రామ్ పోతినేనిపై పోటీకి సీనియర్ హీరో రెడీ: ఎనర్జిటిక్ స్టార్ వర్సెస్ కోలీవుడ్ స్టార్

ఈ మధ్య కాలంలో వరుస విజయాలను అందుకుంటూ దూసుకుపోతున్నాడు ఉస్తాద్ రామ్ పోతినేని. ఈ క్రమంలోనే ప్రస్తుతం కోలీవుడ్ డైరెక్టర్ లింగుసామీతో ఓ సినిమాను చేయబోతున్నాడు. ఇటీవలే పూజా కార్యక్రమాలు జరుపుకున్న ఈ చిత్రం.. అతి త్వరలోనే ప్రారంభం కాబోతుంది. దీంతో ఈ సినిమా గురించి ఎన్నో ఊహాగానాలు ఫిలిం నగర్ ఏరియాలో తెగ వైరల్ అవుతున్నాయి. దీంతో ఈ ప్రతిష్టాత్మక ప్రాజెక్టుపై ప్రేక్షకుల్లో అంచనాలు పెరుగుతున్నాయి. ఇలాంటి పరిస్థితుల్లో ఇందులో విలన్‌గా నటించబోయే యాక్టర్ గురించి ఓ న్యూస్ బయటకు వచ్చింది.

లింగుసామీ - రామ్ పోతినేని కాంబినేషన్‌లో వస్తున్న ఈ సినిమా తెలుగు, తమిళ భాషల్లో రూపొందనున్న విషయం తెలిసిందే. అందుకోసం రెండు భాషల్లో పరిచయం ఉన్న నటీనటులను తీసుకోవాలని చిత్ర యూనిట్ భావిస్తోంది. ఇందులో భాగంగానే ఈ సినిమాలో విలన్‌గా చేసే నటుడిపై బాగా ఫోకస్ చేశారు. తాజా సమాచారం ప్రకారం.. రామ్ నటిస్తోన్న ఈ సినిమాలో కోలీవుడ్ సీనియర్ హీరో మాధవన్ ప్రతి నాయకుడిగా నటించబోతున్నాడట. ఇప్పటికే అతడు అక్కినేని హీరో నాగ చైతన్య నటించిన 'సవ్యసాచి'లో నెగెటివ్ రోల్ చేసి మెప్పించిన విషయం తెలిసిందే.

యాక్షన్ ఎంటర్‌టైనర్‌గా రూపొందబోతున్న ఈ సినిమాలో రామ్ రెండు విభిన్నమైన పాత్రల్లో నటిస్తున్నాడని ఎఫ్పటి నుంచో ప్రచారం జరుగుతోంది. మరీ ముఖ్యంగా ఇందులో అతడు పవర్‌ఫుల్ పోలీస్ ఆఫీసర్‌గా కనిపిస్తాడని అంటున్నారు. దీంతో ఈ చిత్రంపై బజ్ ఏర్పడింది. ఇక, ఈ మూవీని శ్రీనివాస సిల్వర్ స్క్రీన్ బ్యానర్‌పై శ్రీనివాస చిట్టూరి నిర్మిస్తున్నారు. కృతి శెట్టి హీరోయిన్‌గా నటిస్తుండగా.. సీనియర్ హీరోయిన్ నదియా కూడా కీలక పాత్రను పోషిస్తుందట. దీనికి దేవీ శ్రీ ప్రసాద్ సంగీతం సమకూర్చబోతున్నాడు.