Gundeninda Gudigantalu July 24th Episode: కత్తి పట్టిన బాలు.. కాలర్ పట్టిన సత్యం.. మనోజ్‌కు షాకింగ్ కౌంటర్!

Gundeninda Gudigantalu:'గుండె నిండా గుడి గంటలు' గురువారం ఎపిసోడ్‌లో చింతామణి మోసం బయటపడిన తర్వాత మీనా ఫైనాన్సర్ సింగరాజుకు డబ్బు తిరిగి చెల్లిస్తుంది. మీనా నిజాయితీని మెచ్చుకున్న సింగరాజు.. ఇకపై పెద్ద ఆర్డర్లు తీసుకోవాలని, అవసరమైనప్పుడు ఆర్థికంగా అండగా ఉంటానని భరోసా ఇస్తాడు. దీంతో మీనాలో కొత్త ఆత్మవిశ్వాసం కనిపిస్తుంది. ఇంటికి వచ్చిన తర్వాత బాలు.. మీనాకు ధైర్యం చెబుతాడు. ఇద్దరి మధ్య మల్లెపూలతో అందమైన రొమాంటిక్ సీన్ ఆకట్టుకుంటుంది. మరుసటి రోజు మనోజ్ పుట్టినరోజు సందర్భంగా ఇంట్లో వేడుకలు జరుగుతాయి. అయితే మీనా విషెస్ చెప్పకపోవడంతో మనోజ్ ఆమెపై విమర్శలు చేస్తాడు. నిజం తెలిసినా తన తప్పును ఒప్పుకోడు. రవి, శృతి, బాలు అతని ప్రవర్తనపై మండిపడతారు.

రవి తీసుకొచ్చిన బర్త్‌డే కేక్‌ను కూడా మనోజ్ అవమానించడంతో బాలు తీవ్ర ఆగ్రహం వ్యక్తం చేస్తాడు. మరోవైపు బాలు స్నేహితుడు రాజేష్ దంపతులు ఇంటికి రావడంతో మీనా ప్రేమగా టిఫిన్ పెడుతుంది. అదే విషయాన్ని రోహిణి మనోజ్‌కు చెప్పి గొడవకు కారణమవుతుంది. ఇంటికి వచ్చిన అతిథులను అవమానిస్తూ మనోజ్ మాట్లాడటంతో రాజేష్ దంపతులు బాధతో వెళ్లిపోతారు. దీంతో బాలు, శృతి, మీనా మనోజ్‌పై తీవ్రంగా విరుచుకుపడతారు. కోపంతో బాలు మనోజ్‌కు బలవంతంగా టిఫిన్ తినిపించేందుకు ప్రయత్నించడంతో ఇంట్లో ఉద్రిక్త పరిస్థితి ఏర్పడుతుంది. ఈ గొడవ తర్వాత ప్రభావతి ఎవరికి మద్దతు ఇస్తుంది? రోహిణి మరో కుట్ర పన్నుతుందా? అన్న ఆసక్తితో ఎపిసోడ్ ముగిసింది.

Photo courtesy: Jio hotstar

గుండె నిండా గుడిగంటలు' శుక్రవారం ఎపిసోడ్ ఉత్కంఠగా సాగింది. మనోజ్ పుట్టినరోజు వేడుకలు ఆనందంగా జరగాల్సిన సమయంలో ఇంట్లో భారీ గొడవ చెలరేగింది. మనోజ్ అహంకారపు ప్రవర్తనతో మొదలైన వాగ్వాదం చివరకు బాలు కత్తి పట్టుకుని అతనిపై దాడి చేయడానికి వెళ్లే స్థాయికి చేరుకుంది. మనోజ్ ఇంటికి వచ్చిన బాలు స్నేహితుడు రాజేష్ దంపతులను అవమానించి, టిఫిన్ కూడా తినకుండా వెళ్లిపోయేలా చేస్తాడు. ప్రేమతో ఇంటికి వచ్చిన అతిథులను అలా అవమానించడం బాలుకు తీవ్ర ఆగ్రహాన్ని తెప్పిస్తుంది. కోపాన్ని అదుపులో పెట్టుకోలేకపోయిన బాలు, మనోజ్‌కు బలవంతంగా టిఫిన్ తినిపించేందుకు ప్రయత్నిస్తాడు. దీంతో ఇంట్లో మరోసారి ఉద్రిక్త పరిస్థితులు నెలకొంటాయి.

ఈ సమయంలో రోహిణి పరిస్థితిని మరింత రెచ్చగొట్టే ప్రయత్నం చేస్తుంది. "ఏంటి... నా భర్తను చంపేస్తారా?" అంటూ పెద్దగా అరుస్తూ గొడవను పెంచుతుంది. అదే సమయంలో మనోజ్ కూడా తగ్గకుండా.. "చంపుతావా... చంపు. జైలుకు వెళ్లడం నీకు కొత్తేమీ కాదు కదా" అంటూ బాలును రెచ్చగొట్టేలా మాట్లాడతాడు. మనోజ్ నోటి నుంచి ఆ మాట రావడంతో బాలు ఒక్కసారిగా భావోద్వేగానికి గురవుతాడు. చిన్నతనంలో తాను చేయని తప్పుకు జైలు శిక్ష అనుభవించిన బాధ, ఆ ఘటనకు కారణమైన మనోజ్ గుర్తుకు రావడంతో ఆవేదన చెందుతాడు. అప్పటివరకు తనను తాను అదుపులో పెట్టుకున్న బాలు.. మనోజ్ మళ్లీ అదే విషయాన్ని ఎత్తిచూపడంతో సహనం కోల్పోతాడు.

"నిజంగానే నిన్ను చంపేసి మళ్లీ జైలుకు వెళ్లడానికి కూడా నేను సిద్ధమే" అంటూ బాలు వంటగదిలో నుంచి కత్తి తీసుకుని మనోజ్ వైపు దూసుకెళ్తాడు. దీంతో ఇంట్లో ఒక్కసారిగా కలకలం రేగుతుంది. మీనా, రవి, శృతి సహా కుటుంబ సభ్యులంతా బాలును అడ్డుకునేందుకు ప్రయత్నిస్తారు. ప్రాణభయంతో మనోజ్ తన తల్లిదండ్రులను పిలుస్తూ కాపాడమని అరుస్తాడు. సరిగ్గా ఆ సమయంలో సత్యం అక్కడికి చేరుకుని బాలును అడ్డుకుంటాడు. "ఏమైంది? ఎందుకింత కోపం?" అని ప్రశ్నించగా.. రవి జరిగిన విషయాన్ని వివరంగా చెబుతాడు. "అన్నయ్యే కావాలనే బాలును రెచ్చగొట్టాడు. జైలుకు వెళ్లడం నీకు కొత్త కాదు కదా అని అవమానించాడు" అని చెప్పడంతో సత్యం అసలు విషయం అర్థం చేసుకుంటాడు.

అదే సమయంలో రోహిణి మరోసారి సీన్ క్రియేట్ చేయాలని ప్రయత్నిస్తుంది. అయితే శృతి వెంటనే స్పందిస్తూ.. "అనవసరంగా నువ్వు డ్రామా చేయొద్దు. జరిగినది అందరం చూశాం" అంటూ రోహిణికి గట్టి వార్నింగ్ ఇస్తుంది. దీంతో రోహిణి కొంతసేపు మౌనంగా ఉండిపోతుంది. సత్యం బాలును శాంతింపజేస్తాడు. మనోజ్ దగ్గరకు వెళ్లి అతని కాలర్ పట్టుకుంటాడు. "బాలు కళ్లల్లోకి చూసి అదే మాట మరోసారి చెప్పు" అంటూ గట్టిగా ప్రశ్నిస్తాడు. సత్యం ప్రశ్నకు మనోజ్ సమాధానం చెప్పలేక తలదించుకుంటాడు. చిన్నప్పుడు తాను చేసిన తప్పు, బాలు అన్యాయంగా శిక్ష అనుభవించడం గుర్తుకు చేసుకుని ఒక్క మాట కూడా మాట్లాడలేకపోతాడు.

ఈ సమయంలో ప్రభావతి కూడా స్పందిస్తుంది. "వాడు చిన్నప్పుడు చేసిన తప్పును నేను ఇప్పటికీ క్షమించలేదు. ఆ సంఘటన నా మనసులో ఇప్పటికీ ఉంది" అంటూ తన బాధను బయటపెడుతుంది. అయితే గొడవ మరింత పెరగకుండా ఉండాలని భావించిన ప్రభావతి.. మనోజ్‌ను పై అంతస్తుకు తీసుకెళ్లిపోతుంది. ఇక సత్యం బాలుకు ధైర్యం చెబుతూ.. "నీ మంచితనం నాకు తెలుసు. కోపంతో తీసుకునే నిర్ణయాలు జీవితాన్ని నాశనం చేస్తాయి. శాంతంగా ఉండు" అని సూచిస్తాడు. అలాగే.. "నీ తల్లికి కూడా నీ మనసు పూర్తిగా తెలియదు. అందుకే అలా మాట్లాడింది" అంటూ బాలును ఓదార్చే ప్రయత్నం చేస్తాడు.

జరిగిన ఘటనతో మనస్తాపానికి గురైన బాలు భోజనం చేయకుండా వెళ్లిపోవాలని నిర్ణయించుకుంటాడు. కానీ సత్యం అతడిని ఆపి డైనింగ్ టేబుల్ వద్దకు తీసుకొస్తాడు. అదే సమయంలో మనోజ్ కూడా భోజనానికి వస్తాడు. మనోజ్‌ను చూసిన వెంటనే బాలు అక్కడి నుంచి లేచి వెళ్లబోతాడు. అయితే సత్యం అందరినీ ఆపి.. "ఈ ఇంట్లో అందరూ కలిసి భోజనం చేయాలి. త్వరలో సుందరి పెళ్లి పనులు ఉన్నాయి. ఇప్పుడు ఎవరూ గొడవపడకూడదు" అంటూ గట్టిగా ఆదేశిస్తాడు.

ఈ ఘటన తర్వాత శృతి ఆలోచనలో పడుతుంది. "మనోజ్ చెప్పిన ఒక్క మాటకు బాలు ఇంతగా స్పందించాడంటే.. వీళ్ల మధ్య ఇంకా బయటకు రాని పెద్ద రహస్యం ఏదో ఉంది" అని మీనాతో చెబుతుంది. దానికి మీనా కూడా ఆలోచనలో పడుతుంది. వెంటనే శృతి సోషల్ మీడియాలో చూసిన ఓ ఫ్యామిలీ గేమ్ వీడియోను మీనాకు చూపిస్తుంది. "మన ఇంట్లో కూడా ఇలాంటి గేమ్ ఆడితే అందరూ మళ్లీ కలిసిపోతారు. ఒకరిపై ఒకరికి ఉన్న కోపాలు తగ్గుతాయి" అంటూ కొత్త ప్లాన్ చెబుతుంది. మీనా కూడా ఆ ఆలోచనకు అంగీకరిస్తుంది. ఈ విషయాన్ని రోహిణికి కూడా చెబుతారు. ఆశ్చర్యకరంగా రోహిణి కూడా ఆ గేమ్‌కు ఒప్పుకుంటుంది. అయితే మనోజ్‌ను కూడా అందులో భాగం చేయాలని చెబుతుంది. చివరగా మీనాను బాలుతో కలిసి డాబాపైకి రావాలని శృతి చెబుతుంది.

ఒకవైపు రోహిణి మనోజ్‌కు గట్టి క్లాస్ తీసుకోగా, మరోవైపు శృతి ప్లాన్ చేసిన సరదా గేమ్ ఇంట్లో నవ్వులు పూయించింది. ఎపిసోడ్ చివర్లో మాత్రం రోహిణి ఇచ్చిన తాయత్తు, మనోజ్ చెప్పిన పిల్లల కోరిక కథను కొత్త మలుపు తిప్పింది. శృతి చెప్పినట్లుగానే రోహిణి.. మనోజ్‌ను డాబాపై జరుగుతున్న గేమ్‌కు తీసుకురావడానికి వెళ్తుంది. అయితే మనోజ్ మాత్రం ఇంకా కోపంతోనే ఉంటూ.. "బాలుని చూడాలంటేనే అసహ్యంగా ఉంది" అని అంటాడు. వెంటనే రోహిణి అతడికి ఊహించని విధంగా క్లాస్ తీసుకుంటుంది. "నీ కళ్ల ఆపరేషన్ కోసం బాలు, మీనా ఎంత కష్టపడ్డారో నాకు తెలుసు. నువ్వే వాళ్లపై రూ.30 వేల గురించి తప్పుడు ఆరోపణలు చేశావు. అయినా వాళ్లు ఒక్క మాట కూడా అనలేదు. చదువుకున్నవాడివి కదా.. కనీసం ఇంటికి వచ్చిన అతిథులను గౌరవించడం కూడా తెలియదా? సంస్కారం ఉండాలి" అంటూ గట్టిగా నిలదీస్తుంది.

రోహిణి మాటలు విన్న మనోజ్ కాస్త శాంతిస్తాడు. "సరే... రిలాక్స్ అవుతా. వస్తాను" అని గేమ్‌లో పాల్గొనడానికి ఒప్పుకుంటాడు. మరోవైపు బాలు కూడా మొదట రావడానికి ఇష్టపడడు. కానీ మీనా ఎంతో ప్రేమగా రిక్వెస్ట్ చేయడంతో చివరకు అంగీకరిస్తాడు. కొద్దిసేపటికే కుటుంబ సభ్యులంతా డాబాపై చేరుకుంటారు. వాతావరణాన్ని ఆహ్లాదకరంగా మార్చేందుకు శృతి, రవి కలిసి ఒక సరదా గేమ్‌ను ప్రారంభిస్తారు. మొదట శృతి ఒక డ్యాన్స్ స్టెప్‌ను మీనాకు చూపిస్తుంది. అదే స్టెప్‌ను మీనా బాలుకు, బాలు రవికి, రవి రోహిణికి, చివరగా రోహిణి మనోజ్‌కు చూపించాలి. చివరకు మనోజ్ వేసే స్టెప్ మొదట శృతి చూపించిన స్టెప్‌తో పోలిస్తే పూర్తిగా మారిపోతుంది.

అది చూసిన ఇంట్లో వాళ్లంతా పెద్దగా నవ్వేస్తారు. వెంటనే రవి ఆ గేమ్ వెనుక ఉన్న అసలు ఉద్దేశాన్ని వివరిస్తాడు. "సమాజంలో కూడా ఇలాగే పుకార్లు పుడతాయి. ఒకరు చెప్పిన విషయం మరొకరి దగ్గరకు వెళ్లేలోపు పూర్తిగా మారిపోతుంది. చివరకు అసలు విషయానికే సంబంధం లేకుండా ప్రచారం జరుగుతుంది" అని చెబుతాడు. ఈ మాటలు అందరినీ ఆలోచింపజేస్తాయి. అదే సమయంలో మనోజ్ వేసిన స్టెప్పులు చూసి బాలు నవ్వు ఆపుకోలేకపోతాడు. చాలా రోజుల తర్వాత బాలు, మనోజ్ ఒకే చోట నవ్వుకుంటూ కనిపించడం ఇంట్లో అందరికీ ఆనందాన్ని కలిగిస్తుంది.

ఇంతకాలం కుటుంబంలో నెలకొన్న ఉద్రిక్తత కొద్దిసేపైనా తగ్గిపోవడంతో ప్రభావతి ఊపిరి పీల్చుకుంటుంది. మొదట అందరూ కలిసి ఉండటం చూసి ఆశ్చర్యపోయినా.. చివరకు తన పిల్లలు నవ్వుతూ కనిపించడంతో ఎంతో సంతోషిస్తుంది. సత్యం కూడా తన కుమారులు మళ్లీ కలిసిపోతున్నారనే ఆశతో చిరునవ్వు చిందిస్తాడు. గేమ్ ముగిసిన తర్వాత మీనా.. "వంటగదిలో పని ఉంది" అంటూ కిందికి వెళ్లబోతుంది. వెంటనే బాలు సరదాగా.. "నువ్వు నా పక్కన లేకపోతే నాకు నిద్ర పట్టదు" అంటూ అందరి ముందే మీనాను అమాంతం ఎత్తుకుని తీసుకెళ్తాడు. ఆ సన్నివేశం కుటుంబ సభ్యుల ముఖాల్లో చిరునవ్వులు పూయిస్తుంది.

ఇక మరోవైపు తన పుట్టినరోజు సందర్భంగా రోహిణిని మనోజ్.. "నాకు గిఫ్ట్ ఏదైనా ఉందా?" అని అడుగుతాడు. వెంటనే రోహిణి ఒక తాయత్తును తీసి అతని చేతికి కడుతుంది. "ఇది సాధారణ తాయత్తు కాదు. 108 దేవాలయాల్లో ప్రత్యేక పూజలు చేయించి నీ కోసం తీసుకొచ్చాను" అంటూ పెద్ద బిల్డప్ ఇస్తుంది. అయితే ప్రేక్షకులకు మాత్రం అది రోడ్డుపక్కన ఉన్న చిన్న దుకాణంలో కేవలం రూ.20కు కొనుగోలు చేసిన తాయత్తు అని చూపిస్తారు. కానీ ఆ నిజం తెలియని మనోజ్ మాత్రం తనపై భార్యకు ఎంత ప్రేమ ఉందో అంటూ భావోద్వేగానికి గురవుతాడు.

అదే సమయంలో మనోజ్ తన మనసులోని కోరికను కూడా బయటపెడతాడు. "మన జీవితంలో ఒక బిడ్డ ఉంటే ఇంకా అందంగా ఉంటుంది. నాకు పిల్లలు కావాలి" అంటూ తన ఆశను వ్యక్తం చేస్తాడు. రోహిణి కూడా బయటకు మాత్రం అతడి మాటలకు అంగీకరిస్తూ నటిస్తుంది. ఎపిసోడ్ చివర్లో సుందరి పెళ్లి ఏర్పాట్ల ప్రస్తావన రావడంతో కథ మరింత ఆసక్తికరంగా మారింది. సుందరి పెళ్లిలో రోహిణి దాచిపెట్టిన నిజాలు బయటపడతాయా? మనోజ్ కూడా నిజాలను తెలుసుకుంటాడా? రోహిణి మరోసారి తన తెలివితో తప్పించుకుంటుందా? అనే ఉత్కంఠతో నేటి ఎపిసోడ్ ముగిసింది.