాలు ఉండవు. నిబంధనలు అందరికీ ఒకటే. దయచేసి ఫైన్ కట్టి వెళ్లండి" అంటూ స్పష్టంగా చెబుతాడు. అరుణ్ సమాధానంతో సుమతి మనసు నొచ్చుకుంటుంది. ఇదే సమయంలో మరో కానిస్టేబుల్ అక్కడికి వచ్చి అరుణ్ స్వభావం గురించి చెబుతాడు. "ఆయన డ్యూటీ విషయంలో చాలా నిజాయితీగా ఉంటాడు. అవసరమైతే తన తల్లి చేసిన తప్పుకైనా జరిమానా విధించే వ్యక్తి" అంటూ అరుణ్ నిబద్ధతను వివరించడంతో సుమతి కొంత ఆశ్చర్యపోతుంది.

ఇక జరిమానా చెల్లించే సమయంలో అరుణ్ స్వయంగా డబ్బులు ఇవ్వడానికి ప్రయత్నిస్తాడు. కానీ సుమతి ఆ సహాయాన్ని తిరస్కరిస్తుంది. "నాకు అవసరం లేదు. నా తప్పుకు నేను ఫైన్ కట్టగలను" అంటూ తన డబ్బులతోనే జరిమానా చెల్లించి కోపంగా అక్కడి నుంచి వెళ్లిపోతుంది. ఈ సన్నివేశం ఇద్దరి మధ్య భావోద్వేగాలను మరింత పెంచింది.

మరోవైపు సుందరి పెళ్లిచూపుల కోసం రంగ ఇంట్లో సందడి వాతావరణం నెలకొంటుంది. కుటుంబ సభ్యులంతా ఏర్పాట్లలో బిజీగా ఉంటారు. ఈ సందర్భంగా మీనాక్షి తన వద్ద ఉన్న ఖరీదైన నగలను తీసి సుందరికి అలంకరిస్తుంది. ఒక్కో నగ ఎలా చేయించుకుందో, వాటి ప్రత్యేకత ఏంటో అందరికీ వివరిస్తూ గర్వంగా చెప్పుకుంటుంది. సుందరిని ఎంతో ప్రేమగా ముస్తాబు చేస్తుంది.

ఇదిలా ఉండగా రంగ తన స్నేహితుడు సత్యం కుటుంబాన్ని కూడా పెళ్లిచూపులకు ఆహ్వానిస్తాడు. దీంతో బాలు, మీనా, ప్రభావతి కలిసి సత్యం కుటుంబంతో రంగ ఇంటికి చేరుకుంటారు. అతిథుల రాకతో ఇంట్లో మరింత సందడి పెరుగుతుంది. అందరూ అబ్బాయి తరఫు వారి రాక కోసం ఆసక్తిగా ఎదురుచూస్తుంటారు.

అయితే ఈ సమయంలో అబ్బాయి కుటుంబం నుంచి ఫోన్ వస్తుంది. బయలుదేరే సమయంలో అపశకునం ఎదురైందని, బల్లి మీద పడటంతో అరగంట ఆలస్యంగా వస్తామని చెబుతారు. దీంతో రంగ "పర్వాలేదు, మేమంతా ఎదురుచూస్తాం" అంటూ వారికి సమాధానం ఇస్తాడు. కానీ అదే సమయంలో ఎవరూ ఊహించని భారీ షాక్ ఎదురవుతుంది.

సుందరి ఇంట్లో కనిపించకుండా పోతుంది. ఆమెతో పాటు మీనాక్షి నగలన్నీ కూడా మాయమవుతాయి. అంతేకాదు, తనకు ఈ పెళ్లి ఇష్టం లేదని, తాను మరో వ్యక్తిని ప్రేమిస్తున్నానని చెబుతూ ఒక లేఖ రాసి వదిలి వెళ్తుంది. ఆ లేఖ చదివిన మీనాక్షి ఒక్కసారిగా కుప్పకూలిపోతుంది. తన నగలన్నీ పోయాయని విలపిస్తూ బాధపడుతుంది.

అయితే రంగకు మాత్రం నగల కంటే కుటుంబ పరువు గురించే ఎక్కువ ఆందోళన కలుగుతుంది. ఈ విషయం బయటకు తెలిసితే తన గౌరవం పోతుందని, తన తమ్ముడికి ఏ ముఖం పెట్టుకుని సమాధానం చెప్పాలో అర్థం కావడం లేదని వేదన వ్యక్తం చేస్తాడు. "సుందరి ప్రేమ విషయం ముందే తెలిసి ఉంటే నేనే పెద్దలతో మాట్లాడి పెళ్లి చేసేవాడిని. కానీ ఇలా ఇంటి పరువు తీస్తుందని ఊహించలేదు" అంటూ కన్నీటి పర్యంతమవుతాడు.

ఈ పరిస్థితిలో కూడా ప్రభావతి తన స్వభావాన్ని మార్చుకోదు. గత విషయాలను ప్రస్తావిస్తూ మీనాపై పరోక్ష వ్యాఖ్యలు చేస్తుంది. "మీనా కూడా ఒకప్పుడు రవితో కలిసి ఇంటి నుంచి వెళ్లిపోయింది కదా" అంటూ అనుచిత వ్యాఖ్య చేయడంతో అక్కడి వాతావరణం ఒక్కసారిగా ఉద్రిక్తంగా మారుతుంది. వెంటనే సత్యం జోక్యం చేసుకుని ప్రభావతిని హెచ్చరిస్తాడు. అవసరం లేని సమయంలో పాత విషయాలు లాగొద్దని గట్టిగా చెబుతాడు.

బాలు కూడా పరిస్థితిని చక్కదిద్దే ప్రయత్నం చేస్తాడు. "ఇలాంటి కుటుంబ విషయాలను పెద్ద సమస్యగా మార్చకండి. ముందుగా సుందరి ఎక్కడ ఉందో తెలుసుకోవడం ముఖ్యం" అంటూ అందరికీ సూచిస్తాడు. అతని పరిపక్వతను చూసి కుటుంబ సభ్యులు కొంత ధైర్యం పొందుతారు.

చివరగా తీవ్ర ఆవేదనలో ఉన్న రంగ, బాలు వద్ద సహాయం కోరుతాడు. "మా కుటుంబ పరువు ఇప్పుడు నీ చేతుల్లో ఉంది. నువ్వే ఏదైనా చేసి సుందరిని వెతికి తీసుకురావాలి" అంటూ వేడుకుంటాడు. దానికి బాలు ధైర్యంగా స్పందిస్తూ, "నేను ఉన్నాను. మీరు ఆందోళన పడొద్దు. సుందరిని వెతికి తీసుకొచ్చే బాధ్యత నాది" అని మాట ఇస్తాడు.

ఇక రంగంలోకి దిగిన బాలు.. ముందుగా సుందరి గతంలో ఉన్న లేడీస్ హాస్టల్‌కు వెళ్లాడు. బాలుతో పాటు మీనా కూడా ఈ అన్వేషణలో భాగమైంది. ఇద్దరూ హాస్టల్‌కు చేరుకుని అక్కడ సుందరి స్నేహితురాలిని కలుస్తారు. మొదట్లో సుందరి గురించి తనకు ఏమీ తెలియదని, ఎక్కడికి వెళ్లిందో చెప్పలేనని ఆ యువతి తప్పించుకునే ప్రయత్నం చేస్తుంది. దీంతో బాలు మరింత లోతుగా ప్రశ్నలు అడగడం ప్రారంభిస్తాడు. అయినప్పటికీ ఆమె నిజం చెప్పేందుకు ముందుకు రాదు.

అయితే ఈ సమయంలో మీనా తన తెలివిని ఉపయోగిస్తుంది. "మేము డిపార్ట్‌మెంట్ నుంచి వచ్చాం. సుందరి మిస్సింగ్ కేసు గురించి విచారణ చేస్తున్నాం. అనవసరంగా మా సమయాన్ని వృథా చేయకుండా నిజం చెప్పడం మంచిది" అంటూ కాస్త గట్టిగానే హెచ్చరిస్తుంది. మీనా మాటలు విన్న స్నేహితురాలు ఒక్కసారిగా భయపడిపోతుంది. చివరకు దాచిపెట్టిన నిజాన్ని బయటపెడుతుంది.

సుందరి చాలాకాలంగా కిషోర్ అనే యువకుడిని ప్రేమిస్తోందని, ఇద్దరి మధ్య సీరియస్ రిలేషన్‌షిప్ ఉందని వెల్లడిస్తుంది. అంతేకాకుండా ఇంట్లో పెళ్లి ఒత్తిడి పెరగడంతో ఇద్దరూ కలిసి వెళ్లిపోయి ఉండొచ్చని చెబుతుంది. వారికి తెలిసిన మరో స్నేహితుడి ఇంట్లో ఆశ్రయం తీసుకుని ఉండే అవకాశం ఉందని కీలక సమాచారం అందిస్తుంది. ఈ సమాచారంతో బాలు, మీనా దర్యాప్తులో కీలక క్లూ దొరికినట్లవుతుంది.

మరోవైపు కిషోర్ ఇంట్లో కూడా పరిస్థితి ఉద్రిక్తంగానే ఉంటుంది. కొడుకు కనిపించకపోవడంతో అతని తల్లిదండ్రులు తీవ్ర ఆందోళనలో ఉంటారు. తమ కుమారుడు ఇలాంటి నిర్ణయం తీసుకుంటాడని ఊహించలేదని బాధపడుతుంటారు. ఇదే సమయంలో కుటుంబానికి దగ్గర బంధువైన మేనమామ మటన్ కొట్టు మాణిక్యం అక్కడికి చేరుకుంటాడు.

ఇంట్లో నెలకొన్న ఆందోళనను గమనించిన మాణిక్యం అందరినీ ఓదార్చే ప్రయత్నం చేస్తాడు. జరిగిన విషయం మొత్తం తెలుసుకున్న తర్వాత చాలా ప్రశాంతంగా స్పందిస్తాడు. పిల్లల మనసు అర్థం చేసుకోకుండా వారి ఇష్టాలను కాదనడం వల్లే ఇలాంటి పరిస్థితులు వస్తాయని చెబుతాడు. "ప్రేమించుకున్న ఇద్దరిని విడదీయాలని ప్రయత్నిస్తే వారు మనకు దూరమవుతారు. మనం పెద్దలుగా వారి భావాలను గౌరవించడం నేర్చుకోవాలి" అంటూ కుటుంబ సభ్యులకు విలువైన సూచనలు చేస్తాడు.

అంతేకాకుండా సుందరి కుటుంబ సభ్యులతో తానే మాట్లాడతానని, సమస్యను సామరస్యంగా పరిష్కరించే ప్రయత్నం చేస్తానని హామీ ఇస్తాడు. మాణిక్యం చెప్పిన మాటలు కిషోర్ తల్లిదండ్రులను ఆలోచనలో పడేస్తాయి. పిల్లల సంతోషం కంటే సమాజం గురించి ఎక్కువగా ఆలోచించామేమోనని వారు ఆత్మపరిశీలన చేసుకుంటారు.

ఇక మరోవైపు బాలు మాత్రం సమయం వృథా చేయకుండా సుందరి కోసం వెతుకులాట కొనసాగిస్తాడు. ఒక్క క్లూను కూడా వదిలిపెట్టకుండా ముందుకు సాగుతాడు. సుందరి, కిషోర్ ఎక్కడ ఉన్నారు? వారు నిజంగానే స్నేహితుడి ఇంట్లో ఆశ్రయం తీసుకున్నారా? బాలు వారిని కనుగొని రంగ కుటుంబ పరువును కాపాడగలడా? అనే ప్రశ్నలతో కథ మరింత ఆసక్తికరంగా మారింది.