తొలిసారి బుల్లితెరపై వరుణ్ తేజ్, లావణ్య రొమాంటిక్ మోడ్​.. ఫస్ట్ డేటింగ్ ట్రిప్ సీక్రెట్ రివీల్!

మెగా ప్రిన్స్ వరుణ్ తేజ్, అందాల రాక్షసి బ్యూటీ లావణ్య త్రిపాఠి.. ప్రేమించి పెళ్లి చేసుకున్న సంగతి తెలిసిందే. దాదాపు ఆరేళ్ల పాత్ర సీక్రెట్​గా రిలేషన్​షిప్​ మెయిన్​టెయిన్ చేసిన ఈ జంట గతేడాది మెగా ఫ్యామిలీ సమక్షంలో ఏడడుగులు నడిచి ఒక్కటయ్యారు. అప్పటి నుండి ఈ జంటకు సంబంధించిన ప్రతి చిన్న విషయం వైరల్ అవుతూనే ఉంది.

అసలు ఈ జంట ఎప్పుడు తొలిసారి మీట్ అయ్యారు? ఎవరు ఫస్ట్ ప్రపోజ్ చేశారు? ఇలా పలు విషయాలను ఒక్కోక్కటిగా బయటకొస్తున్నాయి. అయితే తాజాగా ఈ జంట తొలిసారి కలిసి బుల్లితెరపై సందడి చేశారు. ఇందులో భాగంగానే తమ లవ్ స్టోరీ గురించి కొన్ని ఇంట్రెస్టింగ్ విషయాలను పంచుకున్నారీ జంట. తమ ఫస్ట్ డేటింగ్ ట్రిప్​ ఎక్కడికి వెళ్లారో చెప్పారు. దాని గురించే ఈ కథనం..

వరుణ్ తేజ్​ - లావణ్య త్రిపాఠి ఇప్పుడీ జంటకు ఇండస్ట్రీలో పుల్ క్రేజ్ ఏర్పడింది. పెళ్లి తర్వాత వీరు చేసే ఏ పనైనా ఇట్టే సోషల్​ మీడియాలో ట్రెండ్ అవుతోంది. మిస్టర్ సినిమా షూటింగ్ సమయంలో ఏర్పడిన పరిచయం.. ఆ సినిమా ముగిసే సమయానికి ప్రేమగా మారింది. తొలిప్రేమ సినిమా స్టైల్​లో లావణ్యకు పువ్వుతో ప్రపోజ్ చేసి బుట్టలో పడేశారు వరుణ్. ఆ తర్వాత అంతరిక్షం సినిమా కలిసి నటించారు ఈ జంట. ఎంతో సైలెంట్​గా రిలేషన్​షిప్​ను మెయిన్​టెయిన్ చేశారు​. అయితే ఆ తర్వాత ఎట్టకేలకు మీడియాకు లీక్ అవ్వడంతో అందరికీ తెలిసింది. ఫైనల్​గా వీరిద్దరూ ఇటలీలో పెళ్లి బంధంతో ఒక్కటైపోయారు.

అయితే పెళ్లి తర్వాత వరుణ్ తేజ్​ తన సినిమా కోసం మీడియా ముందుకు వచ్చారు. కానీ లావణ్య కాస్త గ్యాప్ ఇచ్చి ఈ మధ్యే మిస్ పర్ఫెక్ట్ సిరీస్​ ప్రమోషన్​ కోసం ఇంటర్వ్యూలు ఇచ్చింది. ఈ సిరీస్​ మంచి హిట్​ కూడా అందుకుంది. ఇకపోతే ఇప్పటి వరకు సిల్వర్​ స్క్రీన్​పై కలిసి సందడి చేసిన ఈ జంట తొలిసారి బుల్లితెరపై సందడి చేశారు. స్టార్​ మాలో ప్రసారం కానున్న సూపర్ సింగర్ బ్లాక్ బస్టర్ రౌండ్​కు గెస్ట్​లుగా హాజరై ఆడియెన్స్​ను అలరించారు. తాజాగా దీనికి సంబంధించిన ప్రోమో విడుదలై నవ్వులు పూయించడంతో పాటు ఆకట్టుకుంటోంది.

ఇందులో వరుణ్ - లావణ్య తమ రిలేషన్​షిప్​ గురించి కొన్ని ఇంట్రెస్టింగ్​ విషయాల గురించి బయటపెట్టారు. తామిద్దరు తొలిసారి కలిసినప్పుడు లావణ్య వేసుకున్న డ్రెస్ కలర్ బ్లూ అని చెప్పారు వరుణ్. తమ ఫస్ట్ హాలీడే ట్రిప్​లో​ థాయ్​లాండ్ వెళ్లినట్లు చెప్పుకొచ్చారు. ఇక వరుణ్​కు ఫేవరెట్ ఫుడ్ బిర్యానీ అంటే ఇష్టమని కూడా చెప్పింది లావణ్య. ఆద్యంతం నవ్వులుగా సాగిన ఈ ప్రోమో ప్రస్తుతం వైరల్​గా మారింది.

ఇక మరో ఇంటర్వ్యూలో లావణ్య మాట్లాడుతూ తన అత్త, వరుణ్ వాళ్ల అమ్మ తనను చాలా బాగా చూసుకుంటుందని, ప్రేమిస్తుందని చెప్పింది. వరుణ్ తాను వేరే కాపురం పెట్టారని వస్తున్న వార్తలను కొట్టిపారేసింది. తామంతా కలిసే ఉంటున్నట్లు క్లారిటీ ఇచ్చింది.