మహేష్‌బాబు ఫ్యాన్స్‌కు శుభవార్త.. దీపావళీ రోజున సరిలేరు నీకెవ్వరు..

దీపావళీ పండుగ నేపథ్యంలో సూపర్ స్టార్ మహేష్ బాబు అభిమానులకు శుభవార్త. సంక్రాంతి బరిలో దూకనున్న సరిలేరు నీకెవ్వరు సినిమా టీజర్‌ను దీపావళీ రోజున అందించాలని చిత్ర యూనిట్ నిర్ణయించింది. ఈ మేరకు సోషల్ మీడియాలో ఓప్రకటన చేయడంతో వైరల్‌గా మారింది. ఈ టీజర్‌‌ను ఎప్పుడెప్పుడు చూడాలని అనిపిస్తున్నదని అభిమానులతోపాటు హీరోయిన్ రష్మిక మందన్న ట్వీట్ చేసింది.

మహేష్ బాబు క్రేజ్‌ను, అనిల్ రావిపూడి స్టయిల్‌లో సరిలేరు నీకెవ్వరూ టీజర్ ఉండబోతుందనే విషయం స్పష్టమవుతున్నది. ఇక ఈ టీజర్ గురించి రష్మిక అప్‌డేట్ ఇస్తూ.. దీపావళీ ట్రీట్‌కు సిద్దంగా ఉన్నారా? మీ కోసం స్పెషల్‌గా సిద్ధమవుతున్నది. మీరంతా ఆ ప్రత్యేకమైన దాని కోసం వేచి చూడండి అంటూ ట్వీట్ చేసింది.

మహేష్ బాబు, రష్మిక మందన్నతోపాటు విజయశాంతి చాలా ఏళ్ల తర్వాత ఈ సినిమా ద్వారా టాలీవుడ్‌లో రీ ఎంట్రీ ఇవ్వనున్నారు. ఇంకా ఈ చిత్రంలో ఆది పినిశెట్టి, ప్రకాశ్ రాజ్, నరేష్, రాజేంద్ర ప్రసాద్, సంగీత, బ్రహ్మనందం, వెన్నెల కిషోర్, ప్రదీప్ రావత్ నటిస్తున్నారు. సినిమాటోగ్రఫి: ఆర్ రత్నవేలు, ఎడిటింగ్: తమ్మిరాజు బాధ్యతలు నిర్వహిస్తున్నారు. ఈ చిత్రాన్ని రామబ్రహ్మం సుంకర, దిల్ రాజు, మహేష్ బాబు సంయుక్తంగా నిర్మిస్తున్న సంగతి తెలిసిందే.