ప్రధాని మాట పాటిద్దాం.. పవన్ కళ్యాణ్ సందేశం వైరల్

కరోనాను కట్టడి చేసేందుకు ప్రధాని నరేంద్ర మోడీ జనతా కర్ఫ్యూ అనే కాన్సెప్ట్‌ను ప్రవేశపెట్టిన సంగతి తెలిసిందే. ఈ ఆదివారం (మార్చి 22) ప్రజలెవరూ బయటకు రాకుండా ఎవరికి వారు స్వీయ నిర్భందాన్ని విధించుకోవడమే జనతా కర్ఫ్యూ. ఇప్పటికే ఈ కాన్సెప్ట్‌పై విస్తృత ప్రచారాన్ని కల్పిస్తున్నారు. అందరికీ ఈ విధానం గురించి వివరించడని, ఆ రోజు ఎవ్వరూ కూడా బయటకు వెళ్లొద్దని, తెలిసిన వారందరికీ చెప్పండని ప్రధాని సూచించారు.

ఈ మేరకు జనతా కర్ఫ్యూ గురించి బాలీవుడ్ ప్రముఖులు విస్తృత ప్రచారం నిర్వహిస్తున్నారు. అక్షయ్ కుమార్, అమితాబ్, షాహిద్ కపూర్ వంటి హీరోలు వీడియో సందేశం ద్వారా ప్రజలకు అవగాహన కల్పిస్తున్నారు. ఈ క్రమంలో పవన్ కళ్యాణ్ సైతం ముందడుగు వేశాడు. ప్రధాని నిర్ణయానికి తన మద్దతు తెలుపుతున్నట్టు ప్రకటించి సందేశాన్ని పంపాడు.

ప్రధాని మాట పాటిద్దాం-కరోనా విముక్త భారతాన్ని సాధిద్దాం అంటూ స్లోగన్‌ను ప్రచారం చేస్తున్నాడు పవన్ కళ్యాణ్. ప్రతీ ఒక్కరూ ఈ కార్యక్రమంలో పాల్గొనాలని, ప్రధాని చెప్పినట్టుగా ఆ రోజు ఉదయం 7 గంటల నుంచి రాత్రి 9 గంటలకు వరకు ఎవ్వరూ బయటకు రాకూడదని సూచించాడు. ఇలా చేస్తే కరోనా మహమ్మారిని కట్టడి చేసే అవకాశముందని తెలిపాడు. కాబట్టి ప్రజలంతా ప్రధాని సూచనలను పాటించాలని పిలుపునిచ్చాడు.