హోమ్

లేటేస్ట్ న్యూస్

పూరీ జగన్నాథ్ తెరకెక్కించిన 'ఇస్మార్ట్ శంకర్' నుంచి ఎనర్జిటిక్ స్టార్ రామ్ పోతినేని ఫుల్ జోష్‌లో కనిపిస్తున్నాడు. దీని తర్వాత 'రెడ్'తో మరో హిట్‌ను తన ఖాతాలో వేసుకున్న ఈ ఉస్తాద్ హీరో.. ఆ ఉత్సాహంతోనే మరో సినిమాను లైన్‌లో పెట్టుకున్నాడు. ఈ చిత్రాన్ని కోలీవుడ్ డైరెక్టర్ లింగుసామీ తెరకెక్కించబోతున్నాడు. ఈ సినిమాకు సంబంధించిన పూజా కార్యక్రమాలు కూడా ఎప్పుడో పూర్తయ్యాయి. షూటింగ్ మొదలవుతుంద అనుకున్న సమయంలోనే కరోనా రెండో దశ వచ్చింది. దీంతో అది కాస్తా వాయిదా పడిపోయింది. ఈ నేపథ్యంలో దీనిపై తాజాగా ఓ న్యూస్ లీకైంది.

తాజా సమాచారం ప్రకారం.. రామ్ పోతినేని - లింగుసామీ కాంబినేషన్‌లో వస్తున్న ఈ సినిమా రెగ్యూలర్ షూటింగ్ జూలై 12 నుంచి ప్రారంభం కాబోతుందట. ఈ విషయాన్ని చిత్ర యూనిట్ తాజాగా వెల్లడించింది. ఈ మేరకు సోషల్ మీడియాలో 'బిగ్ న్యూస్.. రామ్ కొత్త సినిమా షూటింగ్ జూలై 12 నుంచి ప్రారంభం కాబోతుంది. మరిన్ని వివరాల కోసం వేచి ఉండండి' అని పేర్కొన్నారు. దీంతో ఉస్తాద్ హీరో ఫ్యాన్స్ ఫుల్ ఖుషీ అవుతున్నారు. ఇక, ఈ మూవీ ఫస్ట్ షెడ్యూల్ హైదరాబాద్‌లోని ఓ ప్రముఖ స్టూడియోలో ప్రారంభం కాబోతుందని తెలుస్తోంది. పర్మీషన్ వచ్చిన తర్వాత విదేశీ షెడ్యూళ్లను ప్లాన్ చేస్తారని సమాచారం.

పూర్తి స్థాయి మాస్ యాక్షన్ ఎంటర్‌టైనర్‌గా రూపొందుతోన్న ఈ సినిమా.. తెలుగు, తమిళ భాషల్లో తెరకెక్కనుంది. ఇందులో రామ్ పోతినేని డుయల్ రోల్ చేస్తున్నాడని జోరుగా ప్రచారం జరుగుతోంది. అంతేకాదు, అందులో ఒక పోలీస్ పాత్ర కూడా ఉందని అంటున్నారు. ఎంతో ప్రతిష్టాత్మకంగా రాబోతున్న ఈ సినిమాను శ్రీనివాస సిల్వర్ స్క్రీన్ బ్యానర్‌పై శ్రీనివాస చిట్టూరి భారీ బడ్జెట్‌తో నిర్మిస్తున్నారు. దీనికి దేవీ శ్రీ ప్రసాద్ సంగీతం అందిస్తున్నాడు. ఇందులో 'ఉప్పెన' బ్యూటీ కృతి శెట్టి హీరోయిన్‌గా నటిస్తోంది.