పరశురాంకు మహేశ్ బాబు డెడ్‌లైన్: ‘సర్కారు వారి పాట’ అంత త్వరగా పూర్తి అవుతుందా!

టాలీవుడ్ సూపర్ స్టార్ మహేశ్ బాబు నటిస్తోన్న తాజా చిత్రం 'సర్కారు వారి పాట'. పరశురాం దర్శకత్వంలో ఈ మూవీ రూపొందుతోంది. 'భరత్ అనే నేను', 'మహర్షి', 'సరిలేరు నీకెవ్వరు' వంటి భారీ హిట్ల తర్వాత వస్తున్న ఈ సినిమాపై భారీ అంచనాలే ఉన్నాయి. బ్యాంకుల నుంచి లోన్లు తీసుకుని వేరే దేశాలకు పారిపోతోన్న బడా వ్యాపారవేత్తలను టార్గెట్ చేస్తూ ఈ సినిమాను రూపొందిస్తున్నట్లు చాలా రోజులుగా ప్రచారం జరుగుతోంది. ఇప్పటికే విడుదలైన మోషన్ పోస్టర్‌కు మంచి రెస్పాన్స్ వచ్చింది. ఈ నేపథ్యంలో ఈ చిత్రం గురించి ఓ ఇంట్రెస్టింగ్ న్యూస్ లీకైంది.

ప్రస్తుతం 'సర్కారు వారి పాట' షూటింగ్ హైదరాబాద్ శివారు ప్రాంతమైన శంకరపల్లిలో జరుగుతోంది. రెండు రోజుల క్రితమే ప్రారంభమైన ఈ షెడ్యూల్ దాదాపు 20 రోజుల పాటు జరగనుందని తెలుస్తోంది. ఇందుకోసం అక్కడ ఓ ప్రత్యేకమైన సెట్‌ను కూడా నిర్మించారు. అందులోనే కీలక నటీనటులపై ముఖ్యమైన సన్నివేశాలను చిత్రీకరించబోతున్నారని అంటున్నారు. అలాగే, ఓ పాటను కూడా ప్లాన్ చేసినట్లు తెలుస్తోంది. కరోనా వైరస్ ప్రభావం అంతకంతకూ పెరిగిపోతోన్న నేపథ్యంలో ఈ మూవీ షూటింగ్‌కు చాలా తక్కువ మంది సిబ్బందిని తీసుకెళ్తున్నారనే టాక్ వినిపిస్తోంది.

తాజా సమాచారం ప్రకారం.. 'సర్కారు వారి పాట' విషయంలో దర్శకుడు పరశురాంకు మహేశ్ బాబు డెడ్‌లైన్ విధించాడట. దీని బట్టి ఈ సినిమాను జూలై నాటికి పూర్తి చేయాలని చెప్పాడని తెలిసింది. ఆ వెంటనే పోస్ట్ ప్రొడక్షన్ పనులు ప్రారంభించాలని కూడా వెల్లడించినట్లు గుసగుసలు వినిపిస్తున్నాయి. ఇదిలా ఉండగా.. ఈ ప్రతిష్టాత్మక చిత్రాన్ని మైత్రీ మూవీ మేకర్స్, 14 రీల్స్ ఎంటర్‌టైన్‌మెంట్స్ సంస్థలతో పాటు మహేశ్ స్వయంగా నిర్మిస్తున్నాడు. ఇందులో కీర్తి సురేష్ హీరోయిన్‌గా నటిస్తోంది. థమన్ దీనికి సంగీతం సమకూర్చుతున్నాడు. 2022 సంక్రాంతికి ఇది విడుదల కానుంది.