Gundeninda Gudigantalu july 1st Episode: కానిస్టేబుల్ తో బాలు గొడవ, ప్రభావతి పందెం, చింటును కలిసిన మనోజ్

Courtesy: Jio hotstar

Gundeninda Gudigantalu: గుండె నిండా గుడిగంటలు మంగళవారం ఎపిసోడ్‌లో సుందరి పెళ్లి ఏర్పాట్ల బాధ్యతలను రంగారావు కుటుంబ సభ్యులకు అప్పగిస్తుండగా, ట్రాన్స్‌పోర్ట్ బాధ్యత బాలుకు దక్కుతుంది. ఇదే సమయంలో మనోజ్ పోలీస్ స్టేషన్‌లో హంగామా చేయగా, పోలీసులు అతడికి గట్టి వార్నింగ్ ఇచ్చి పంపిస్తారు. మరోవైపు బాలు సోషల్ మీడియాలో పోస్ట్ చేసిన వీడియో కారణంగా ట్రాఫిక్ కానిస్టేబుల్ అరవింద్ తీవ్ర ఇబ్బందులు ఎదుర్కొంటాడు. హెల్మెట్ లేకుండా బైక్ నడపడం, ఫోన్ మాట్లాడడం వంటి నిబంధనలు ఉల్లంఘించిన వీడియో వైరల్ కావడంతో అధికారులు అతడిని మూడు రోజుల పాటు సస్పెండ్ చేస్తారు. తల్లి ఆరోగ్యం బాగోలేక అత్యవసరంగా వెళ్లాల్సి వచ్చిందని అరవింద్ వివరణ ఇచ్చినా ఫలితం ఉండదు. దీంతో బాలు మీద ప్రతీకారం తీర్చుకుంటానని శపథం చేస్తాడు.

ఇక విద్య తన ప్రేమ గురించి మీనాతో మాట్లాడగా, జీవిత భాగస్వామిని అర్థం చేసుకోవడానికి ఇద్దరూ ఒకే ప్రశ్నలకు సమాధానాలు రాయాలని మీనా ఇచ్చిన సలహా విద్యను ఆకట్టుకుంటుంది. అయితే ఈ విషయాన్ని చూసిన రోహిణి అసూయతో రగిలిపోతుంది. అరవింద్ ఇంటికి వెళ్లిన సుమతి అతడికి ధైర్యం చెబుతుంది. మూడు రోజుల సస్పెన్షన్‌ను శిక్షగా కాకుండా కుటుంబంతో గడిపే అవకాశంగా చూడాలని సూచిస్తుంది. మరోవైపు బాలు అరవింద్ సస్పెన్షన్‌పై సంతోషపడగా, మీనా మాత్రం ఒకరి పరిస్థితి తెలుసుకోకుండా తీర్పు చెప్పడం తప్పని గట్టిగా మందలిస్తుంది. దీంతో బాలు తన తప్పును గ్రహించి ఆలోచనలో పడతాడు. చివర్లో డ్రైవింగ్ స్కూల్‌లో వీడియో వివాదం సద్దుమణగగా, డాన్స్ అకాడమీలో చింతామణి మాటలకు ప్రభావతి రెచ్చిపోవడంతో కొత్త కుటుంబ ఘర్షణకు బీజం పడుతుంది.

బుధవారం ఎపిసోడ్ ఉత్కంఠభరిత సన్నివేశాలతో ప్రేక్షకులను ఆకట్టుకుంది. ఎపిసోడ్ ప్రారంభంలో డాన్స్ అకాడమీలో చింతామణి మరోసారి ప్రభావతిని రెచ్చగొట్టే ప్రయత్నం చేస్తుంది. "మీ ఇంట్లో ముగ్గురు కోడళ్లు ఉన్నారు. అందరూ మీ మాటే వింటారా? ముఖ్యంగా మీనా మీ మాటకు విలువ ఇస్తుందా?" అంటూ వ్యంగ్యంగా ప్రశ్నిస్తుంది. దానికి ప్రభావతి ఏమాత్రం తగ్గకుండా, "మా ఇంట్లో నా మాటే శాసనం. నేను చెప్పకుండా ఎవరూ ఏ పని చేయరు. ఇంట్లో జరిగే ప్రతి విషయం నా అనుమతితోనే జరుగుతుంది" అంటూ ధీమాగా సమాధానం ఇస్తుంది.

అయితే చింతామణి అక్కడితో ఆగకుండా, "ముందు మీ ఇంట్లో ఉన్న కోడలిని అదుపులో పెట్టుకోండి. తర్వాత బరువు తగ్గడం గురించి ఆలోచించండి. ఇంటిని అదుపులో పెట్టుకోలేని వాళ్లు తమ శరీరాన్ని ఎలా అదుపులో పెట్టుకుంటారు?" అంటూ మరింత ఎద్దేవా చేస్తుంది. ఆ మాటలు ప్రభావతి అహాన్ని గట్టిగా దెబ్బతీస్తాయి. వెంటనే ఆమె ఆవేశంగా స్పందిస్తూ, "ఇక చూడండి... కేవలం మూడు నెలల్లో నేను బరువు తగ్గి చూపిస్తాను. నా మార్పు చూసి మీరే ఆశ్చర్యపోవాలి. ఇది నా సవాల్" అంటూ గట్టిగా ప్రకటిస్తుంది. దానికి చింతామణి కూడా, "సవాళ్లు విసరడం కాదు... చేసి చూపించండి" అంటూ మరింత రెచ్చగొడుతుంది.

ఆ సంఘటనతో తీవ్రంగా ఆలోచనలో పడిన ప్రభావతి ఇంటికి వెళ్లగానే మనోజ్‌కు ఫోన్ చేస్తుంది. తాను మూడు నెలల్లో బరువు తగ్గాలని నిర్ణయించుకున్నానని, మంచి డైటీషియన్ నంబర్ ఉంటే వెంటనే పంపించాలని కోరుతుంది. ప్రభావతి మాటలు విన్న మనోజ్ ఆశ్చర్యపోతూ, "ఇప్పుడిదంతా ఎందుకు?" అని అడుగుతాడు. దానికి ప్రభావతి, "మీనాక్షి నన్ను చూసి నవ్వింది, అందరి ముందు అవమానించింది. నేను విసిరిన సవాల్‌లో ఎలాగైనా గెలవాలి" అని చెబుతుంది. చివరకు మనోజ్, "సరే... నీ ఇష్టం. నేను మంచి డైటీషియన్ వివరాలు పంపిస్తాను" అంటూ ఆమెకు ధైర్యం చెబుతాడు.

మరోవైపు కథ రోహిణి వైపు తిరుగుతుంది. తన షాపులో పనులతో బిజీగా ఉన్న రోహిణికి ఆమె తల్లి సుగుణమ్మ ఫోన్ చేస్తుంది. "రేపు చింటూ స్కూల్‌లో పేరెంట్స్ మీటింగ్ ఉంది. ఈసారి మేనేజ్‌మెంట్ కచ్చితంగా తల్లిదండ్రుల్లో ఎవరో ఒకరు రావాలని చెప్పింది. నువ్వు తప్పకుండా రావాలి" అని కోరుతుంది. అయితే ఈ మాటలు విన్న రోహిణి తీవ్ర అసహనం వ్యక్తం చేస్తుంది. "ప్రస్తుతం నా పరిస్థితి నీకు తెలుసు. అక్కడికి వస్తే బాలు, మా మామయ్యకు కనిపించే ప్రమాదం ఉంది. ఎందుకు నన్ను ఇబ్బంది పెడుతున్నావు?" అని అంటుంది. కానీ సుగుణమ్మ మాత్రం చింటూ గురించి ఆలోచించాలని, అతని భవిష్యత్తు కోసం తల్లిగా బాధ్యత తీసుకోవాలని నచ్చజెప్పే ప్రయత్నం చేస్తుంది.

అయినా రోహిణి కోపం తగ్గదు. "అవసరమైతే చింటూ వాళ్ల అమ్మ చనిపోయిందని చెప్పేయ్" అంటూ ఆవేశంలో నోరు జారుతుంది. ఆ మాటలు విన్న సుగుణమ్మ ఒక్కసారిగా షాక్‌కు గురై, "ఏం మాట్లాడుతున్నావు? ఇంకోసారి అలాంటి మాటలు మాట్లాడకు. చింటూ మనసు ఎంతగా దెబ్బతింటుందో ఆలోచించు" అంటూ గట్టిగా హెచ్చరిస్తుంది. చివరికి రోహిణి, "సరే... ఎలాగోలా రావడానికి ప్రయత్నిస్తాను. ఇక నన్ను విసిగించకు" అని చెప్పి ఫోన్ పెట్టేస్తుంది. ఫోన్ పెట్టిన తర్వాత రోహిణి తీవ్ర ఆందోళనలో పడుతుంది. "ప్రతి విషయంలో బాలు, మీనా నన్ను వెంటాడుతూనే ఉన్నారు. ఇప్పుడు చింటూ స్కూల్‌కు వెళ్తే వాళ్ల కంటపడే ప్రమాదం ఉంది. అక్కడికి ఎలా వెళ్లాలి?" అంటూ మనసులోనే టెన్షన్ పడుతుంది.

ఇక మరోవైపు.. బాలు ఎంతో ఓపికగా మీనాకు డ్రైవింగ్ నేర్పిస్తుంటాడు. ప్రతిరోజూ ప్రాక్టీస్ చేయడంతో మీనా కూడా భయాన్ని పూర్తిగా పక్కనబెట్టి ధైర్యంగా కారు నడపడం ప్రారంభిస్తుంది. అదే సమయంలో అక్కడికి మీనా స్నేహితులు రావడంతో వారిని కూడా కారులో ఎక్కించుకుని డ్రైవ్ చేస్తుంది. మీనా డ్రైవింగ్ చూసి ఆమె ఫ్రెండ్స్ ఆశ్చర్యపోతూ.. "చాలా బాగా డ్రైవింగ్ చేస్తోంది. త్వరలోనే మరో కారు కొనివ్వండి. అప్పుడు మీనా కూడా డ్రైవింగ్ చేస్తూ, మీ డ్రైవింగ్ స్కూల్‌లో స్టూడెంట్స్‌కు ట్రైనింగ్ ఇస్తుంది" అంటూ బాలుతో సరదాగా మాట్లాడతారు. దానికి బాలు స్పందిస్తూ, "డ్రైవింగ్ మాత్రమే కాదు... మా మీనా దగ్గర పూలు అల్లడం కూడా నేర్చుకోవచ్చు" అంటూ చమత్కరిస్తాడు.

తర్వాత మీనా ఫ్రెండ్స్, "ఇంత బాగా డ్రైవింగ్ నేర్చుకుంది కాబట్టి మాకు పార్టీ ఇవ్వాలి" అని పట్టుబడతారు. వెంటనే బాలు, "నా దగ్గర డబ్బులు లేవు... కావాలంటే మీ ఫ్రెండ్‌ను అడగండి" అని అంటాడు. మీనా కూడా తన దగ్గర డబ్బులు లేవని చెప్పడంతో, "పర్లేదు... ఇప్పుడైతే మేమే ఖర్చు చేస్తాం. తర్వాత నువ్వు పార్టీ ఇవ్వాలి" అంటూ సరదాగా ఒప్పిస్తారు. దీంతో బాలు, "మీరు వెళ్లి టిఫిన్ చేయండి. నాకు చిన్న పని ఉంది" అంటూ వారిని సమీపంలోని హోటల్ వద్ద దింపేస్తాడు. మీనా తన స్నేహితులతో కలిసి హోటల్‌లోకి వెళ్లగా, బాలు కూరగాయలు కొనడానికి దగ్గర్లోని మార్కెట్‌కు వెళ్తాడు.

అయితే అక్కడే అప్పటికే ట్రాఫిక్ కానిస్టేబుల్ అరవింద్ కనిపిస్తాడు. కొద్దిరోజుల క్రితం తన వీడియో వైరల్ చేసి సస్పెన్షన్‌కు కారణమైన బాలు ఎదురుగా కనిపించడంతో అరవింద్‌లో కోపం ఉప్పొంగుతుంది. అయితే ఈసారి కూడా బాలు సైలెంట్‌గా వెళ్లకుండా, "తెలివైన వాళ్లు చేసిన తప్పులను మర్చిపోరు... వాటి నుంచి పాఠాలు నేర్చుకుంటారు" అంటూ ఇన్‌డైరెక్ట్‌గా అరవింద్‌ను రెచ్చగొట్టేలా వ్యాఖ్యలు చేస్తాడు. బాలు మాటలు విన్న అరవింద్ ఒక్కసారిగా ఆగ్రహంతో ఊగిపోతాడు. వెంటనే బాలు దగ్గరకు వెళ్లి అతని షర్ట్ కాలర్ పట్టుకుని, "ఏరా... చాలా ఎక్కువ చేస్తున్నావ్. కావాలనే నన్ను రెచ్చగొడుతున్నావు కదా. నీ అంతు చూస్తా" అంటూ గట్టిగా వార్నింగ్ ఇస్తాడు.

దానికి ఏమాత్రం భయపడని బాలు కూడా ధైర్యంగా సమాధానం ఇస్తాడు. "నువ్వు పోలీస్ యూనిఫాం వేసుకుని ఉన్నావు కాబట్టే గౌరవిస్తున్నాను. ఇప్పుడు నువ్వు సాధారణ పౌరుడివి. అనవసరంగా గొడవ చేయకు. నేను ఎవరినీ ఉద్దేశించి మాట్లాడలేదు. ముందు నా కాలర్ వదిలేయ్" అని హెచ్చరిస్తాడు. అయినా అరవింద్ వెనక్కి తగ్గకుండా, "వదలకపోతే ఏం చేస్తావ్?" అంటాడు. వెంటనే బాలు అతడిని బలంగా నెట్టేస్తాడు. బ్యాలెన్స్ కోల్పోయిన అరవింద్ కిందపడబోతుండగా, అతడిని పట్టుకునేందుకు బాలు ప్రయత్నిస్తాడు. అయితే ఆ ప్రయత్నంలో అరవింద్ షర్ట్ ఒక్కసారిగా చిరిగిపోతుంది.

షర్ట్ చిరిగిపోవడంతో అందరి ముందు అవమానంగా ఫీలైన అరవింద్ మరింత కోపంతో రగిలిపోతాడు. బాలు మాత్రం, "నేను కావాలని చేయలేదు. నువ్వు కిందపడకుండా పట్టుకోవడానికి ప్రయత్నించాను. అలా షర్ట్ చిరిగిపోయింది" అంటూ వివరణ ఇచ్చినా, అరవింద్ ఏమాత్రం వినిపించుకోడు. ఈ అవమానాన్ని పట్టుకోలేని అరవింద్, "ఇప్పటికే నా సస్పెన్షన్‌కు కారణమయ్యావు. ఇప్పుడు అందరి ముందు మరోసారి నన్ను అవమానించావు. ఇక నిన్ను ఎక్కడ కనిపించినా వదలను. ఎలాగైనా నా ప్రతీకారం తీర్చుకుంటాను" అంటూ మనసులోనే శపథం చేస్తాడు. దీంతో బాలు-అరవింద్ మధ్య శత్రుత్వం మరింత పెరిగింది.

మరోవైపు.. ఇంట్లో మీనా ఎంతో ప్రేమగా స్పెషల్‌గా గారెలు, చికెన్ కూర తయారు చేస్తుంది. వంటల నుంచి వస్తున్న ఘుమఘుమల వాసనకు బాలు నోరూరిపోతుంది. వెంటనే తండ్రి సత్యంతో కలిసి టేబుల్ దగ్గర కూర్చొని ఆవురావురుమంటూ తినడం మొదలుపెడతాడు. అదే సమయంలో అక్కడికి వచ్చిన ప్రభావతి మాత్రం, "నేను డైట్‌లో ఉన్నాను. ఇలాంటి ఆయిల్ ఫుడ్స్ చేసి నా డైట్ చెడగొట్టకండి. మూడు నెలల్లో స్లిమ్ అయి చూపించాలి" అంటూ సీరియస్‌గా చెబుతుంది. అయితే ఆమె మాటలు విన్న సత్యం నవ్వుకుంటూ, "పెళ్లైనప్పటి నుంచి నువ్వు బరువు పెరగడమే చూశాను కానీ, తగ్గడం మాత్రం ఎప్పుడూ చూడలేదు. నువ్వు డైట్ చేసి సన్నబడతానంటే నాకు అసలు నమ్మకం రావడం లేదు" అంటూ సరదాగా సెటైర్ వేస్తాడు.

దానికి ప్రభావతి, "ఈసారి మాత్రం సీరియస్‌గా డైట్ ఫాలో అవుతాను. ఇకపై నాన్‌వెజ్, ఆయిల్ ఫుడ్స్ జోలికి కూడా వెళ్లను" అంటూ గట్టిగా ప్రకటిస్తుంది. ఇంతలో ప్రభావతి తన కోసం ప్రత్యేకంగా డైట్ డ్రింక్ తయారు చేయాలని మీనాను కోరుతుంది. కానీ మీనా, "అది ఎలా చేయాలో నాకు తెలియదు అత్తయ్య... మీరే చేసుకోవాలి" అని చెప్పేస్తుంది. దీంతో ప్రభావతి బయటకు మాత్రం డైట్ అంటూ బిల్డప్ ఇస్తూ కూర్చుంటుంది. కానీ ఇంట్లో అందరూ గారెలు, చికెన్‌ను ఎంజాయ్ చేస్తూ తింటుండటం చూసి ఆమె మనసు అదుపులో ఉండదు.

అందరూ తమ తమ పనుల్లో బిజీగా ఉన్నారని చూసి ప్రభావతి నెమ్మదిగా వంటగదిలోకి వెళ్లి, ఎవరూ చూడకుండా గారెలు, చికెన్‌ను రుచిగా తింటూ కనిపిస్తుంది. అదే సమయంలో మనోజ్ అక్కడికి వచ్చి, "అమ్మా... ఏం చేస్తున్నావ్? నేను అంతా చూశాను" అంటూ పట్టేస్తాడు. ఒక్కసారిగా షాక్ అయిన ప్రభావతి, "అరే... నువ్వు ఎన్నిసార్లు తప్పులు చేసినా నేను కాపాడాను. ఇప్పుడు నా పరువు ఎందుకు తీస్తున్నావ్?" అంటూ కొడుకును బుజ్జగించే ప్రయత్నం చేస్తుంది. దానికి మనోజ్, "ఇదంతా ఎందుకమ్మా? అందరితో కలిసి తినేస్తే అయిపోతుంది కదా" అని చెప్పగా, ప్రభావతి మాత్రం తనకంటూ కొత్త లాజిక్ చెబుతుంది. "నేను నిజంగానే డైట్ ఫాలో అవుతున్నాను. కానీ మీనా కావాలనే ఇలాంటి వంటలు చేసి నా డైట్ చెడగొట్టాలని చూస్తోంది. ఆ వాసనను తట్టుకోలేక ఇలా దొంగచాటుగా తినాల్సి వచ్చింది" అంటూ బాధపడుతుంది. అయినా మూడు నెలల్లో ఎలాగైనా బరువు తగ్గి చూపిస్తానని మరోసారి పట్టుదలగా చెబుతుంది.

ఈ వ్యవహారాన్ని గమనించిన బాలు వెంటనే, "తల్లీకొడుకులు ఇద్దరూ వంటగదిలో ఏదో మింగినట్టున్నారు" అంటూ కామెంట్ చేస్తాడు. దాంతో ప్రభావతి వెంటనే తేరుకుని, "నేను డైట్‌లో ఉన్నాను. నాన్‌వెజ్ అసలు ముట్టుకోను. ఆయిల్ ఫుడ్స్ కూడా తినను" అంటూ మళ్లీ అమాయకంగా నటిస్తుంది. మనోజ్ కూడా తల్లికి మద్దతుగా, "నేను కూడా ఇకపై అమ్మతో పాటు డైట్ ఫాలో అవుతాను" అని చెబుతాడు. అయితే బాలు మాత్రం, "అది మీ వల్ల అయ్యే పని కాదు" అంటాడు. ఇదే సమయంలో సత్యం, "ఇవి తర్వాత చూసుకుందాం. నాకు స్కూల్‌కు వెళ్లాలి. ఈరోజు స్కూల్‌లో పేరెంట్స్ మీటింగ్ ఉంది" అని చెబుతాడు.

వెంటనే బాలు, "నేను కూడా వస్తాను నాన్న. మీనా కూడా చింటూని చూడాలని అంటోంది. మేమిద్దరం డ్రాప్ చేస్తాం" అని చెప్పేస్తాడు. ఈ మాటలు విన్న రోహిణి ఒక్కసారిగా టెన్షన్‌కు గురవుతుంది. "వీళ్లంతా స్కూల్‌కు వస్తే... నేను అక్కడికి ఎలా వెళ్లాలి? నిజం బయటపడితే ఏం చేయాలి?" అంటూ మనసులోనే భయపడుతుంది.

మరోవైపు సుగుణమ్మ చింటూని తీసుకుని స్కూల్‌కు బయలుదేరుతుంది. అయితే ప్రతిరోజూ వచ్చే ఆటో ఆ రోజు రాకపోవడంతో ఇద్దరూ నడుచుకుంటూ వెళ్లాల్సి వస్తుంది. దారిలో ఎంత ప్రయత్నించినా ఆటో దొరకదు. ఇంతలో ఓ ఆటో కనిపించడంతో దాన్ని ఆపేందుకు చింటూ ఒక్కసారిగా రోడ్డుమీదకు పరిగెడతాడు. అదే సమయంలో మనోజ్ కారులో అటువైపు వస్తుంటాడు. చింటూ హఠాత్తుగా కారు ముందుకు రావడంతో అప్రమత్తమైన మనోజ్ వెంటనే బ్రేక్ వేయడంతో పెద్ద ప్రమాదం తృటిలో తప్పుతుంది. భయంతో వెంటనే కారు దిగిన మనోజ్, "చింటూ... ఇలా రోడ్డు మీదకు ఒక్కసారిగా పరిగెత్తొచ్చా? ఇంకొంచెం ఆలస్యమైతే ఎంత పెద్ద ప్రమాదం జరిగేదో తెలుసా?" అంటూ ప్రేమగా మందలిస్తాడు.

అప్పుడు చింటూ అమాయకంగా, "ఈరోజు మా స్కూల్‌లో పేరెంట్స్ మీటింగ్ ఉంది. మా ఆటో రాలేదు. అందుకే ఆటో ఆపాలని రోడ్డుమీదకు వచ్చాను. మీరు వీలైతే మా స్కూల్ దగ్గర దింపుతారా?" అని అడుగుతాడు. చింటూ అమాయకత్వానికి మనోజ్ కరిగిపోతాడు. "తప్పకుండా దింపుతాను. ఎక్కడ ఉందో చెప్పు" అంటూ వారిద్దరినీ కారులో ఎక్కించుకుంటాడు. అయితే సుగుణమ్మ మాత్రం లోలోపల భయపడుతుంది. చింటూ చదివే స్కూల్‌కే మనోజ్ వెళ్తుండటం, అక్కడ పేరెంట్స్ మీటింగ్‌లో రోహిణి కూడా రావాల్సిన పరిస్థితి ఉండటంతో నిజం బయటపడుతుందేమోనని ఆందోళన చెందుతుంది. చింటూ పేరెంట్స్ మీటింగ్‌లో ఎలాంటి ట్విస్ట్ చోటుచేసుకుంటుందో చూడాలి.