Shekar సినిమాకు మరో సమస్య.. ద్వేషంతోనే అలా చేశారు అంటూ హీరో రాజశేఖర్ ఆవేదన!

మలయాళ సినిమాకు రీమేక్..

మంచి హీరోగా తనకంటూ ఒక ప్రత్యేకమైన గుర్తింపును అందుకున్న రాజశేఖర్ చాలా కాలం తర్వాత శేఖర్ అనే సినిమాతో ప్రేక్షకుల ముందుకు వచ్చారు ఈ సినిమా మలయాళంలో మంచి విజయాన్ని అందుకున్న జోసెఫ్ సినిమాకు రీమేక్ గా తెరకెక్కింది. జీవిత రాజశేఖర్ ఈ సినిమాను డైరెక్ట్ చేయడం విశేషం. ఎన్నో ఒడిదుడుకులను దాటుకుంటూ సినిమాను పూర్తి చేసినట్లుగా ఇటీవల రాజశేఖర్ తెలియజేశారు. తప్పకుండా సినిమా అన్ని వర్గాల వారికి నచ్చుతుందని కూడా ఆయన ధీమా వ్యక్తం చేశారు.

రాజశేఖర్ ఆందోళన?

అంతేకాకుండా శేఖర్ సినిమాను రాజశేఖర్సొంత బ్యానర్ లోనే నిర్మించినట్లుగా తెలియజేస్తూ కొన్ని ఆస్తులు కూడా దీనిపైన పెట్టుబడిగా పెట్టినట్లుగా వివరణ ఇచ్చారు. సినిమా ఏ మాత్రం తేడా వచ్చినా కూడా చాలా కష్టాలు ఎదుర్కోవలసి వస్తుందని కూడా ఆయన ఆందోళన వ్యక్తం చేయడం ఆశ్చర్యాన్ని కలిగించింది. తప్పకుండా ఈ సినిమా తమకు మంచి విజయాన్ని అందించాలని కూడా వాళ్లు కోరుకున్నారు.

రాజశేఖర్ ఆవేదన

అయితే శేఖర్ సినిమాను కొందరు కావాలని అడ్డుకుంటున్నారు అని రాజశేఖర్ ఆవేదన వ్యక్తం చేయడం సోషల్ మీడియాలో వైరల్ గా మారుతుంది. రీసెంట్ గా తన ట్విట్టర్ లో ఒక పోస్ట్ చేసిన రాజశేఖర్ సినిమా ఆడకుండా చేసేందుకు కొందరు కావాలని కుట్ర పూరితంగా ప్రయత్నాలు చేస్తున్నట్లుగా కూడా ఆయన ఇందులో వివరణ ఇవ్వడం హాట్ టాపిక్ గా మారింది.

కేవలం ద్వేషంతో..

శేఖర్ అనే సినిమా నా కుటుంబానికి సర్వస్వం, ఈ చిత్రాన్ని ప్రేక్షకుల ముందుకు తీసుకురావడానికి మేం చాలా కష్టపడ్డాం.. శేఖర్‌కి చాలా మంచి రెస్పాన్స్ వస్తోంది. కానీ ఈరోజు కేవలం ద్వేషంతో కొందరు కుట్ర చేసి మా సినిమా ప్రదర్శనను ఆపేశారు. సినిమా మా ప్రాణం, ఈ సినిమా ముఖ్యంగా మా ఆశ.. చెప్పాల్సినవి అయిపోయాయి. ఈ చిత్రానికి నిజంగా ప్రశంసలు చివరికి లభిస్తాయని నేను ఆశిస్తున్నాను.. అని రాజశేఖర్ వివరణ ఇచ్చారు.

ఎందుకంటే..?

అయితే శేఖర్ సినిమాను ఎందుకు ఆపేశారు అనే విషయంలో కూడా వివిధ రకాల కామెంట్స్ వెలువడుతున్నాయి. పలు ఆర్థిక సమస్యల కారణంగా శేఖర్ సినిమాను కొన్ని థియేటర్స్ లో నిలిపివేస్తున్నట్లు గా సోషల్ మీడియాలో కామెంట్స్ అయితే వస్తున్నాయి. అయితే ఈ విషయంపై ఇంకా పూర్తిస్థాయిలో రాజశేఖర్ ఎలాంటి క్లారిటీ ఇవ్వలేదు. మరి ఆయన ఏ విధంగా స్పందిస్తారో చూడాలి.