నయనతారను వెంటాడుతున్న చిక్కులు.. కోర్టు కేసుల వరకూ వెళ్లింది

వరుసగా లేడీ ఓరియెంటెడ్ సినిమాలు

లేడీ సూపర్ స్టార్ గా పేరు తెచ్చుకున్న నయనతార సౌత్ సినీ ఇండస్ట్రీలోని అందరూ అగ్ర హీరోలతో కలిసి నటించింది. అయితే ఈ మధ్య కాలంలో ఆమె మనసు లేడీ ఓరియెంటెడ్ సినిమాలపై పడినట్లుగా తెలుస్తోంది. ఈ నేపథ్యంలో ఇటీవలే ఐరా సినిమాతో ప్రేక్షకులను పలకరించిన ఈమె ప్రస్తుతం 'కోలైయుతీర్ కలాం' సినిమాలో లీడ్ రోల్ పోషిస్తోంది.

కోలైయుతీర్ కలాం మూవీ

బిల్లా 2 ఫేం చక్రి తోలేటి దర్శకత్వంలో రూపుదిద్దుకుంటున్న సినిమా కోలైయుతీర్ కలాం. థ్రిల్లర్‌ కథాంశంతో తెరకెక్కుతున్న ఈ సినిమాలో మరో హీరోయిన్ భూమిక కీలక పాత్రలో కనిపించనుంది. ఇటీవలే విడుదల చేసిన ఈ సినిమా ట్రైలర్‌ ప్రేక్షకుల నుంచి భారీ స్పందన తెచ్చుకుంది. కాగా తమిళ రచయిత సుజాతా రంగరాజన్‌ నవల ఆధారంగా కోలైయుతీర్ కలాం సినిమా తీసినట్లు తెలిసింది.

ఇంతలో అనుకోని చిక్కులు

ఈ సినిమాను జూన్‌ 14న విడుదల చేయాలని ప్లాన్ చేశారు. కానీ ఇంతలో అనుకోని చిక్కుల్లో పడిన ఈ సినిమా చివరకు కోర్టు దాకా వెళ్లింది. సుజాతా రంగరాజన్‌ నవల హక్కుల్ని 10 లక్షల రూపాయలకు సుజాతా రంగరాజన్‌ భార్య నుంచి కొనుగోలు చేశానని దర్శకుడు బాలాజీ కుమార్‌ ఆరోపణ తీసుకొచ్చాడు. ఇది కాపీ రైట్స్‌ను ఉల్లంఘించడమని పేర్కొంటూ.. ఈ సినిమా విడుదల చేయకుండా చర్యలు తీసుకోవాలని మద్రాసు హైకోర్టులో పిటిషన్‌ వేశాడు.

వివరణ కోరిన కోర్టు

బాలాజీ కుమార్‌ ఆరోపణను పరిశీలించిన కోర్టు 'కోలైయుతీర్ కలాం' సినిమా విడుదల ఆపేయాలని ఉత్తర్వులు జారీ చేసింది. అలాగే ఈ నెల 21న చిత్ర నిర్మాతలు దీనిపై వివరణ ఇవ్వాలని కోర్టు ఆదేశించింది. కెరీర్ షైనింగ్ లో దూసుకుపోతున్న తరుణంలో నయనతారకు వస్తున్న చిక్కులు సినీ సర్కిల్స్ లో హాట్ అవుతున్నాయి. గతంలో ఈమెపై రాధారవి చేసిన ఆరోపణలు సంచలనం సృష్టించగా.. ఇప్పుడు కోలైయుతీర్ కలాం మూవీ నయన్‌కి కాస్త ఇబ్బంది కలిగిస్తోంది.