Drishyam Movie: హాలీవుడ్‌లో దృశ్యం రీమేక్.. ఇప్పటి వరకు ఎన్ని భాషల్లో వచ్చిందంటే?

మలయాళ సూపర్ హిట్ ఫిల్మ్ దృశ్యం గురించి అందరికీ తెలిసిందే. అద్భుతమైన కథాంశంతో వచ్చి అందరినీ ఆకట్టుకున్న ఈ సినిమా ఇప్పుడు హాలీవుడ్ లో సందడి చేసేందుకు సిద్ధం అవుతుంది. ఇంగ్లీష్ లో కూడా ఈ సినిమాను రీమేక్ చేయబోతున్నట్లు తెలుస్తోంది. ప్రముఖ హాలీవుడ్ చిత్ర నిర్మాణ సంస్థ ఇంగ్లీష్, స్పానిష్ లలో ఈ చిత్రాన్ని తెరకెక్కించబోతున్నట్లు తాజాగా ప్రకటించింది. హాలీవుడ్ లో రీమేక్ కాబోతున్న తొలి భారతీయ చిత్రంగా దృశ్యం రికార్డుకు ఎక్కబోతుంది. ఈ వివరాలు ఏంటో మనం ఇప్పుడు తెలుసుకుందాం.

మలయాళ స్టార్ హీరో మోహన్ లాల్, మీనా ప్రధాన పాత్రల్లో వచ్చిన ఈ సినిమాను జీతూ జోసెఫ్ తెరకెక్కించాడు. ముందుగా మలయాళ భాషలో మాత్రమే తెరకెక్కిన ఈ చిత్రం బ్లాక్ బస్టర్ హిట్ గా నిలిచింది. సినిమా బాగుండడంతో.. ముఖ్యంగా ఫ్యామిలీ థ్రిల్లర్ నేపథ్యంలో రావడంతో ఈ సినిమాను చూసే వారి సంఖ్య పెరిగింది. కేవలం మలయాళంలో మాత్రమే కాకుండా ఈ సూపర్ హిట్ సినిమాను తెలుగులోకి తీసుకు వచ్చారు. అయితే తెలుగులో మాత్రం మోహన్ లాల్ కు బదులుగా వెంకటేషన్ నటించారు. ఇలా ఇక్కడ కూడా ఈ సినిమా హిట్ అయింది.

ఆ తర్వాత తమిళం, కన్నడ, హిందీ, సింహలేసే, చైనీస్ భాషల్లో రీమేక్ చేయడం.. అక్కడ కూడా ఈ సినిమా సెన్సేషన్ క్రియేట్ చేయడంతో పార్ట్ 2ని తీసుకు వచ్చారు. అలా దృశ్యం 2 కూడా బాక్సాఫీసు వద్ద భారీ వసూళ్లు రాబట్టుకుంది. అయితే ఈ సినిమా వచ్చిన ఇంతకాలానికి మరో అద్భుతమైన రికార్డును క్రియేట్ చేసింది. ముఖ్యంగా పదేళ్ల తర్వాత ఈ చిత్రాన్ని ఇంగ్లీష్ లోనూ రీమేక్ చేసేందుకు ముందుకు వచ్చారు. కేవలం ఇంగ్లీష్ లోనే కాకుండా స్పానిష్ భాషలో కూడా ఈ చిత్రాన్ని రీమేక్ చేయనున్నట్లు తెలుస్తోంది.

తాజాగా హాలీవుడ్ లోనూ ఈ దృశ్యం సినిమాను ప్రకటించబోతున్నట్లు చెప్పారు. హాలీవుడ్ లో ప్రసిద్ధి చెందిన గల్ఫ్ స్ట్రీమ్ పిక్చర్స్, మరో నిర్మాణ సంస్థతో కలిసి ఈ దృశ్యం సినిమాను ఇంగ్లీష్ వాళ్లకు అందరించబోతున్నారు. ఇండియన్ సినిమా నిర్మాణ సంస్థ పనోరమ స్టూడియోస్ నుంచి ఈ సినిమా అంతర్జాతీయ రీమేక్ హక్కులను ఆ సంస్థ సొంతం చేసుకుంది.

ఇప్పటికే ఈ సినిమాలు ఇండోనేషియా, కొరియన్ భాషల్లో రీమేక్ అవుతున్నాయి. ప్రస్తుతం ప్రొడక్షన్ పనులు చేసుకుంటోంది. మరి హాలీవుడ్ లో ఈ సినిమాలో ఎవరెవరు నటించబోతున్నారనేది మాత్రం ఇంకా తెలియదు. హాలీవుడ్ లో రీమేక్ అవుతున్న తొలి భారతీయ చిత్రం ఇదే కావడం గమనార్హం.