హోమ్

లేటేస్ట్ న్యూస్

క్రియేటివ్‌ కమర్షియల్స్‌ పతాకంపై భీమనేని శ్రీనివాసరావు దర్శకత్వంలో ప్రొడక్షన్‌ నెం.47గా క్రియేటివ్‌ ప్రొడ్యూసర్‌ కె.ఎ.వల్లభ నిర్మిస్తున్న విభిన్న కథా చిత్రం 'కౌసల్య కృష్ణమూర్తి ది క్రికెటర్‌'. కేఎస్ రామారావు సమర్పణలో తెరకెక్కిన చిత్రంలో ఐశ్వర్య రాజేష్ లీడ్ రోల్ పోషించగా.. రాజేంద్రప్రసాద్‌, వెన్నెల కిషోర్‌ ముఖ్యపాత్రలు పోషించారు. ఈ రోజే (ఆగస్టు 23) విడుదలైన ఈ సినిమా ప్రేక్షకుల నుంచి మిశ్రమ స్పందన తెచ్చుకుంటోంది.

కాగా ఈ చిత్ర ప్రమోషన్స్‌లో భాగంగా ఇటీవల ఓ ఇంటర్వ్యూలో పాల్గొన్న హీరోయిన్ ఐశ్వర్య రాజేష్ సినిమా విశేషాలతో పాటు పలు ఆసక్తికర విశేషాలు చెప్పుకొచ్చింది. ఒక మంచి సినిమా కోసం చాలా రోజుల నుండి వెయిట్‌ చేశానని, తమిళ్‌లో తాను చేసిన క్యారెక్టర్స్‌ అన్నీ పెర్‌ఫార్మెన్స్‌ ఓరియెంటెడ్‌గా ఉంటాయి కాబట్టి తెలుగులోనూ మంచి సినిమాతో ఇంట్రడ్యూస్‌ అవ్వాలని అనుకున్నానని చెప్పిన ఆమె 'కౌసల్య కృష్ణమూర్తి ది క్రికెటర్‌' సినిమా ద్వారా తెలుగు తెరపై అడుగుపెట్టడం సంతోషంగా ఉందని తెలిపింది.

క్రికెట్ నేపథ్యంలో తెరకెక్కిన సినిమా కావడంతో క్రికెట్ మెళకువలు నేర్చుకునేందుకు చాలా కష్టపడ్డానని పేర్కొంది ఐశ్వర్య. సినిమా సెట్స్ పై ఫస్ట్‌ షాట్‌ చేసేటపుడు మూడు కెమెరాలు, ఒక డ్రోన్‌ కెమెరాతో షూట్‌ చేయడం జరిగిందని, అలా తాను ఫస్ట్‌టైమ్‌ బౌలింగ్‌ చేయగానే వికెట్‌ పడటంతో అంతా ఆశ్చర్యపోయారని తెలిపింది ఐశ్వర్య. ఇది చూడగానే తనను ఒక ప్రొఫెషనల్‌ క్రికెటర్‌ అనుకున్నారని చెప్పిన ఆమె.. ఈ సినిమా షూటింగ్ లో భాగంగా బౌలింగ్‌, బ్యాటింగ్‌ రెండూ ఎంజాయ్‌ చేశానని పేర్కొంది.