Devara: జపాన్‌లో దేవర రిలీజ్.. ఆ సినిమానే ఎన్టీఆర్ టార్గెటా?

ఇండియన్ బాక్సాఫీస్ వద్ద సంచలన విజయం సాధించిన దేవర చిత్రం మరోసారి కలెక్షన్ల సునామీని సృష్టించేందుకు రెడీ అవుతున్నది. కొరటాల శివ దర్శకత్వంలో యంగ్ టైగర్ ఎన్టీఆర్, జాన్వీ కపూర్ జంటగా నటించిన ఈ చిత్రం జపాన్‌లో రిలీజ్‌కు సిద్దమవుతున్నది. ఇప్పటి వరకు ఎన్టీఆర్ నటించిన సినిమాలకు జపాన్‌లో మంచి స్పందన లభించింది.

అయితే ఈ సినిమా పట్ల జపాన్ ఆడియెన్స్ ఇంట్రెస్ట్ చూపిస్తుండటంతో అక్కడ రిలీజ్ చేయాలని ప్లాన్ చేశారు. ఈ సినిమాను ప్రమోట్ చేయడానికి ఎన్టీఆర్ ఆ దేశంలో పర్యటించేందుకు కూడా రెడీ అవుతున్నట్టు సమాచారం. ఈ సినిమాకు సంబంధించిన జపాన్ రిలీజ్ వివరాలు, అలాగే ఎన్టీఆర్ ప్రమోష్సన్ వివరాల్లోకి వెళితే..

దేవర చిత్రాన్ని యువసుధ ఆర్ట్స్, ఎన్టీఆర్ ఆర్ట్స్ బ్యానర్‌పై నందమూరి కల్యాణ్ రామ్, మిక్కిలేనేని సుధాకర్, హరికృష్ణ కే నిర్మించారు. ఈ చిత్రంలో సైఫ్ ఆలీ ఖాన్, ప్రకాశ్ రాజ్ తదితరులు కీలక పాత్రల్లో నటించారు. సెప్టెంబర్ 27వ తేదీన ఈ సినిమా ప్రేక్షకుల ముందుకు వచ్చింది. ఈ సినిమాలో నటించిన వారు, పనిచేసిన వారి రెమ్యునరేషన్లతోపాటు ఇతర ఖర్చులు కలిపి ఈ సినిమా బడ్జెట్ సుమారుగా 400 కోట్ల రూపాయలు అయిందని ట్రేడ్ వర్గాలు వ్యక్తం చేశాయి.

ఇండియన్ బాక్సాఫీస్ వద్ద దేవర భారీ వసూళ్లను సాధించింది. ఏపీ, తెలంగాణలో ఈ సినిమా 240 కోట్ల గ్రాస్ వసూళ్లను రాబట్టింది. కర్ణాటకలో 40 కోట్ల గ్రాస్, తమిళనాడులో 11 కోట్ల రూపాయలు, కేరళలో 2.5 కోట్లు, హిందీలో 82 కోట్లు, ఓవర్సీస్‌లో 77 కోట్ల రూపాయల గ్రాస్ వసూళ్లను రాబట్టింది. దాంతో మొత్తంగా ఈ సినిమా 450 కోట్లు వసూలు చేసింది.

అయితే ఎన్టీఆర్‌కు జపాన్‌లో ఉన్న క్రేజ్ చూసిన తర్వాత దేవర విడుదల చేసేందుకు ప్లాన్ చేశారు. ఈ సినిమాకు సంబంధించిన ప్రమోషనల్ వర్క్స్ మొదలయ్యాయి. ఇటీవల ఎన్టీఆర్, అక్కడ చేపట్టిన ప్రమోషన్స్ నిర్వాహకులతో ఆన్‌లైన్‌లో మీటింగ్ ఏర్పాటు చేసి వారితో చర్చించారు. ఆ మీటింగ్‌కు సంబంధించిన ఫోటోలు సోషల్ మీడియాలో వైరల్ అయ్యాయి. త్వరలోనే ఈ సినిమాను జపాన్‌లో రిలీజ్ చేసేందుకు రెడీ అవుతున్నారు.

ఇదిలా ఉండగా, ఎన్టీఆర్, రాంచరణ్ కలిసి నటించిన RRR చిత్రానికి జపాన్ ఆడియెన్స్ నుంచి భారీ స్పందన లభించింది. ఈ చిత్రం జపాన్ బాక్సాఫీస్ వద్ద 121 కోట్ల రూపాయలు వసూలు చేసింది. ఈ రికార్డుపై దేవర గురిపెట్టినట్టు తెలుస్తున్నది. జపాన్ రిలీజ్ తర్వాత ఈ సినిమా భారీ వసూళ్లు చేస్తుందని ట్రేడ్ వర్గాలు అంచనా వేస్తున్నారు. త్వరలోనే ఎన్టీఆర్ జపాన్‌లో పర్యటించి తన సినిమా ప్రమోషన్స్ చేస్తారని పేర్కొంటున్నారు.