‘ఆచార్య’లో సంగీతది గెస్ట్ రోల్ కాదట: బయటకు వచ్చిన సర్‌ప్రైజింగ్ న్యూస్

టాలీవుడ్ టాప్ హీరో మెగాస్టార్ చిరంజీవి ప్రధాన పాత్రలో టాలీవుడ్ బడా డైరెక్టర్ కొరటాల శివ తెరకెక్కిస్తోన్న చిత్రం 'ఆచార్య'. దేవాదాయ భూముల ఆక్రమణల నేపథ్యంతో సందేశాత్మకంగా రూపొందుతోన్న ఈ సినిమాలో మెగా పవర్ స్టార్ రామ్ చరణ్ కూడా నటిస్తున్నాడు. ఎంతో ప్రతిష్టాత్మకంగా రాబోతున్న ఈ సినిమాపై భారీ అంచనాలే ఉన్నాయి. అందుకు అనుగుణంగానే దీన్ని హై లెవెల్ యాక్షన్ అండ్ ఫ్యామిలీ ఎంటర్‌టైనర్‌గా తీస్తున్నారు. తాజాగా ఈ సినిమాలోని సంగీత పాత్ర గురించి ఓ సర్‌ప్రైజింగ్ న్యూస్ ఫిలిం నగర్ ఏరియాలో విపరీతంగా చక్కర్లు కొడుతోంది.

కొద్ది రోజుల క్రితం 'ఆచార్య' మూవీ నుంచి లాహే లాహే అంటూ సాగే ఓ పాట విడుదలైన విషయం తెలిసిందే. ఇందులో సీనియర్ హీరోయిన్ సంగీత తళుక్కున మెరిసింది. దీంతో ఈ చిత్రంలో ఆమె నటిస్తుందా? లేక ఈ పాటకే పరిమితమైందా అని చర్చలు సాగాయి. తాజా సమాచారం ప్రకారం.. ఇందులో సంగీతం అత్యంత కీలకమైన ధర్మస్థలి నర్తకి పాత్రను పోషిస్తుందట. ఎంతో హైలైట్‌గా ఉండే ఈ రోల్.. ఇంటర్వెల్‌కు ముందు జరిగిన ఓ యాక్షన్ సీన్‌లో చనిపోతుందని తెలుస్తోంది. కానీ, ఉన్నంత వరకూ ఆమె అద్భుతమైన యాక్టింగ్‌తో మెస్మరైజ్ చేస్తుందనే టాక్ గట్టిగానే వినిపిస్తోంది.

భారీ బడ్జెట్.. ఉన్నత విలువలతో రూపొందుతోన్న 'ఆచార్య' షూటింగ్ కొంత భాగం చిత్రీకరణ జరగాల్సి ఉంది. అది ఈ నెల చివర్లోనే వచ్చే నెల ఆరంభంలోనే జరుగుతుందని తెలుస్తోంది. అది అయిన వెంటనే పోస్ట్ ప్రొడక్షన్ పనులు ప్రారంభించి.. వీలైనంత త్వరగా దీన్ని ప్రేక్షకుల ముందుకు తీసుకు రావాలని ప్రయత్నాలు జరుపుతున్నారట. ఇక, ఈ సినిమాను కొణిదెల ప్రొడక్షన్స్, మ్యాట్నీ ఎంటర్‌టైన్‌మెంట్ బ్యానర్లు నిర్మిస్తున్నాయి. కాజల్ అగర్వాల్, పూజా హెగ్డే ఇందులో హీరోయిన్లుగా చేస్తోన్నారు. ఈ సినిమాకు మెలోడీ కింగ్ మణిశర్మ సంగీతం సమకూర్చుతున్నాడు.