ఎన్టీఆర్ సినిమాలో ‘మన్మథుడు’ హీరోయిన్: వాళ్ల తర్వాత ఈమెను తీసుకొస్తున్నాడు

'అరవింద సమేత.. వీరరాఘవ' వంటి సూపర్ డూపర్ హిట్ తర్వాత.. టాలీవుడ్ స్టార్ హీరో జూనియర్ ఎన్టీఆర్, మాటల మాంత్రికుడు త్రివిక్రమ్ శ్రీనివాస్ కాంబినేషన్‌లో ఓ సినిమా రాబోతున్న విషయం తెలిసిందే. దీన్ని ఎన్టీఆర్ ఆర్ట్స్, హారిక హాసినీ క్రియేషన్స్ బ్యానర్లపై నందమూరి కల్యాణ్ రామ్, రాధాకృష్ణ సంయుక్తంగా నిర్మిస్తున్నారు. ఇక, ఈ ప్రాజెక్టుకు సంబంధించిన ప్రకటన ఎప్పుడో వెలువడినప్పటికీ.. రెగ్యూలర్ షూటింగ్ మాత్రం ఇంకా ప్రారంభం కాలేదు. దీంతో దీనికి సంబంధించిన అప్‌డేట్స్ బయటకు రావడం లేదు. ఇలాంటి పరిస్థితుల్లో ఓ ఇంట్రెస్టింగ్ న్యూస్ లీకైంది.

ఎంతో ప్రతిష్టాత్మకంగా రూపొందనున్న ఈ సినిమాలో పూజా హెగ్డే హీరోయిన్‌గా చేస్తుందని ఇటీవల ఓ న్యూస్ బయటకు వచ్చిన విషయం తెలిసిందే. ఇక, ఇందులో ఓ కీలకమైన పాత్ర కోసం 'మన్మథుడు' హీరోయిన్ అన్షు అంబానీని తీసుకున్నారని తాజాగా ఓ వార్త ఫిలిం నగర్ ఏరియాలో చక్కర్లు కొడుతోంది. హీరోయిన్‌గా రెండు మూడు సినిమాల్లో మాత్రమే నటించిన ఆమె.. టాలీవుడ్‌కు దూరమై చాలా కాలమే అవుతోంది. ఈ నేపథ్యంలో ఈ అందాల భామను మరోసారి తెలుగు సినిమాల్లోకి తీసుకొచ్చేందుకు ఇప్పుడు త్రివిక్రమ్ ప్లాన్ చేశాడనే టాక్ వినిపిస్తోంది.

గతంలో తన సినిమా ద్వారా నదియా, కుష్బూ, స్నేహ వంటి సీనియర్ హీరోయిన్లతో రీఎంట్రీ ఇప్పించిన త్రివిక్రమ్.. ఇప్పుడు అన్షును తీసుకు రాబోతున్నాడని ప్రచారం జరుగుతోంది. ఇక, ఈ సినిమాకు 'అయిననూ పోయి రావలె హస్తినకు' అనే టైటిల్ ఎప్పటి నుంచో ప్రచారంలో ఉంది. ఇందులో ఎన్టీఆర్ యంగ్ ఎంటర్‌ప్రెన్యూర్‌గా నటిస్తున్నాడని.. దీనితో పాటు మరో వైవిధ్యమైన పాత్రనూ పొషిస్తున్నాడని కొద్ది రోజులుగా వార్తలు వస్తున్నాయి. ఇక, ఈ చిత్రానికి యంగ్ మ్యూజిక్ సెన్సేషన్ ఎస్ ఎస్ థమన్ సంగీతం సమకూర్చబోతున్నాడు.