Accident రోడ్డు ప్రమాదానికి గురైన నటుడు రఘుబాబు కారు.. బీఆర్ఎస్ నేత మృతి

తెలుగు సినీ రంగంలో ప్రముఖ నటుడు రఘుబాబు ప్రయాణిస్తున్న కారు రోడ్డు ప్రమాదానికి గురైంది. ఈ ప్రమాదంలో భారత రాష్ట్ర సమితి (బీఆర్ఎస్) నాయకుడు మృతి చెందడం విషాదంగా మారింది. ఈ సంఘటన జరిగినప్పుడు నటుడు కారులోనే ఉండటంతో ఆ ప్రాంత గ్రామస్థులతో భారీ వాగ్వాదం జరిగింది. ప్రస్తుతం ప్రమాదానికి సంబంధించిన వీడియో, ఫోటోలు సోషల్ మీడియాలో ప్రచారం అవుతున్నాయి. ఆ సంఘటన వివరాల్లోకి వెళితే..

నటుడు గిరిబాబు కుమారుడు, పాపులర్ యాక్టర్ రఘుబాబు ప్రయాణిస్తున్న కారు నల్లగొండ బైపాస్ రోడ్డులో ద్విచక్ర వాహనాన్ని ఢీ కొట్టారు. ఆ ఘటనలో నల్లగొండ పట్టణ బీఆర్ఎస్ ప్రధాన కార్యదర్శి సందినేని జనార్ధన్ రావు అక్కడికక్కడే మృతి చెందారు. యాక్సిడెంట్ జరిగిన సమయంలో బైక్‌ను సుమారుగా 50 మీటర్ల దూరం లాక్కెల్లినట్టు తెలిసింది.

ఇక యాక్సిడెంట్ గురైన జనార్ధన్ రావుకు తీవ్ర గాయాలు కావడంతో ఆ క్షణంలో తుదిశ్వాస విడిచారు. అయితే కారును ఆపి కొన ఊపిరితో ఉన్న ఆయనను హాస్పిటల్‌కు తరలించే ప్రయత్నం చేశారు. కానీ ఆ ప్రయత్నాలు సఫలం కాలేదు. రోడ్డు ప్రమాదంలో బీఆర్ఎస్ నేత మరణించారనే విషయం తెలుసుకొన్న పార్టీ కార్యకర్తలు, గ్రామస్థులు అక్కడికి భారీగా చేరుకొన్నారు.

అయితే కారులో నటుడు రఘుబాబు ఉన్న విషయం తెలియడంతో ఈ సంఘటనకు మరింత అటెన్షన్ పెరిగింది. బాధితుడి కోసం ఆయన కుటుంబ సభ్యులు, బంధువులు, గ్రామస్థులు తీవ్రంగా వాగ్వాదానికి దిగారు. పరిస్థితి చేజారి పోతుండటంతో పోలీసులు రంగంలోకి దిగి.. ఆయనను స్టేషన్‌కు తరలించారు. రఘుబాబుపై కేసు నమోదు చేసి విచారణ చేపట్టారు. ఈ ఘటన స్థానికంగా తీవ్ర విషాదానికి గురిచేసింది.

ఇదిలా ఉండగా, రఘుబాబుపై కేసు నమోదు చేసి అతడిని అక్కడి నుంచి సురక్షితంగా పంపించినట్టు సమాచారం. అయితే ఇరు వర్గాల మధ్య రాజీ కుదిర్చే ప్రయత్నాలను నేతలు, సినీ వర్గాలు చేస్తున్నట్టు తెలిసింది.