పుష్ప ఐటమ్ సాంగ్... చక్కని చుక్క కోసం సుక్కూ ఆరాటం

టాలెంటెడ్ డైరెక్టర్ సుకుమార్ సినిమాలో ఐటమ్ సాంగ్ అంటే, ఓ రేంజ్ లో ఉండాల్సిందే. జనాలపై అంతగా ఆ పాటలు ప్రభావం చూపుతున్నాయి అంటే, దానికి వెనుక సుకుమార్ విజన్ ఏ విధంగా ఉంటుందో అర్ధం చేసుకోవచ్చు. ఇక సుక్కూ, బన్నీ కాంబినేషన్ లో వస్తున్న పుష్ప కోసమూ ఓ రేంజ్ లోనే అరేంజ్ మెంట్స్ జరుగుతున్నాయని తెలుస్తోంది.

సుకుమార్, అల్లు అర్జున్ కాంబినేషన్ లో వచ్చిన ఆర్య, ఆర్య 2లో ఐటమ్ సాంగ్స్ వల్లే ఆల్బమ్ హిట్ అయిన సంగతిని అంత తేలిగ్గా మరచిపోలేం. ఆ పాటలు అంతగా అలరించాయి. ఇక పుష్పలోనూ ఓ అదిరిపోయే ఐటమ్ సాంగ్ ఉంటుందని ప్రత్యేకించి చెప్పుకోనక్కరలేదు. అయితే దీని కోసం ఓ సుందరాంగిని వెతికిపట్టుకునే పనిలో పడ్డారు చిత్ర యూనిట్.

దేవిశ్రీ స్వరాలకు, బన్నీ స్టెప్పులకు మ్యాచ్ అయ్యే విధంగా ఓ చక్కని చుక్కను వెతికిపట్టుకునే పనిలో ప్రస్తుతం పుష్ప టీమ్ తలమునకలైందని తెలుస్తోంది. సూపర్ పెప్పీ గా ఉండనున్న ఈ పాట, ఆల్బమ్ కే హైలైట్ గా మారబోతోందని వినికిడి. అందుకే, ఓ స్టార్ హీరోయిన్ ను రంగంలోకి దించాలని భావిస్తున్నారు.

ఇక ఈ సినిమాలో అల్లు అర్జున్ ఓ లారీడ్రైవర్ గా కనిపించబోతున్నాడన్న సంగతి తెలిసిందే. అబ్బాయితో రొమాన్స్ చేసేందుకు ఇప్పటికే కన్నడ కస్తూరి రష్మిక మందనను ఫైనలైజ్ చేశారు. మరి బన్నీ ఎనర్జీకి మ్యాచ్ అయ్యే ఐటమ్ గర్ల్ ఎక్కడ ఉందో, ఎప్పుడు దిగుతుందో చూడాలి.