మామాఅల్లుళ్ళ స్టైలిష్ వీడియో బయటపెట్టిన దగ్గుబాటి రానా

రియల్ లైఫ్ మామా అల్లుళ్లు విక్టరీ వెంకటేష్, యువ సామ్రాట్ నాగ చైతన్య కలిసి నటిస్తున్న సినిమా 'వెంకీ మామ'. ప్రస్తుతం ఈ సినిమా షూటింగ్ శరవేగంగా జరుగుతోంది. చిత్రంలో వెంకటేష్ సరసన పాయల్ రాజ్‌పుత్ హీరోయిన్‌గా నటిస్తుండగా, నాగ చైతన్య సరసన రాశి ఖన్నా హీరోయిన్‌గా నటిస్తోంది. సురేష్ ప్రొడక్షన్స్ బ్యానర్‌పై రూపొందుతున్న ఈ సినిమాకు డైరెక్టర్ బాబీ (కె ఎస్ రవీంద్ర) దర్శకత్వం వహిస్తున్నారు. దగ్గుబాటి సురేష్ బాబు నిర్మాతగా వ్యవహరిస్తున్నారు. తమన్ సంగీతం అందిస్తున్నారు.

తాజాగా ఈ సినిమాకు సంబంధించి మేకింగ్‌ వీడియో విడుదలైంది. దర్శకుడు కేఎస్‌ రవీంద్ర(బాబీ) పుట్టినరోజు సందర్భంగా ఈ వీడియోను విడుదల చేశారు. మేకింగ్ వీడియోను హీరో రానా తన ట్విటర్‌ లో పోస్ట్‌ చేస్తూ బాబీకి పుట్టిన రోజు శుభాకాంక్షలు తెలిపారు. ఈ వీడియోలో వెంకీ,నాగ్ చైతన్య స్టైలిష్ లుక్స్ చూస్తుంటే.. వెండితెరపై వారి హంగామా మామూలుగా ఉండదని తెలుస్తోంది. ఈ మల్టీస్టారర్ సినిమా పట్ల ప్రేక్షకుల్లో ఇప్పటికే మంచి క్రేజ్ నెలకొంది.

ఇక ఇటీవలే వెంకీ మామ కథాంశానికి సంబందించిన ఓ ఆసక్తికర వార్త బయటకు వచ్చింది. ఫిలిం నగర్ సర్కిల్స్‌లో వినిపిస్తున్న టాక్ ప్రకారం.. ఈ సినిమాలో నాగ చైతన్య బాగా కష్టాలొస్తాయట. ఆ కష్టాలన్నీ తన మామ వెంకటేష్ వల్లనే ఉత్పన్నమవుతాయట. అయితే వాటి నుంచి బయటపడే క్రమంలో నాగ చైతన్య జ్యోతిష్యుల చుట్టూ తిరగాల్సి వస్తుందట. ఈ నేపథ్యంలో ఆసక్తికర సన్నివేశాలతో సినిమా సాగిపోతుందని అంటున్నారు. ఆడియన్స్‌ని ఫుల్లుగా ఎంటర్‌టైన్ చేసే కామెడీ సన్నివేశాలు ఉంటాయని తెలుస్తోంది. చిత్రంలో వెంకటేష్, నాగ చైతన్య మామ అల్లుళ్లుగానే నటిస్తున్నారు.