‘టక్ జగదీష్’ మూవీ రిలీజ్‌పై క్లారిటీ: ఆ రెండు డేట్లలో ఒకటి ఖాయమట

నేచురల్ స్టార్ నాని వరుస సినిమాలతో దూసుకుపోతున్నాడు. ఇప్పటికే పలు విజయవంతమైన చిత్రాలను ప్రేక్షకులకు అందించిన అతడు.. ప్రస్తుతం 'నిన్ను కోరి' దర్శకుడు శివ నిర్వాణ దర్శకత్వంలో 'టక్ జగదీష్' అనే సినిమా చేశాడు. ఈ మూవీ షూటింగ్ చాలా రోజుల క్రితమే పూర్తి అయినప్పటికీ.. కోవిడ్ రెండో దశ కారణంగా విడుదల వాయిదా పడింది. దీంతో ఇది ఎప్పుడు విడుదలవుతుందా అని అంతా ఆసక్తిగా ఎదురు చూస్తున్నారు. ఇలాంటి పరిస్థితుల్లో ఈ సినిమా రిలీజ్‌పై తాజాగా ఓ ఆసక్తికరమైన వార్త ఫిలిం నగర్ ఏరియాలో విపరీతంగా వైరల్ అవుతోంది.

ఫ్యామిలీ ఎంటర్‌టైనర్‌గా రూపొందిన 'టక్ జగదీష్' సినిమాను ఏప్రిల్ 23న విడుదల చేయాలని చిత్ర యూనిట్ భావించింది. కానీ, ప్రస్తుత పరిస్థితుల దృష్ట్యా రిలీజ్‌ను వాయిదా వేశారు. దీంతో ఈ సినిమా ఓటీటీలో విడుదలవుతుందని ప్రచారం జరిగింది.

కానీ, ఆ తర్వాత ఆ వార్తలను చిత్ర యూనిట్ కొట్టేసింది. ఇక, తాజా సమాచారం ప్రకారం.. జూలై 1 నుంచి యాభై శాతం ఆక్యూపెన్సీతో థియేటర్లు రన్ అవనున్న నేపథ్యంలో ఈ మూవీని ఆగస్టు 13న కానీ, 27న కానీ విడుదల చేయాలని చిత్ర యూనిట్ భావిస్తున్నట్లు తెలిసింది. ఈ రెండింట్లో ఒక దానిని త్వరలోనే ప్రకటించే అవకాశాలు కనిపిస్తున్నాయి.

ఎంతో ప్రతిష్టాత్మకంగా తెరకెక్కిన 'టక్ జగదీష్' మూవీలో నేచురల్ స్టార్ నాని సరసన టాలెంటెడ్ హీరోయిన్లు ఐశ్వర్య రాజేష్, రీతూ వర్మ నటిస్తున్నారు. ఈ సినిమాను షైస్ స్క్రీన్స్ బ్యానర్‌పై సాహు గారపాటి, పెద్ది హరీష్ నిర్మిస్తున్నారు. ఇప్పటికే ఈ చిత్రం నుంచి విడుదలైన పోస్టర్లు, పాటలు, టీజర్‌కు ప్రేక్షకుల నుంచి విపరీతమైన స్పందన వచ్చింది. దీంతో సినిమాపై అంచనాలు భారీగా పెరిగిపోయాయి. ఇక, ఇందులో నరేష్, జగపతిబాబు, నాజర్ తదితరులు కీలక పాత్రలు పోషిస్తున్నారు.