బాలకృష్ణ రూల‌ర్‌ అప్‌డేట్.. ప్రీ రిలీజ్ వేడుకకు ముహూర్తం ఖరారు!

నందమూరి బాలకృష్ణ హీరోగా నటిస్తున్న కొత్త సినిమా 'రూలర్'. కె.ఎస్‌.ర‌వికుమార్ ద‌ర్శ‌క‌త్వంలో రూపొందుతోన్న ఈ చిత్రానికి సి.క‌ల్యాణ్ నిర్మాత‌గా వ్యవహరిస్తున్నారు. బాలకృష్ణ సరసన సోనాల్ చౌహాన్, వేదిక హీరోయిన్లుగా నటిస్తున్నారు. ఎప్పటి నుంచో షూటింగ్ జరుపుకుంటున్న ఈ సినిమా చివ‌రి ద‌శ‌ షూటింగ్‌లో ఉంది.

గతంలో బాలకృష్ణ- కెఎస్ రవికుమార్ కాంబినేషన్‌లో వచ్చిన జైసింహా సూపర్ డూపర్ హిట్ కావడంతో 'రూలర్' సినిమాపై భారీగా అంచనాలు పెట్టుకున్నారు ప్రేక్షకులు. డిసెంబర్ 20వ తేదీన ఈ సినిమా ప్రేక్షకుల ముందుకు రానుంది. ఈ నేపథ్యంలో ఈ సినిమా ప్రీ రిలీజ్ ఈవెంట్ ఘనంగా నిర్వహించాలని ప్లాన్ చేస్తోందట చిత్రయూనిట్. ఈ మేరకు డిసెంబ‌ర్ 15న ప్రీ రిలీజ్ ఈవెంట్ కోసం ముహూర్తం ఫిక్స్ చేశారనేది ఇన్‌సైడ్ టాక్.

ఇప్పటికే రూలర్ సినిమా నుంచి విడుదలైన లుక్స్, టీజర్ భారీ రెస్పాన్స్ తెచ్చుకోవడంతో ఈ సినిమాపై ఓ రేంజ్ అంచనాలు క్రియేట్ అయ్యాయి. పైగా ఈ చిత్రంలో బాలయ్యబాబు యంగ్ లుక్‌లో దర్శనమీయనుండటం నందమూరి అభిమానుల్లో ఆసక్తి రేకెత్తిస్తోంది. అలాగే బాలయ్య బాబు రెండు డిఫరెంట్ షేడ్స్ ఉన్న పాత్రలు పోషిస్తున్నారని మరో సమాచారం అందరిలో ఆత్రుత పెంచుతోంది. చిరంత‌న్ భ‌ట్ సంగీతం అందించిన ఈ చిత్ర పాటలను అతి త్వ‌ర‌లోనే విడుద‌ల చేయనున్నారు.

బాలకృష్ణ 105వ సినిమాగా రాబోతున్న ఈ సినిమాపై మొదటి నుంచే పెద్ద ఎత్తున రూమర్స్ పుట్టుకొస్తున్నాయి. టైటిల్ మొదలుకొని హీరోయిన్ల వరకూ రకరకాల వాదనలు వినిపించారు. చివరకు బాలకృష్ణ రెమ్మ్యూనరేషన్ విషయంలోనూ రూమర్స్ పుట్టించడంతో చివరకు నిర్మాత సి.క‌ల్యాణ్ దీనిపై క్లారిటీ ఇచ్చారు.